Mose 1; Aperaamo 3

Tusi le fuaitau O ai Au? i luga o le laupapa. Valaaulia tagata aoga e faamatala mai auala eseese e mafai ona latou taliina ai le fesili lenei. Mafaufau e tusi a latou tali i luga o le laupapa.

• E mafai faapefea e auala ua e faailoaina ai oe lava ia ona aafia ai lou olaga ma filifiliga e te faia?

Faamalamalama atu a o talanoa ai ma le Alii, sa aoaoina e Mose upumoni taua e uiga i lona tagata. (Atonu foi e taua le faailoa atu e faapea i le Mose 1, o loo fetalai Iesu Keriso e fai ma sui o le Tama Faalelagi. O le pule e tautala ai mo le Tama Faalelagi lea e ta’ua o le tuuina atu paia o le pule [tagai “Mose 1:2–8. O ai na fetalai atu ia Mose?” Fesoasoaniga mo Mau: Feagaiga Tuai]).

Valaaulia tagata aoga e faitau le Mose 1:1–11 ma mafaufau e faailoga mea na aoaoina e Mose ma pe faapefea ona faatatau nei upumoni ia i latou lava.

• O a upumoni na aoao e Mose e uiga ia te ia lava e mafai ona fesoasoani tatou te malamalama ai pe o ai moni lava oe? (E mafai ona faasoa mai e tagata aoga upumoni e pei o nei: O a’u o se atalii po o se afafine o le Tama Faalelagi. Na te silafia lo’u igoa, ma e i ai Sana galuega mo a’u e fai.)

• E mafai faapefea e le talitonu i nei upumoni ona aafia ai lou mafaufau e uiga ia te oe lava? E mafai faapefea ona aafia ai le ala e te vaai atu ai i isi? E mafai faapefea ona aafia ai le ala e te vaai atu ai i le Atua?

Ina ia fesoasoani i tagata aoga ia malamalama lelei i le taua o lo latou faasinomaga o ni fanau a le Atua, talanoaina faatasi le saunoaga lenei a Peresitene Russell M. Nelson:

Ou te talitonu ana faapea o loo fetalai tuusao atu le Alii ia te oe i le po nei, o le mea muamua lava Na te faamautinoa ua e malamalama i ai o lou faasinomaga moni. A’u uo pele, o outou moni lava o fanau agaga a le Atua. Sa outou pepese lava i lenei upumoni talu ina outou iloa upu o le “O le Atua lo’u Tama” [Viiga, no.184]. Ae pe ua tusia ea lena upumoni e faavavau i lou loto? Pe na laveaiina ea oe e lenei upumoni ina ua e fetaiai ma se faaosoosoga?

Ou te popole lava i lo outou faalogo soo i lenei upumoni ua foliga mai ua na o se faaupuga nai lo o se upumoni paia. Ae, o le auala e te mafaufau ai po o ai moni oe e aafia ai toetoe o faaiuga uma e te faia. (“Filifiliga mo le Fa’avavau” [faigalotu i le lalolagi atoa mo talavou matutua, Me 15, 2022], Potutusi a lGospel Library)

• O le a se mea e tulaga ese ia te oe mai aoaoga a Peresitene Nelson? Aiseā?

• Aisea e te manatu ai o le manatuaina o lou faasinomaga o se atalii/afafine o le Atua e aafia ai toetoe lava o faaiuga uma o le a e faia?

E mafai ona e fai atu i tagata aoga e mafaufau i se taimi na uunaia ai e le malamalama i lo latou faasinomaga moni o se atalii/afafine o le Atua se faaiuga na latou faia. Valaaulia ni nai tagata aoga e faasoa mai ni o latou aafiaga. E mafai foi e tagata aoga ona mafaufau i se faaiuga e tatau ona latou faia—i le taimi nei po o le lumanai—ma tusifaamaumau pe faapefea e upumoni na latou aoaoina i lenei aso ona aafia ai lena faaiuga. Uunaia i latou e faatino o latou uunaiga faaleagaga.

Manatua: E faalagolago lava i le auala e atiina ae ai la outou talanoaga, atonu e fesoasoani le faasino atu o le auala na faamalosia ai Mose, a o ia fetaiai ma Satani, e faamalosia i le iloaina o lona faasinomaga moni o se atalii o le Atua (tagai Mose 1:13). E mafai ona outou suesueina faatasi le Mose 1:12–22 ma valaaulia tagata aoga e faasoa mai pe na faapefea ona fesoasoani le malamalama o Mose i lona faasinomaga paia ia te ia.

Toe foi i le “Filifiliga o Gaoioiga e Aoao Ai.”

Mafaufau e talanoa faatasi le faamatalaga lenei a Peresitene Russell M. Nelson:

O le taua ma le agasala e moni. Ua matuā faateleina e le tiapolo ana taumafaiga e faavaivaia molimau ma taotaomia le galuega a le Alii. O loo ia faaauupegaina ana au i meatau malolosi e taofia ai i tatou mai le mauaina o le olioli ma le alofa o le Alii. (“E Mafai Ona Tatou Faia Ia Lelei Atu ma Ia Tatou Lelei Atu,” Liahona, Me 2019, 68)

• O a nisi o “meatau malolosi” o loo faaaogaina e Satani e faasagatau ai i talavou matutua i aso nei? (Mafaufau e fai se lisi o tali a tagata aoga i luga o le laupapa.)

Valaaulia tagata aoga e mafaufau i a latou lava taumafaiga patino e faatoilalo faaosoosoga a Satani. Uunaia i latou e saili le taitaiga mai le Agaga Paia e faailoa mai ai upumoni e mafai ona fesoasoani ia i latou e maua ai le malosi sili atu e aloese ai ma tetee atu i faaosoosoga.

Faamanatu i tagata aoga a o talanoa faafesagai Mose ma le Alii, sa ia aoaoina o ia o se atalii o le Atua ma e i ai se galuega a le Atua mo ia e fai (tagai Mose 1:1–11). Ina ua mavae lenei aafiaga paia, “sa alu ane Satani ma faaosooso ia te ia” (Mose 1:12).

Valaaulia tagata aoga e suesue le Mose 1:12–24, ma vaavaai mo mea na faia e Mose e faatoilalo ai faaosoosoga a Satani. E mafai foi ona e uunaia i latou e gauai atu i le eseesega na matauina e Mose i le va o le Alii ma Satani. (Mo nisi manatu e uiga i le auala e fesoasoani ai i tagata aoga e faaaoga lenei tomai, tagai i le “Taula’i Atu i Eseesega i Mau,” i le Tomai mo Suesuega o Tusitusiga Paia.)

Fai atu fesili e pei o fesili nei e valaaulia ai tagata aoga e faasoa mai mea na latou aoaoina mai nei fuaiupu:

• O a ni mea na e maua i nei fuaiupu e ono mafai ona fesoasoani ia te oe pe a feagai ma faaosoosoga? (E mafai ona e aoteleina tali a tagata aoga e ala i le tusia o se upumoni e pei o lenei i luga o le laupapa: E mafai ona tatou maua le fesoasoani a le Atua e faatoilalo ai faatosinaga a Satani pe a tatou malamalama ma manatua lo tatou faasinomaga o ni fanau a le Atua, toe manatua aafiaga faaleagaga ua tuanai, ma valaau atu i le Atua mo le malosi.)

• O a isi auala e mafai ona tatou faaaogaina ai le mana o le Atua e faatoilalo ai faatosinaga a Satani? (E mafai ona e valaaulia tagata aoga e sue mau po o faamatalaga mai taitai o le Ekalesia e fesoasoani e tali ai lenei fesili. O faataitaiga o na mau e aofia ai le 1 Nifae 15:23–24; Helamana 5:11–12; ma le Mataupu Faavae ma Feagaiga 10:5.)

Mafaufau e valaaulia ni nai tagata aoga e faasoa mai mea na fesoasoani ia i latou e aloese ai ma tetee atu i faaosoosoga a Satani. (Faamalamalama i tagata aoga e le tatau ona latou faasoa mai ni aafiaga e patino tele.)

Valaaulia tagata aoga e mafaufau pe faapefea e upumoni na latou suesueina ona fesoasoani ia i latou e faatoilalo ai o latou lava faaosoosoga. Uunaia i latou e faatu ma tusifaamaumau se sini e faavae i mea na latou aoaoina ma soo se uunaiga faaleagaga atonu na latou maua mai le Agaga Paia.

Toe foi i le “Filifiliga o Gaoioiga e Aoao Ai.”

Mafaufau e faaali atu le ata lenei ma talanoaina le fesili lenei:

• O a ni ou lagona po o ni fesili na e maua a o e mafaufau i foafoaga tetele a le Atua?

Faamalamalama atu a o talanoa faafesagai Mose ma le Alii, sa faaali atu ia te ia se faaaliga vaaia o foafoaga a le Alii. Valaaulia tagata aoga e suesue le Mose 1:27–30, ma vaavaai mo mea na faaali atu e le Alii ia Mose ma le auala na tali atu ai Mose.

• O a fesili na fesili atu ai Mose i le Alii ina ua uma ona vaai i lenei faaaliga vaaia ofoofogia? (Mafaufau e tusi fesili e lua a Mose mai le fuaiupu e 30 i luga o le laupapa.)

Valaaulia tagata aoga e suesue i le Mose 1:31-39, ma vaavaai pe na faapefea ona tali e le Alii fesili a Mose. (E mafai foi e tagata aoga ona faaaoga faamatalaga e faatatau i nei fuaiupu i le Fesoasoaniga mo Mau: Feagaiga Tuai ina ia malamalama lelei ai i aoaoga a le Alii ia Mose.)

Valaaulia tagata aoga e faasoa atu mea na latou aoaoina faatasi ma se paga po o se vaega toalaiti. E mafai ona e fa’aali atu fesili nei mo i latou e talanoaina.

• O le a se mea na e aoaoina pe lagonaina e uiga i le Tama Faalelagi ma Iesu Keriso ao e suesueina nei fuaiupu?

• E faapefea e afioga a le Alii i le faaiuga o le fuaiupu e 35 ona faatatau ia te oe?

• E mafai faapefea e le manatuaina o le galuega ma le mamalu o le Tama Faalelagi (tagai i le fuaiupu 39) ona faatosinaina au faaiuga ma au fegalegaleaiga ma isi?

A uma le talanoaga a tagata aoga, valaaulia nisi e faasoa mai a latou malamalama’aga i isi o le vasega. Afai e manaomia, fesoasoani ia i latou e faailoa mai nisi o upumoni nei mai nei fuaiupu: I lalo o le taitaiga a le Tama Faalelagi, na foafoaina ai e Iesu Keriso lalolagi e le mafaitaulia. E ui lava o i tatou o se vaega o le anoanoai o foafoaga, ae e silafia e le Alii i tatou taitoatasi. O faamoemoega o le Tama Faalelagi o le aumaia lea o lo tatou tino ola pea ma le ola e faavavau.

Mafaufau e faasoa atu le faamatalaga lenei a Elder Dieter F. Uchtdorf:

Tatou te si’i a’e o tatou leo i viiga o lo tatou Atua agalelei ma le lotofaamagalo. … O le faamoemoega musuia o Ana galuega uma o le fesoasoani lea ia i tatou, o Ana fanau, ia manuia ia tatou sailiga mo le tino ola pea ma le ola e faavavau. (“Toefuataiga i Aso Taitasi,” Liahona, Nov. 2021, 79)

Valaaulia tagata aoga e mafaufau pe talanoaina auala o loo galue malosi ai le Alii e fesoasoani ia i latou ia faamanuiaina i la latou sailiga mo le ola e faavavau. E mafai foi ona e valaaulia i latou e mafaufau pe faapefea ona latou faipaaga atoatoa ma le Alii e fesoasoani ai i Lana galuega ma le mamalu ia faataunuuina, mo i latou lava ma mo isi. Uunaia i latou e tusifaamaumau ni uunaiga faaleagaga atonu na latou maua mai le Agaga Paia.

Toe foi i le “Filifiliga o Gaoioiga e Aoao Ai.”

Valaaulia tagata aoga e mafaufau loloto i le valaaulia lenei mai ia Sister Wendy W. Nelson: “Vaai faalemafaufau i le aafiaga i lou olaga i le taimi nei pe afai e faatagaina oe e matamata i le 10 minute o lou olaga i le muai olaga” (“Hope of Israel,” [faigalotu a le autalavou i le lalolagi atoa, 3 Iuni, 2018], Gospel Library).

• Afai e mafai ona e vaai ia te oe lava i le muai olaga, o a ni mea patino e te faamoemoe e aoao e uiga ia te oe lava?

• O le a se eseesega e te manatu e mafai ona faia e lenei mea i lou olaga?

Faamalamalama atu e faapea, o le Aperaamo 3 o loo tusifaamaumauina ai le faaaliga vaaia a Aperaamo o le muai olaga. Valaaulia tagata aoga e saili le taitaiga a le Agaga a o latou suesue e fesoasoani ia i latou ia malamalama lelei po o ai i latou ae latou te lei o mai i le lalolagi.

Suesue faatasi le Aperaamo 3:22–28. Valaaulia tagata aoga e vaavaai mo mea na aoaoina e Aperaamo e uiga i fanau agaga a le Atua i le muai olaga. (E mafai foi ona e valaaulia tagata aoga e suesue ia faamatalaga mo nei fuaiupu i Fesoasoaniga mo Mau: Feagaiga Tuai.)

Mafaufau e fai atu fesili e pei o nei e fesoasoani ai i tagata aoga e faasoa mai mea na latou mauaina:

• O a ni mea na e aoaoina e uiga i le muai olaga mai nei fuaiupu? (Faatasi ai ma isi upumoni, e mafai e tagata aoga ona faailoa mai e faapea Na filifilia e le Atua Ana fanau agaga “tamalii ma ta’uta’ua” ae latou te lei fananau mai e avea ma taitai i Lona malo i le lalolagi.)

• E te manatu e faapefea ona faauigaina e le Alii le “tamalii ma ta’uta’ua”?

Ina ia fesoasoani i tagata aoga ia malamalama o i latou o nisi o i latou na filifilia i le muai olaga e faataunuu ni tiutetauave patino i le lalolagi, faasoa atu le saunoaga lenei a Elder Steven R. Bangerter. (E mafai foi ona e matamata i se vaega o lana lauga “Mua’i Faau’uina e Auauna Atu” mai le faailo taimi 2:13 i le 5:28.)

11:30

Ae tou te le’i fananau mai, na tofia outou taitoatasi e le Atua e faataunuu ni misiona patino i le taimi o lo outou olaga faaletino i luga o le fogaeleele. Afai e tumau lo outou agavaa, o faamanuiaga o lena tulafono i le muai olaga o le a mafai ai ona outou maua ituaiga uma o avanoa i lenei olaga, e aofia ai avanoa e auauna atu ai i le Ekalesia ma auai i le faatinoga o le galuega aupito taua o loo tupu i le lalolagi i aso nei: o le faapotopotoina o Isaraelu. O na folafolaga ma faamanuiaga i le muai olaga ua ta’ua o lo outou muai faauuina. “O le aoaoga faavae o le muai faauuina e faatatau i tagata uma o le Ekalesia” [Autu ma Fesili, “Muai Faauuga,” Gospel Library]. O le mua’i faau’uina e le faapea ua mautinoa ai o le a outou maua ni valaauga po o ni tiutetauave faapitoa. O nei faamanuiaga ma avanoa e oo mai i lenei olaga o se taunuuga o lo outou faaaogaina ma le amiotonu o le faitalia, e pei lava ona oo mai lo outou mua’i faau’uina i lo outou muai olaga o se taunuuga o le amiotonu. (“Mua’i Faau’uina e Auauna Atu,” Liahona, Me 2024, 57)

Tuu atu i tagata aoga e faasoa mai se mea na tūmātila ia i latou mai le faamatalaga. E mafai foi ona e uunaia i latou e faataitai le aoaoina e le tasi o le isi i le uiga o le muai faauuina ma le mafuaaga e taua tele ai lenei aoaoga faavae.

Ina ia faaiu, e mafai ona e tuuina atu i tagata aoga se taimi e mafaufau loloto ai ma le agaga tatalo ma tusifaamaumau o latou manatu e uiga i se fesili se tasi pe sili atu o fesili nei:

• Pe o faatagaina a’u e a’u filifiliga e faataunuu tiutetauave ua tuuina mai e le Alii ia te a’u pe finagalo e tuuina mai ia te a’u?

• E mafai faapefea ona ou mulimuli i le faataitaiga a Iesu Keriso ma faataunuu le galuega ua filifilia a’u e le Atua e fai?

• O le a se mea e mafai ona ou faia e manatua ai ua silafia a’u e le Tama Faalelagi ma ua filifilia a’u?

Toe foi i le “Filifiliga o Gaoioiga e Aoao Ai.”