1 Samuelu 17–18; 24–26; 2 Samuelu 5–7

Mafaufau e tusi Tavita i le tasi itu o le laupapa ma Koliata i le isi itu. E mafai ona e faaali atu le ata mai le amataga o le lesona ma valaaulia tagata aoga e tusi i itu taitasi o le laupapa faamatalaga latou te manatua e uiga i le mea na taitai atu ai i le taua i le va o Tavita ma Koliata. (Afai e manaomia, e mafai e tagata aoga ona suesue faapuupuu i le 1 Samuelu 17:1–25 mo auiliiliga.)

Faailoa atu e faapea e mafai ona tatou aoaoina upumoni taua mai le tala ia Tavita ma Koliata lea e mafai ona fesoasoani i tofotofoga tatou te feagai. Valaaulia tagata aoga e mafaufau e uiga i se tofotofoga o loo latou feagai i le taimi nei. Uunaia i latou a o latou suesue i lenei aso e gauai atu i uunaiga mai le Agaga Paia e mafai ona fesoasoani ia i latou e tali atu ai i o latou lu’itau faatasi ma le fesoasoani a le Alii.

Valaaulia tagata aoga e faitau le 1 Samuelu 17:26, 32–37, ma vaavaai pe na faapefea ona tali atu Tavita ina ua ia faalogo i taufaamata’u a Koliata agai atu i le autau a Isaraelu. Ona mafaufau lea e fai atu fesili e pei o nei:

• O le a se mea na e maua i nei fuaiupu e atagia ai le faatuatua o Tavita i le Atua?

• O a nisi o upumoni ua tatou aoaoina e uiga i le Alii mai le tali a Tavita? (E mafai e tagata aoga ona faailoa mai se upumoni faapenei: A o tatou faalagolago atu i le Alii, o le a Ia fesoasoani ia i tatou e feagai ma o tatou luitau.)

Valaaulia tagata aoga e faitau le 1 Samuelu 17:38–51 ma faailoga auala na faalagolago ai Tavita i le Alii. A uma se taimi talafeagai, e mafai ona e fai atu i tagata aoga e faasoa atu lo latou malamalama’aga i se paga po o ni vaega toalaiti. E mafai foi ona latou talanoaina fesili nei:

• O le a le matafaioi na faia e le sootaga a Tavita ma le Alii i lona manumalo?

• O a nisi o auala e mafai ona tatou faaalia ai tatou te faalagolago i le Alii pe a tatou feagai ma luitau?

Valaaulia ni nai tagata aoga e faasoa mai o latou malamalama’aga mai a latou talanoaga i le vasega. Ona mafaufau lea e fai atu le fesili lenei:

• O anafea na fesoasoani ai le faalagolago i le Alii i ou luitau ia te oe e iloa ai Lana fesoasoani? (I le avea ai ma se vaega o lenei talanoaga, e mafai ona e faaali atu se vitio mai le tuufaatasiga o le “His Grace”, e pei o le “I Didn’t Feel Good Enough, But I Was Enough for God” [5:08].)

  

  5:9

Valaaulia tagata aoga e toe mafaufau i le luitau patino sa latou mafaufau i ai i le amataga o le gaoioiga e aoao ai. Faamanatu atu ia i latou na filifili e Tavita ni maa se lima e sauni ai e fetaiai ma Koliata. Fautuaina i latou e tusi i lalo ni auala se lima e mafai ona latou faalagolago ai i le Alii a o latou feagai ma o latou luitau patino.

E mafai ona e faaiu i le faasoa atu o le molimau lenei mai ia Sister Andrea Muñoz Spannaus o le Au Peresitene Aoao o Tamaitai Talavou:

O loo naunau mai Keriso tatou te malaga faatasi i le malaga o o tatou olaga. … O le a Ia taialaina oe, ma o le a Iaa’oa’oina oe. O Lona aao lava, o le a mafai ai ona e faatoilaloina Koliata uma e alia’e mai i lou olaga. (“Faamaoni e oo i le Iuga,” Liahona, Me 2024, 61)

Toe foi i le “Filifiliga o Gaoioiga e Aoao Ai.”

E mafai ona e tusia e pei o finauga, ita, ma le lotoleaga i luga o le laupapa. Fesili atu i tagata aoga e mafaufau i le taimi mulimuli na latou oo ai i se tasi o nei lagona. Ona fai atu lea o fesili e pei o lenei:

• Aisea e mafai ai i nisi taimi ona faigata ona aloese mai ai i nei lagona?

Uunaia tagata aoga a o latou suesue i lenei aso e mafaufau loloto i mea e mafai ona latou aoao mai ia Tavita ma Saulo lea e mafai ona fesoasoani ia i latou i tulaga fefinauai latou te feagai i o latou olaga.

Faamalamalama atu ina ua uma ona faatoilaloina e Tavita ia Koliata, sa tuu e le Tupu o Saulo ia Tavita e vaaia lana autau. Mulimuli ane, sa oo ina lotoleaga Saulo i le manuia o Tavita ma taumafai pea lava pea e aveese le ola o Tavita. Ina ia fesoasoani i tagata aoga e aoao mai fegalegaleaiga i le va o Tavita ma Saulo, e mafai ona e tufa atu le pepa e tufa atu “Aoao mai le Tala ia Tavita ma Saulo.” Valaaulia tagata aoga e faamaea le gaoioiga muamua po o le lona lua o le pepa e tufa atu faatasi ma se paga po o se vaega toalaiti. Atonu e aoga le tuu atu i tagata aoga e tofi se toatasi i totonu o vaega taitasi e avea ma taitai o talanoaga.

A ua lava loa se taimi na tuu atu i tagata aoga e faamaea ai a latou vaega o le pepa e tufa atu, valaaulia i latou e faasoa mai le upumoni na latou maua i le vasega. O faataitaiga o na upumoni e aofia ai mea nei: Pe a tatou lotoleaga pe ita, ua tatou faatagaina le fili ia i ai ni faatosinaga i o tatou olaga. O le a faatasi le Alii ma i tatou a o tatou taumafai e amio ma le poto i tulaga fefinauai. Ona o le Alii o se faamasino atoatoa, tatou te le saili e tauimasui ia i latou o e na faia ni mea sese ia i tatou.

E mafai foi ona e faasoa atu ma talanoaina le saunoaga lenei a Peresitene Russell M. Nelson:

O le asō o le a ou talosagaina ai i tatou e fegalegalea’i ma isi i se ala maualuga atu ma sili ona pa’ia. …

O finauga e tata’iese ai le Agaga—i taimi uma. O finauga e saga faamalosia ai manatu sese faapea o le fevataua’i o le ala lea e fo’ia ai eseesega; ae e leai lava. O finauga o se filifiliga. O le faatupuina o le filemu o se filifiliga. Ua ia te oe lau faitalia e filifili ai ia finauga po o le faaleleiga. Ou te uuna’ia outou ia filifili e avea ma sē e faatupuina le filemu, i le taimi nei ma aso uma. (“Ua Manaomia i Latou e Faatupuina le Filemu,” Liahona, Me 2023, 99-100)

Mafaufau e talanoaina ia fesili nei:

• O a ni aoaoga po o ni faataitaiga mai le soifuaga o Iesu Keriso e mafai ona fesoasoani ia i tatou e tali atu ai ma le talafeagai i feteenaiga tatou te feagai?

• Na faapefea ona faamanuiaina oe e tagata na filifili e faatupuina le filemu?

Fautuaina tagata aoga e mafaufau loloto i o latou olaga ma sootaga. Valaaulia i latou e fatu se fuafuaga e tali lelei atu ai i tulaga fefinauai latou te ono oo i ai. Fautuaina i latou e tatalo mo le fesoasoani a le Alii e faatoilalo ai finauga po o lagona o le ita po o le lotoleaga.

Toe foi i le “Filifiliga o Gaoioiga e Aoao Ai.”

Mafaufau e fesili atu i tagata aoga e mafaufau i se tasi latou te iloa e faamanatu atu ai ia i latou le Faaola i soo se auala. Tuu atu i tagata aoga i ni vaega po o se paga e faasoa mai se faamatalaga o lena tagata, e aofia ai se ata pe afai latou te mananao ai. E mafai ona latou talanoaina nisi o fesili nei:

• O le a le mea e uiga i lenei tagata e faamanatu atu ai ia te oe le Faaola?

• O a ni auala ua faamanuiaina ai oe e ala i a latou amioga?

Faamatala atu e faapea o le 1 Samuelu 25 o loo i ai le tala i se feteenaiga na tulai mai i le va o Tavita ma se tagata e igoa ia Napalu. I lenei tala, e mafai ona vaai ia Apikaila o se faataitaiga mamana o se faatusa poo se faailoga o Iesu Keriso. O se nofoaga aoga lenei e faaaoga ai le tomai o le “Taula’i Atu ia Iesu Keriso i Tusitusiga Paia” i le Tomai o Suesuega o Tusitusiga Paia.) Valaaulia tagata aoga a o latou suesueina lenei tala e mafaufau ai i auala e faamanatu atu ai e Apikaila ia i latou ia Iesu Keriso.

Ina ia fesoasoani i tagata aoga ia malamalama i le talaaga e faatatau i lenei tala, e mafai e oe po o se tagata aoga ona faasoa mai le aotelega lenei:

Ina ua mavae le maliu o le perofeta o Samuelu, sa sosola Tavita ma ana tagata i le vao e sosola ese mai le Tupu o Saulo, o le sa manao e fasioti Tavita. I lo latou taimi i le vao, sa puipuia ai e Tavita ma ana tagata ia lafu ma mamoe a se tagata mauoa e igoa ia Napalu, o le sa faaipoipo ia Apikaila. Mulimuli ane, sa manaomia e Tavita ma ana tagata ni meaai ma ni sapalai ma fesili atu ia Napalu mo se fesoasoani. Ae peitai, sa faalumaina e Napalu ia Tavita ma musu e ofo atu soo se fesoasoani. Sa tigā ai Tavita ma saunia ana tagata e osofaia Napalu ma lona aiga. Ina ua iloa e Apikaila le feteenaiga i le va o Tavita ma lona toalua, sa vave ona ia galue e fesoasoani e aumai le filemu.

Valaaulia tagata aoga e faitau le 1 Samuelu 25:18–35 ma mafaufau i ni auala e faamanatu atu ai ia i latou e faatinoga ma upu a Apikaila ia Iesu Keriso. E mafai ona e faaaogaina se siata e pei o lenei mo tagata aoga e faamaumau ai mea na latou maua. Afai e manaomia e tagata aoga se fesoasoani, valaaulia i latou e suesue le tusiga mo le 1 Samuelu 25 i le Fesoasoaniga mo Tusitusiga Paia : Feagaiga Tuai.

A uma suesuega a tagata aoga, fuafua e fai atu fesili e pei o nei:

• O a nisi o auala e faamanatu atu ai e Apikaila ia te oe ia Iesu Keriso? (A o tali mai tagata aoga, e mafai ona latou faailoa mai upumoni e uiga i le Faaola e pei o lenei: E mafai e Iesu Keriso ona fesoasoani ia i tatou e faamagalo atu ia i latou o e faatiga ia i tatou.)

Ina ia fesoasoani i tagata aoga ia malamalama atili i lenei upumoni, mafaufau e faasoa atu le saunoaga lenei a Sister Kristin M. Yee o le Au Peresitene Aoao o le Aualofa:

E pei lava ona naunau ia Apikaila e tauave le agasala a Napalu i ona lava luga, sa faapena foi le Faaola—i se ala e faigata ona malamalama i ai—na Ia tauave ai i Ona luga a tatou agasala ma agasala a i latou e faatiga ma faatausuai ia i tatou. I Ketesemane ma luga o le satauro, sa Ia tauave ai nei agasala. Sa Ia faia se ala mo i tatou e faamaamulu ese ai se loto tauimasui. O lena “ala” o le faamagalo atu—lea e mafai ona avea o se tasi o mea sili ona faigata tatou te faia, ma o se tasi o mea sili faalelagi tatou te mauaina. I luga o le ala o le faamagalo atu, o le mana togiola o Iesu Keriso e mafai ona tafe mai i o tatou olaga ma amata ai ona faamaloloina tiga o le loto ma le agaga. (“Matagofie e Sui A’i le Lefulefu: O Le Ala Faamalōlō o le Faamagaloga,” Liahona, Nov. 2022, 37)

• Aisea e ono faigata ai pe le mafai foi i nisi taimi ona faamagalo se tasi na faatiga ia i tatou?

Valaaulia tagata aoga e vaai faalemafaufau faapea latou te iloa se tasi o loo i ai se taimi faigata e faamagalo atu ai i se isi tagata. Tuu atu ia i latou se taimi e su’e ai se mau se tasi pe sili atu poo saunoaga mai taitai o le Ekalesia e mafai ona fesoasoani i lena tagata e faamagalo atu. A mae’a galuega a tagata aoga, valaaulia i latou e faasoa atu mea na latou maua ma se paga po o vaega toalaiti. E mafai foi ona e tuu atu i ni nai tagata aoga e faasoa mai a latou mau po o faamatalaga i le vasega.

Ina ia fesoasoani i tagata aoga e aoao e uiga i faataitaiga i ona po nei o Iesu Keriso o loo fesoasoani i tagata ia faamagalo atu, mafaufau e faaali atu le “Faamagaloga pe a uma ona Faalataina o se Faagasologa” [5:21] po o le “Pe O Le a Faaatoatoaina Oe?” (mai le faailotaimi 5:49 i le 7:44).

5:20

9:38

Valaaulia tagata aoga e mafaufau i soo se manatu ma uunaiga na latou maua i le asō e mafai ona fesoasoani ia i latou i o latou olaga patino. Fautuaina i latou e tusi i lalo fuafuaga e tatau ona latou faatinoina po o uunaiga faaleagaga na latou maua mai le Agaga Paia.

Toe foi i le “Filifiliga o Gaoioiga e Aoao Ai.”