Esoto 1–6

Mafaufau e faasoa atu le saunoaga lea a Peresitene Russell M. Nelson.

O soo moni o Iesu Keriso ua loto e tutu atu, tautatala atu, ma ia ese mai i tagata o le lalolagi. E le fefefe i latou, ae tuuto ma lototetele. (“Mauaina o le Mana o Iesu Keriso i o Tatou Olaga,” Liahona, Me 2017, 40–41)

Valaaulia tagata aoga e faasoa mai ni faataitaiga o tulaga o loo feagai ma i latou po o isi talavou matutua lea e manaomia ai i latou e “tutu atu, tautatala atu, ma ia ese ai” mai isi tagata. Uunaia i latou e mafaufau pe na faapefea ona latou tali atu i tulaga faapenei i le taimi ua tuanai. Valaaulia i latou a o latou suesue i le asō e vaavaai mo upumoni e mafai ona fesoasoani ia i latou e avea ai ma soo lototetele o Iesu Keriso.

Valaaulia ni nai tagata o le vasega e faasoa mai mea latou te iloa e uiga i le mea na tupu i tagata Isaraelu ina ua mavae le maliu o Iosefa o Aikupito. Afai e manaomia, faamalamalama atu ina ua mavae le maliu o Iosefa, sa faatupulaia le aofai o le fanauga a Isaraelu (e ta’ua foi o le au Eperu) i Aikupito. I le fefefe ai nei faateleina le malolosi o tagata Isaraelu, na faapologaina ai i latou e le farao fou (tagai i le Esoto 1:6–14).

Valaaulia tagata aoga e suesue le Esoto 1:15–19 ma faailoa mai se tulaga na tetee ai tagata taitoatasi i faatosinaga amioletonu ma galulue ai ma le lototetele. E ono mafai ona tou talanoaina fesili nei:

• Aiseā na ono faigatā ai iā Pu’a ma Sepela ona lē usiusitai i le faatonuga a Farao?

• O le a sou manatu i le uiga e faapea o faatosaga na “matatau i le Atua”? (Esoto 1:17). Afai e manaomia, tagai i le tusiga mo le Esoto 1:17 i le Fesoasoaniga mo Mau: Feagaiga Tuai.

Valaaulia tagata aoga e faitau le Esoto 1:20–21, ma vaavaai pe na faapefea ona faamanuiaina e le Alii ia Pu’a ma Sepela mo lo la’ua lototetele. Ona mafai lea ona e fai atu i tagata aoga e faasoa mai upumoni ua latou aoaoina mai lenei tala e mafai ona fesoasoani ia i tatou pe a tatou feagai ma faatosinaga amioletonu. O se tasi o upumoni e mafai ona faailoa mai e tagata aoga o lenei: O le a lelei ona taulimaina i tatou e le Alii pe a tatou matata’u ia te Ia ma tetee atu i faatosinaga amioletonu.

• O le a se mea e mafai ona faigata ai ona tetee atu i faatosinaga amioletonu i aso nei?

Fai atu i tagata aoga e vaai faalemafaufau e faapea, latou te iloa se tasi o loo tauivi e tetee atu i faatosinaga amioletonu o loo latou feagai. Tuu atu ia i latou ni nai minute e su’e ai se tasi pe sili atu o punaoa nei e mafai ona fesoasoani:

1. O se mau

2. O se saunoaga mai se taitai o le Ekalesia

3. O se faataitaiga mai le soifuaga o le Faaola

Valaaulia tagata aoga e faasoa mai le punaoa na latou maua i se vaega toalaiti ma faamatala mai pe mafai faapefea ona fesoasoani i se tasi e faatoilalo ai faatosinaga amioletonu.

Mafaufau e valaaulia ni nai tagata aoga e faasoa mai i le vasega pe na faapefea ona faamanuiaina i latou e le Alii mo le faia o le mea sa’o e ui lava i uunaiga atonu o loo latou feagai.

Uunaia tagata aoga e mafaufau loloto ma tusifaamaumau pe mafai faapefea ona latou faaaogaina upumoni ua latou aoaoina i o latou olaga.

Toe foi i le “Filifiliga o Gaoioiga e Aoao Ai.”

E mafai ona e faaali atu se lisi e pei o lenei:

• Fetagofi atu i le faamanatuga

• Malaga i le malumalu

• Mauaina o se faamanuiaga faaleperisitua

• Tatalo faaletagata lava ia

• Suesue i tusitusiga paia

• Auai i le Inisitituti

Valaaulia tagata aoga e faasoa mai mea na latou faia a o lei oo po o le taimi foi o aafiaga o loo lisiina ina ia anoa atili ai. Ona mafai lea ona e fesili atu:

• Aisea e te manatu ai o le faia o nei mea e fesoasoani ia i tatou e maua ai ni aafiaga paia e sili atu ona anoa?

A o latou suesueina le aafiaga lenei mai le soifuaga o Mose, uunaia tagata aoga e vaavaai mo upumoni e mafai ona fesoasoani ia i latou e taulima ai taimi ma nofoaga paia ma le migao.

Mafaufau e faasino atu ina ua uma ona sola ese Mose mai Aikupito, sa nofo o ia i le laueleele o Mitiana. O iina na ia faaipoipo atu ai iā Sepora ma tausia lafu a lona tamā o Ietero. I le taimi lea, sa maua ai e Mose se aafiaga paia lea na faaali atu ai le Alii ia te ia ma valaauina o ia e laveai Isaraelu mai le nofo pologa i Aikupito. A o lei tuuina atu e le Alii ia Mose lona valaauga, sa Ia muai faasoa mai ni faatonuga taua.

Valaaulia tagata aoga e faitau le Esoto 3:1–6, ma vaavaai mo le aafiaga na oo ia Mose i le afioaga o le Atua. Atonu e fesoasoani le faasino atu o le Faaliliuga a Iosefa Samita o le Esoto 3:2 ua suia ai le “agelu a le Alii” i le “afioaga o le Alii” (i le Esoto 3:2, vaefaamatalagaa).

Mafaufau e fai atu fesili e pei o fesili nei e fesoasoani ai i tagata aoga e faasoa mai mea na latou aoaoina:

• O le ā le mea na faia e Mose e faaalia ai le migao i le Atua?

• O le a se mea e mafai ona tatou aoao e uiga i le migao mai le aafiaga o Mose ma le Alii? (E mafai ona faasoa mai e tagata aoga upumoni faapenei: E finagalo le Alii ia tatou faaali atu le migao mo Ia ma Ona nofoaga paia. O le faaalia o le migao i le Alii e saunia ai i tatou ina ia aoaoina e Ia.)

Ina ia fesoasoani i tagata aoga ia malamalama atili i le taua o le migao, mafaufau e faaali atu faamatalaga pupuu nei ma valaaulia tagata aoga e faitau le leoa. (Mo nisi manatu e uiga i le faaaogaina o aoaoga a taitai o le Ekalesia, tagai i le “Faaaogaina o Aoaoga a Taitai o le Ekalesia e Malamalama ai i Mau” i le Tomai mo le Suesueina o Tusitusiga Paia.)

OleLe faaaloalo na te valaaulia faaaliga (Boyd K. Packer, “Reverence Invites Revelation,” Ensign, Nov. 1991, 22)

Migao e tumu i leOlioli ? ‘Se mea moni lena mea?’ atonu e te fesili ai. Ioe, e moni! E loloto lo tatou alolofa, faamamalu, ma faaaloalo i lo tatou Atua, ma e tafe mai lo tatou migao mai se agaga e olioli i le alofa tele, alofamutimutivale, ma le faaolataga o Keriso! (Patrick Kearon, “Susu Maia i le Ekalesia o le Olioli,” Liahona, Nov. 2024, 36).

Pe a e atiina ae se migao loloto mo mea paia, o le a avea le Agaga Paia ma au soa tumau. E te tuputupu a’e i le malamalama ma le upumoni. (D. Todd Christofferson, “A Sense of the Sacred,” New Era, Iuni 2006, 31).

Valaaulia tagata aoga e faasoa mai ni malamalamaaga sa latou maua mai nei faamatalaga. E mafai foi ona fai ni nai fesili e pei o nei:

• O a nisi o faataitaiga o le auala na faaalia ai e Iesu Keriso le migao mo mea paia po o nofoaga i le taimi o Lana galuega i le olaga nei?

• O a nisi o auala e mafai ona e faaalia ai le migao mo le Tama Faalelagi i vaega eseese o lou olaga?

• Na faapefea e le faaalia o le migao mo le Tama Faalelagi ona fesoasoani e saunia ai oe e maua fesootaiga mai ia te Ia?

Valaaulia tagata aoga e mafaufau i ni auala e mafai ona latou faaalia ai le migao sili atu mo le Tama Faalelagi ma Iesu Keriso i o latou olaga. Valaaulia i latou e tusifaamaumau manatu ma uunaiga latou te maua mai le Agaga Paia.

Toe foi i le “Filifiliga o Gaoioiga e Aoao Ai.”

Mafaufau e faasoa atu se vaaiga faataitai e uiga i se talavou matua ua lagona le lē agavaa e faia le galuega a le Alii. E mafai ona e faaaogaina le vaaiga faataitai lenei po o se vaaiga foi e te fatuina.

Sa faateia Nyla ina ua tuuina atu e lona epikopo se valaauga mo ia e auauna atu o se fesoasoani i le au peresitene o le Aualofa. Sa na o le 20 ona tausaga, sa fou o ia i lana uarota, ma sa tauivi o ia ma le popole faaagafesootai. Sa lofituina o ia i ona vaivaiga ma tapulaa. Sa mafaufau o ia, Aisea o le a valaau mai ai le Alii ia te a’u?

Mafaufau e tusi le fasifuaitau lenei mai le Esoto 3:11 i luga o le laupapa:

• O ai a’u, e tatau ai ona ou …?

Fai atu i tagata aoga e faauma lenei fuaiupu e ala i le faasoa mai o mea ua poloaiina i tatou e le Alii e fai e ono foliga mai e sili atu nai lo o tatou gafatia. E mafai ona e lisiina a latou tali i autafa o le fasifuaitau o loo i luga o le laupapa. Uunaia tagata aoga a o latou suesue i le asō e saili mo upumoni e mafai ona fesoasoani ia i latou pe a latou lagonaina le le agavaa e fai le galuega e finagalo le Alii latou te faia.

Mafaufau e faaali atu se ata o Mose. Faamanatu atu i tagata aoga, e ui lava ina avea Mose ma se perofeta maoae o lē na faatinoina vavega maoae faatasi ai ma le fesoasoani a le Alii, ae sa ia lagonaina muamua le lē agavaa ina ua valaauina o ia e le Atua.

Valaaulia tagata aoga e faitau le Esoto 3:7–11, ma vaavaai pe na faapefea ona tali atu Mose ina ua valaauina o ia e le Alii e laveai Isaraelu mai le nofopologa i Aikupito. Valaaulia tagata aoga e faailoga le fesili na fesili atu ai Mose i le Alii i le fuaiupu e 11.

Ina ia fesoasoani i tagata aoga ia iloa pe na faapefea ona taulimaina e le Alii popolega o Mose, mafaufau e faaali atu le siata lenei. Valaaulia tagata aoga e suesue i mau e faatatau i ai ma mafaufau pe mafai faapefea e aoaoga a le Alii ona fesoasoani ia i latou pe a latou lagonaina le lē agavaa e faia le galuega a le Atua.

A uma le taimi na tuuina atu i tagata aoga e suesue ai, valaaulia i latou e faasoa o latou manatu ma se paga po o se vaega toalaiti. E mafai foi ona tou talanoaina faatasi fesili nei o se vasega:

• O le a se mea na e maua i nei fuaiupu e mafai ona fesoasoani ia te oe pe a e lagonaina le lē gafatia po o le lē agavaa e faia le galuega a le Alii? (O se tasi lenei o faataitaiga o se upumoni e ono faailoa mai e tagata aoga: Pe a valaauina i tatou e le Atua i Lana galuega, Na te tuuina mai ia i tatou le mana e faataunuu ai.)

Ina ia fesoasoani i tagata aoga ia malamalama atili i lenei upumoni, mafaufau e faasoa atu le saunoaga lenei a Peresitene Henry B. Eyring ma talanoaina fesili o loo mulimuli mai:

O le a i ai taimi o le a e lagona ai le lofituina. O se tasi o auala o le a osofaia ai oe o le lagona lea o lou le gafatiaina. Ia, e te le gafatia le tali atu i se valaau e fai ma sui o le Atua i na o lou lava malosi. Ae ua mafai ona e sao atu i se isi malosi e sili atu nai lo lou lava malosi, ma e te le o galue na o oe.

O le a faalauteleina e le Alii mea e te tautala ai ma mea e te faia i le vaai a tagata o loo e auauna atu i ai. (“Tulai i Lou Valaauga,” Liahona, Nov. 2002, 76-77)

• O le a se mea ua e aoaoina e uiga i le Alii e ala i au taumafaiga e auauna atu ia te Ia?

• O anafea na e vaai ai i le faamalosia o oe po o isi e le Atua e fai Lana galuega?

  (I le avea ai ma se vaega o lenei talanoaga, mafaufau e faaali atu le “Do You Want to Be Happy?” mai le faailo taimi 4:02 i le 5:36.)

  

  10:21

Uunaia tagata aoga e tusi i lalo soo se uunaiga latou te mananao e manatua mai o latou aafiaga i le vasega. Atonu foi e te manao e faasoa atu lau lava molimau i le gafatia e le Alii e fesoasoani ia i tatou e faataunuu Lana galuega.

Toe foi i le “Filifiliga o Gaoioiga e Aoao Ai.”

E mafai ona tou amata e ala i le faasoa atu o le saunoaga lenei a Peresitene Jeffrey R. Holland.

O le Fa’akerisiano e fa’amafanafana, ae e masani ona lē mafanafana. O le ala i le pa’ia ma le fiafia iinei ma le olaga a sau o se ala umi ma o nisi taimi e gaoā ai. E manaomia ai le taimi ma le finafinau e savalia ai. Ae, o le mea moni, o le taui mo le faia o lena mea e maoa’e lava. (“Fa’atalitali Ai i le Alii,” Liahona, Nov. 2020, 116–17)

Valaaulia tagata aoga e talanoaina faatasi ma se paga fesili nei:

• O le a se mea e mafai ona faigata ai ona avea ma se soo o Iesu Keriso i aso nei?

• Aisea e te manatu ai e matua’i aoga lava le taumafaiga e mulimuli i le Faaola?

Faamanatu i tagata aoga na valaauina Mose e le Alii e faasaoloto le fanauga a Isaraelu mai le nofopologa i Aikupito. E ui ina laveaiina le fanauga a Isaraelu e le Alii, ae sa oo Mose ma lona nuu i le tele o faigata i le ala. Uunaia tagata aoga e vaavaai mo malamalamaaga a o latou suesue i le asō e mafai ona fesoasoani ia i latou pe a latou feagai ma luitau i le mulimuli i le Faaola.

Valaaulia tagata aoga e faitau le Esoto 5:1–2, ma vaavaai pe na faapefea ona tali atu Farao i le talosaga a Mose ma Arona e faasaoloto le fanauga a Isaraelu e o. A uma ona faasoa mai e tagata aoga mea na latou mauaina, ta’u i ai e le gata ina musu Farao e tuu le fanauga a Isaraelu e o, ae sa ia faafaigata foi o latou olaga e ala i le faateleina o a latou galuega (tagai i le Esoto 5:4–19).

Valaaulia tagata aoga e suesue le Esoto 5:20–23, ma vaavaai pe na faapefea ona tali atu Mose ma le fanauga a Isaraelu i le faateleina o le faigata o o latou tofotofoga. Fai i ni nai tagata e faasoa mai mea na latou maua. E mafai foi ona e talanoaina fesili nei:

• O a nisi o faataitaiga o taimi na e lei vaaia ai ni faamanuiaga i le taimi lava lena, e ui lava sa pei na e lagonaina sa e usitai i le Alii?

• Aisea e te manatu ai e faatagaina i tatou e le Alii i nisi taimi e oo i tofotofoga po o faafitauli a o tatou mulimuli ia te Ia?

Valaaulia tagata aoga e faitau le Esoto 6:1–8 ma le 7:1–6, ma vaavaai pe na faapefea ona tali atu le Alii ia Mose ma le fanauga a Isaraelu i o latou tofotofoga. Fai atu ia i latou e fai se lisi o upumoni e le itiiti ifo ma le tolu o loo aoao mai e nei fuaiupu ia i latou e uiga i le Alii. Faamatala atu o le a latou maua se avanoa e faasoa atu ai mea ua latou tusia pe a uma ona latou suesue.

Faaali atu fesili nei ma valaaulia tagata aoga e talanoaina faatasi ma se paga po o se vaega toaitiiti.

• O a ni mea na e aoaoina e uiga i le Alii mai nei fuaiupu?

• E mafai faapefea e le manatuaina o nei mea e uiga i le Alii ona fesoasoani ia te oe pe a e feagai ma faigata i le mulimuli ia te Ia?

A uma ona talanoaina e tagata aoga, mafaufau e valaaulia ni nisi e faasoa mai o latou manatu ma le vasega. E mafai ona latou faailoa mai upumoni e pei o nei: O le Alii e mamana. E manatua ma tausia e le Alii Ana folafolaga. Pe a tatou talitonu i le Alii ma Ana folafolaga, e mafai ona tatou faalagolago ma mulimuli ia te Ia e tusa lava pe tatou te le o vaaia le taunuuga vave.

E mafai ona e faasoa atu le saunoaga lenei a Elder Jörg Klebingat ma talanoaina fesili o loo mulimuli mai:

Ia talia tofotofoga, faafitauli ma “mea e faateia ai” o se vaega o lou aafiaga faaletino. … A oo mai nei tofotofoga, o le a amata ona faasalalau atu e autau a le fili sa e faia se mea sese, ma o se faasalaga lenei, o se faailoga o le le alofa o le Tama Faalelagi ia te oe. Aua e te amanaiaina! Ae, taumafai e fosi se ataata, tepa atu agai i le lagi, ma fai atu, “Ou te malamalama, le Alii e. Ou te iloa lenei mea. O se taimi e faamaonia ai lou lava tagata, e sa’o?” Ona galulue faatasi lea ma Ia ina ia tumau seia oo i le iuga. E faateleina le lototele faaleagaga pe a e taliaina e faapea e “masani ona faatagaina ia tofotofoga ma faigata e oo mai i lou olaga ona o le mea sa’o o loo [e] faia” (Glenn L. Pace, “Crying with the Saints” [Brigham Young University devotional, Dec. 13, 1987], 2; speeches.byu.edu). (“Faalatalata Atu i le Nofoalii o le Atua ma le Lototele,” Liahona, Nov. 2014, 36-37)

• O le a se taimi na e oo ai i ni faafitauli a o e tauivi e usitai i le Atua?

• O le a se mea ua e iloa e uiga ia Iesu Keriso e mafai ona fesoasoani ia te oe e faalagolago ai ia te Ia e tusa lava pe e te oo i luitau?

Valaaulia tagata aoga e mafaufau i mea ua latou aoaoina ma lagonaina mai le Agaga Paia e mafai ona fesoasoani ia i latou i o latou olaga. Fautuaina i latou e tusifaamaumau o latou manatu ma uunaiga faaleagaga.

Toe foi i le “Filifiliga o Gaoioiga e Aoao Ai.”