“O Le Keriso Soifua: O Le Molimau a le Au Aposetolo,” Tusi Lesona a le Faia’oga Inisitituti o le Feagaiga Tuai (2026)

“O Le Keriso Soifua: O Le Molimau a le Au Aposetolo”

Ina ia faamanatuina le soifua mai o le Faaola i le silia ma le lua afe tausaga ua mavae, na tautino mai ai e le Au Peresitene Sili ma le Korama a Aposetolo e Toasefululua la latou molimau ia Iesu Keriso i le “O Le Keriso Soifua: O Le Molimau a le Au Aposetolo.” O lenei tautinoga ua molimau mai ai i le “olaga e le mafaatusalia ma le mamā e le iu o le taulaga togiola tele [a le Alii].”

Uunaia Suesuega Faaletagata Lava Ia

A o lei amataina le vasega, mafaufau e auina atu i tagata aoga se tasi pe sili atu o sāvali nei po o nisi o au oe lava sāvali:

A o amata ona e suesue i le Feagaiga Tuai, faitau le “O Le Keriso Soifua: O Le Molimau a le Au Aposetolo” (Gospel Library). Vaavaai mo upumoni e uiga ia Iesu Keriso e mafai ona fesoasoani ia te oe e lagona ai le alofa sili atu ma le talisapaia o Ia.
Ua fautuaina i tatou e taitai o le Ekalesia ina “ia mautinoa o lo tatou faamanatuina o le mea aupito sili ona taua na tupu i lenei lalolagi—o le Togiola ma le Toetu o Iesu Keriso—e aofia ai le migao ma le faaaloalo e tatau ai i le Alii” (Gary E. Stevenson, “O Le Tala Silisili o le Eseta ua Faamatalaina,” Liahona, Me 2023, 6). Ina ia fesoasoani e taulai atu lou mafaufau ma lou loto ia Iesu Keriso i lenei Eseta, suesue le “O Le Keriso Soifua: O Le Molimau a le Au Aposetolo.” Ia gauai atu i mea ua e aoaoina ma lagona e uiga i le Faaola.
Sa uunaia i tatou e Elder Gerrit W. Gong ina ia “olioli ia Iesu Keriso, i le Kerisimasi ma aso uma” (“Christ, Our Savior, Is Born” [Faigalotu o le Kerisimasi a le Au Peresitene Sili, 3 Tes., 2023], Gospel Library). Faaalu sina taimi e suesue ai i le “O Le Keriso Soifua: O Le Molimau a Aposetolo.” O a ni mea na e aoaoina e mafai ona fesoasoani ia te oe e olioli ai ia Keriso?

Fesili ma Fetufaa’iga

Tuu atu se taimi mo tagata aoga e fai ai fesili ma faasoa mai ni malamalamaaga ma upumoni na latou maua i a latou suesuega faaletagata lava ia o le “O Le Keriso Soifua.”

Aoaoga o Tomai

A o e valaaulia tagata aoga e suesue le “O Le Keriso Soifua” i le taimi o le lesona, atonu e te mafaufau e toe faamanatu le tomai “Taulai atu ia Iesu Keriso i Mau” i Tomai mo le Suesueina o Tusitusiga Paia.

Faaleleia o Lo Tatou Aoao Atu ma le Aoaoina mai

Fatufatu ni fa’atulagaga ma ni avanoa mo tagata a’oao ina ia a’otauina e le Agaga Paia. Talu ai o le Agaga Paia o le faiaoga moni, ia avea lou potuaoga o se faatulagaga e mafai ona afio ai le Agaga. Faamanatu atu i tagata aoga la latou matafaioi i le fatuina o se siosiomaga faaleagaga. Vaavaai mo avanoa e fesoasoani ai i tagata aogo ia iloa le auala e fesootai ai le Agaga ma i latou. Tuuina atu le tele o le taimi i tagata aoga e mafaufau loloto ai ma tusitusi e uiga i mea ua latou aoaoina mai le Agaga Paia.

Gaoioiga e Aoao Ai

E mafai faapefea e le suesueina o le “O Le Keriso Soifua” ona faalolotoina lo’u sootaga ma lo’u Faaola?

Fa’aali atu se ata o Iesu Keriso, e pei o le ata i le amataga o lenei lesona. E mafai foi ona e valaaulia tagata aoga e sue le ata o le Faaola e sili ona latou fiafia i ai. Valaaulia i latou e manatunatu lemu ma tusi se tali patino i se uunaiga e pei o lenei:

O ai Iesu Keriso ia te oe? O a ou manatu, lagona, po o talitonuga e uiga ia te Ia?

Faamanatu i tagata aoga o le aso 1 Ianuari, 2000, na faasoa mai ai e le Au Peresitene Sili ma le Korama a Aposetolo e Toasefululua a latou molimau i le Faaola i le “O Le Keriso Soifua: O Le Molimau a le Au Aposetolo.”

Faamalamalama atu ua uunaia i tatou e taitai o le Ekalesia e suesue i lenei pepa o faamatalaga paia. Mafaufau e faitau faatasi nisi po o faamatalaga uma nei e saunia ai tagata aoga e suesue i le “O Le Keriso Soifua.” Valaaulia tagata aoga e faasoa mai mea e tulagaese ia i latou.

Ua tatou matamata, faalogo, faitau, suesue, ma faasoa atu upu a perofeta ina ia muai lapataiina ma puipuia ai i tatou. Mo se faataitaiga, “O Le Aiga: O Se Folafolaga i le Lalolagi” ua leva ona tuuina mai ae tatou te le i taitai oo i luitau ua feagai nei ma aiga. “O Le Keriso Soifua: O Le Molimau a Aposetolo” ua leva ona tapena mo le taimi o le a sili ona tatou manaomia ai. (Robert D. Hales, “Konafesi Aoao: Faamalosia o le Faatuatua ma le Molimau,“ Liahona, Nov. 2013, 7)

E toatele tagata o le ekalesia ua taulotoina [upumoni o loo i ai i le “O Le Keriso Soifua“]. O isi e tau le iloaina o loo i ai. A o e saili e aoao atili e uiga ia Iesu Keriso, ou te uunaia oe e suesue i le “O Le Keriso Soifua.” (Russell M. Nelson, “Mauaina o le Mana o Iesu Keriso i o Tatou Olaga,” Liahona, Me 2017, 40)

Ao ou suesueina le soifuaga ma aoaoga a Iesu Keriso ma taulai atili ma tautino atu e tauloto le “O Le Keriso Soifua,: sa faateleina lo’u lotofaafetai ma le alofa mo lo tatou Faaola. O fuaiupu taitasi o lena tusiga musuia o loo i ai se lauga ma ua faalauteleina ai lo’u malamalama i Ana matafaioi paia ma le misiona i le lalolagi nei. (Jean B. Bingham, “Ina Ia Atoa Lo Outou Olioli,” Liahona, Nov. 2017, 85)

Ina ia taialaina tagata aoga i a latou suesuega o le “O Le Keriso Soifua,” mafaufau e faaali atu faatonuga nei.

Suesue le, “O Le Keriso Soifua.” Faailoga ia upu po o fasifuaitau e sili ona taua ia te oe.
Sue upumoni mai le “O Le Keriso Soifua” o loo faataitaia i le Feagaiga Tuai pe e faatatau foi i mau o le Feagaiga Tuai. Mo se faataitaiga, o le a se mea e te maua i le “O Le Keriso Soifua” e faatatau i upumoni o loo i fuaitau nei o le Feagaiga Tuai? Kenese 1:1–2, 31 (tagai foi i le Mose 2:1); Iopu 19:25–26; Salamo 9:7–8; Faataoto 3:5–6; Isaia 12:2; 45:23; 53:3–5.
Tusi manatu ma uunaiga e te maua e uiga ia Iesu Keriso a o e suesue.

Ina ia fesoasoani i tagata aoga e aoao mai le tasi i le isi, valaaulia i latou e faasoa o latou manatu i ni vaega toalaiti. E mafai foi ona e valaauliaina i latou e talanoa i fesili nei.

Mafaufau i upumoni na e mauaina e uiga i le Faaola. O le a se mea ua latou fesoasoani ia te oe ia malamalama ai e uiga i le matafaioi e mafai ona Ia faia i lou olaga?
E mafai faapefea ona faamanuiaina oe i le taulai atili atu ia Iesu Keriso i lou olaga?

Ina ia faaiu, valaaulia tagata aoga e mafaufau pe mafai faapefea ona latou faaaogaina le “O Le Keriso Soifua” e fesoasoani ai ia i latou e faamalolosia la latou sootaga ma le Tama Faalelagi ma Iesu Keriso. Tuu atu i tagata aoga se taimi e mafaufau loloto ai ma tusi i lalo uunaiga mai le Agaga Paia atonu na latou maua i le taimi o le lesona.