1 Tupu 12–13; 17–22

Mafaufau e tusi le fesili lenei i luga o le laupapa ma fesili atu i le vasega. E mafai ona e tusiina tali a tagata aoga i luga o le laupapa.

• O a nisi o tulaga le mautonu o feagai ma talavou matutua lea o le a manaomia ai ona latou tuu atu se aofaiga tele o le faalagolago i le Alii?

Valaaulia tagata aoga e mafaufau i tulaga faigata o loo latou feagai ai i le taimi nei, aemaise lava i mea e lagona ai le faigata o le faatuatuaina o le Alii ona latou te le iloa pe o le a faapefea le taunuuga o mea uma. Uunaia i latou a o latou suesue i le asō e vaavaai mo upumoni e mafai ona fesoasoani ia i latou e faalagolago ai i le Alii ma le mautinoa sili atu, e tusa lava pe foliga mai ua le mautonu le lumanai.

Ina ia fesoasoani i tagata aoga ia malamalama i le talaaga mo le 1 Tupu 17, e mafai e oe po o se tamaitiiti aoga ona aotele le faamatalaga i le parakalafa lenei:

Sa soifua le perofeta o Elia i le Malo i Matu o Isaraelu i se taimi o le faateleina o le amioleaga ma le ifo i tupua. Sa ia faaaogaina le mana o le Atua e taofia ai le timu mai le paū, lea na iu ai i le tele o tausaga o le lamala ma le oge. Na saunia e le Alii mea e manaomia e Elia e ala i le faatonuina o ia e lafi i se alia, lea na fafagaina ai o ia e oreva. Ona ta’u atu lea e le Alii ia Elia e alu i le laueleele o Sarefata, lea o le a tausia ai o ia e se fafine ua oti lana tane (tagai 1 Tupu 17:1–9). O le tele o faatinoga a Elia i lenei tala e mafai ona faamanatu faafaatusa ia i tatou e uiga ia Iesu Keriso. (Atonu o se taimi lelei lenei e faailoa ai le tomai o le “Taula’i Atu ia Iesu Keriso i Tusitusiga Paia” i le Tomai mo Suesuega o Tusitusiga Paia.)

Tuu atu i tagata aoga se taimi e suesue ai le 1 Tupu 17:10–24 ma tusifaamaumau a latou tali i fesili nei:

• O le a le mea na fai pe na fai atu e Elia e faamanatu atu ai ia te oe Iesu Keriso?

• O le a se mea ua e aoaoina mai le fafine ua oti lana tane e uiga i le faalagolago i le Alii?

A uma le taimi na tuuina atu i tagata aoga e suesue ai, valaaulia i latou e faasoa a latou tali i nei fesili ma se paga po o se vaega toalaiti. E mafai foi e ni nai tagata aoga naunau ona faasoa mai o latou manatu i le vasega. O se tasi o faataitaiga o se upumoni atonu latou te faailoa mai o lenei: A tatou tuu atu lo tatou faatuatuaga i le Alii, o le a Ia faamanuiaina ma lagolagoina i tatou.

Mafaufau e valaaulia tagata aoga e suesue i nai mau nei: Fai atu ia i latou e faasoa mai upumoni mai nei fuaiupu o loo aoao mai ai le taua o le faalagolago i le Alii. E mafai foi ona latou faasoa mai pe faapefea ona faaalia upumoni o loo aoaoina i fuaitau i le tala ia Elia ma le fafine ua oti lana tane i le 1 Tupu 17.

• Salamo 34:22

• Faataoto 3:5–6

• Ioane 6:35

• Ioane 11:25

• Ioane 14:6

• Alema 36:3

E mafai ona e faasino atu mafaufau o tagata aoga i le lisi na e fatuina i luga o le laupapa i le amataga o le gaoioiga e aoao ai, ona fai atu lea o ni nai fesili e pei o nei:

• O le a se mea e faigata ai ona tuu atu lo tatou faatuatuaga i le Alii i tulaga faapenei?

• O a nisi o auala e mafai ai e tagata ona faaalia lo latou faalagolago i le Alii i nei tulaga?

Valaaulia tagata aoga e faaalu sina taimi e tusi ai e uiga i se taimi na tatau ai ia i latou po o se tasi latou te iloa ona faatuatuaina atoa pe faalagolago i le Alii e aunoa ma le iloaina o le taunuuga. E mafai foi ona latou faamatalaina pe na faapefea ona latou vaai i faamanuiaga a le Alii mai lena aafiaga. Ona mafai lea ona e valaaulia ni nai tagata aoga e faasoa mai o latou aafiaga i le vasega.

Mafaufau e faaali atu se fagu o loo i ai se tamai suauu ma se isi fagu e i ai sina vaega itiiti o le falaoamata. Valaaulia tagata aoga e mafaufau loloto pe mafai faapefea ona latou mulimuli i le faataitaiga a le fafine Sarefata ua oti lana tane ma tuu atu lo latou faalagolago i le Alii i le lotolotoi o tulaga faigata o loo latou feagai. Fautuaina i latou e tusifaamaumau o latou manatu ma uunaiga.

Toe foi i le “Filifiliga o Gaoioiga e Aoao Ai.”

E mafai ona e amata i le faasoa atu o le saunoaga lenei a Peresitene Thomas S. Monson ma talanoaina fesili o loo avatu faatasi ai:

I se tasi taimi na tele lava ona tutusa tulaga faatonuina o le Ekalesia ma tulaga faatonuina o malo, o lea ua i ai se vā tēle i lo tatou va, ma o loo faatupulaia pea lena va. (“Mana o le Perisitua,” Liahona, Me 2011, 66)

• O a nisi o faataitaiga e mafai ona e mafaufau i ai e faapupula ai mea o loo faamatala mai e Peresitene Monson i lenei faamatalaga?

Faamalamalama atu sa soifua foi le perofeta o Elia i se taimi na i ai se avanoa i le va o tulaga faatonuina o lona sosaiete ma tulaga faatonuina a le Alii. I le taimi o le nofoaiga a le Tupu o Aapo ma le Masiofo o Iesepela i le Malo i Matu o Isaraelu, e toatele Isaraelu sa taumafai e tapuai i atua pepelo, e aofia ai Paala, faatasi ma Ieova. Na luiina e Elia le faitau selau o perofeta pepelo i se tauvaga i luga o le Mauga o Karamelu e faamaonia ai pe o Paala po o Ieova o le Atua moni (tagai i le 1 Tupu 18:17-21). A o le’i amataina le tauvaga, na talanoa atu Elia i tagata.

Valaaulia tagata aoga e faitau le 1 Tupu 18:21, ma vaavaai mo le fesili a Elia i tagata Isaraelu. Ona mafai lea ona e fesili atu:

• E faapefea ona e aoteleina upu a Elia i lenei fuaiupu? (Afai e manaomia, e mafai e tagata aoga ona faitau le tusiga mo le 1 Tupu 18:21 i le Fesoasoani mo Tusitusiga Paia: Feagaiga Tuai.)

• O le a se upumoni e mafai ona tatou aoao mai le fesili a Elia i tagata? (E mafai ona faailoa mai e tagata aoga se upumoni e pei o lenei: E le mafai ona tatou mulimuli i le Atua a o mulimuli foi i atua ese ma faatosinaga amioletonu.)

Mafaufau e faasoa atu ma talanoaina le faamatalaga lenei a Elder D. Todd Christofferson:

O le asō atonu e faapea mai Elia:

• Pe o loo i ai le Atua, lo tatou Tama Faalelagi, pe leai, ae afai o loo i ai o Ia, tapuai atu ia te Ia.

• Pe o Iesu Keriso o le Alo o le Atua, le Togiola toetu o tagata uma, pe leai, ae afai o Ia lenā, mulimuli atu ia te Ia. …

O le tumau ma mausali faifaipea i le faatuatua o Keriso e manaomia ai ona ulufia e le talalelei a Iesu Keriso le loto ma le agaga o le tagata, o lona uiga e le avea le talalelei na o se tasi o le tele o faatosinaga i le olaga o se tagata ae o le taulaiga manino atoa o lona olaga ma uiga faaletagata. (“Tumau ma Mausali i le Faatuatua o Keriso,” Liahona, Nov. 2018, 30, 31)

• O a nisi o auala e ono taumafai ai tagata i o tatou taimi e mulimuli i le Atua a o mulimuli foi i atua ese ma faatosinaga amioletonu?

• O le a se mea ua e iloa e uiga i le Atua e mafai ona uunaia ai oe e avea o Ia ma Lana talalelei “o le taulaiga taua” o lou olaga?

Valaaulia tagata aoga e faitau le 1 Tupu 18:22–39, ma vaavaai mo le mea na tupu i le va o Elia ma faitaulaga a Paala. (E mafai foi e tagata aoga ona faitau le faamatalaga mo le 1 Tupu 18:22–46 i le Fesoasoaniga mo Tusitusiga Paia: Feagaiga Tuai.) Mafaufau e faaaoga ni fesili e pei o nei e fesoasoani ai i tagata aoga e faasoa mai o latou malamalama’aga:

• Aisea atonu na sasaa atu ai e Elia le tele o vai i luga o le taulaga ma le fatafaitaulaga?

• O le a se mea ua fesoasoani ai lenei tala ia te oe e te malamalama ai e uiga i le mana o le Atua?

E mafai ona e faaiuina i le usuina faatasi po o le faitauina o upu o le viiga“Who’s on the Lord’s Side?” (Hymns, 260). Valaaulia tagata aoga e mafaufau loloto ma tusi i lalo ni auala e mafai ona latou tuuto atoatoa atu ai i latou lava e mulimuli i le Alii.

Toe foi i le “Filifiliga o Gaoioiga e Aoao Ai.”

Mafaufau e amata i le talanoaina o le saunoaga lenei a Elder Gary E. Stevenson:

I le aluga o la’u auaunaga, ua ou iloa ai se moomooga taatele a tagata uma ina ia iloa le auala e valaaulia ma iloa ai uunaiga a le Agaga Paia. (“Uunaiga a le Agaga,” LiahonaNov. 2023, 43)

Aisea e faigata ai i nisi taimi ona tatou iloa pe faapefea ona valaaulia ma iloa uunaiga a le Agaga Paia?

I lenei gaoioiga e aoao ai, e mafai ona e fesoasoani i tagata aoga e faataitaia le tomai “Faia o Fesili e Valaaulia ai le Aoaoina Ma le Filiga” mai le Tomai mo le Suesueina o Tusitusiga Paia Valaaulia tagata aoga e tusi i lalo se fesili se tasi pe sili atu o loo ia i latou e uiga i le valaauliaina ma le iloaina o uunaiga mai le Agaga. Uunaia i latou a o latou suesue e vaavaai mo upumoni e mafai ona fesoasoani e tali ai nei fesili.

Faamalamalama atu ina ua uma ona faatoilaloina e Elia perofeta pepelo a Pala, sa saili le toalua o Aapo, o Iesepela, ina ia fasiotia Elia. Sa ia sola ese mai le nuu o Isaraelu ma malaga atu i le tele o aso seia oo ina taunuu i le Mauga o Horepa, o le isi igoa mo le Mauga o Sinai.

Valaaulia le vasega e faitau le 1 Tupu 19:9–12 ma le tusiga mo nei fuaiupu i le Fesoasoani i Tusitusiga Paia: Feagaiga Tuai, ma vaavaai mo le mea na tupu a o alu atu Elia i le mauga. Ona mafai lea ona e fai atu ni fesili e pei o nei:

• O le a se mea e mafai ona tatou aoao mai i lenei tala e faatatau i le auala e fesoʻotaʻi ai le Alii ma i tatou? (Fesoasoani i tagata aoga e faailoa mai se upumoni faapenei: E masani ona fetalai mai le Alii ia i tatou e ala i le leo filemu ma le itiiti o le Agaga.)

• Aisea e te manatu ai e taua le iloa e masani ona fetalai mai le Alii ia i tatou i se leo filemu, ma le itiiti? E faapefea ona atagia mai i lenei mea Lona natura ma uiga?

• E mafai faapefea ona tatou faamalosia lo tatou tomai e iloa ai uunaiga filemu a le Agaga Paia?

Tuu atu i tagata aoga se avanoa e faaalu ai se taimi e suesue ai fesili sa latou tusia i lalo i le amataga o le gaoioiga e aoao ai. E mafai ona latou suesue i tusitusiga paia, aoaoga mai taitai o le Ekalesia, po o isi punaoa i le Gospel Library e sue ai tali i a latou fesili. O faataitaiga o punaoa e mafai ona latou faaaogaina e aofia ai le Taiala i Tusitusiga Paia, “Faaaliga” (Gospel Library); Autu ma Fesili, “Faaaliga” (Gospel Library); po o le saunoaga a Elder Gary E. Stevenson ua faaautuina “Uuunaiga a le Agaga” (Liahona, Nov. 2023, 42–45).

A uma ua lava se taimi o tagata aoga e saili ai mo ni tali, valaaulia i latou e faasoa mai mea na latou maua, muamua i se paga po o se vaega toalaiti ona sosoo ai lea ma le vasega. (Faamanatu i tagata aoga afai latou te lei mauaina ni tali, e mafai ona faaauau pea ona latou sailia tali e ala i le tatalo, fefautuaai ma i latou latou te faatuatuaina, ma isi punaoa paia ua atofaina.)

Mafaufau foi e talanoaina fesili e pei o nei.

• O le a se fautuaga o le a e tuuina atu i isi talavou matutua i ni fesili e pei o oe?

• E mafai faapefea e le taumafai ia iloa ma tali atu i uunaiga faaleagaga ona faamalosia ai lou sootaga ma le Tama Faalelagi ma Iesu Keriso?

• O a ni faataitaiga o le ala na fetalai mai ai le Alii talu ai nei ia te oe e ala i le leo filemu ma le itiiti o le Agaga? (Lapatai atu i tagata aoga e aua le faasoa mai aafiaga e patino tele.)

Valaaulia tagata aoga e tusi i lalo laasaga latou te mananao e fai ia iloa lelei ai pe maua ai faaaliga mai le Agaga Paia. Molimau atu e uiga i upumoni na outou talanoaina i lenei aso.

Toe foi i le “Filifiliga o Gaoioiga e Aoao Ai.”