Mose 7

Mafaufau e faasoa atu le saunoaga lenei a le Perofeta o Iosefa Samita:

E tatau ona avea le atiina ae o Siona ma o tatou faamoemoe aupito sili. (Aoaoga a Peresitene o le Ekalesia: Iosefa Samita [2007], 186)

Valaaulia tagata aoga e faasoa mai mea ua latou iloa i le taimi nei i le uiga o le atiina ae o Siona ma le mafuaaga ua avea ai lenei mea ma se sini taua tele. E mafai foi ona e fai atu ia i latou e iloilo le leoa a latou taumafaiga o i ai nei e fausia Siona. Uunaia i latou a o latou suesue e vaavaai mo upumoni e mafai ona fesoasoani ia i latou ia malamalama lelei ai po o le a Siona ma le auala e mafai ona latou fesoasoani ai e faatulaga i o latou olaga ma le lalolagi o siomia ai i latou.

Faamalamalama atu na aoao atu ma taitai e le perofeta o Enoka lona nuu e faatu le aai o Siona. E ui lava na tupu lenei mea anamua, ae ua tuuina mai ai se mamanu mo ituaiga tagata e tatau ona avea ai i tatou e fausia ai Siona i aso nei.

Valaaulia tagata aoga e suesue le Mose 7:16–27, 53, 68–69 e iloa ai nisi o uiga o Siona. (Afai e i ai ni fesili a tagata aoga e uiga i le fuaiupu e 22, e mafai ona e valaaulia i latou e faitau le “Mose 7:22. O le a le uiga e faapea ‘o fanau a Kaino sa uliuli’?” i le Fesoasoaniga mo Mau: Feagaiga Tuai.)

Valaaulia tagata aoga e faasoa mai uiga o Siona na latou maua. Mafaufau e lisi mea na latou maua i luga o le laupapa. E mafai ona e fai atu ni fesili e pei o fesili nei e fesoasoani ai i tagata aoga e faasoa mai o latou malamalama’aga.

• Na faapefea ona ese Siona mai isi o le lalolagi?

• O le a se mea na e matauina e uiga i le sootaga na faia e nei tagata ma le Alii?

• O le a le mea ua aoao atu e le fuaiupu e 18 ia te oe e uiga i le auala e mafai ai ona avea i tatou ma tagata o Siona? (E mafai ona faailoa mai e tagata aoga se upumoni faapenei: Tatou te avea ma tagata o le Alii ma fausia Siona pe a tasi o tatou loto ma le mafaufau, nonofo faatasi i le amiotonu, ma tausia e matitiva. Mafaufau e talanoaina pe na faapefea ona faaalia e Iesu Keriso nei uiga i Lona soifuaga faaletino.)

Faamalamalama atu e mafai ona avea Enoka ma ona tagata ma se faataitaiga mo i tatou a o tatou tauivi e fausia Siona i aso nei. Mafaufau e lisi vaega po o faatulagaga nei i luga o le laupapa:

• Aiga

• Tagata e potu faatasi ma uo

• Uarota po o le paranesi

• I le galuega

• Luga o le Initoneti

• I le alalafaga

I faigapaaga po o ni vaega toalaiti, valaaulia tagata aoga e filifili ni nai vaega po o ni faatulagaga mai le lisi ma talanoaina fesili nei:

• E faape’ī foliga o le atiina ae o Siona i lenei nofoaga?

• O le a se eseesega e mafai ona faia e le lotogatasi, paia, po o le tausia o isi i lenei vaega o lo’u olaga?

Mafaufau e faasoa atu le saunoaga lenei a Elder D. Todd Christofferson ma talanoaina ni malamalama’aga faaopoopo o loo i ai i tagata aoga e uiga ia Siona ma le auala e mafai ona latou fesoasoani ai e atiina ae:

O Siona e Siona ona o aga, uiga, ma le faamaoni o ona tagatanuu. … Afai o le a tatou atiina ae Siona i totonu o o tatou aiga, paranesi, uarota, ma siteki, … [o le] a manaomia (1) ia lotogatasi i le loto e tasi ma le manatu e tasi; (2) ia avea ma ni tagata paia taitoatasi ma tuufaatasi; ma (3) ia tausia e matitiva ma e le tagolima i se lelei ia faapea ona aveesea ai le mativa mai ia i tatou. E le mafai ona tatou faatalitali sei iloga e oo mai Siona ona faatoa tupu lea o nei mea—o le a faatoa oo mai Siona pe afai e faia ia mea. (“O Mai i Siona,” Liahona, Nov. 2008, 38)

Uunaia tagata aoga e saili le taitaiga a le Agaga Paia a o latou fatuina se fuafuaga ia sili atu ona lotogatasi, paia, pe agaalofa ina ia mafai ona latou atiina ae atoatoa Siona i o latou olaga. Valaaulia i latou e faaaofia ai ni faatinoga patino o le a latou faia ma le taimi o le a latou faia ai. E mafai ona e valaaulia ni nai tagata aoga e faasoa mai i le vasega ni fuafuaga e le patino tele.

Ina ia faaiu, mafaufau e molimau atu o Iesu Keriso o le “Tupu o Siona” (Mose 7:53) ma o le a toe foi mai o Ia i le lalolagi i Lona Afio Mai Faalua. O a latou taumafaiga e atiina ae Siona o le a fesoasoani e saunia ai i latou lava ma isi mo Lona toe foi mai.

Toe foi i le “Filifiliga o Gaoioiga e Aoao Ai.”

Mafaufau e faasoa atu se tasi po o vaaiga faataitai uma nei, pe fatu sau lava vaaiga faataitai:

• E i ai aiga ma uo a Ruby o e ua filifili e le mulimuli ia Iesu Keriso. Sa ia mafaufau pe na aafia le alofa o le Tama Faalelagi mo i latou i a latou faaiuga.

• E faatalatū Max e sa’ili se faiā ma le Atua. E silasila o ia i le Atua o se tagata sauā ma e vave ona faasalaina tagata.

Valaaulia tagata aoga e mafaufau i tagata latou te iloa o e atonu o loo i ai i tulaga e pei o i latou o loo i vaaiga faataitai. E mafai foi ona latou mafaufau i a latou lava sootaga ma le Atua ma fesili po o lagona o loo ia i latou e uiga ia te Ia. Uunaia i latou ia talia mea e mafai ona latou aoaoina mai le Agaga Paia a o latou aoao atili e faatatau i uiga o le Atua i lenei gaoioiga e aoao ai.

Faailoa atu na faatuina e Enoka ma lona nuu o Siona ma na iu lava ina aveina ae i le lagi (tagai i le Mose 7:16–21, 68–69). I se faaaliga vaaia, na vaaia ai e Enoka le faatosinaga a Satani ia i latou o e na totoe i le lalolagi ona e lei avea i latou ma se vaega o Siona.

Valaaulia tagata aoga e faitau le Mose 7:23–27, ma vaavaai mo mea na vaai ma aoaoina e Enoka.

• O a ni mea na e mauaina i nei fuaiupu e ono taua ona manatua?

Suesue le Mose 7:28–33, ma vaavaai po o a lagona o le Tama Faalelagi a o ia silasila atu ia i latou o e na filifili e le mulimuli ia te Ia.

• O a ni mea na e aoaoina po o ni ou lagona e uiga i le Tama Faalelagi ao e suesue i nei fuaiupu? (E mafai ona faailoa mai e tagata aoga upumoni faapenei: E lagona e le Tama Faalelagi le alofa ma le agaalofa mo tagata uma ma tutulu pe a latou mafatia. E alofa mutimutivale ma agalelei le Tama Faalelagi e faavavau. E silafia lelei lava e le Tama Faalelagi i tatou ma o tatou tulaga patino.)

• O le a se eseesega e mafai ona faia i lou olaga i lou iloa ai o nei upumoni?

Mafaufau e faasoa atu le saunoaga lenei mai ia Peresitene Jeffrey R. Holland:

O iina, i le totonugalemu o se faaaliga vaaia maoae o tagata ola na tatalaina e le lagi i lana vaai, na maitauina ai e Enoka faamanuiaga ma luitau o le olaga nei, na liliu atu ai lana vaai i le Tama ma ua faateia i le vaai atu ia te Ia o loo tutulu. Na ia fai ane ma le ofo ma le maofa i lenei Tagata pito sili ona mamana i le atulaulau: “Pe ua mafai faapefea ona e tutulu? …E tonu [ma] alofa mutimutivale ma agalelei oe e faavavau; … Filemu … o le nofoaga lea o lou nofoalii; ma o le a alu atu le alofa mutimutivale i ou luma ma e leai sona iuga; e faapefea ona e tutulu?” …

O lena vaaiga mamana e tasi, ua aoao mai ai ni mea se tele e uiga i le natura moni o le Atua nai lo soo se isi lava tusitusiga faalelotu ua mafai ona faailoa atu ai. …

O se faatusa e le mafaagaloina o le aafiaga o le Atua i o tatou olaga! O se mea tiga tele i se matua pe afai e le filifilia e Lana fanau o Ia po o le “talalelei a le Atua” na Ia auina mai! [Roma 1:1] E maeu le faigofie ona alofa i se tasi o le ua faapito le alofa ia i tatou! …

Ou te tuuina atu se molimau patino i se Atua soifua, Na te silafia o tatou igoa, e faafofoga ma tali mai i talosaga, ma e faapelepele ia i tatou e faavavau o fanau a Lona agaga. (“O Le Silisiliese o le Atua,” Liahona, Nov. 2003, 72)

Valaaulia tagata aoga e faasoa mai se mea na tulaga ese ia i latou mai upu a Peresitene Holland. E mafai foi ona e filifili e fai atu fesili nei:

• Na faapefea ona e iloa e alofa le Atua ia te oe ma e nofouta i ou mafatiaga? (Atonu e fesoasoani mo tagata aoga le vaaia o faataitaiga a isi tagata talavou o e na oo i lenei mea. E mafai ona e matamata i vitio “E faafofoga mai le Atua ia te Oe | Mosaea 23:10” [2:24] po o le “Ua Silafia A’u e le Tama Faalelagi” [3:18]; Gospel Library.)

  

  3:19

Afai e lava se taimi, e mafai ona e faamalamalama atu na aoaoina e le Atua ia Enoka e faapea, ona o le amioleaga tele sa i ai i le lalolagi, o i latou o e o le a le salamo o le a fano i se lolo. O lenei mea na mafua ai ona tagi Enoka (tagai i le Mose 7:36–44). E mafai e tagata aoga ona suesue le Mose 7:44–53, ma vaavaai pe na faapefea ona faamafanafanaina e le Alii ia Enoka. E mafai ona e talanoaina le māfuaaga atonu na olioli ai le agaga o Enoka ona o le vaai atu i nei mea.

Ina ia faaiuina le gaoioiga e aoao ai, valaaulia tagata aoga e mafaufau i mea na latou aoaoina pe lagonaina mai le Agaga Paia. Tuu atu i tagata aoga se taimi e tusi ai i lalo o latou manatu ma uunaiga.

Toe foi i le “Filifiliga o Gaoioiga e Aoao Ai.”

Mafaufau e faasoa atu le saunoaga lenei a Peresitene Russell M. Nelson:

I aso o le a oo mai, o le a tatou vaai ai i faailoga silisili o le mana o le Faaola e le’i vaai muamua lava i ai le lalolagi. I le va o le taimi nei ma le taimi e toe fo’i mai ai o Ia “faatasi ma le mana ma le mamalu silisili” [Iosefa Samita—Mataio 1:36], O le a ia faae’e mai avanoa e le mafaitaulia, faamanuiaga, ma vavega i luga o e faamaoni.

Peitai, o loo tatou ola i le taimi nei i le mea moni o se taimi aupito sili ona faigata i le talafaasolopito o le lalolagi. O mea lavelave ma lu’itau ua tuua ai le tele o tagata e lagonaina le lofituina ma le vaivai. (“Manumalo i le Lalolagi ma Maua le Malologa,” Liahona, Nov. 2022, 95)

Valaaulia tagata aoga e faasoa mai o latou manatu e uiga i le faamatalaga a Peresitene Nelson. E mafai ona e fai atu fesili e pei o nei:

• O a nisi o luitau e mafai ona faigata ai ona ola i aso e gata ai?

• E mafai faapefea ona e maua le faamoemoe a o e ola i aso e gata ai?

Faamalamalama atu faapea o se vaega o lana faaaliga vaaia o loo faamaumauina i le Mose 7, na aoaoina ai e Enoka nisi o auala o le a faasaoina ai e le Alii Lona nuu i aso e gata ai. Valaaulia tagata aoga a o latou suesue e vaavaai mo upumoni ma ia gauai atu i uunaiga faaleagaga mai le Agaga Paia lea e mafai ona fesoasoani ia i latou e lagona ai le faateleina o le lotofaafetai e uiga i le ola ai i lenei taimi taua i le talafaasolopito o le lalolagi.

Suesue faatasi le Mose 7:60–61. Valaaulia tagata aoga e vaavaai ma faasoa mai ni tulaga lamatia na ta’u atu e le Alii ia Enoka o le a tupu i aso e gata ai.

• O le a le mea na folafola atu e le Alii o le a Ia faia mo Lona nuu i le fuaiupu 61? (E mafai ona e valaaulia tagata aoga e faailoga le fuaitau “ae o lo’u nuu o le a Ou faasaoina” i a latou tusitusiga paia.)

Mafaufau e tusi le fasifuaitau lenei i luga o le laupaa: Ina ia faasaoina Lona nuu i aso e gata ai, o le Alii o le a Ia:

Valaaulia tagata aoga e suesue le Mose 7:62–67, ma vaavaai mo auala e mafai ona latou faamae’aina ai le fuaitau mai le laupapa. Fai atu i tagata o le vasega e faasoa mai mea na latou maua. E mafai ona e tusia a latou tali i luga o le laupapa. Afai e manaomia, faatosina mai le gauai o tagata aoga i le fuaiupu e 62 ma tusi le upumoni lenei i luga o le laupapa:

Ina ia faasaoina Lona nuu i aso e gata ai, o le Alii o le a:

• Auina ifo mai le lagi le amiotonu.

• Auina atu le upumoni mai le eleele.

• Tafia le lalolagi i le amiotonu ma le upumoni.

• Faapotopoto Lona nuu i Siona.

Ina ia fesoasoani i tagata aoga ia malamalama lelei i le taua o nei mea e tutupu na valoia, mafaufau e talanoaina fesili o loo i lalo. (Mo nisi manatu e uiga i le fai atu o nei ituaiga fesili, tagai i le “Faia o Fesili e Valaaulia ai le Aoaoina ma le Filiga” i le Tomai mo le Suesueina o Tusitusiga Paia.)

• O a nisi o auala ua faataunuuina ai e le Alii pe o faataunuuina ai lenei valoaga? (E mafai ona e tusiina tali a tagata aoga i luga o le laupapa. Atonu e aoga le faitauina o le “Mose 7:62–63. O le a le mea na faaali atu ia Enoka e uiga i aso e gata ai?” i le Fesoasoaniga mo Mau: Feagaiga Tuai e fesoasoani ai i tagata aoga ia saunia lelei e tali lenei fesili.)

• O le a se mea ua fesoasoani nei mea ua valoia ia te oe ia e malamalama pe lagona ai e uiga i le Tama Faalelagi ma Iesu Keriso?

• Na faapefea ona fesoasoani se tasi o nei mea na valoia ia te oe e manumalo ai i faigata o aso e gata ai?

E mafai ona e faaiuina i le toe faasoaina atu o le palakalafa muamua o le saunoaga a Peresitene Russell M. Nelson i le amataga o lenei gaoioiga e aoao ai. Mafaufau e valaaulia ni nai tagata aoga e faasoa mai ni mafuaaga latou te faafetai ai e ola i lenei taimi i le talafaasolopito o le lalolagi.

Toe foi i le “Filifiliga o Gaoioiga e Aoao Ai.”