Faamasino 2–46–813–16

Mafaufau e faailoa atu le tomai “Sailia o Mamanu i Tusitusiga Paia” i le Tomai mo le Suesueina o Tusitusiga Paia. Ina ia faapupula le taua o le sailia o mamanu, e mafai ona e faaali atu le ata lenei ma tuu atu i tagata aoga e vaai pe fia fuainumera e mafai ona latou maua i le faasologa, e amata i le numera 1, i totonu o le 30 sekone.

Valaaulia tagata aoga e faasoa mai pe na latou matauina se mamanu i le auala o loo faatulagaina ai fuainumera. Afai e manaomia, faamalamalama atu afai e te tuuina i totonu se laina tusao ma se laina faalava i le ogatotonu o le siata e fatu ai ni vaega tutusa se fa, o le a e iloa ai o numera e mulimuli i se mamanu faasolosolo, faatasi ai ma numera taitasi i le faasologa o loo faaalia i le isi vaega (tagai i le ata).

Valaaulia tagata aoga e faaalu le isi 30 sekone e toe fai ai le lu’i ma vaai i le eseesega e tupu pe a latou mulimuli i le mamanu.

Faamalamalama atu o le tusi o Faamasino o loo ta’u mai ai le talafaasolopito o Isaraelu ina ua mavae lo latou taunuu i le laueleele o Kanana ma le maliu o Iosua (tagai i le “O le a le tusi a Faamasino?” i le Fesoasoaniga mo Mau: Feagaiga Tuai ). I le tusi o Faamasino, tatou te aoao ai e uiga i se mamanu po o se taamilosaga faaleagaga na oo ia Isaraelu ona sa latou le mulimuli soo i faatonuga a le Alii. Mafaufau e faaali atu se siata avanoa o le taamilosaga, e pei o lea o loo i lalo, i luga o le laupapa. Valaaulia tagata aoga e kopi le siata i se fasi pepa.

Valaaulia tagata aoga e suesue fuaiupu nei ma se paga po o se vaega toalaiti, ma vaavaai mo le mamanu o amioga na tupu i tagata Isaraelu. E mafai e tagata aoga ona aotele seti taitasi o fuaiupu i se upu po o se fasifuaitau ona tusi lea o lena upu po o le fasifuaitau i le pusa talafeagai i luga o a latou siata.

1. Faamasino 3:5–7

2. Faamasino 3:8

3. Faamasino 3:9 (fasifuaitau muamua o le fuaiupu)

4. Faamasino 3:9–11

A uma ona suesue e tagata aoga ia fuaiupu, valaaulia i latou e faasoa mai upu po o fasifuaitau na latou faaaofia i a latou siata. Afai e manaomia, e mafai ona e ofoina atu fautuaga nei mo pusa taitasi: (1) Agasala, (2) Taunuuga, (3) Tagi atu i le Alii, (4) Laveaiina. E mafai foi ona e tuu atu ia i latou e saili mo nisi faataitaiga o le taamilosaga po o vaega o le taamilosaga i le Faamasino 2:10–18; 3:12–15, 26–30; 4:1–4, 14–16. Ona mafaufau lea e fesili atu:

• O a nisi o upumoni ua e aoaoina e uiga i le Alii mai lenei taamilosaga i le Faamasino? (O faataitaiga o upumoni e mafai ona latou faasoa mai e aofia ai mea nei: Afai tatou te filifili e teena le Alii, o le a lamatia lo tatou aveesea o Lana taitaiga ma le puipuiga i o tatou olaga. A o tatou filifili e liliu atu i le Alii ma valaau atu i Lona suafa, o le a Ia laveai i tatou.)

Faamalamalama atu o se tasi o faalagiga o le Faaola o le Laveai [Faaola] (tagai i le 2 Samuelu 22:2). Valaaulia tagata aoga e faasoa mai ni faataitaiga o tulaga po o mea tatou te manaomia ai le Faaola e laveai mai ai i tatou. Mafaufau e lisi a latou tali i luga o le laupapa. (Mo ni manatu, e mafai ona e tuu atu i tagata aoga e suesue le Alema 36:27–29; 38:5.)

• O a nisi o faatinoga e mafai ona tatou faia e fesoasoani ai i a i tatou ia maua le mana laveai o le Faaola? (O se vaega o la outou talanoaga, mafaufau e suesue le Mosaea 7:33; 29:20; Alema 58:10–11.)

• O a ni faataitaiga o le laveaiga a le Faaola e mafai ona e mafaufau i ai i tusitusiga paia, i olaga o tagata e te iloa, po o i lou lava olaga?

Mafaufau e toe faasino atu tagata aoga i le siata o le taamilosaga mai le amataga o le gaoioiga. E mafai ona e tusia A’u i luga o le laupapa i le ogatotonu o le taamilosaga. Valaaulia tagata aoga e mafaufau loloto po o fea atonu o latou i ai i le taimi nei i le taamilosaga ma mafaufau i tulaga i o latou olaga latou te manaomia ai le laveaiga a le Faaola. Fautuaina i latou e tusifaamaumau faatinoga e mafai ona latou faia e valaaulia ai le mana laveai o le Faaola i o latou olaga.

Toe foi i le “Filifiliga o Gaoioiga e Aoao Ai.”

Valaaulia tagata aoga e fai se lisi o tagata o e na sili ona faatosinaina lo latou faatuatua ia Iesu Keriso. Atonu latou te faaaofia ai uiga patino, amioga, po o faatinoga a nei tagata na musuia ai i latou. Mafaufau e valaaulia tagata aoga e faasoa mai ni nai faataitaiga i le vasega.

Faamanatu i le vasega o le tusi a Faamasino o loo faamatala ai le tele o taimi na pauu atu ai Isaraelu i le agasala ina ua uma ona ulu atu i le nuu folafolaina. O lenei mea na taunuu atu ai i le le toe puipuia e le Alii o i latou mai o latou fili. Ina ua salamo Isaraelu, sa faatuina e le Alii faamasino e laveai i latou. O se tasi o nei faamasino o Tepora, o se tamaitai o le faatuatua tele. Valaaulia tagata aoga a o latou suesue i le tala ia Tepora e mafaufau i ni auala atonu e avea ai i latou ma ni faataitaiga o le faatuatua i a latou uo, aiga, po o isi.

Valaaulia tagata aoga e faitau le Faamasino 4:4; 5:7 e su’e ai faalagiga e lua o Tepora. Atonu e fesoasoani le faailoa atu e faapea o se perofeta fafine “o se tamaitai ua mauaina le molimau ia Iesu ma olioli i le agaga o faaaliga” (Taiala i Tusitusiga Paia, “Perofeta Fafine,” Gospel Library).

Fai i tagata aoga e suesue le Faamasino 4:1–15, ma vaavaai mo le faatosinaga a Tepora i tagata na siomia o ia. Ona mafaufau lea e fai atu fesili e pei o nei:

• O a nisi o upu po o faatinoga a Tepora na faaalia ai lona faatuatua i le Alii?

• Na faapefea e le faatuatua o Tepora ona uunaia Parako ma isi? (I le avea ai ma se vaega o lenei talanoaga, mafaufau e tusi le upumoni lenei i luga o le laupapa: A o tatou galulue ma le faatuatua i le Alii, e mafai ona tatou fesoasoani i isi ia maua le malosi e mulimuli ai ia te Ia.)

Fesoasoani i tagata aoga e mafaufau pe mafai faapefea ona latou mulimuli i le faataitaiga a Tepora o le faatuatua. O se tasi o auala e mafai ona e faia ai lenei mea o le faaali atu lea o faamatalaga nei ma a latou fesili ma valaaulia o loo avatu faatasi ai. Valaaulia tagata aoga e tusi a latou tali mo se aitema o loo faailo atu se tasi pe sili atu.

• O le faatuatua o Tepora i le Alii na fesoasoani ia te ia e faatino ai ma le lototoa ma le lototele. O a ni mea faigata e mafai e lou faatuatua ia Iesu Keriso ona tuuina atu ia te oe le lototele e fai? O le a se mea e mafai ona e faia e faateleina ai lou faatuatua ia Iesu Keriso?

• Sa faalagolago Tepora i le Alii a o ia taitaia Isaraelu i se taimi o faigata tele. E faapefea e le faalagolago ia Iesu Keriso ona aumaia ia te oe le malosi? E mafai faapefea e lou faatuatua ona fesoasoani e faamalosia isi i taimi faigata?

• O le faatuatua o Tepora i le Alii na faamalosia ai isi. Fai se lisi o mea e te iloa e uiga ia Iesu Keriso—mai tusitusiga paia, mai upu a perofeta soifua, ma mai ou lava aafiaga patino. O ai e manaomia ona iloa lenei mea? O le a faapefea ona e faasoa atua?

Valaaulia ni nai tagata aoga e faasoa mai nisi o manatu sa latou tusi faamaumauina. Molimau atu e uiga i upumoni na outou talanoaina i lenei aso.

Toe foi i le “Filifiliga o Gaoioiga e Aoao Ai.”

Faaali atu le siata lenei:

Valaaulia tagata aoga e mafaufau le leoa po o fea o le a latou tuu ai i latou lava i luga o le laina i tulaga taitasi nei. E mafai foi ona e valaaulia tagata aoga e faasoa mai nisi tulaga faaopoopo.

1. Filifiliina o se galuega

2. Mauaina o aoaoga

3. Taulimaina o luitau po o tofotofoga

4. Faaleleia atili o lou lava tagata

5. Sailia o tali i fesili e uiga i le talalelei

Faamatala atu e faapea o le Faamasino 6 o loo faamatala ai se isi taimi na galo ai i tagata Isaraelu le Alii ma le maua ai Ana faamanuiaga. Mo le fitu tausaga, na sauaina ai e sa Mitiana ia Isaraelu. I le atuatuvale, na iu lava ina latou liliu atu i le Alii mo se fesoasoani (tagai i le Faamasino 6:1–7). Ina ua uma ona manatua e le fanauga a Isaraelu le Alii ma tagi atu ia te Ia, sa Ia faatuina se tagata amiotonu e igoa ia Kitiona e laveai i latou mai o latou fili. Valaaulia tagata aoga e vaavaai mo upumoni e mafai ona fesoasoani ia i latou e faalagolago atili ai i le Alii a o latou suesue i le tala ia Kitiona.

Valaaulia tagata aoga e faitau le Faamasino 6:11–16, 24–27, ma vaavaai mo faatonuga a le Alii ia Kitiona. Valaaulia tagata aoga e faasoa mai se mea na tūmātila ia i latou mai nei fuaiupu. E mafai foi ona fai atu ni fesili e pei o nei:

• O le a se mea o aoao mai e nei fuaiupu e uiga i le Alii?

• O le a se mea atonu na aoao atu e le Alii ia Kitiona ma tagata i ana faatonuga i fuaiupu 25–27?

Faamalamalama atu na talia e Kitiona le valaau a le Alii e taitai Isaraelu e faasaga ia Mitiana. Atonu e fesoasoani le ta’u atu o le autau a Isaraelu i le amataga e 32,000 alii (tagai i le Faamasino 7:3), a o i ai i le autau a Mitiana ni alii e 135,000 (tagai i le Faamasino 8:10).

Valaaulia tagata aoga e faitau fuaiupu nei ma talanoaina fesili o loo auina atu faatasi ma se paga.

• A o lei oo i le taua: Faamasino 7:2–7

• I le taimi o le taua: Faamasino 7:15–21; 8:28

• Ana faapea sa e i ai i le tulaga o Kitiona, o a nisi o fesili po o ni atugaluga atonu e oo ia te oe a’o le’i faia ma i le taimi o le taua?

• O le a se mea ua e aoaoina e uiga i le taua o le faalagolago i le Alii mai le tala ia Kitiona?

Valaaulia ni nai tagata aoga e faasoa mai o latou malamalamaaga mai a latou talanoaga i le vasega. A o latou faasoa mai, e mafai e tagata aoga ona ta’ua se upumoni faapenei: A o tatou faalagolago atu i le Alii, o le a Ia faamanuiaina i tatou i Lona malosi.

Ina ia fesoasoani i tagata aoga ia malamalama atili i lenei upumoni, mafaufau e tuu atu ia i latou e fai se kopi o le siata lenei. Valaaulia i latou e talanoaina ma se paga po o se vaega toalaiti ni auala eseese e mafai ona latou faauma ai pusa taitasi i le siata.

Valaaulia tagata aoga e faasoa mai nisi o mea na latou tusia i a latou siata. Atonu foi e te fai atu ni fesili e pei o nei:

• O a fuaiupu po o tala i tusitusiga paia ua musuia ai oe e faalagolago i le Alii? (Afai e manaomia, e mafai ona e fautuaina atu ni nai faataitaiga, e pei o le Faataoto 3:5–6; Filipi 4:13; Alema 26:12; Eteru 12:27.)

• O anafea na faamalosia ai oe e le Alii e sili atu i mea e te gafatia?

E mafai foi ona e faasoa atu le saunoaga lenei mai ia Peresitene Russell M. Nelson:

E ala i Lana Togiola, na manumalo ai le Alii o Iesu Keriso i le Lalolagi. O le mea lea, o Ia o lē ua “malosi e … faamama [outou] mai i amioletonu uma” (Alema 7:14). O le a Ia laveaiina outou mai i o outou tulaga sili ona pagatia i Lana lava ala ma le taimi. Pe a outou o mai ia te Ia i le faatuatua, o le a Ia taiala, faasaoina, ma puipuia outou. O le a Ia faamalolo lou loto nutimomoia ma faamafanafana oe i ou faanoanoaga. O le a Ia tuu atu ia te oe le avanoa e maua ai Lona mana. Ma o le a Ia faia mea faigata i lou olaga e avea ma mea faigofie. (“Filifiliga mo le Fa’avavau” faigalotu i le lalolagi atoa mo talavou matutua, Me 15, 2022], Gospel Library)

Tagai i le siata aū mai le amataga o le gaoioiga e aoao ai. Fai atu i tagata aoga e mafaufau i se vaega o o latou olaga atonu o loo latou filifili ai e faalagolago tele i lo latou lava tomai. Fautuaina i latou e tusi i lalo soo se manatu po o ni uunaiga faaleagaga na latou maua e uiga i auala e mafai ona latou faalagolago atili ai i le Alii.

Toe foi i le “Filifiliga o Gaoioiga e Aoao Ai.”