1 Samuelu 8–10; 13; 15–16

Mafaufau e amata i le talanoaina o le saunoaga lenei a Sister Elaine S. Dalton, o le sa avea muamua ma Peresitene Aoao o Tamaitai Talavou:

Afai e te manao e faia se eseesega i le lalolagi, e tatau ona ese oe mai le lalolagi. (“O Le Taimi Lenei e Tutulai ai ma Susulu Atu!,” Liahona, Me 2012, 124)

• O a ni luitau e ono feagai ma oe a o e filifili ia ese mai le lalolagi?

Valaaulia tagata aoga e mafaufau loloto pe faapefea ona latou naunau ia latou tulaga ese pe a latou fetaiai ma tulaga faatauaina e ese mai le finagalo o le Alii. Fautuaina i latou a o latou suesue i le asō e vaavaai mo upumoni e mafai ona fesoasoani ia i latou i a latou taumafaiga e mulimuli ia Iesu Keriso.

Faamanatu i tagata aoga e faapea, o Isaraelu na taitaia e faamasino mo le uluai selau tausaga talu ona latou ulu atu i le nuu folafolaina. O le perofeta o Samuelu o se tasi o faamasino mulimuli o nei faamasino. Sa ia taitaia ma le faamaoni Isaraelu i lalo o le taitaiga a le Alii mo le tele o tausaga.

Valaaulia tagata aoga e faitau le 1 Samuelu 8:1–9, ma vaavaai mo mea na mananao ai toeaiina o Isaraelu a o faasolo ina matua Samuelu. Tuu atu ia i latou e faasoa mai mea na latou maua. E mafai foi ona e fesili atu:

• Aisea na mananao ai toeaiina i se tupu? (Pe a manaomia, ta’u i ai na lagona e Isaraelu e sili atu le i ai o se tupu aua o le mea lena sa faia “pei o nuu uma” o loo siomia ai i latou. Tagai i le fuaiupu 20.)

• Aisea e te manatu ai o mafuaaga o le mananao ai o Isaraelu i se tupu o le a le fiafia ai Samuelu?

Aotele fuaiupu 10–18 i le faamatala atu e faapea, na tuuina atu e le Alii ia Samuelu ni lapataiga patino e uiga i le matautia o le i ai o se tupu.

Valaaulia tagata aoga e suesue le 1 Samuelu 8:19–22 ona sosoo ai lea ma le saunoaga lenei a Peresitene Jeffrey R. Holland, ma vaavaai pe na faapefea ona tali atu Isaraelu i lapataiga a Samuelu.

O le tulaga tiga lea, ona o loo i ai so latou tupu na muamua atu ia i latou ma tau a latou taua. O Ia o Ieova, le Tupu o tagata uma, ae na latou le toe mananao ia Ieova e taitai ia i latou. Latou te le toe mananao ia te Ia e tau a latou taua. Ma o le ogatusa ai ma le autu o le tele o lesona o talafaasolopito, na oo mai ai taunuuga tiga ina ua tuai tele ona aloese ai. Sa tagitui mulimuli ane tagata, “Ua matou faaopoopoina i a matou agasala uma lenei mea leaga, ina ua matou faatoga atu ai i se tupu mo i matou” (1 Samuelu 12:19). (“Filifili le Alii ma Lana Perofeta,” Liahona, Iuni 2022, 6)

Valaaulia tagata aoga e faasoa mai upumoni ua latou aoaoina mai lenei tala e mafai ona fesoasoani ia i latou i tulaga latou te feagai. O se tasi lenei o faataitaiga o se upumoni e mafai ona latou faailoa mai: O le filifili e mulimuli i manatu lauiloa nai lo le fautuaga a le Alii o le a taitai atu ai i mafatiaga ma le faanoanoa.

Mafaufau e faaali atu fesili nei ma valaaulia tagata aoga e talanoaina ma se soa po o se vaega toaitiiti.

• O a nisi o manatu po o tulaga faatauaina masani e mafai ona taitai ese ai talavou matutua mai le Atua?

• O le a se mea ua e iloa e uiga ia Iesu Keriso e mafai ona fesoasoani ia te oe e faatoilalo ai le faaosoosoga e mulimuli i nei ituaiga o manatu?

E mafai ona e valaaulia ni nai tagata aoga e faasoa mai ni o latou manatu mai a latou talanoaga. E mafai foi ona e filifili e talanoaina se fesili e pei o lenei:

• O le a se taimi na e lagona ai le latalata atili atu i le Faaola ona sa e filifili e mulimuli i Ana fautuaga ia ese le ola ai mai le lalolagi?

Mafaufau e faaiu i le faasoa atu o le saunoaga lenei a Peresitene Holland ma valaaulia tagata aoga e mafaufau pe faapefea ona faatatau ia i latou:

I le avea ai ma tagata o lenei lava aiga o Isaraelu e pei ona faauigaina faalautele ai, ua poloaiina i tatou ia aua nei faapei o isi tagata, ia aua nei faapei o le lalolagi. Ae e pei o le nuu o le Atua i ona po o Samuelu, tatou te fetaiai ma faatosinaga malolosi ia faapei o i latou i ala faatauvaa, i latou ua faatoilaloina e ala faalelalolagi i amioga po o talitonuga. …

Ua valaauina i tatou e vavaeese mai i tatou lava mai le amioleaga … ma ia avea ma mea faafefeteina faaleagaga i le lalolagi e aunoa ma le faalaugatasia faaleagaga e le lalolagi. (“Filifili le Alii ma Lana Perofeta,” 6, 7)

Fautua atu i tagata aoga e mafaufau pe mafai faapefea ona latou faaaogaina upumoni sa latou suesueina i le asō. Valaaulia i latou e tusifaamaumau o latou manatu po o uunaiga mai le Agaga Paia.

Toe foi i le “Filifiliga o Gaoioiga e Aoao Ai.”

E mafai ona e amata i le faasoa atu o le saunoaga lenei a Peresitene Russell M. Nelson ma talanoaina le fesili o loo mulimuli mai:

O le a [e] fetaui i ni tagata o le a latou filifili po o le fea poloaiga latou te tausia ae le ano i isi poloaiga latou te filifili e solia. Ou te ta’ua lenei mea o le faiga faafale‘ai ia usiusitai. O lenei faiga o le ilo ma filifili o le a le manuia. O le a oo atu ai i le faanoanoa. Ina ia saunia e fetaia’i ma le Atua, o lea e tausi ai e se tagata Ana poloaiga uma . E manaomia le faatuatua e usiusitai ai, ma o le tausia o Ana poloaiga o le a faamalosia ai lena faatuatua. (“Opogi le Lumanai i le Faatuatua,” Liahona, Me 2011, 34)

• Aisea e ono filifili ai se tasi e le tausia ni poloaiga faapitoa mai le Atua?

A o suesue e tagata aoga le 1 Samuelu 15, valaaulia i latou e mafaufau loloto i le taua o le tausia o poloaiga uma a le Atua. Fautuaina i latou i le gaoioiga atoa e aoao ai, ia mafaufau i auala e mafai ona faateleina ai lo latou usiusitai i le Atua.

Faamanatu i tagata aoga o Saulo sa lotomaualalo ma faalagolago i le Alii ina ua faauuina o ia o le tupu o Isaraelu (tagai i le 1 Samuelu 9:21; 15:17). Peitai, a o faasolo ina faamanuiaina atili o ia, sa amata ona faaitiitia lona faatuatuaina o le Alii ae faalagolago atili i lana lava faamasinoga. Ina ua faamata’uina e Filisitia se osofaiga, sa le usitai Saulo i le Alii e ala i le ofoina atu o se taulaga e le’i faatagaina (tagai i le 1 Samuelu 13:8–14. “Aisea na sese ai Saulo i le osi atu o se taulaga?” i le Fesoasoaniga mo Mau: Feagaiga Tuai). O se aafiaga faapena foi na tupu i le 1 Samuelu 15, ina ua le usitai a’ia’i Saulo ma lana autau i le Alii.

Valaaulia tagata aoga e faitau le 1 Samuelu 15:1–3, 7–9, ma vaavaai mo le poloaiga na tuuina mai e le Alii ia Saulo ma lana autau ma pe na faapefea foi ona latou tali atu.

Atonu e fesoasoani le faailoa atu o loo i ai vaega o lenei tala atonu e faigata mo le au faitau i ona po nei. Mo nisi faamatalaga e uiga i le poloaiga e faaumatia sa Amalekā, tagai i le “1 Samuelu 15:1–3. Aisea na poloaiina ai Saulo e ‘faaumatia atoa’ sa Amalekā?” i le Fesoasoaniga mo Mau: Feagaiga Tuai, ma le “E faapefea ona tatou malamalama i taimi o sauaga i tusitusiga paia?” i Autu ma Fesili, “Religion vs. Violence,” Gospel Library.

Faailoa atu e faapea, e ui lava tatou te le iloa mafuaaga uma na poloaiina ai Saulo e fasiotia sa Amalekā uma ma a latou manu, ae e mafai lava ona tatou aoaoina ni lesona taua mai le ala na tali atu ai Saulo i le poloaiga a le Alii.

Valaaulia tagata aoga e suesue i le 1 Samuelu 15:13–26, ma vaavaai pe na faapefea ona tauamiotonuina e Saulo ana amioga i le perofeta o Samuelu. Ona tou talanoaina lea o fesili nei:

• O le a se mea e tulagaese ia te oe e uiga i le tali a Saulo?

• O a nisi o faataitaiga o auala e ono ta’uamiotonuina ai e tagata i o tatou aso lo latou le usiusitai i poloaiga a le Atua?

Fai i tagata aoga e faasoa mai upumoni sa latou aoaoina mai le tala ia Saulo ma Samuelu lea e mafai ona fesoasoani ia i tatou pe a tatou lagona le faaosoosoina e ta’uamiotonuina lo tatou le usiusitai. (O se tasi o upumoni e mafai ona faailoa mai e tagata aoga o se mea faapenei: O le faalogo ma usitai i le Alii e sili atu nai lo le osia o taulaga.) E mafai foi ona e fai atu se fesili e pei o lenei:

• O le a le sootaga i le va o le usitai ma taulaga?

• O le a se eseesega e mafai ona faia i lo tatou tali atu i poloaiga a le Atua ma la tatou sootaga ma Ia?

Mafaufau e tuu atu i tagata aoga se taimi e sue ai ni nai mau po o faamatalaga mai taitai o le Ekalesia e mafai ona fesoasoani ia i latou e usitai atoatoa ai i poloaiga a le Tama Faalelagi ma Iesu Keriso. (E mafai foi ona e fesoasoani i tagata aoga e faataitai le tomai “Faailogaina o Mau ma Isi Aoaoga o le Talalelei” i le Tomai mo le Suesueina o Tusitusiga Paia e ala i le fatuina o se Faailoga e ta’ua o le “Usiusitai” mo aoaoga latou te maua.) A uma ua lava se taimi, valaaulia tagata aoga e faasoa atu se tasi o mau po o faamatalaga na latou maua i se paga po o se vaega toalaiti.

Valaaulia tagata aoga e filifili pe mafai faapefea ona latou faaaogaina upumoni sa latou suesueina i le asō. Fautuaina i latou e tusi i lalo ni sini po o ni fuafuaga na latou faia mo i latou lava. Molimau atu e uiga i upumoni na outou talanoaina i lenei aso.

Toe foi i le “Filifiliga o Gaoioiga e Aoao Ai.”

Valaaulia tagata aoga e talanoaina faatasi ma se paga uunaiga nei:

• O a ni mea moni e te manatu e sili ona aafia ai lou uluai lagona o se tagata?

• Pe na i ai se taimi na e maua ai se uunaiga muamua e uiga i se tasi ae na faamaonia mulimuli ane e sese? O le a se mea na suia ai lou mafaufau?

Faamalosiau i tagata aoga a o latou suesue i le asō ina ia gauai atu i soo se uunaiga mai le Agaga Paia e mafai ona fesoasoani ia i latou e vaai ai ia i latou lava ma isi i le ala e faia ai e le Atua.

Faamatala atu e faapea, ona o le le usiusitai o Saulo, na teena ai o ia e le Alii e avea ma tupu o Isaraelu (tagai i le 1 Samuelu 13:13–14; 15:26–28). Valaaulia tagata aoga e suesue le 1 Samuelu 16:1–13, ma vaavaai mo upu ma fasifuaitau o loo faaalia ai le ala na fesoasoani ai le Alii ia Samuelu e su’e le tagata na Ia filifilia e suitulaga ia Saulo. Ona mafaufau lea e fesili atu:

• O le a le taitaiga taua na tuuina atu e le Alii ia Samuelu e fesoasoani ai ia te ia ia iloa le tupu e sosoo ai? (E mafai e tagata aoga ona faailoa mai se upumoni e pei o le E vaai atu tagata i foliga vaaia i fafo, ae e silasila le Alii i le loto.)

Ina ia fesoasoani i tagata aoga ia malamalama atili i lenei upumoni, mafaufau e faaali atu gaoioiga pupuu nei, ma valaaulia tagata aoga e faauma se tasi po o gaoioiga uma:

1. Saili faataitaiga faatusi paia o le ala na silasila ai le Faaola i loto o isi ma gafatia i totonu nai lo o latou foliga vaaia po o faatinoga i fafo. E mafai ona e maua ni faataitaiga na o oe pe faaaoga se tasi o mau nei: Mataio 11:7–11; Luka 19:1–10; Ioane 8:1–11.

2. Faaaoga le Gospel Library e saili ai mo faamatalaga mai taitai o le Ekalesia e fesootai ma le vaai ia i tatou lava ma isi i le ala e faia ai e le Atua.

Valaaulia tagata aoga e faasoa atu mea na latou aoaoina ma se paga po o se vaega toalaiti. Ona valaaulia lea o ni nai tagata aoga e faasoa mai a latou manatu i le vasega. I le avea ai ma se vaega o lenei talanoaga, mafaufau e faaali le vitio “Pray for Eyes to See as He Sees” (6:27).

6:27

Mafaufau e faaali atu fesili nei ma tuu atu i tagata aoga se taimi e tusi ai a latou tali i se fesili se tasi po o fesili uma e lua.

• E mafai faapefea ona e aoao e vaai ia te oe lava ma isi i le ala e silasila mai ai le Alii ia te oe?

• O anafea na fesoasoani ai le Alii ia te oe e vaai ia te oe lava po o isi e pei ona Ia faia?

A uma ua lava se taimi, valaaulia ni nai tagata aoga naunautai e faasoa mai tali na latou faamaumauina e le patino tele.

Molimau atu e uiga i upumoni na outou talanoaina i lenei aso. Fautuaina tagata aoga e saili le fesoasoani a le Tama Faalelagi i le vaai atili ia i latou lava ma isi e pei ona Ia faia.

Toe foi i le “Filifiliga o Gaoioiga e Aoao Ai.”