Kenese 24–33

Mafaufau e faasoa atu le vaaiga faataitai lenei i le vasega.

Valaaulia tagata aoga e mafaufau pe faapefea ona tali atu Maria e fesoasoani i popolega o Lusia. Ona mafai lea ona e uunaia i latou e mafaufau loloto ma tusi a latou tali i fesili nei.

• O le a le taua o se faaipoipoga e faavavau ia te a’u?

• O a ni faafitauli o loo ou feagai i le mauaina o se faaipoipoga e faavavau?

Mafaufau e faaali atu le faafanua lenei a o e faamatala atu sa nonofo Aperaamo ma lona aiga i Kanana, lea sa tapuai ai tagata i tupua. Sa iai tagata o le aiga o Aperaamo sa nonofo i Karana, lea sa silia ma le 400 maila (650 kilomita) le mamao.

Valaaulia tagata aoga e faitau le Kenese 24:1–9, ma vaavaai mo faatonuga na tuuina atu e Aperaamo i lana auauna. (Atonu e fesoasoani le faailoa atu e faapea o le Faaliliuga a Iosefa Samita ua suia ai le upu “ogavae” i le “lima” i fuaiupu 2 ma le 9 [tagai i le fuaiupu 2, vaefaamatalagae, ma le fuaiupu 9, vaefaamatalagaa]).

• Ana faapea o oe o le auauna a Aperaamo, o a ni au fesili po o ni atugaluga atonu e i ai e uiga i nei faatonuga?

• Aisea e te manatu na popole tele ai Aperaamo i le tagata na faaipoipo i ai lona atalii? (Mafaufau foi e suesue faatasi le “Kenese 24:2–9. Aisea na le manao ai Aperaamo ia Isaako e faaipoipo i se sa Kanana?” i le Fesoasoaniga mo Mau: Feagaiga Tuai.)

Afai e manaomia, fesoasoani i tagata aoga ia malamalama na manao Aperaamo ia Isaako e faaipoipo i se tamaitai e tausia feagaiga. O le auala lenei o le a maua ai e Isaako faamanuiaga e fesootai ma le feagaiga faa-Aperaamo mo ia lava ma lana fanau. O le faaiuga a Isaako e faaipoipo i le feagaiga e talitutusa lava ma la tatou filifiliga i aso nei pe faaipoipo i le malumalu.

Faamalamalama atu na malaga atu le auauna a Aperaamo i Karana, lea sa nofo muamua ai Aperaamo. O iina na taitai atu ai o ia e le Alii i se tamaitai amiotonu e igoa ia Repeka. Sa feiloai le auauna ma le aiga o Repeka e talanoaina lona toe foi atu ma ia i Kanana e faaipoipo ia Isaako.

Valaaulia tagata aoga e faitau le Kenese 24:50–67, ma vaavaai pe na faapefea ona tali atu Repeka i lenei tulaga ma osigataulaga na ia faia e faaipoipo ai ia Isaako. Fai atu fesili e pei o nei:

• O le a se mea sa tulaga ese ia te oe mai nei fuaiupu? Aisea?

• O a ni mea e mafai ona e aoaoina e uiga i le faaipoipoga e faavavau mai lenei tala? (E mafai ona faailoa mai e tagata aoga ni upumoni eseese, e aofia ai le mea lenei: E aoga taumafaiga ma osigataulaga tetele ina ia maua ai faamanuiaga o le faaipoipoga e faavavau.)

• Aisea e te manatu ai o le faaipoipoga e faavavau e matua taua ai le osigataulaga tele? (Mafaufau e valaaulia tagata aoga e sue ma faasoa mai mau po o faamatalaga mai taitai o le Ekalesia e fesoasoani e tali ai lenei fesili. O se tasi o faataitaiga o se mau e mafai ona latou faaaogaina o le Mataupu Faavae ma Feagaiga 131:1–4.)

I le taimi o la outou talanoaga, atonu e taua le faailoa atu e le o tagata uma o loo saili e savavali i le ala o le feagaiga o le a maua le avanoa e ulu atu ai i le faaipoipoga e faavavau i lenei olaga. Ia nofouta i manaoga ma tulaga o tagata. Atonu e fesoasoani le faamanatu atu i tagata aoga e faapea “e leai se tasi ua muai fuafuaina e mauaina se mea itiiti ifo nai lo mea uma ua i ai i le Tama mo Ana fanau” (D. Todd Christofferson, “Aisea e Faaipoipo ai, Aisea e Maua ai le Aiga,” Liahona, Me 2015, 52). O le a saunia e le Alii le avanoa i le isi olaga mo tagata o e sa lei maua se avanoa e faaipoipo ai i lenei olaga (tagai Neil L. Andersen, “O Le Manumalo o le Faamoemoe,” Liahona, Nov. 2024, 5). Molimau atu e mafai ona tatou maua le olioli i le taimi nei e ala mai ia Iesu Keriso, e tusa lava po o le a lo tatou tulaga faale-faaipoipoga.

Valaaulia tagata aoga e tusi i lalo mea e mafai ona latou faia e faamuamua ai le faaipoipoga e faavavau, e tusa lava po o a o latou tulaga o le olaga i le taimi nei.

Toe foi i le “Filifiliga o Gaoioiga e Aoao Ai.”

E mafai ona e valaaulia tagata aoga e mafaufau loloto ma tusi i lalo pe faapefea ona faatatau ia faamatalaga taitasi nei ia i latou e faaaoga ai tali “mautinoa,” “tele,” “laitiiti,” ma le “leai lava.”

1. Ua ou naunau e ositaulagaina manaoga faalelalolagi mo faamanuiaga e faavavau.

2. Ua ou malamalama i le mafuaaga ua poloaiina ai a’u e le Alii e faataua Ana faamanuiaga e faavavau nai lo mea ou te manao ai i le taimi nei.

3. Ou te iloa faamanuiaga e oo mai pe a ou faamuamua le Tama Faalelagi ma Iesu Keriso nai lo mea o le lalolagi.

Valaaulia tagata aoga e saili musumusuga a o latou suesue i le asō e uiga i le auala e faamuamua ai faamanuiaga e faavavau nai lo manaoga faalelalolagi.

Faamalamalama atu e faapea, sa le mafai e Repeka ma Isaako ona maua ni fanau mo le tele o tausaga. Na iu lava ina faamanuiaina i laua i atalii masaga e igoa ia Iakopo ma Esau. I le taimi o le maitaga o Repeka, sa fesoasoani le Alii ia te ia ia malamalama o Iakopo, le laitiiti o tama e toalua, o le a iu lava ina avea ma atalii ulumatua—e ui lava o le atalii matua sa masani ona mautofi i le aia tatau o le ulumatua (tagai Kenese 25:23). O se atalii e umia le tofi o le ulumatua, e fai mona tofi e le gata i laueelele ma meatotino a lona tama, ae faapea foi le tulaga o lona tama o se taitai faaleagaga o le aiga ma le “pule e pulefaamalumalu ai” ( tagai i le Bible Dictionary, “Birthright”).

Valaaulia tagata aoga e suesue le Kenese 25:27–34 ma le 26:34–35, ma vaavaai po o a lagona o Esau e uiga i le tofi o le ulumatua. (E mafai foi ona e valaaulia tagata aoga e suesue le “Kenese 25:29–34. Aisea na faatau atu ai e Esau lona tofi o le ulumatua?” i le Fesoasoaniga mo Mau: Feagaiga Tuai.)

• O le a se mea ua fautuaina mai e amioga a Esau e uiga i ona lagona e uiga i lona tofi o le ulumatua?

• O a ni upumoni e mafai ona tatou aoaoina mai aafiaga o Iakopo ma Esau? (E mafai ona faailoa mai e tagata aoga se upumoni faapenei: O le taulai atu i manaoga vave e mafai ona faaseseina ai i tatou mai mataupu e faavavau le taua.)

Ina ia fesoasoani i tagata aoga ia iloa pe faapefea ona fesootai lenei upumoni i tulaga latou te feagai, mafaufau e talanoaina faatasi saunoaga nei a Elder David A. Bednar ma Brother Bradley R. Wilcox:

I le pisi tele ai o o tatou olaga i aso taitasi ma le vevesi o le lalolagi i ona po nei o loo tatou ola ai, e ono tosina ese ai i tatou mai mea e faavavau e sili ona taua e ala i le faia o le fiafia, manuia, lauiloa, ma le taʻutaʻua o ni mea e ave i ai la tatou faamuamua. O le faalofituina o o tatou mafaufau mo sina taimi i “mea o le lalolagi” ma “mamalu o tagata” e ono ta’ita’i atu ai i tatou e faaleaogaina lo tatou tofi ulumatua faaleagaga mo sina meaai itiiti. (“Ia Oofu i Lou Malosi, E, Siona e,” Liahona, Nov. 2022, 94)

‘Aua ne’i e faatau atua lou tofi ulumatua mo sina meaai itiiti. ‘Aua ne’i faafesuia’ia mea uma mo le leai o se mea. (“Autalavou o le Tofi Ulumatua Tautupu,” Liahona, Nov. 2024, 95)

Mafaufau e faaali atu fesili nei ma valaaulia tagata aoga e talanoaina ma se soa po o se vaega toaitiiti.

• O a nisi o faataitaiga o le auala e mafai ai e tagata i aso nei ona faamuamua manaoga vave po o faalelalolagi nai lo faamanuiaga e faavavau a le Alii?

• Na faapefea ona faamuamua e le Faaola faamanuiaga e faavavau i luga atu o manaoga o le taimi nei lava?

• O le a se mea ua fesoasoani ia te oe e faamuamua ai faamanuiaga e faavavau nai lo manaoga vave po o manaoga faalelalolagi?

Valaaulia tagata aoga e mafaufau loloto pe faapefea ona latou faaaogaina upumoni na latou talanoaina i le asō i o latou olaga. Tuu atu ia i latou se taimi e faamaumau ai se fuafuaga ma isi uunaiga faaleagaga atonu na latou maua.

Toe foi i le “Filifiliga o Gaoioiga e Aoao Ai.”

Mafaufau e faafesootai ni nai tagata aoga a o lei amataina le vasega ma valaaulia i latou e auai i se talanoaga puupuu i le vasega e uiga i feagaiga. E mafai ona e auina atu ia i latou fesili nei a’o lumanai ai le taimi ma fai atu ia i latou e filifili se fesili e tali atu i ai i le taimi o le vasega.

• E faapefea ona e faamalamalama atu le taua o feagaiga i se tasi e fou i lo tatou faatuatuaga?

• Na faapefea e le tausia o au feagaiga i lou olaga i aso taitasi ona faamalosia ai lou sootaga ma le Atua?

• Aisea e te tausia ai au feagaiga ma le Atua e ui lava i le faatosinaga e solia i latou?

Faatulaga ni nai nofoa i luma o le potu, ma fai atu i tagata aoga na e faafesootaia muamua e nonofo ai. Faaali atu fesili na muamua atu ma tuu atu i tagata aoga e tali i le fesili na latou filifilia.

Faamalamalama atu na filifili Esau e fasioti Iakopo ina ua uma ona feteenai le toalua lea i le tofi o le ulumatua ma le faamanuiaga mulimuli a Isaako (tagai i le Kenese 27:36-41). Sa faatonuina e Repeka ma Isaako ia Iakopo e malaga i le silia ma le 400 maila (650 kilomita) i Karana, lea e mafai ona saogalemu ai o ia mai ia Esau ma mafai ai ona maua se avā e faaipoipo iai i le feagaiga. I le taimi o le malaga a Iakopo i Karana, sa ia maua ai se aafiaga na faaalia ai le taua o le osia ma le tausia o feagaiga ma le Atua.

Ina ia fesoasoani i tagata aoga e aoao e uiga i le aafiaga o Iakopo, valaaulia i latou e suesue le Kenese 28:10–15 ma le “Kenese 28:10–15. O le a le taua o le miti a Iakopo e uiga i se apefai?” i le Fesoasoaniga mo Mau: Feagaiga Tuai. Fai atu fesili e pei o nei:

• O le a se mea ua e aoao mai e faatatau i feagaiga mai le aafiaga a Iakopo?

• Aisea e te manatu ai atonu na faapitoa le taua o folafolaga na faia e le Atua ia Iakopo ia te ia i lena taimi o lona olaga?

• E faavae i mea na e aoaoina i le fuaiupu e 15, o a nisi o faamanuiaga e mafai ona tatou maua pe a tatou osia ma tausia feagaiga ma le Atua? (E mafai ona faasoa mai e tagata aoga se mataupu faavae faapenei: A o tatou osia ma tausia feagaiga ma le Atua, o le a faatasi o Ia ma i tatou, puipuia ma tausia i tatou, ae le tuua i tatou.)

Mafaufau e valaaulia se tagata aoga e faitau le saunoaga lenei a Peresitene Emily Belle Freeman:

Sa tu le Alii i autafa o Iakopo, ma faailoa atu Ia lava o le Atua o le tamā o Iakopo, ona folafola atu lea:

• Ou te i ai ia te oe.

• Ou te tausi ia te oe.

• Ou te toe faafoisia mai oe i le nuu nei.

• Ou te le tuua oe.

• Ou te faia le mea ua ou fai atu ai ia te oe.

Sa i ai se filifiliga a Iakopo e fai. Sa mafai ona ia filifili e ola i lona olaga e na ona ogatusa ma le Atua o lona tamā, pe sa mafai foi ona ia filifili e ola i le olaga i se sootaga tuuto i le feagaiga ma Ia. E tele tausaga mulimuli ane, na molimau ai Iakopo i se olaga sa ola ai i totonu o folafolaga o le feagaiga a le Alii: “Na tali mai le Atua … ia te a’u i le aso na ou puapuaga ai, ma sa ia te a’u i le ala na ou ui ai” [Kenese 35:3; faaopoopo le faamamafa]. (“Savali i le Sootaga i le Feagaiga ma Keriso,” Liahona, Nov. 2023, 77)

Valaaulia tagata aoga e faasoa mai se mea na tulaga ese ia i latou mai le faamatalaga.

Faamalamalama atu ina ua mavae lona aafiaga paia ma le Atua, sa faailoa atu e Iakopo ona lagona. Valaaulia tagata aoga e suesue le Kenese 28:16–22, ma vaavaai mo faaupuga mai ia Iakopo e tulaga ese ia i latou. Vala’aulia tagata a’oga e fa’asoa mai mea na latou maua.

E mafai ona e faaiuina i le valaauliaina o tagata aoga e usu pe faitau upu o le viiga “Nearer, My God, to Thee” (Viiga—Mo Le Aiga ma le Ekalesia), e aofia ai fuaiupu e 4 ma le 5. E mafai e tagata aoga ona faasoa mai se laina po o se fasifuaitau e sili ona fiafia i ai. E mafai ona e fesili atu:

• O a fesootaiga ua e vaaia i le va o lenei viiga ma le aafiaga o Iakopo?

• E faapefea ona fesoasoani le tausiaina o feagaiga ia te oe e te lagona ai le latalata atili atu i le Atua?

Toe foi i le “Filifiliga o Gaoioiga e Aoao Ai.”

Mafaufau e faaali atu le iloiloga faaletagata lenei pe fai ni kopi mo tagata aoga. Tuu atu i tagata aoga se taimi e faamaea ai e i latou lava.

Mo faʻamatalaga taʻitasi nei, faatulaga oe lava e faʻaaoga ai se fua mai le 1 (e tau le moni ia te a’u) i le 5 (matua moni ia te a’u):

1. Ou te taumafai ia mautinoa o le Atua o le uunaiga aupito sili lea ona taua i lo’u olaga.

2. Ou te mulimuli i le Atua ona ou te manao iai—e le ona o faamoemoega o isi.

3. Ou te faatuatua i le taimi ma faamoemoega o le Atua, e tusa lava pe ou te le malamalama i ai.

4. Pe a i ai ni a’u fesili e faatatau i le talalelei, ou te saili ia taitai a’u e le Atua i le upumoni e faavavau.

Faamalamalama atu faapea i lenei gaoioiga e aoao ai, o le a suesue ai e tagata aoga se aafiaga paia na maua e Iakopo. Valaaulia i latou a o latou suesue e vaavaai mo upumoni e mafai ona fesoasoani ia i latou e faateleina ai lo latou faatuatua ma le faatuatuaina o le Alii.

Ina ia fesoasoani i tagata aoga ia malamalama i le talaaga o le Kenese 32, faamalamalama atu faapea ina ua uma ona faigaluega mo lona tamā faaletulafono, o Lapana, mo le 20 tausaga, sa poloaiina Iakopo e le Atua e toe foi atu i le laueleele o Kanana. A o nofo muamua Iakopo iina, sa manao lona uso o Esau e fasioti o ia ona o feeseeseaiga i le tofi o le ulumatua (tagai i le Kenese 27:41). I le taimi na ia alu ese ai, sa tele aafiaga na oo iā Iakopo na ia latalata atili atu ai i le Atua. Ae sa “mata’u tele ai lea o [ia], ma ua atuatuvale” (Kenese 32:7) e uiga i le toe faatasia ma lona uso.

Valaaulia tagata aoga e faitau le Kenese 32:9–12, 24–30 e aoao ai e uiga i lagona o Iakopo ma lona aafiaga ma le Atua i le taimi lea. (Mo se fesoasoani ina ia malamalama ai i nei fuaiupu, valaaulia tagata aoga e faitau le “Kenese 32:24–32. O le a le taua o le tauiviga a Iakopo?” i le Fesoasoaniga mo Mau: Feagaiga Tuai.)

Tuu atu i tagata aoga avanoa e talanoaina ai mea na latou aoaoina e ala i le fai atu o fesili e pei o fesili nei:

• O le a se mea na tulaga ese ia te oe e uiga i manaoga o Iakopo o loo faamatalaina i fuaiupu 9–12?

• O le a le mea na aoao atu e le Alii ia Iakopo i le fuaiupu e 28 e uiga i le mafuaaga na Ia suia ai le igoa o Iakopo ia Isaraelu?

Ina ia fesoasoani i tagata aoga ia malamalama i le uiga o le igoa fou o Iakopo, faasoa atu le saunoaga lenei mai ia Peresitene Russell M. Nelson:

Sa tauivi Iakopo ma se lu’i matuiā. Sa tofotofoina lana faitalia. I lenei tauiviga, na faamaonia ai e Iakopo le mea na sili ona taua ia te ia. Na ia faaali atu sa loto o ia e faamuamua le Atua i lona olaga. I se tali mai, sa suia ai e le Atua le igoa o Iakopo ia Isaraelu, o lona uiga “ia faamuamua le Atua.” Ona folafola atu lea e le Atua ia Isaraelu o faamanuiaga uma na folafola atu i luga o le ao o Aperaamo o le a avea foi ma ana. (“Ia Faamuamua le Atua,” Liahona, Nov. 2020, 92)

• E faavae i mea ua e aoaoina mai le aafiaga o Iakopo, o le a se mea e mafai ona tupu pe a tatou faatagaina le Atua e manumalo i o tatou olaga? (E mafai ona faailoa mai e tagata aoga se upumoni faapenei: A o tatou naunau e faataga le Atua e manumalo i o tatou olaga, o le a tatou maua Ana faamanuiaga folafolaina.)

Valaaulia tagata aoga e mafaufau i le uiga o le fuaitau “Ia manumalo le Atua.” E mafai ona e tuuina atu i tagata aoga ni nai minute e suesue ai vaega o le saunoaga a Peresitene Russell M. Nelson “Ia Faamuamua le Atua” (Liahona, Nov. 2020, 92–95). Ona mafai lea ona latou faasoa atu i se paga mea na latou aoaoina e uiga i le faatagaina o le Atua e manumalo. E mafai foi ona outou talanoaina faatasi fesili e pei o nei:

• E faape’ī foliga o le faatagaina o le Atua e manumalo i lou olaga?

• O a mea e mafai ona fesoasoani e faateleina ai lou naunau e faataga le Atua e manumalo?

• O ā ni aafiaga na e oo i ai i le faatagaina o le Atua ia manumalo? O le a le eseesega ua faia e lenei mea mo oe?

Valaaulia tagata aoga e mafaufau i auala e mafai ona latou faatagaina ai le Atua e manumalo atili i o latou olaga. Valaaulia i latou e tusifaamaumau a latou sini.

Toe foi i le “Filifiliga o Gaoioiga e Aoao Ai.”