Elder Ozani Farias

Ang pag-ampo mahitungod sa mahagitong mga desisyon nahimong pundasyon ni Elder Ozani Farias gikan pa sa kabatan-on. Si Elder Farias nag-ampo human niya mahimamat ang mga misyonaryo sa edad nga 15. Nag-ampo siya mahitungod sa mga oportunidad sa full-time nga misyon, edukasyon, kaminyoon, ug panarbaho.

Ug bisan kon ang dalan dili klaro, nasayod siya unsay iyang angay nga buhaton.

“Ang Dios kanunay nga unahon,” miingon siya. “Moserbisyo Kaniya pag-una. Kita nakakita og dagkong mga panalangin sa pagbuhat niini.”

Ang pagsunod sa mga aghat gikan sa Espiritu Santo wala gayod makapahisalaag kaniya ug sa iyang asawa, miingon siya. “Nakakat-on ko sa gahom sa personal nga pagpadayag. Ang Dios makigsulti ngadto sa Iyang mga anak. Ug ang Dios adunay plano alang kanato.”

Si Ozani Barboza Marques Farias natawo sa Recife, Brazil, niadtong Oktubre 19, 1969, ngadto nila ni José Osanã Farias ug Severina Barbosa Marques. Siya ug ang iyang asawa, si Giovanna de Medeiros Prata Farias, naselyo sa São Paulo Brazil Temple niadtong Enero 18, 1994. Sila adunay tulo ka anak.

Si Elder Farias nakaangkon og bachelor’s degree sa accounting gikan sa Catholic University of Pernambuco, ug usa ka postgraduate nga degree sa finance gikan sa University of Pernambuco, ug usa ka master of business administration gikan sa Getulio Vargas Foundation. Nagtrabaho siya alang sa Simbahan sa lain-laing mga posisyon, lakip isip usa ka manedyer sa panalapi, manedyer sa human resources, ug sa labing bag-o isip usa ka direktor sa temporal affairs alang sa Brazil Area.

Si Elder Farias sa pagkakaron nagserbisyo isip presidente sa misyon sa Georgia Atlanta Mission. Nagserbisyo usab siya isip usa ka magtatambag sa kapangulohan sa stake, klerk sa stake, high councilor, bishop, magtatambag sa bishopric, ug magtutudlo sa Primary.