Elder Clement M. Matswagothata

Sa dihang si Elder Clement M. Matswagothata usa pa ka bata sa Botswana, basahon niya og kusog ang Biblia ngadto sa iyang lola. Napaklian niya ang 1 Samuel 3, diin ang Dios nakigsulti ngadto ni Samuel, kinsa sa wala madugay gitawag nga usa ka propeta.

“Ang akong natural nga pangutana mao, ‘Buhaton pa ba gihapon sa Dios ang sama nga butang?’”

Kana nga pangutana misugod sa iyang panaw sa pagpaningkamot sa pagpangita sa Dios nga makigsulti gihapon. Nahimamat niya ang mga misyonaryo nga Santos sa Ulahing mga Adlaw sa dihang nag-edad siya og 16, nagbasa sa Basahon ni Mormon sulod sa pipila ka adlaw, ug mitawag nila sa alas 3:00 sa buntag aron sultihan sila nga gusto siya nga magpabunyag.

Unya nahimo siyang unang presidente sa stake nga gitawag sa Botswana, dayon unang Area Seventy, ug karon unang Kinatibuk-ang Awtoridad nga Seventy.

“Ako adunay nakagamot pag-ayo nga pagpamatuod nga ang Dios buhi ug namulong kanato niining kataposang mga adlaw ug nga kita nagpuyo sa usa ka panahon ug higayon nga ang mga propeta naglakaw sa yuta,” miingon siya.

Si Clement Mosiame Matswagothata natawo sa Middlepits, Botswana, niadtong Enero 8, 1980, ngadto nila ni Bojotlhe J. ug Rachel M. Matswagothata. Human makaserbisyo sa South Africa Cape Town Mission, nahimamat niya ang iyang asawa, si Novelty Busisiwe Buthelezi, sa usa ka kombinsyon sa young single adult sa area. Nagminyo sila sa Johannesburg South Africa Temple niadtong Pebrero 28, 2004. Sila adunay tulo ka anak.

Nakadawat siya og bachelor’s degree sa philosophy. Nagtrabaho siya sa industriya sa sakyanan nga adunay nagkalain-laing mga klase sa sakyanan, naghupot og pipila ka katungdanan sa pagpangulo, lakip sa pagka-sales manager, general manager, ug country manager alang sa Barloworld Motor.

Sa panahon sa iyang pagkatawag, si Elder Matswagothata nagserbisyo isip usa ka temple ordinance worker sa Johannesburg South Africa Temple ug isip usa ka espesyalista sa self-reliance sa area.