Elder Michael Cziesla

Si Elder Michael Cziesla nahinumdom kaayo sa mga pakigbisog sa 2017. Usa ka Martes niadtong Enero, nawad-an siya sa iyang trabaho sa usa ka internasyonal nga kompaniya sa pamalaod sa dihang ang kompaniya mideklarar og pagkabangkarota. Pagkasunod adlaw ang iyang balay nabahaan sa dihang ang linya sa tubig naguba. Ang mga kawatan miransak sa iyang balay sa ikatulo nga adlaw misulay sa pagkuha sa bililhong mga butang sa pamilya. Sulod sa pipila ka adlaw, ang iyang kinabuhi kalit nga nakasinati og kausaban.

“Mipahiyom ko nianang Dominggo sa naandan samtang milingkod ko sa pulpito isip usa ka presidente sa stake,” miingon siya. “Walay usa ang nakahibalo unsay nahitabo. Apan sa kahiladman naguol ako sa hilabihan. Ako anaa sa usa ka mangitngit kaayo nga dapit.”

Human sa miting, usa ka hilomon, malumo nga tawo sa ward nangutana kaniya unsay nahitabo. “Yano ra siya naminaw, ug dayon gigakos ko niya,” miingon si Elder Cziesla. “Gibati nako nga ang Ginoo migakos nako, nga Siya nasayod sa akong kahimtang, nga ang tanan mamaayo ra.”

Si Michael Cziesla natawo ngadto nila ni Armin Ludwig ug Irmtraut Hanna sa Neumünster, Germany, niadtong Hulyo 26, 1972. Nagdako siya sa Schleswig-Holstein ug unya nagserbisyo sa Utah Ogden Mission. Ang iyang asawa, si Margret Anne Rauh, nagserbisyo sa Temple Square Mission. Nagminyo sila sa Frankfurt Germany Temple niadtong Abril 4, 1997. Sa panahon sa pagkatawag, nagpuyo sila uban sa ilang lima ka anak sa Griesheim, Germany, diin nalingaw sila sa pagsuroy-suroy sa kalasangan ug pagbakasyon sa usa ka isla sa Denmark.

Si Elder Cziesla nakaangkon og law degree gikan sa University of Mainz niadtong 2000. Nakompleto niya ang iyang panarbaho sa pamalaod isip usa ka senior corporate partner sa McDermott Will & Emery.

Sa wala pa ang iyang tawag isip usa ka Kinatibuk-ang Awtoridad nga Seventy, si Elder Cziesla nagserbisyo isip usa ka Area Seventy sa Europe Central Area, temporaryo nga presidente sa misyon sa Germany Frankfurt Mission, presidente sa stake, high councilor, ug magtatambag sa bishopric.