Elder Brian J. Holmes

Si Elder Brian J. Holmes miingon nga siya ug ang iyang asawa, si Maggie, mga saksi sa saad sa Ginoo sa Doktrina ug mga Pakigsaad 84:88 nga Siya “magauban kaninyo.”

“Mao kana unsay iyang nahimo kanamo sa among tibuok kinabuhi,” miingon si Elder Holmes. “Kon atong itugyan ang atong kinabuhi ngadto sa Ginoo, mas daghan Siya og mahimo niini kay sa atong mahimo sa atong kaugalingon.”

Sa iyang bag-ong tahas isip usa ka Kinatibuk-ang Awtoridad nga Seventy, si Elder Holmes naglaom nga siya adunay mga oportunidad sa pagpamatuod sa importante nga tahas ni Jesukristo sa plano sa Langitnong Amahan.

“Siya mao ang Manluluwas ug Manunubos sa tanang anak sa Langitnong Amahan,” miingon siya.

Si Brian J. Holmes natawo niadtong Disyembre 5, 1977, sa siyudad sa Salt Lake, Utah, usa sa 12 ka anak, ngadto nila ni Michael H. Holmes ug Marian R. Holmes. Isip usa ka batan-ong lalaki, mialagad siya og misyon sa Munich, Germany. Pagkahuman nakigminyo siya ni Maggie Wilson sa Salt Lake Temple niadtong Marso 29, 1999. Si Elder ug si Sister Holmes mga ginikanan sa unom ka anak ug nagpuyo sa Queen Creek, Arizona, sa panahon sa iyang pagkatawag.

Si Elder Holmes nakaangkon og bachelor’s degree sa political science ug usa ka juris doctor degree, gikan sa Arizona State University. Nagtrabaho siya isip usa ka bise presidente sa Holmes Homes sa Arizona, mitukod sa Holmes Law, PLC, ug karong bag-o nagtrabaho isip general counsel alang sa Charter One, LLC.

Sa wala pa siya matawag isip Kinatibuk-ang Awtoridad nga Seventy, si Elder Holmes nagserbisyo isip usa ka Area Seventy sa North America Southwest Area. Siya nagserbisyo usab isip presidente sa stake, high councilor, ug bishop.