Sama sa usa ka Gamay nga Bata

Si Jesus nagsugod sa kataposang tuig sa Iyang mortal nga kinabuhi pinaagi sa pagbansay pa og dugang sa Iyang Apostoles. Kon ang Iyang mensahe ug kon molahutay ang Simbahan, dugang kahibalo ug baroganan ang kinahanglang itudlo ngadto sa 12 ka ordinaryong tawo nga nakaila Kaniya sulod lamang sa 24 ka bulan.

Usa ka adlaw si Jesus nakasaksi og panaglalis sa Napulog Duha ug nangutana, “Unsa may inyong gilalisan didto sa dalan?” Klaro nga naulawan, sila “wala motubag,” ang rekord nag-ingon. Apan kining labing bantogan sa tanang magtutudlo nakahibalo sa gihunahuna sa ilang mga kasingkasing ug nakahibalo sa unang kaulaw sa personal nga garbo. Maong “gitawag Niya ang gamay nga bata ngadto kaniya, …

“Ug miingon siya, Sa pagkatinuod magaingon ako kaninyo, nga gawas kon mangausab kamo, ug mangahimong sama sa mga gagmayng bata, dili gayod kamo makasulod sa gingharian sa langit.

“Busa si bisan kinsa nga magpaubos sa iyang kaugalingon sama niining gamayng bata, siya mahimong labing dako sa gingharian sa langit.”

Kinahanglan kining mahibaloan nga bisan sa wala pa ang pagkatawo ni Kristo, ang panamilit nga wali ni Hari Benjamin naglakip usab niining talagsaong komentaryo sa pagkamapainubsanon sa usa ka bata. Nag-ingon, “Kay ang kinaiyanhon nga tawo kaaway sa Dios, … ug mao gihapon sa umaabot, ug hangtod sa kahangtoran, gawas kon siya … mahimo nga usa ka santos pinaagi sa pag-ula ni Kristo ang Ginoo, ug mahimo nga sama sa usa ka bata, manunuton, … mapainubsanon, … puno sa gugma, … sa samang paagi nga ang usa ka bata [motubag] ngadto sa iyang amahan.”

Karon, klaro nga adunay pipila ka binata nga mga pagsabot nga dili nato iawhag. Baynte singko ka tuig ang nakalabay, ang akong tres anyos nga apong lalaki mipaak sa bukton sa iyang singko anyos nga igsoong babaye. Ang akong umagad nga lalaki nga nag-atiman sa mga bata nianang gabhiona, nataranta nga mitudlo sa iyang anak nga babaye sa tanang leksiyon sa pagpasaylo nga iyang mahunahunaan, mihatag og konklusyon nga kanang gamay nga igsoong lalaki tingali wala makahibalo unsa ang bation nga mapaakan sa bukton. Kanang dili epektibo nga inamahan nga paningkamot nagmalamposon sa mga usa ka minuto, tingali usa ka minuto ug tunga, hangtod dihay kusog kaayo nga singgit gikan sa kwarto sa mga bata, diin ang akong apo nga babaye kalmang misingggit, “Kahibalo na siya karon.”

Maong unsay atong masabtan sa mga hiyas sa gagmayng mga bata? Unsa kanang nakapahilak ni Kristo Mismo sa labing malumong talan-awon sa tibuok Basahon ni Mormon? Unsa ang gitudlo ni Jesus sa dihang Siya mitawag sa langitnong kalayo ug sa nanalipod nga mga anghel nga alirongan kadto nga mga bata, nagsugo sa mga hamtong nga “[tan-awon] ang [ilang] gagmayng mga bata.”?

Kita wala makahibalo unsa ang nakaaghat nianang tanan, apan sa akong pagtuo aduna kini kalabotan sa ilang kaputli ug kainosente, sa ilang dala sa pagkatawo nga pagkamapainubsanon, ug unsa ang mahimong epekto niini sa atong kinabuhi kon ato kining ipabilin.

Ngano nga ang atong mga adlaw sa pagkawalay paglaom giingon man nga “kawang sa mga pagkakawang”? Sa unsa nga paagi nga ang “kawang nga mga panghunahuna ug garbo sa mga anak sa mga tawo” nga maoy gihulagway sa dako ug lapad nga gambalay, patay man kaayo sa espiritu diha sa panan-awon ni Lehi? Ug ang mga Zoramita, nga mapagarbohon kaayong nag-ampo? Bahin kanila si Alma miingon, “O Dios, sila nangamuyo kanimo sa ilang mga ba-ba, samtang sila nagmapagarbohon … sa kawang nga mga butang sa kalibotan.”

Sa pagtandi, aduna bay mas tam-is, mas putli, o mas mapainubsanon kay sa bata nga nag-ampo? Ingon og ang langit anaa sa kwarto. Ang Dios ug si Kristo tinuod gayod, apan alang sa uban, ang kasinatian mahimong taphaw ra.

Apan sama sa kinutlo ni Elder Richard L. Evans mga 60 ka tuig na ang nakalabay: “Kadaghanan nato nagpatuo nga mga Kristiyano, apan kita … wala magseryoso Kaniya. … Kita nagtahod Kaniya, apan kita wala magsunod Kaniya. … Kita nagkutlo sa Iyang mga panultihon, apan kita wala magsunod pinaagi niini.” “Kita nagdayeg Kaniya, apan kita wala magsimba Kaniya.”

Pagkalahi unta sa kinabuhi kon ang kalibotan magmahal ni Jesus labaw sa lebel sa mapasipad-on nga panumpa matag karon ug unya.

Apan ang mga bata nahigugma gayod Kaniya, ug kana nga gugma madala ngadto sa ilang ubang mga relasyon ngadto sa laing mga tawo. Isip usa ka lagda, bisan sa ilang linghod nga mga pangidaron, ang mga bata dali nga mahigugma, mopasaylo dayon, ug ang ilang katawa makapalukmay sa labing bugnaw, labing gahi, labing tig-a nga kasingkasing.

Maong, ang lista magpadayon ug magpadayon. Kaputli? Pagsalig? Kaisog? Kinaiya?

Uban kanako sa pagtan-aw sa pagkamapainubsanon sa atubangan sa Dios nga gipakita sa akong batan-ong higala, mahal kaayo nako nga higala.

Niadtong Enero 5, 2025—91 ka adlaw na ang nakalabay—si Easton Darrin Jolley gitugyanan sa Aaronic nga Pagkapari ug giordinahan nga usa ka deacon sa Ang Simbahan ni Jesukristo sa mga Santos sa Ulahing mga Adlaw.

Si Easton dugay nang naghandom nga moapod-apod sa sakramento sa Panihapon sa Ginoo kutob sa iyang mahinumdoman. Apan kining sagrado nga oportunidad giubanan sa makapasakit sa tiyan nga kahadlok nga siya mapakyas, nga siya matumba, nga siya sungogon o magpakaulaw sa iyang kaugalingon ug sa iyang pamilya.

Abi ninyo, si Easton adunay talagsaon ug makadaot kaayo nga sakit, ang Ullrich congenital muscular dystrophy. Kini anam-anam nga mihatag og malisod nga mga hagit sa iyang batan-ong kinabuhi samtang miguba sa iyang mga paglaom ug mga damgo alang sa umaabot. Siya sa dili madugay permanente nang magkinahanglan og wheelchair. Ang iyang pamilya dili maghisgot mahitungod unsay moabot niya human niana.

Sa Dominggo human sa iyang ordinasyon, si Easton mopaambit sa sakramento sa unang higayon. Ug ang iyang pribado nga gihuptan nga kadasig mao nga siya makapresentar sa iyang kaugalingon ug niining sagrado nga mga simbolo ngadto sa iyang amahan, kinsa mao ang bishop sa ward. Sa pagpaabot niana nga buluhaton nga iyang gihangyo ug gipangamuyo, nagbakho ug nangamuyo, nangayo og garantiya nga walay usa, walay usa, ang mosulay sa pagtabang kaniya. Tungod sa daghang rason, nga alang lang sa iyang kaugalingon, kinahanglan niyang buhaton kini nga mag-inusara ug walay tabang.

Human mapikaspikas sa priest ang pan ug napanalanginan kini—usa ka simbolo nga nagrepresentar sa gisamaran nga lawas ni Kristo—Si Easton, bisan sa iyang masakiton nga lawas, miduol aron modawat sa tray. Pero, dihay tulo ka dagko nga ang-ang gikan sa salog sa meetinghouse ngadto sa mas taas nga plataporma. Mao nga, human madawat ang iyang tray, mituyhad siya kutob sa iyang mahimo ug gibutang ang iyang tray sa ibabaw sa pasamano. Dayon, naglingkod sa usa sa mas taas nga mga ang-ang, gamit ang duha ka kamot iyang gibira ang iyang tuong tiil ngadto sa unang ang-ang. Dayon iyang gibira ang iyang walang tiil ngadto sa samang ang-ang, ug ngadto sa uban hangtod, sa tumang kalisod, nabuntog niya ang lisod kaayo nga personal nga hagit.

Siya dayon mimaniobra sa iyang kaugalingon ngadto sa usa ka haligi sa estraktura nga iyang kagunitan aron makabarog. Gikuha niyag balik ang tray. Pipila na lamang ka lakang ug siya nagbarog na sa atubangan sa bishop, iyang amahan, kinsa, adunay mga luha sa iyang mga mata ug miagas sa iyang nawong, kinahanglang mopugong sa iyang kaugalingon sa paggakos nining hingpit nga maisog ug matinud-anon nga anak. Ug si Easton, nga nahupay mipakita og dako nga pahiyom sa iyang nawong, tingali nakaingon, “Gipasidunggan ko ang [akong amahan ug] natuman ko ang buhat nga [iyang gitugyan] kanako.”

Hugot nga pagtuo, kamaunongon, kaputli, pagsalig, dungog, ug, sa kataposan, gugma alang niana nga amahan nga gusto kaayo niyang mahimuot. Kini ug daghan pang ubang hiyas nga makapahimo usab nato sa pagsulti, “Busa … kinsa nga magpaubos sa iyang kaugalingon sama niining gamayng bata, siya mahimong labing dako sa gingharian sa langit.”

Mga kaigsoonan ug mga higala, sa labing una sa lista sa labing matahom nga mga imahe nga akong nahibaloan mao ang mga masuso ug mga bata ug kabatan-onan nga masaligan ug bililhon sama niadtong atong gipasabot karon. Ako mopamatuod nga sila mao ang mga imahe sa gingharian sa Dios dinhi sa yuta sa tanang kalig-on ug katahom niini.

Nianang sama nga espiritu sa pagpamatuod, ako mosaksi nga sa iyang kabatan-on, si Joseph Smith nakakita unsay iyang gisulti nga iyang nakita ug nakigsulti niadtong iyang giingon nga iyang gisultihan. Ako mopamatuod nga ang mapainubsanon ug putli nga si Russell M. Nelson mao ang giordinahan sa Dios ug hanas nga propeta ug manalagna. Gikan sa tibuok kinabuhi nga pagbasa kanunay, ako mosaksi nga ang Basahon ni Mormon mao ang labing magantihon nga basahon nga sukad akong nabasa ug sa tinud-anay ang bato sa pamag-ang sa akong gamay nga kapuy-an diha sa gingharian sa daghang mansyon. Ako mosaksi nga ang pagkapari ug pag-ampo mipahiuli sa akong kinabuhi—ang pagkapari ni Kristo ug ang inyong mga pag-ampo. Ako nasayod nga kining tanan tinuod ug mosaksi niini sa ngalan sa labing maunongon ug mapainubsanon sa tanang anak sa Dios—Alpha ug Omega, ang Halangdon nga Ako Mao, ang gilansang, ang matinud-anong saksi—bisan ang Ginoo nga si Jesukristo, amen.