Atubangan Gayod sa Atong mga Mata

Mga kaigsoonan, ako mapasalamaton kaayo nga makauban kamo karon. Kami nahigugma kaninyo, mapasalamaton kami kaninyo, ug gibati namo nga napanalanginan sa inyong mga pag-ampo.

Si Presidente Russell M. Nelson misulti kanato sa miaging komperensiya: “Nakita ba ninyo ang nanghitabo sa atubangan gayod sa atong mga mata? Ako nag-ampo nga dili nato mataligam-an ang kahalangdon niini nga higayon! Ang Ginoo nagpadali gayod sa Iyang buhat.”

Pagpadali sa Iyang buhat. Ang “pagpadali” mao ang pulong nga importante. Kini nagsugyot og dali nga paglihok, pagbuylo, ug gani dinalian. Sa pagtubo sa Simbahan ug sa plano ni Kristo, ang pagpadali nahitabo. Ug kitang tanan kabahin niini.

Niadtong Abril 1834 sa Kirtland, Ohio, ang propeta Joseph Smith mipundok sa tanan kinsa naghupot sa pagkapari didto sa gamay nga balay nga eskwelahan mga 14 ka piye (4.3 m) kwadrado. Posible gani nga mapaigo nato ang dinosena niadtong mga balay nga eskwelahan niining Conference Center, nga aduna pay bakante. Si Joseph Smith misulti, “Diyotay ra kaayo nga Priesthood nga inyong makita dinhi karong gabhiona, apan kini nga Simbahan mopuno sa Amihanan ug Habagatang Amerika—pun-on niini ang kalibotan.”

Kana nga panagna natuman karon “ atubangan gayod sa atong mga mata.” Ang Simbahan ni Jesukristo sa mga Santos sa Ulahing mga Adlaw nagtubo sa gidaghanon sa mga miyembro ug mga pamilya, mga misyon ug mga misyonaryo, mga meetinghouse ug mga templo, ug sa enrollment sa atong mga seminary, mga institute, ug mga unibersidad sa tibuok kalibotan.

Kita mapasalamaton nga ania sa yuta samtang nagkadako ang gidaghanon ug impluwensiya sa Simbahan, apan mas importante diha sa mga kasingkasing ug mga kinabuhi sa mga miyembro niini. Kita nailhan isip mga disipulo ni Jesukristo. Atong ipakigbahin ang atong mga pagpamatuod Kaniya, ang Iyang Simbahan, ang Iyang mga pamaagi, ug ang Iyang dalan sa pakigsaad. Kita Iyang katawhan, ug Siya mao ang atong Manluluwas.

Ako nahingangha sa unsay gitawag ni Presidente Nelson nga “kahalangdon niini nga higayon” ug mopahayag og tiunay nga pasalamat ngadto sa Ginoo alang sa Iyang buhat. Ako modasig kanato nga magpabiling isog isip Iyang mga disipulo, mga buhing saksi ngadto sa katumanan sa panagna, sa karaan ug sa moderno.

Adunay mga magsupak nga nagsinggit og, “Tan-aw diri ug … Tan-aw didto!” sama lamang sa ilang gibuhat sa panahon ni Propeta Joseph Smith. Hinuon, sa kataposan gamay lang og epekto ang mga misupak niining halangdong buhat. Hinumdomi ang mga pulong ni Propeta Joseph Smith: “Walay dili balaan nga kamot ang makapugong sa buhat sa paglambo; mga panggukod mahimong magkakusog … apan ang kamatuoran sa Dios magpadayon nga maisogon, halangdon, ug gawasnon, hangtod nga kini makasulod sa matag yuta, makabisita sa matag dapit, molukop sa matag nasod, ug makasulti sa matag dunggan, hangtod ang mga katuyoan sa Dios matuman, ug ang Halangdong Jehova moingon nga ang buhat nahuman na.”

Sa akong mga buluhaton niining tuiga, ako nakasaksi gayod sa Ginoo sa pagpadali sa Iyang buhat. Ang Simbahan nagtukod og mga templo nga walay sama kapaspas, nakahatag sa mas daghang miyembro og kahigayonan sa pagsimba ngadto sa balay sa Ginoo. Ikaduha, pinaagi sa misyonaryo nga buhat mas daghang tawo ang nagpasakop sa Simbahan ni Jesukristo kaysa kaniadto. Ug ikatulo, ang edukasyon sa Simbahan anaa na sa daghang lahi-lahi nga paagi sa pagtudlo nga maakses sa tanan niadtong kinsa “[na]ngita niining Jesus.”

Karon ang Simbahan adunay 367 ka templo nga gidesinyo pa, gitukod pa o nag-operate na. Ug alang sa unsang tumong? Ang tubag gipamahayag sa matag templo: “[Pagka]balaan ngadto sa Ginoo.” Ang templo nagbukas sa kahigayonan aron kita makadawat sa labing balaang mga panalangin nga giandam sa atong Amahan sa Langit alang sa matag usa kanato. Mga kaigsoonan, kita nagpadali sa atong pagkabalaan samtang kita magpakabuhi nga takos sa templo, samtang magsimba kita sa balay sa Ginoo, ug samtang kita naghimo og mga pakigsaad uban sa Dios alang sa atong kaugalingon ug alang sa atong mga katigulangan nga anaa sa laing habig sa tabil.

Si Presidente Nelson miingon: “Ang mga pagpangatake sa kaaway paspas kaayo, sa gikusgon ug sa matang. Ang atong panginahanglan nga maanaa sa templo kanunay wala sukad pa nga mas labaw nga gikinahanglan. Mohangyo ko kaninyo nga mainampuong motan-aw kon giunsa ninyo paggamit ang inyong oras.” Sa Iyang balay atong mabati ang balaang presensiya sa Ginoo ug ang langitnong kalinaw.

Sa miaging tuig akong pribilihiyo nga mangulo sa pagpahinungod sa Mendoza Argentina Temple. Sa akong mensahe, akong gihimong pkisayran ang 1926 nga panagna ni Elder Melvin J. Ballard nga ang buhat sa Ginoo hinay nga motubo sa usa ka panahon sa Habagatang Amerika, “sama sa usa ka tugas nga motubo sa hinay-hinay gikan sa usa ka liso. Dili kini mosulbong sa usa ka adlaw,” apan liboan ang mopasakop sa Simbahan, ug ang mga nasod sa Habagatang Amerika mahimong “kalig-on sa Simbahan.” Akong nakita ang katumanan niana nga panagna atubangan gayod sa akong mga mata.

Ang Mendoza, kaniadto usa ka gamay nga liso, nahimong usa ka gamhanang tugas. Ang maong paglambo nasubli latas sa mga kontinente ug sa mga kapuloan sa dagat.

Atong nakita nga ang Ginoo nagpadali sa Iyang buhat sa mga misyon. Niadtong 2024, 80,000 ka misyonaryo ang miserbisyo sa 450 ka misyon. Trayntay sayis niadto bag-ong mga misyon. Sa miaging tuig ang misyonaryo nga buhat nagdala og sobra 308,000 ka bag-ong mga miyembro ngadto sa Simbahan. Labaw pa sa gidaghanon, ang katuyoan sa pagpundok mao ang pagdala og mga kalag ngadto ni Jesukristo ug sa Iyang ebanghelyo.

Ako naghunahuna sa Apostoles nga si Brigham Young ug Heber C. Kimball, kinsa niadtong 1839 misugod sa ilang panaw isip mga misyonaryo ngadto sa mga Isla sa Britanya. Sila nagmasakiton; gibiyaan nila ang mga pamilya nga masakiton ug diha sa kawad-on. Bisan paman, ang duha misakay ngadto sa karwahe, ug samtang makita pa ang ilang mga minahal, si Heber miingon, “Motindog ta ug moabiba kanila.” Ang duha naglisod pagtindog ug misinggit, “Mabuhi, mabuhi ang Israel.”

Akong nakita kanang sama nga kadasig sa buhat sa Ginoo sa Lima, Peru, sa dihang akong nahimamat ang mga misyonaryo gikan sa missionary training center ug sa mga misyon sa Lima. Kaanindot tan-awon! Akong nakita ang pagpadali atubangan gayod sa akong mga mata. Karon adunay pito ka misyon sa siyudad lamang sa Lima.

Sa pagtapos sa among miting, ang mga misyonaryo adunay espesyal nga surprisa alang kanako. Sila nanindog ug nagdungan sa pagsulti “Mabuhi ang Israel.” Dili nako malimtan kadto nga higayon; ako nanghinaot nga unta anaa kamo didto. Atubangan gayod sa akong mga mata mao ang mga misyonaryo nga mibiya “sa mga butang niini nga kalibotan” aron sa pagserbisyo sa Ginoo ug nagtabang sa pagpadali sa Iyang pag-abot.

Atong nakita ang Ginoo nga nagpadali sa mga oportunidad sa edukasyon alang sa atong mga miyembro ug gani sa mga dili miyembro sa tibuok kalibotan. Usa sa mga butang nga kita nailhan isip usa ka simbahan mao ang atong paghatag og gibug-aton sa edukasyon. Ang Ginoo misugo sa sayong bahin sa Pagpahiuli nga “tinguha[on] ang pagkat-on, gani pinaagi sa pagtuon ug usab pinaagi sa pagtuo.” Nahitabo kana karon ug takos sa usa ka kusganon nga pagpahayag sa “hingpit nga kalipay.”

Sa kasamtangan sobra sa 800,000 ka estudyante sa tibuok kalibotan ang na-enroll sa seminary ug institute, ang labing taas nga enrollment sa kasaysayan sa Simbahan. Ang atong kabatan-onan nagpundok sa nagkadaiya nga mga paagi, gikan sa sayong buntag, sa adlaw, ug sa gabii nga mga klase ngadto sa online ug sa balay nga pagtuon. Sila mao ang usa ka gamhanan ug matinud-anon nga batalyon, nag-angkon og kalig-on gikan sa matag-usa samtang sila nagkat-on bahin ni Jesukristo, nagsunod, ug nagpamatuod Kaniya isip Anak sa Dios.

Sa miaging tinglarag ako namulong sa usa ka debosyonal diha sa usa ka arena nga puno sa seminary ug institute nga mga estudyante ug sa ilang mga ginikanan sa University of Utah. Ang ilang pagtambong nagpakita gayod sa ilang tinguha nga masayod ug mosunod ni Jesukristo. Ang akong mensahe niadtong mga estudyante klaro: Paggahin og patas nga oras ngadto sa Dios. Ako mitambag kanila sa pagbalanse sa ilang mga pagtuon uban sa tinuod mas balaan nga pagkat-on, gani pagtuon sa “Anak sa buhing Dios.”

Ako mohangyo sa sama alang sa tanan karon: Bisan unsa man ang anaa sa listahan sa inyong buluhaton, paghatag og patas nga oras, dili salin nga oras, ngadto sa Ginoo diha sa personal nga pagtuon, pamilya nga pagtuon sa Dali, Sunod Kanako, pag-ampo, mga calling sa Simbahan, pagpangalagad, pag-ambit sa sakramento, pagsimba diha sa templo, ug pagpamalandong sa mga butang sa Dios. Ang atong Ginoo ug Manluluwas miingon, “pagtuon kamo gikan kanako … ug makakaplag kamog pahulay alang sa inyong mga kalag.” Tuohi ug lihoka kon unsa ang gisulti sa Ginoo. Ug hatagi Siya og patas nga panahon.

Si Presidente Russell M. Nelson miingon: “Mohangyo ko kaninyo nga ipatigbabaw ang Dios sa inyong kinabuhi. Hatagi Siya og patas nga bahin sa inyong panahon. Kon inyo kining buhaton, panid-i kon unsay mahitabo sa inyong positibo nga espirituhanong paglambo.”

Kita nakakita niana nga paglambo nga nahimo diha sa mga seminary, mga institute, ug mga unibersidad sa Simbahan. Niini nga mga palibot, ang Ginoo mao ang prayoridad. Mao nga kinahanglang Siya gayod ang prayoridad sa matag usa sa atong mga kinabuhi.

Lain nga dapit nga nagpakita sa naglambo nga impluwensiya sa edukasyon diha sa Simbahan mao ang BYU–Pathway Worldwide. Tibuok kalibotan, ang enrollment miabot hapit 75,000 ug nagpadayon ang paspas nga pagtubo. Kadaghanan mga miyembro, ug sobra sa ikatulong bahin anaa sa Africa. Ang katuyoan sa Pathway mao ang paghimo sa edukasyon nga maakses sa daghang tawo. Ang pagkompleto sa mga kurso nagpasabot og akses ngadto sa panarbaho, ug ang akses sa panarbaho nagpasabot og maayong kinabuhi sa mga pamilya ug mas daghang mga oportunidad sa pagserbisyo sa Ginoo.

Sa dihang nakigkita ko sa mga lider sa stake sa Uganda, akong nasayran nga ang tibuok kapangulohan sa stake na-enroll sa BYU–Pathway. Kon mas andam kita sa temporal ug espirituwal nga paagi, mas mapakgang nato ang malipotong mga pag-atake sa kaaway. Hinumdomi ang mga pulong ni Pedro: “Ang inyong kaaway nga mao ang yawa nagalibotlibot sama sa leon nga nagangulob nga nangitag iyang matukob.”

Akong nailhan nga sa taliwala sa maayong balita sa ebanghelyo, adunay daghan nga nakigbisog, kinsa adunay mga hagit sa pagtuo, mga pagduhaduha, ug mga pangutana nga ingon og walay mga tubag. Mga kaigsoonan, si Jesukristo mao ang tubag. Pagsugod diha Kaniya. Pangitaa ang Iyang impluwensiya sa inyong kinabuhi. Paminaw Kaniya. “Kinahanglang dili magkaguol ang inyong kasingkasing,” Siya misulti sa Iyang kataposang mga oras ngadto sa Iyang mga disipulo sa wala pa sa Getsemane, sa wala pa Niya gipas-an ang Iyang krus diha sa kadalanan sa Jerusalem, sa wala pa sa Golgota, diin Iyang gikompleto ang Iyang maulaong sakripisyo—nga Siya lamang ang makabuhat, ang Bugtong Anak sa Dios.

Hibaloi nga Siya nakasabot. Siya midala diha sa Iyang kaugalingon sa tanan natong mga kasal-anan, mga sayop, kauyamot, ug mga kalisod aron nga kita makapuyo pag-usab uban sa atong Langitnong Amahan sa kahangtoran. Siya miingon, “Tan-aw ngari kanako sa matag hunahuna; ayaw pagduhaduha, ayaw kahadlok.” Ang hugot nga pagtuo kang Jesukristo mobayaw kanimo ug moalim sa samaran mong kalag. Salig Kaniya ug inyong mapadali ang inyong pagbalik ngadto “sa mga bukton sa Iyang gugma.”

Akong hatagan og gibug-aton pag-usab ang mga pulong sa atong buhing propeta: “Nakita ba ninyo ang nanghitabo atubanagan gayod sa atong mga mata? Ako nag-ampo nga dili nato mataligam-an ang kahalangdon niini nga higayon! Ang Ginoo nagpadali sa Iyang buhat.” Unta kita isip mga disipulo sa atong adlaw mosinggit, “Mabuhi ang Israel,” samtang kita mag-andam sa pagbalik sa atong Ginoo ug Manluluwas. Sa ngalan ni Jesukristo, amen.