“Kon Maghigugmaay Kamo, Mahibalo ang Tanan nga Kamo Akong mga Tinun-an”
Ang atong gugma sa Dios ug sa Iyang mga anak mao ang gamhanan nga pagpamatuod ngadto sa kalibotan nga kini mao ang tinuod nga Simbahan sa Manluluwas.
Daghang tuig na ang milabay si Harriet ug ako nagbiyahe sa habagatang Germany. Hapit na ang Pasko sa Pagkabanhaw, ug kami midapit og suod nga higala, nga dili miyembro sa Simbahan, sa pag-apil namo sa atong tulumanon sa pagsimba sa Dominggo. Kami nahigugma niining mahal nga higala, maong normal ug natural lang nga mopakigbahin kaniya unsay among gibati mahitungod sa Manluluwas ug sa Iyang Simbahan ug sa pagdapit kaniya nga mouban ug motan-aw! Gidawat niya ang imbitasyon ug miapil namo sa mga miting sa duol nga branch.
Kon kamo nakadala og higala ngadto sa simbahan sa unang higayon, tingali makasabot kamo sa akong gibati nianang buntag sa Dominggo. Gusto ko nga perpekto ang tanan. Ang among higala taas og edukasyon, espirituwal nga tawo. Ako malaomon kaayo nga ang mga miting niini nga branch makahatag og maayong impresyon kaniya ug morepresentar og maayo sa Simbahan.
Ang branch magmiting sa pipila ka giabangan nga mga kwarto sa ikaduhang andana sa tindahan sa grocery. Aron makaadto didto, kinahanglan kaming mosaka sa hagdanan sa bilding, moagi sa isog nga baho gikan sa mga baligya nga gibutang didto.
Samtang nagsugod ang panagtigom alang sa sakramento, naghunahuna ko bahin sa akong higala nga nakasinati niini sa unang higayon, ug wala koy mahimo apan nakamatikod og mga butang nga dili komportable. Ang pagpanganta, pananglitan, dili gayod pareha sama sa Tabernacle Choir. Ang lihokan, banha nga mga bata madungog atol sa sakramento. Ang mga mamumulong naningkamot, apan dili sila hanas sa pagpamulong sa publiko. Naglingkod ko nga dili komportable diha sa miting, naglaom nga basin sa Sunday School mas maayo.
Dili sad.
Sa tibuok buntag nabalaka ko unsa kaha ang gihunahuna sa among higala niini nga simbahan nga among gidad-an niya.
Pagkahuman, sa among pagpauli, nakigsulti ko sa among higala. Gusto nakong ipasabot nga kini usa lang ka gamay nga branch ug wala ni magrepresentar sa tibuok Simbahan. Apan sa wala pa ko makasulti, miingon siya.
“Nindot kadto,” miingon siya.
Wala ko makatingog.
Mipadayon siya, “Nadani ako pag-ayo kon giunsa sa mga tawo pagtagad ang usag usa sa inyong simbahan. Ingon og sila gikan sa lain-laing mga gigikanan, ug bisan pa klaro nga tinud-anay nilang gihigugma ang usag usa. Mao kini ang akong gihunahuna nga gusto ni Kristo sa Iyang Simbahan.”
Maong, nagdali ko sa paghinulsol sa akong mahukmanon nga kinaiya. Ako gusto unta nga walay sayop ang mga miting aron madani ang akong higala. Apan ang nakab-ot sa mga miyembro niini nga branch usa ka hingpit nga pagsunod sa ehemplo ni Kristo pinaagi sa pagpakita og gugma, pagkamabination, pailob, ug kaluoy.
Kana nga Pagtuo Basin Madugangan dinhi sa Yuta
Minahal nakong kaigsoonan, gimahal nako Ang Simbahan ni Jesukristo sa mga Santos sa Ulahing mga Adlaw. Mao kini ang tinuod ug buhi nga Simbahan sa Manluluwas, ug nagtudlo kini sa gipahiuli nga kahingpitan sa ebanghelyo ni Jesukristo. Ang Iyang gahom ug awtoridad sa pagkapari ania dinhi. Si Jesukristo personal nga nangulo niini nga Simbahan, pinaagi sa mga sulugoon nga Iyang gitawag ug gitugotan, ug pinaagi sa usa ka buhi nga propeta, bisan si Presidente Russell M. Nelson. Ang Manluluwas mihatag sa mga Santos sa Ulahing mga Adlaw og talagsaong misyon sa pagpundok sa mga anak sa Dios ug sa pag-andam sa kalibotan alang sa Ikaduhang Pag-anhi sa Manluluwas. Ako mosaksi nga kining tanan tinuod.
Apan importante ang paghinumdom nga kon ang kadaghanan sa mga tawo makasinati sa Simbahan ni Jesukristo sa unang higayon, wala sila maghunahuna sa awtoridad o mga ordinansa sa pagkapari o sa pagpundok sa Israel. Unsay gusto nilang mamatikdan, labaw sa tanan, kon unsay ilang gibati kon uban sila kanato ug giunsa nato pagtagad ang usag usa.
“Paghigugmaay kamo,” miingon si Jesus. “Mahibalo ang tanan nga kamo Akong mga tinun-an.” Sa kasagaran, ang unang pagpamatuod sa usa ka tawo bahin ni Jesukristo moabot kon siya mobati og gugma gikan sa mga tinun-an ni Jesukristo.
Ang Manluluwas mipahayag nga Siya mipahiuli sa Iyang Simbahan “aron ang pagtuo usab madugangan dinhi sa yuta.” Busa, kon ang mga tawo mobisita sa atong mga miting sa Simbahan, ang Manluluwas gusto nga sila mobiya nga adunay mas lig-on nga pagtuo diha Kaniya! Ang gugma sa atong mga higala nga mabati diha kanato mas mopaduol nila ngadto ni Jesukristo! Mao kana ang atong yanong mga tumong matag higayon kita magpundok.
Si bisan kinsa nga nagtinguha og mas lig-ong pagtuo diha ni Kristo, o mas duol nga koneksiyon sa Langitnong Amahan kinahanglang mobati nga anaa sa panimalay sa Ang Simbahan ni Jesukristo sa mga Santos sa Ulahing mga Adlaw. Ang pagdapit kanila sa atong mga miting mahimong normal ug natural sama sa pagdapit nila ngadto sa atong panimalay.
Ang Modelo ug ang Tinuod
Karon, nakaamgo ko nga ako naghulagway sa modelo. Ug niining mortal nga kinabuhi, talagsa ra kita makasinati sa modelo. Ug “hangtod sa hingpit nga adlaw” aduna gayoy gintang kanunay tali sa modelo ug sa tinuod. Busa, unsa ang atong angay nga buhaton kon ang Simbahan dili mabati nga sama sa hingpit nga adlaw? Kon, sa bisan unsa nga rason, ang atong ward wala pa moamuma sa hingpit nga pagtuo o gugma? O kon mabati nga kita wala dawata?
Usa ka butang nga kinahanglan nga dili nato buhaton mao ang dili pagtuo sa modelo!
Ang ulohan nga pahina sa Basahon ni Mormon naglakip sa importante nga pahimangno: “Kon aduna may kasaypanan,” matod pa niini, “kini mga sayop sa mga tawo; mao nga, ayaw ipanghimaraot ang mga butang sa Dios.”
Mahimo ba nga ang usa ka basahon—o usa ka simbahan o usa ka tawo—adunay “kasaypanan” ug “mga sayop” ug sa gihapon mao ang buhat sa Dios?
Ang tubag usa ka lanog nga oo!
Mao nga, samtang kita naningkamot sa pagtuman sa taas nga mga sumbanan sa Ginoo, magmapailobon usab kita sa usag usa. Ang matag usa nato nagkat-on pa gihapon, ug kitang tanan nagsalig sa Manluluwas alang sa bisan unsa nga kauswagan nga atong mahimo. Tinuod kana alang nato isip mga indibidwal, ug tinuod kini sa gingharian sa Dios sa yuta.
Ang Ginoo nagdapit nato dili lamang moapil sa Iyang gingharian apan usab matinguhaon nga moapil sa pagtukod niini. Ang Dios naghunahuna og katawhan nga “usa sa kasingkasing ug usa sa hunahuna.” Ug aron anaa sa usa ka kasingkasing, kinahanglan nga kita adunay putli nga mga kasingkasing, ug kana nagkinahanglan og dakong kausaban sa kasingkasing.
Apan kana wala magpasabot sa pag-usab sa akong kasingkasing aron motakdo sa inyong kasingkasing. Ni nagpasabot kini sa pag-usab sa inyong kasingkasing aron motakdo sa akong kasingkasing. Nagpasabot kini nga kitang tanan mousab sa atong mga kasingkasing aron motakdo sa Manluluwas.
Kon kita wala pa diha, hinumdomi: nga uban sa tabang sa Ginoo, walay imposible.
Takos ug Mahisakop
Ug kon kamo mobati gani nga dili kamo takos, palihog hibaloi nga kamo wala mag-inusara. Dili ba kitang tanan nahimutang sa sitwasyon sa kinabuhi sa dihang mibati kita nga sama sa estranyo sa mga tawo nga atong kaila? Ako nakasinati niini kadaghan. Sa dihang nag-edad ko og 11 anyos, ang akong pamilya napugos sa pagbiya sa among panimalay ug mibalhin ngadto sa dili pamilyar nga dapit. Ang tanan lahi sa unsay akong naandan. Ug ang akong tono klaro ngadto sa ubang bata nga ako lahi sa unsay ilang naandan. Sa usa ka higayon sa dihang ako desperado nga nagkinahanglan og amigo ug pagkasakop, gibati nako nga masulub-on ug walay labot.
Dinhi sa yuta, kadaghanan sa mga kalainan nga atong mamatikdan—ang mga kalainan nga gigamit sa uban sa pagkategoriya sa matag usa—adunay kalabotan sa yutan-ong mga butang: pisikal nga hitsura, nasyonalidad, pinulongan, sininaan, mga kostumbre, ug uban pa. Apan ang “Dios dili motan-aw sa mga butang sama sa pagtan-aw sa mga tawo. Ang mga tawo motan-aw sa hitsura sa gawas, apan ang Ginoo motan-aw sa kasingkasing.”
Gikan sa Iyang panglantaw, adunay usa ka kategoriya nga mag-una sa tanan: anak sa Dios. Ug kitang tanan hingpit nga haom niini.
Natural lang nga gusto nga mahimong kauban sa mga tawo nga motan-aw, mosulti, mobuhat, ug mohunahuna sama nato. Adunay dapit alang niana.
Apan sa Simbahan sa Manluluwas, pundokon nato ang tanang anak sa Dios nga andam nga pundokon ug nangita sa kamatuoran. Dili ang atong pisikal nga hitsura, ang atong politikal nga mga panglantaw, ang atong kultura, o gigikanan ang naghiusa nato. Dili ang atong komon nga mga kasinatian o kaagi ang naghiusa kanato. Kini ang atong komon nga tumong, ang atong gugma alang sa Dios ug sa silingan, ang atong pasalig ngadto ni Jesukristo ug sa Iyang gipahiuli nga ebanghelyo. Kita “nahiusa kang Kristo.”
Ang panaghiusa nga atong gitinguha dili nga ang tanan mobarog sa samang mga opinyon; kon dili ang tanan magtinguha sa samang tumong—ngadto ni Jesukristo. Kita nahiusa, dili tungod kon diin kita gikan apan kon asa kita naningkamot nga moadto, dili tungod kon kinsa kita apan kon kinsa ang atong gitinguha nga mamahimo.
Mao kana ang tanan mahitungod sa tinuod nga Simbahan ni Kristo.
Usa ka Lawas
Kon kamo nahigugma sa Dios, kon kamo gusto nga mas makaila Kaniya pinaagi sa pagsunod sa Iyang Anak, nan nahisakop kamo dinhi. Kon kamo maikagong nagtinguha sa pagtuman sa mga sugo sa Manluluwas—bisan og kamo dili pa hingpit—nan kamo hingpit nga takos alang sa Ang Simbahan ni Jesukristo sa mga Santos sa Ulahing mga Adlaw.
Ug unsay mahitabo kon kamo lahi gikan sa mga tawo sa inyong palibot? Kana dili makahimo ninyo nga dili takos—makahimo kini ninyo nga gikinahanglan nga bahin sa lawas ni Kristo. Ang tanan gikinahanglan sa lawas ni Kristo. Ang mga dunggan makasabot sa mga butang nga dili mahimo sa mga mata. Ang tiil makahimo sa mga butang nga dili epektibo sa mga kamot.
Wala kana magpasabot nga ang inyong trabaho mao ang pag-usab sa tanan nga mahimong sama ninyo. Apan nagpasabot kana nga kamo adunay butang nga importante nga ikatampo—ug kamo adunay butang nga importante nga makat-onan!
Usa ka Tingog
Sa matag sesyon sa kinatibuk-ang komperensiya, kita napanalanginan sa makadasig nga musika gikan sa maayo kaayo nga mga choir. Samtang kamo maminaw, tingali makamatikod kamo nga ang mga mag-aawit dili tanan mokanta sa sama nga mga nota. Usahay ang usa ka seksiyon modala sa melodiya, usahay lain. Apan silang tanan nagtampo sa matahom nga tingog, ug sila hingpit nga nagkahiusa. Ang matag miyembro sa choir adunay sama nga sentro nga tumong: sa pagdayeg sa Dios ug sa pagbayaw sa atong mga kasingkasing ngadto Kaniya. Ang matag usa adunay iyang hunahuna ug kasingkasing nga nakatutok sa samang balaan nga katuyoan. Ug kon kana mahitabo, sila sa tinuod mahimong usa ka tingog.
Kon kamo dili pa usa ka miyembro sa Ang Simbahan ni Jesukristo sa mga Santos sa Ulahing mga Adlaw, kami modapit kaninyo sa pag-apil namo samtang mag-ambahan kita sa “awit sa matubsanong gugma” sa Manluluwas. Kami nagkinahanglan kaninyo. Kami nagmahal kaninyo. Ang Simbahan mahimong mas maayo uban sa inyong mga paningkamot sa pagserbisyo sa Ginoo ug sa Iyang mga anak.
Kon kamo nakapakita na, pinaagi sa bunyag, pinaagi sa paghimo og mga pakigsaad uban sa Dios, sa inyong tinguha sa “pag-ipon sa pundok sa Dios, ug pagatawgon nga iyang katawhan,” salamat nga nahimo kamong kabahin niining mahinungdanon ug balaan nga buhat ug sa pagtabang sa paghimo sa Simbahan ni Jesukristo kon unsa ang gusto sa Manluluwas nga kini mamahimo.
Sa akong nakat-onan gikan sa akong higala sa Germany, ang atong gugma alang sa Dios ug sa Iyang mga anak mao ang gamhanan nga pagpamatuod ngadto sa kalibotan nga kini mao ang tinuod nga Simbahan sa Manluluwas.
Hinaot nga ang Dios mopanalangin kanato nga mapailobon apan makugihon nga nagtinguha sa pagsunod sa mga modelo nga gipakita sa atong Manluluwas, Manunubos ug Ginoo kanato—aron ang tanan masayod nga kita Iyang mga tinun-an. Sa sagradong ngalan ni Jesukristo, amen.