Ang Kapanahonan sa Pagpahiuli sa Tanan nga mga Butang

Ang pormal nga organisasyon sa Ang Simbahan ni Jesukristo sa mga Santos sa Ulahing mga Adlaw mao ang kulminasyon sa sunod-sunod nga milagrosong mga kasinatian. Ang una niini nga mga kasinatian nahitabo sa nag-unang 10 ka tuig sa ibabaw nga bahin sa estado sa New York.

Sa tingpamulak sa 1820, usa ka batan-ong lalaki nga ginganlan og Joseph Smith miadto sa kakahoyan duol sa iyang panimalay aron mag-ampo. Duna siyay mga pangutana kabahin sa kaluwasan sa iyang kalag, ug nagtinguha nga masayod kon “hain sa tanan nga mga [simbahan] ang husto, nga [siya] unta masayod asa magpasakop.” Misalig si Joseph nga ang Dios motubag sa iyang pag-ampo ug mogiya kaniya.

Palihog timan-i nga si Joseph wala lamang mag-ampo aron masayod unsa ang husto. Kon dili, nag-ampo siya aron masayod unsa ang husto aron siya makahimo sa unsay husto. Nangutana si Joseph inubanan sa pagtuo ug determinadong mobuhat pinasubay sa mga tubag nga iyang nadawat.

“Agig [tubag] sa sinsero niyang pag-ampo, ang Dios nga Amahan ug ang Iyang Anak, si Jesukristo, mipakita kang Joseph ug mipasiugda sa ‘pagpabalik sa tanang mga butang’(Mga Buhat 3:21) sama sa gipanagna diha sa Biblia. Dinhi niini nga panan-awon, iyang nahibaloan nga human sa pagkamatay sa orihinal nga mga Apostoles, ang Simbahan ni Kristo sa Bag-ong Tugon nawala sa kalibotan.” Si Joseph Smith himoong instrumento sa pagpahiuli sa makausa pa sa doktrina, sa awtoridad, ug sa mga pakigsaad ug mga ordinansa sa karaan nga Simbahan sa Manluluwas.

Mipamatuod si Joseph nga: “Ako nakakita og duha ka Personahe, kansang kahayag ug himaya dili mahulagway, nagtindog ibabaw kanako diha sa kawanangan. Usa kanila misulti ngari kanako, nagtawag kanako sa akong ngalan ug miingon, nagtudlo ngadto sa lain—Kini mao ang Akong Hinigugmang Anak. Paminaw Kaniya!”

Pinaagi niini nga panan-awon ug sa nagsunod nga balaang mga kasinatian, nasabtan ni Joseph Smith nga ang Dios ug si Jesukristo nakaila kaniya isip usa ka indibidwal, nagpakabana sa iyang mahangtoron nga kaluwasan, ug adunay misyon nga ipabuhat kaniya. Nahibaloan usab niya ang mahinungdanong mga leksiyon mahitungod sa mga hiyas, kinaiya, ug mga pagkahingpit sa Dios nga Kapangulohan—ug nga ang Amahan ug ang Anak managlahi ug lainlaing Mga Binuhat. Si Jesukristo tinuod gayod nga Anak sa Dios sa espiritu ug sa unod.

Namahayag si Joseph Smith nga ang Langitnong Amahan ug si Jesukristo mga binuhat nga may lawas ug unod. Miingon siya, “Ang Amahan adunay lawas nga unod ug mga bukog nga mahikap sama sa tawo, ang Anak usab, apan ang Espiritu Santo walay lawas nga unod ug mga bukog, apan usa ka personahe sa Espiritu.”

Mopamatuod ko nga ang pagbisita sa Amahan ug sa Anak ngadto ni Joseph Smith mao ang sinugdanang hitabo sa halapad nga “pagpahiuli sa tanang mga butang nga gipamulong sa ba-ba sa tanang balaan nga mga propeta sukad sa sinugdanan sa kalibotan.”

Ang ikaduhang sunod-sunod nga milagrosong mga kasinatian nga misangpot sa pormal nga pag-organisar sa gipahiuli nga Simbahan sa Manluluwas mao ang paghubad ug pag-abot sa Basahon ni Mormon.

“Si Joseph Smith gihatagan sa gasa ug gahom sa Dios sa paghubad sa usa ka karaan nga rekord: ang Basahon ni Mormon—Lain nga Tugon ni Jesukristo. … Kining sagrado nga teksto naglakip og usa ka asoy sa personal nga pagpangalagad ni Jesukristo taliwala sa katawhan sa Kasadpang Bahin sa Kalibotan human gayod sa Iyang Pagkabanhaw. [Ang Basahon ni Mormon] nagtudlo sa katuyoan sa kinabuhi ug nagpasabot sa doktrina ni Kristo, nga mahinungdanon ngadto niana nga katuyoan. Isip kauban nga kasulatan sa Biblia, ang Basahon ni Mormon nagpamatuod nga ang tanang tawhanong nilalang mga anak nga lalaki ug mga anak nga babaye sa usa ka mahigugmaong Amahan sa Langit, nga Siya adunay balaanon nga plano alang sa atong kinabuhi, ug nga ang Iyang Anak, si Jesukristo, namulong karon sa samang paagi sa karaang panahon.”

Isip mga miyembro sa gipahiuli nga Simbahan sa Manluluwas,“[Kita] nagtuo sa Biblia nga pulong sa Dios kon kini tukma nga pagkahubad; [kita] nagtuo usab sa Basahon ni Mormon nga pulong sa Dios.” Ang Basahon ni Mormon mao ang lahi nga tugon ni Jesukristo, nagmatuod sa pagkatinuod sa Biblia, ug nagpahiuli sa yano ug labing bililhong mga kamatuoran nga nawala gikan sa Biblia.

Ang Simbahan ni Jesukristo sa mga Santos sa Ulahing mga Adlaw nagtudlo nga ang orihinal nga Simbahan nga giestablisar sa Manluluwas, kauban sa balaanong awtoridad niini, doktrina, ug mga pakigsaad ug mga ordinansa, nawala sa yuta. Isip usa ka bahin sa gipanagna nga pagpahiuli sa tanan nga mga butang sa ulahing mga adlaw, ang karaang mga propeta ug apostoles personal gayod nga mitugyan sa awtoridad sa pagkapari ngadto ni Joseph Smith ug mihatag sa mga yawe sa pagkapari ngadto kaniya. Mao kini ang ikatulo sa sunodsunod nga milagrosong mga kasinatian nga misangpot sa pormal nga pagkaorganisar sa gipahiuli nga Simbahan sa Manluluwas.

Ang awtoridad sa pagkapari nagtugot sa mga sulugoon sa Dios sa “pagrepresentar [Kaniya] ug sa paglihok pinaagi sa Iyang ngalan.” “Ang mga yawe sa pagkapari mao ang awtoridad sa paggiya sa paggamit sa pagkapari alang sa mga anak sa Dios.”

Ubos sa direksiyon sa Amahan ug sa Anak, ang nabanhaw nga si Juan Bautista mipahiuli, niadtong 1829, sa awtoridad sa pagbunyag pinaagi sa pagpaunlod alang sa kapasayloan sa mga sala. Nianang mao gihapon nga tuig, tulo sa orihinal nga Napulog Duha ka Apostoles—si Pedro, Santiago, ug Juan—mipahiuli sa pagka-apostol ug sa mga yawe sa awtoridad sa pagkapari.

Unom ka tuig human sa pormal nga pagkaorganisar sa Simbahan, didto sa Kirtland Temple, si Moises, Elias, ug si Elijah mitugyan ngadto ni Joseph sa dugang nga awtoridad nga gikinahanglan sa pagtuman sa buluhaton sa Dios sa ulahing mga adlaw.

Gitugyan ni Moises ang yawe sa pagpundok sa Israel.

Gitugyan ni Elias ang dispensasyon sa ebanghleyo ni Abraham, lakip ang pagpahiuli sa pakigsaad ni Abraham.

Gitugyan ni Elijah ang mga yawe sa gahom sa pagselyo, nagsangkap sa awtoridad nga nagtugot sa mga ordinansa nga ipahigayon sa kalibotan nga magbugkos hangtod sa kahangtoran, sama sa pagpundok sa mga pamilya sa usa ka mahangtoron nga mga relasyon nga molapas sa kamatayon.

Dihang gihubad ni Joseph Smith ang Basahon ni Mormon, nakadawat siya og mga pagpadayag nga nagpasabot nga ang Simbahan ni Jesukristo pagatukoron og balik. Apan ang Ginoo misugo ni Joseph sa dili dayon pag-organisar sa Iyang Simbahan. Kondili, “pinaagi sa espiritu sa panagna ug pagpadayag” ang Ginoo mipadayag ngadto ni Joseph “sa tukma nga adlaw nga … [siya] kinahanglan nga mopadayon sa pagtukod sa Iyang Simbahan sa makausa pa sa ibabaw sa yuta.”

Ang Simbahan giorganisar sa tukma nga pagkasunod-sunod human lamang sa pagpahiuli sa pagkapari ug sa pagmantala sa Basahon ni Mormon. Aduna nay unang mga kopya sa Basahon ni Mormon pagka-Marso 26, 1830, ug ang Simbahan pormal nga naorganisar pagka-Abril 6.

“Ang Simbahan ni Jesukristo sa mga Santos sa Ulahing mga Adlaw … mao ang gipahiuli nga Simbahan ni Kristo sa Bag-ong Tugon. Kini nga Simbahan nakaangkla sa hingpit nga kinabuhi sa ulohang bato sa pamag-ang niini, si Jesukristo, ug diha sa Iyang walay kinutoban nga Pag-ula ug literal nga Pagkabanhaw. Si Jesukristo mitawag na usab og mga Apostol ug mihatag kanila og awtoridad sa pagkapari. Nagdapit Siya kanatong tanan sa pagduol ngadto Kaniya ug sa Iyang Simbahan, sa pagdawat sa Espiritu Santo, sa mga ordinansa sa kaluwasan, ug sa pag-angkon og malungtarong kalipay.”

Ang pagpakita sa Amahan ug sa Anak ngadto kang Joseph Smith, ang paghubad ug pagtungha sa Basahon ni Mormon, ug ang pagpahiuli sa awtoridad ug mga yawe sa pagkapari mao ang nag-unang mga gikinahanglan sa pag-organisar sa gipahiuli nga Simbahan sa Ginoo 195 na ka tuig ang milabay karon.

Sa Daang Tugon, si propeta Daniel mihubad sa usa ka damgo mahitungod sa bato nga pikason gikan sa bukid nga walay kamot nga gamiton ug mokaylap ug mopuno sa tibuok yuta. Usa ka tuig human maorganisar ang Simbahan, ang Ginoo mitudlo ni Joseph Smith nga ang mga yawe sa gingharian sa Dios “gitugyan na usab ngadto sa tawo sa yuta” ug ang “ebanghelyo [ni Jesukristo] mokaylap ngadto sa mga kinatumyan sa yuta, sama sa bato nga gipikas mokaylap gikan sa bukid nga walay gigamit nga mga kamot.”

Mopamatuod ko: Ang Ginoo nagtuman sa Iyang saad. Ang Simbahan sa Manluluwas giestablisar sa tibuok kalibotan ug mao ang instrumento diin ang Dios “[mo]hiusa diha kang Kristo sa tanang butang, mga butang diha sa langit ug mga butang dinhi sa yuta, gani diha kaniya.”

Ang buhat sa Ginoo sa ulahing mga adlaw “mao ang katuyoan nga nakapadasig sa mga tawo sa Dios sa tanang panahon; usa kini ka tema diin ang mga propeta, mga pari ug mga hari mipuyo uban sa talagsaon nga kalipay; sila nagpaabot niini uban sa malipayon nga pagpaabot hangtod karong adlawa sa atong pagpuyo; ug mipabuhagay og langitnon ug malipayon nga mga pagpaabot nanag-awit sila ug nanagsulat ug nanagna niining atong panahon.”

Niining labing mahinungdanon ug kataposan sa tanang mga dispensasyon sa ebanghelyo, “ang tibuok ug kompleto ug hingpit nga pagkahiusa, ug lig-on nga pagkatakdo sa mga dispensayon, ug mga yawe, ug mga gahom, ug mga himaya kinahanglan nga mahitabo, ug ipadayag gikan sa mga adlaw ni Adan bisan hangtod karon nga panahon. Ug dili lamang kini, apan kadto nga mga butang nga wala pa gayod mapadayag gikan sa pagtukod sa kalibotan … ipadayag … karon, ang dispensasyon sa kahingpitan sa mga panahon.”

Si Propeta Joseph midugang sa pagpasabot nga, “Ang tanan nga mga ordinansa ug mga katungdanan nga sukad kaniadto gikinahanglan sa [Pagkapari], ubos sa mga direksyon ug kasugoan sa Makagagahom sa bisan unsa nga dispensasyon, ang tanan anha sa kataposan nga dispensasyon … sa pagpahinabo sa pagpahiuli nga gipamulong sa mga ba-ba sa tanang mga Balaang Propeta.”

Akong gisulayan sa pag-sumada ang unang mga elemento sa labing importante ug mahimayayon nga “maayong balita” nga madawat ni bisan kinsa sa bisan asa sa kalibotan—ang mensahe nga si Ginoong Jesukristo mipahiuli sa Iyang ebanghelyo ug Simbahan niining ulahing mga adlaw.

Gidapit ko ang tanan sa pagkat-on ug pagprobar niini nga mensahe. Mosaad ko nga ang mga indibidwal nga “mainampoong magtuon sa mensahe sa Pagpahiuli ug molihok uban sa pagtuo mapanalanginan [pinaagi sa gahom sa Espiritu Santo] nga makaangkon og ilang kaugalingong pagsaksi sa kabalaan niini ug sa katuyoan niini sa pag-andam sa kalibotan alang sa gisaad nga Ikaduhang Pag-anhi sa atong Ginoo ug Manluluwas, si Jesukristo.” Samtang mag-ampo kamo nga matinguhaon nga adunay hunahuna nga makadawat ug molihok sa tubag nga gikan sa Dios, sama sa gibuhat sa batan-ong si Joseph Smith, ang inyong kapasidad sa pag-ila ug pagsanong nianang balaanong saksi molambo.

Ako mosaksi nga ang Dios ang Amahan sa Kahangtoran mao ang atong Amahan. Mopamatuod ko ug mosaksi nga si Jesukristo mao ang Hinigugmang Anak sa Amahan ug ang Iyang Bugtong nga Anak sa unod. Siya ang atong Manluluwas ug Manunubos.

Ug malipayon akong mosaksi nga ang Amahan ug ang Anak mipakita sa bata nga si Joseph Smith, nga maoy sinugdanan sa Pagpahiuli sa ebanghelyo ni Jesukristo sa ulahing mga adlaw. Ang Basahon ni Mormon mao ang lain nga tugon ni Jesukristo ug naglangkob sa pulong sa Dios. Ang awtoridad sa pagkapari sa pagrepresentar sa Manluluwas ug sa paglihok pinaagi sa Iyang ngalan ania na usab sa yuta. Ug Ang Simbahan ni Jesukristo sa mga Santos sa Ulahing mga Adlaw mao ang gipahiuli nga Simbahan ni Kristo sa Bag-ong Tugon. Mohatag ko sa akong may kaseguradohan nga pagsaksi nga tanan kini nga butang tinuod sa sagrado nga ngalan ni Ginoong Jesukristo, amen.