Elder John D. Amos

Niadtong 2020, si Elder John D. Amos nakadawat og makapausab sa kinabuhi nga calling nga mahimong presidente sa misyon alang sa Baton Rouge Louisiana Mission. Daghang butang sa iyang kinabuhi nagkinahanglan og kausaban tungod sa tawag, apan si Elder ug si Sister Amos malipayong midawat sa buluhaton inubanan sa hugot nga pagtuo.

“Ang desisyon ug ang pasalig nahimo sa dugay na nga panahon,” miingon si Elder Amos. “Kon ang Ginoo motawag, motubag lang kita.”

Si John D. Amos natawo niadtong Nobiyembre 2, 1961, sa Lafayette, Louisiana, ngadto nila ni John N. Amos Sr. ug Dorothy Victorian Amos. Nahimamat niya ang iyang umaabot nga asawa, nga si Michelle Evette Wright, pinaagi sa mga klase nga dungan nilang gikuha sa kolehiyo, pareha og major sa electrical engineering.

Si Michelle, nga miyembro na sa Simbahan, midapit ni John sa usa ka sayaw sa simbahan sa ilang unang pag-date. Human niana, nagsugod siya sa pagkat-on pa og dugang mahitungod sa Simbahan ug sa importante nga tahas sa Manluluwas sa gipahiuli nga ebanghelyo.

“Ang tanan mahitungod ni Jesukristo,” miingon siya. “Siya ang sentro sa tanang butang.”

Si Elder Amos ug Michelle naminyo niadtong Hunyo 9, 1990, sa the Atlanta Georgia Temple. Sila adunay tulo ka anak ug unom ka apo.

Si Elder Amos nakaangkon og mga degree sa electrical ug nuclear engineering. Atol sa iyang panarbaho, nagserbisyo siya sa Navy sa Estados Unidos, nagtrabaho sa Siemens Energy Inc., ug nagtudlo sa University of Central Florida.

Ang iyang nahaunang mga calling sa Simbahan naglakip sa Area Seventy (North America Southeast Area), presidente sa misyon, magtatambag sa kapangulohan sa stake, bishop, magtatambag sa bishopric, presidente sa Sunday School sa ward, executive secretary sa ward, lider sa grupo sa mga high priest, ug lider sa nursery.