Elder Brik V. Eyre

Si Elder Brik V. Eyre mitawag sa iyang kasinatian sa pagserbisyo isip presidente sa Arizona Phoenix Mission og tulo ka tuig “nga dili katuohan.”

Sa pagserbisyo kauban sa iyang asawa, si Susan, miingon siya, “Pakighiusa kamo sa inyong kompanyon, … ug maong dungan kaming nagserbisyo.” Ug sa pagserbisyo uban sa gatosan ka full-time nga mga misyonaryo, siya midugang, “Wala ko kahibalo nga mapasabot ba nako ang talagsaong panalangin ang paggahin sa matag adlaw uban sa gitugotan nga mga representante ni Jesukristo sulod sa tulo ka tuig.”

Si Brik Vern Eyre natawo niadtong Enero 17, 1964, sa Logan, Utah, ngadto nila ni Vern Bingham Eyre ug Emma Rae Anderson Eyre. Siya adunay lima ka magulang nga babaye ug pipila ka katigulangan nga apil sa unang mga miyembro sa Simbahan.

Si Elder Eyre nagserbisyo sa Guatemala Guatemala City Mission. Siya nakigminyo ni Susan Zari Rahimzadeh sa Logan Utah Temple niadtong Hunyo 27, 1987. Ang amahan ni Sister Eyre gikan sa katigulangan nga Muslim, ug ang iyang inahan gikan sa katigulangan nga Santos sa Ulahing mga Adlaw. Ang mga Eyre, nga nagpuyo sa Park City, Utah, sa panahon sa iyang pagkatawag, adunay lima ka hamtong nga mga anak.

Si Elder Eyre nakaangkon og bachelor’s degree sa finance gikan sa Utah State University ug usa ka master of business administration gikan sa University of Tulsa. Nagtrabaho siya sa industriya sa medikal nga mga produkto, lakip alang sa Baxter International isip senior vice president ug presidente sa kompaniya sa rehiyon sa Amerika, ug sa labing bag-o isip usa ka sakop sa hunta sa HemaSource.

Sa panahon sa iyang pagkatawag si Elder Eyre, nagserbisyo siya isip Area Seventy. Nagserbisyo usab siya isip usa ka presidente sa stake, magtatambag sa kapangulohan sa stake, high councilor, bishop, presidente sa Young Men sa ward, ug magtutudlo sa sayo sa buntag nga seminary.