Ikaw Mao ang Kristo
(Mateo 16:16)
Gusto nato ang atong mga anak nga motuo ni Jesukristo, mahisakop ni Jesukristo ug sa Iyang Simbahan pinaagi sa pakigsaad, ug maningkamot nga mahimong sama ni Jesukristo.
Sa dihang ang among anak nga lalaki nga si Eli naa sa grade four, ang iyang klase nagmugna og hinimo-himo nga gobyerno diin siya gipili sa iyang mga kaubanan nga magsilbi isip huwes sa klase. Usa ka adlaw ang naglingkod nga huwes nga gikan sa Ikaduha nga Distrito nga Korte sa Utah mibisita, mibutang sa iyang opisyal nga kupo ngadto ni Eli, ug dayon mipahigayon og pagpanumpa sa katungdanan alang sa ilang klase. Kini nakapadasig sa batan-on ug madawaton nga pagkatawo ni Eli nga magtuon pagka-abogado ug sa Maghuhukom Mismo, si Jesukristo.
Human sa mga tuig sa makugihong paningkamot, si Eli nakadawat og pagdapit alang sa usa ka interbiyo sa usa sa iyang labaw nga gipili nga eskwelahan sa abogasiya. Siya mipahayag, “Ma, gipangutana ko og 10 ka pangutana. Ang kataposang pangutana mao ang, ‘Diin ka nagkuha sa imong moral nga kompas?’ Akong gipahayag nga sa tibuok kasaysayan ang katawhan mikuha sa mga sistema sa moralidad pinaagi sa pagbase sa ilang kinabuhi gikan sa orihinal nga sumbanan. Ang orihinal nga sumbanan sa moralidad nga akong gipaningkamotan nga basehan sa akong kinabuhi mao ang kang Jesukristo. Akong gipahayag nga kon ang tanang katawhan mosunod sa mga pagtulun-an ni Jesukristo diha sa Wali sa Bukid, ang kalibotan mahimong mas maayo, mas malinawon nga dapit.” Dayon ang interbiyo natapos, ug naghunahuna siya sa iyang kaugalingon, “Wala na ang akong mga pangandoy sa pagkabata. Walay bisan usa sa sekular nga akademya ang ganahang maminaw mahitungod ni Jesukristo.”
Duha ka semana human niadto, si Eli nakadawat og scholarship. Sa wala pa mopasalig, gibisitahan namo ang kampus. Ang eskwelahan sa abogasiya mura og kastilyo nga gibutang ibabaw sa bungtod nga nag-ambo sa usa ka matahom nga linaw. Ang makapahingangha, samtang naglakaw kami sa nindot kaayo nga librarya ug halangdon nga mga hawanan, nakita namo sa mga bandila ug gikulit sa mga bato ang mga hiyas gikan sa Wali sa Bukid.
Ang Wali sa Bukid ang kataposan nga labing maayo nga hinumdoman nga diskurso nga nahatag sukad. nagsugod sa mga pagtulun-an niini. Walay lain nga wali ang makatabang nato nga mas makasabot sa kinaiya ni Jesukristo, sa Iyang balaanong mga hiyas, ug sa atong kataposan nga katuyoan nga mahimong sama Kaniya.
Ang tibuok kinabuhi nga pagkadisipulo ni Jesukristo magsugod sa atong mga panimalay—ug sa Primary nga mag-edad og 18 ka bulan. Gusto nato ang atong mga anak nga motuo ni Jesukristo, mahisakop ni Jesukristo ug sa Iyang Simbahan pinaagi sa pakigsaad, ug maningkamot nga mahimong sama ni Jesukristo.
Motuo ni Jesukristo
Una, motuo ni Jesukristo.
Human sa pan sa kinabuhi nga wali, “daghan sa mga tinun-an [sa Ginoo]” naglisod sa pagdawat sa Iyang mga pagtulun-an ug doktrina, ug sila “mitalikod, ug wala na managpanglakaw uban kaniya. Dayon si Jesus milingi ngadto sa Napulog Duha ug nangutana og usa ka makapatandog nga pangutana: “Buot ba usab kamong mobiya kanako?”
Mitubag si Pedro:
“Ginoo, kang kinsa man kami moadto? ikaw mao ang may mga pulong mahitungod sa kinabuhing dayon.
“… Nagtuo kami ug nasayod nga ikaw mao ang Kristo, ang Anak sa buhing Dios.”
Sama sa gipakita ni Pedro, ang pagtuo mao ang “pagbaton og hugot nga pagtuo diha sa usa ka tawo o pagdawat sa usa ka butang ingon nga tinuod.” Ug aron ang atong pagtuo mopaingon ngadto sa kaluwasan, kinahanglan kini nga nakasentro kang Ginoong Jesukristo. “Kita … magpakita og hugot nga pagtuo diha ni Jesukristo kon kita adunay kasegurohan nga Siya buhi, may panabot sa Iyang tinuod nga kinaiya ug kinaiyahan, ug kahibalo nga kita naningkamot nga magpuyo sumala sa Iyang kabubut-on.”
Ang atong mahal nga propeta, si Presidente Russell M. Nelson, namahayag, “Ang hugot nga pagtuo diha kang Jesukristo mao ang pundasyon sa tanan nga tinuohan ug agianan sa balaang gahom.”
Unsaon nato sa pagtabang ang kabataan nga mapalig-on ang ilang pagtuo ni Jesukristo ug makaakses sa Iyang balaang gahom? Dili na kita kinahanglan nga motan-aw pa og layo kay sa atong Manluluwas Mismo.
“[Ang Ginoo] namulong ngadto sa katawhan, nag-ingon:
“Tan-awa, Ako si Jesukristo. …
“Tindog ug duol kamo kanako. …
“… Ang pundok sa mga katawhan miduol ngadto kaniya, ug mihikap pinaagi sa ilang mga kamot ngadto sa iyang kilid, ug mibati sa mga agi sa mga lansang sa iyang mga kamot ug sa iyang mga tiil; ug kini sila mihimo, miduol tagsa-tagsa … ug nakakita uban sa ilang mga mata ug mibati uban sa ilang mga kamot, nasayod sa pagkatinuod ug nagpamatuod, nga siya kadto.”
Ako modapit kaninyo sa pagpamalandong kon sa unsang paagi kini makita diha sa kinabuhi sa gagmayng bata. Sila ba nakadungog og mga pagpamatuod kang Jesukristo ug sa Iyang ebanghelyo? Sila ba nakakita og matinahoron, mapanalanginon nga imahe sa Iyang pagpangalagad ug pagka-dios? Sila ba nakabati ug nakaila sa Espiritu Santo nga nagpamatuod sa Iyang katinuod ug kabalaan? Sila ba nakahibalo sa Iyang mensahe ug misyon?
Pagpasakop kang Jesukristo ug sa Iyang Simbahan
Ikaduha, pagpasakop kang Jesukristo ug sa Iyang Simbahan.
Ang katawhan ni Hari Benjamin nakasinati og dakong kausaban sa kasingkasing ug pinaagi sa pakigsaad mipahinungod sa ilang kinabuhi sa pagbuhat sa kabubut-on sa Dios. Tungod sa pakigsaad nga ilang gihimo uban sa Dios ug ni Jesukristo, sila “gitawag nga mga anak ni Kristo, iyang mga anak nga lalaki, ug iyang mga anak nga babaye.” Isip mga miyembro sa Ang Simbahan ni Jesukristo sa mga Santos sa Ulahing mga Adlaw, kita adunay responsibilidad sa pakigsaad sa pagtukod sa Iyang gingharian ug mangandam alang sa Iyang pagbalik.
Unsaon nato sa pagtabang ang kabataan nga maghimo ug magtuman sa balaang mga pakigsaad? Sa Dali, Sunod Kanako nga manwal, sa Apendiks A ug B, atong makita ang mga pagsugod og panag-istoryahanay ug mga leksiyon nga makapalig-on sa mga pamilya ug makasuporta sa mga magtutudlo ug mga lider sa ilang balaan nga pagkatinugyanan aron maandam ang kabataan nga maanaa sa dalan sa pakigsaad sa Dios sa tibuok kinabuhi.
Mahimong sama ni Jesukristo
Ikatulo, mahimong sama ni Jesukristo.
Diha sa Basahon ni Mormon, ang Manluluwas miawhag sa Iyang bag-ong gitawag nga mga disipulo sa pagsundog Kaniya nga mas duol kaayo kon posible: “Unsa nga matang sa mga tawo kamo angay nga mahimo? Sa pagkatinuod sultihan ko kamo, gani sama kanako.”
Unsaon nato sa pagtabang ang nabunyagan ug nakompirmahan nga kabataan nga matuman ang ilang responsibilidad sa pakigsaad nga mopundok sa ilang kaugalingon ug sa uban ngadto ni Jesukristo? Ang tibuok kinabuhi nga pagkadisipulo nagkinahanglan kanato nga “mahimong … [tigtuman sa] pulong, ug dili kay magpaminaw ra.”
Kon maghatag og mga pagdapit sa labing bata nga mga disipulo sa Ginoo, palihog gamita ang tanang kahigayonan aron sa pagpangulo nila, paggiya nila, ug paglakaw tupad nila, ug tabangi sila nga makaplagan ang Dalan. Pakigtambag kauban niining bililhong mga gagmayng bata samtang sila mag-andam sa pagtudlo, mopamatuod, mag-ampo, o magserbisyo aron sila masaligon ug makasinati og kalipay sa pagtuman sa ilang mga responsibilidad. Pangita og dinasig nga mga paagi sa pagtabang nila nga hinay-hinay nga makasabot nga kini ilang Simbahan ug sila adunay mahinungdanon nga tahas sa pagpangandam alang sa pagbalik sa Manluluwas.
Samtang ang atong kinabuhi nakatutok ni Jesukristo, unsa ang atong gitinguha, ug giunsa nato kini pagtinguha, mausab sa kahangtoran. Ang pagkakabig makapausab sa tanan! Kini mousab sa atong kinaiyahan “nga kita wala nay tinguha sa pagbuhat og daotan, apan sa pagbuhat og maayo kanunay.” Kini makapausab kon unsaon nato sa paggugol sa atong panahon, atong mga kapanguhaan; unsa ang atong basahon, tan-awon, paminawon, ug ipakigbahin. Kini gani mousab unsaon nato pagtubag sa halangdon, akademiko, interbiyo nga motino sa padulngan sa atong karera.
Kinahanglan natong isagol ang Kahayag ni Jesukristo ngadto sa matag bahin sa atong kinabuhi. Kon kita wala magpamatuod sa kamatuoran sa Iyang premortal nga Pagka-Dios, Iyang balaan nga misyon, ug sa Iyang makapalingkawas sa bilanggoan nga Pagkabanhaw diha sa atong mga panimalay ug sa matag miting niini nga Simbahan, nan ang atong mga mensahe sa gugma, pagserbisyo, pagkamatinuoron, pagkamapainubsanon, pagpasalamat, ug pagkamaluluy-on mahimo lamang usa ka madasigong pakigpulong sa manggihuna-hunaon nga pagpuyo. Kon wala si Jesukristo walay gahom nga mag-usab, walay katuyoan nga kab-oton, ug walay pakig-uli sa mga hagit sa kinabuhi. Kon kita dili kaayo magtagad sa atong pagkadisipulo ni Jesukristo, kini mahimong kaalaotan sa atong mga anak.
Kon atong sultihan ang atong mga anak nga gihigugma nato sila, ato ba usab silang gisultihan nga ang ilang Amahan sa Langit ug ang Manluluwas nga si Jesukristo nahigugma kanila? Ang atong gugma mahimong makahupay ug makadasig, apan ang Ilang gugma makabalaan, makapabayaw, ug makaayo.
Kini nga Jesus kinahanglan dili usa ka hinimo-himo nga Jesus, o usa ka yano nga Jesus, o usa ka walay lawas nga Jesus, o wala kaayo magtagad nga Jesus, o wala mailhi nga Jesus, apan usa ka gihimaya, makagagahom, nabanhaw, gibayaw, masimbahon, gamhanan, Bugtong nga Anak sa Dios, kinsa gamhanan sa pagluwas. Ug sama sa usa ka bata sa Pilipinas nga lig-on nga nagpamatuod kanako usa ka adlaw, “Kita angay gayod nga luwason!” Sa sagrado ug balaan nga ngalan Niya “kinsa gihatag sa Dios nga mahimong [dako] nga pagpasig-uli,” si Jesukristo, amen.