Pagbantay sa Ikaduhang Tentasyon
Ayaw pagtago gikan niadtong kinsa mohigugma ug mosuporta kaninyo; hinuon, dagan ngadto kanila.
Pipila ka tuig ang milabay, sa dihang nag-edad ko og 12, gidapit ako sa pagtambong sa akong unang tibuok gabii nga kamping sa korum sa Aaronic nga Pagkapari. Kini mao ang dugay nang gipaabot nga imbitasyon, tungod kay ang akong amahan usa ka lider sa korum ug kasagaran magkamping uban sa mga batang lalaki diha sa ward, samtang ako nabilin sa balay.
Sa dihang miabot ang adlaw, nagmahinamon ako. Ug moangkon gayod ako nga gusto kaayo nako nga mobati nga nahisakop ug dawaton sa mas magulang nga batang mga lalaki. Determinado ako nga pamatud-an ang akong kaugalingon. Niana nga paningkamot wala ra magdugay nga ako gisulayan aron mahibal-an kon moapil ba ako sa usa ka pasiaw ug mahimong kabahin sa grupo.
Ang gisangon sa ako nga buluhaton mao ang pagkuha sa mga yawe sa sakyanan sa akong amahan aron mahimo ang usa ka pasiaw ngadto sa mga lider. Wala gayod ko kahinumdom sa unsay eksakto nakong gisulti aron sa pagkombinser sa akong papa, apan sa wala madugay midagan ko ngadto sa grupo sa mga batang lalaki nga naggunit og mga yawe, mapasigarbohon sa akong kalamposan.
Dayon miabot ang sunod nga buluhaton. Kinahanglan nakong ablihan ang pultahan sa sakyanan ug butangan og stick taliwala sa sandiganan sa lingkoranan sa drayber ug sa serbato sa sakyanan. Ug kinahanglan nako nga i-lock ang pultahan aron ang serbato magsige og tingog hangtod sa kagabhion nga walay bisan unsa nga paagi alang sa mga lider sa pag-abli sa sakyanan aron makuha ang yano nga himan.
Karon, dinhi mao ang punto diin ang istorya mahimong sakit kaayo nga makaulaw alang kanako. Sa higayon nga napahimutang na nako ang stick, gi-lock nako ang pultahan ug kusog nga midagan kutob sa akong mahimo aron makatago ko sa usa ka duol nga kalibonan. Samtang mihupo ako sa yuta, akong gibati ang grabe nga kasakit. Sa kangitngit ug sa akong pagdali-dali, nalingkoran nako ang usa ka tunokon nga pear cactus.
Ang akong mga singgit sa kasakit natabonan sa saba kaayo nga serbato, ug ako wala nay laing paingnan gawas nga bakikaw nga maglakaw balik ngadto sa sakyanan, mokumpisal sa akong “mga sala,” ug mangayo og yano ug makaulaw nga medikal nga pagtagad.
Sa nahibilin nga panahon nianang gabhiona, naghapa ko diha sa usa ka tolda samtang ang akong amahan, gamit ang pliers, mitangtang sa mga tunok sa cactus gikan sa akong … aw, ingnon lang nako nga ako wala makalingkod og komportable sulod sa pipila ka adlaw human niana.
Ako naghunahuna og kadaghan mahitungod niana nga kasinatian. Makakatawa na ko karon sa kabuang sa akong pagkabatan-on, bisan og pipila ka sukaranan nga mga baroganan ang nahimong tin-aw ngari kanako.
Daghang mga sundanan sa pamatasan sa tawo ang daw komon sa kinaiyanhon nga tawo—ang tinguha nga mohaom, ang tinguha nga pamatud-an ang kaugalingon, ang kahadlok nga dili maapil sa usa ka gusto nga kasinatian, ug ang mapugsanon nga panginahanglan nga motago aron malikayan nato ang mga sangpotanan. Kining kataposan nga pamatasan ang gusto nakong tutokan karon—pagtago human kita makabuhat og usa ka butang nga dili angay natong buhaton.
Karon, wala nako gipakasama ang akong binata nga pasiaw sa mabug-at nga sala, apan makakat-on kita og pipila ka baroganan nga mahimong mapamatud-an nga mapuslanon samtang kita gisulayan sa atong mortal nga kinabuhi.
Sa Tanaman sa Eden, si Adan ug Eva adunay usa ka yano nga hingpit nga kahimtang—kaabunda sa pagkaon, dili hitupngan nga katahom sa tanaman—dili lamang usa ka tanaman sa katahom apan usa ka tanaman nga walay mga sagbot o tunokon nga mga pear cactus.
Apan, nasayod usab kita nga ang kinabuhi sa tanaman mipugong sa ilang gikinahanglan nga pag-uswag. Ang tanaman dili usa ka kataposang destinasyon apan usa ka pagsulay, ang una sa daghan nga momatuod, moandam, ug motugot kanila sa pag-uswag ngadto sa ilang kataposang destinasyon sa pagbalik ngadto sa presensiya sa Amahan ug sa Anak.
Mahinumdoman ninyo nga adunay oposisyon diha sa tanaman. Si Lucifer gitugotan sa pagsulay nila ni Adan ug Eva. Siya unang mitintal ni Adan sa pagkaon sa bunga sa kahoy sa kahibalo sa maayo ug sa daotan. Nakahinumdom sa sugo nga dili mokaon niini, misukol si Adan. Unya miabot si Eva nga bulahan, kinsa mipili sa pagkaon sa bunga, nagkombinsir ni Adan sa pagbuhat sa ingon.
Wala madugay, si Adan ug si Eva mipahayag nga kini nga desisyon gikinahanglan aron matuman ang plano sa Langitnong Amahan. Apan pinaagi sa pagkaon sa bunga, sila nakalapas sa balaod—usa ka balaod nga gihatag kanila direkta gikan sa Amahan. Ang miresulta ug bug-at kaayo nga pagsabot sa maayo ug daotan mimugna gayod og mga pagbati sa kasubo sa diha nga sila nakadungog sa tingog sa Amahan nga nagpahibalo sa Iyang pagbalik ngadto sa tanaman. Sila nakaamgo nga sila mga hubo, kay sila sa pagkatinuod walay sinina, ingon nga nagpuyo diha sa usa ka kahimtang sa pagka-inosente. Apan tingali mas sakit pa kay sa ilang pagkawalay sinina nianang higayona, sila karon nabantang tungod sa ilang kalapasan. Sila walay panalipod ug mahuyang. Sila hubo sa literal ug pasumbingay nga pagkasulti.
Kanunay nga mapahimuslanon, si Lucifer, nasayod sa ilang nabantang ug huyang nga kahimtang, mitintal nila pag-usab—niining higayona sa pagtago gikan sa Dios.
Kini nga tentasyon—tawagon nako kini nga ang “ikaduhang tentasyon,”—mao ang tentasyon nga mahimong magdala sa kinadak-ang sangpotanan kon kita magpadala. Sa pagkatinuod, ang paglikay sa tanang unang mga tentasyon sa pagsupak sa balaod sa Dios mao ang labing maayo, apan nasayod kita nga ang tanan madala ngadto sa nagkadaiya nga unang mga tentasyon dinhi sa yuta. Samtang kita mouswag sa atong pagkahingkod ug pagsabot, kita naglaom nga ang atong kalig-on sa paglikay sa unang mga tentasyon padayon nga mouswag samtang maningkamot kita nga mas mahisama sa atong Manluluwas, si Jesukristo.
Ang uban tingali mosulay sa pagtago gikan sa Dios tungod kay sila dili gusto nga madiskobrehan o mailhan, ug sila mobati og kaulaw o pagbati nga sad-an. Apan, daghang kasulatan ang nagtudlo kanato nga imposible ang pagtago gikan sa Dios. Ako mopakigbahin lang og pipila.
Ang Ginoo nagtudlo ni Jeremias pinaagi sa mosunod nga mga pangutana: “Aduna bay usa nga makatago sa iyang kaugalingon sa mga suok sa pagkaagi nga ako dili makakita kaniya? miingon ang Ginoo. Dili ba napuno ko ang langit ug yuta?”
Ug si Job gitudloan:
“Kay ang iyang mga mata anaa sa mga alagianan sa usa ka tawo, ug siya nagasud-ong sa tanan niyang mga lakang.
“Walay kangitngit, ni mabaga nga kangiob, diin makatago sa ilang kaugalingon ang mga mamumuhat sa kadaotan.”
Ang salmista nga si David balaknon kaayo nga mituaw:
“O Ginoo, gisusi mo ako ug nakaila ka gayod kanako.
“Nasayod ka sa tanan kong gibuhat; nasayod ka sa akong gihunahuna bisag halayo ka. …
“Bisan sa dili pa ako mosulti, O Ginoo, nasayod ka nang daan sa akong isulti. …
“Asa ba ako paingon aron mahilayo ako sa imong Espiritu? Asa ba ako motago aron mahilayo sa imong presensya?
“Kon mosaka ako sa langit, atua ka didto; kon mohigda ako didto sa kalibotan sa mga patay, atua ka usab didto.”
Bag-o nga mga Kinabig
Alang niadtong bag-o pa lang nga nagpasakop sa Ang Simbahan ni Jesukristo sa mga Santos sa Ulahing mga Adlaw, ang ikaduhang tentasyon mahimong hilabihan ka mahagiton. Pinaagi sa inyong bunyag kamo nakigsaad sa pagdala diha sa inyong kaugalingon sa ngalan ni Jesukristo, nga alang sa daghan naglakip sa gikinahanglan nga kausaban sa estilo sa kinabuhi. Ang pagbag-o sa estilo sa kinabuhi sa usa ka tawo dili sayon. Kasagaran kini nagkinahanglan kaninyo sa pag-usab sa mga naandan ug mga binuhatan ug bisan sa mga pagpakigdait [associations] aron sa pag-uswag ngadto sa inyong mahigugmaong Langitnong Amahan.
Ang kaaway nasayod nga tingali mahimo kamong huyang sa iyang malipoton nga mga atake. Siya mohimo sa inyong miagi nga kinabuhi, nga mibiya kaninyo nga wala matagbaw sa daghan kaayong paagi, nga karon madanihon kaayo sa dili matuod nga paagi. Ang magsusumbong, ingon nga siya gitawag diha sa basahon sa Gipadayag, motintal kaninyo sa mga hunahuna nga ingon niini: “Ikaw dili ingon niana kalig-on sa pag-usab sa imong kinabuhi; dili ka makahimo niini; ikaw wala mahisakop uban niini nga katawhan; sila dili gayod modawat kanimo; ikaw huyang kaayo.”
Kon kini nga mga hunahuna ingon og tinuod kaninyo nga bag-o lang nagsugod diha sa dalan sa pakigsaad, nangamuyo kami kaninyo nga dili maminaw sa tingog sa magsusumbong. Kami nahigugma kaninyo; makahimo kamo niini; kami modawat kaninyo; ug uban sa Manluluwas, kamo makabaton sa kusog sa pagbuhat sa tanan. Sa usa ka panahon nga gikinahanglan kaayo ninyo ang among gugma ug suporta, ayaw pailad sa paghunahuna nga kami mosalikway kaninyo kon kamo mobalik sa inyong kanhi estilo sa kinabuhi. Pinaagi sa dili hitupngan nga gahom sa Pag-ula ni Jesukristo, kamo mamahimong hingpit pag-usab. Apan kon kamo motago gikan Kaniya ug mopalayo sa inyong kaugalingon gikan sa inyong bag-ong nakaplagan nga komunidad sa hugot nga pagtuo, kamo mopalayo sa inyong kaugalingon gikan sa mismong tinubdan nga makahimo ug mohatag kaninyo og kalig-on sa pagbuntog.
Usa ka minahal nakong higala, usa ka bag-ong kinabig, mipakigbahin kon unsa ka lisod ang pagpadayon sa hugot nga pagtuo nga nag-inusara. Adunay dakong kalig-on sa pagkahimong ug pagpabilin nga kabahin sa usa ka matinabangong komunidad—ang tanan makahimo og kasaypanan apan mouswag samtang gipanalanginan sa gugma ni Jesukristo.
Si Presidente Russell M. Nelson mitudlo nga “ang pagbuntog sa kalibotan dili usa ka kalihokan nga mahitabo sa usa ka adlaw o duha. Kini mahitabo sa tibuok kinabuhi samtang kita balik-balik nga modawat sa doktrina ni Kristo. Kita mougmad og hugot nga pagtuo diha ni Jesukristo pinaagi sa paghinulsol kada adlaw ug pagtuman sa mga pakigsad nga motuga nato sa gahom. Kita magpabilin diha sa dalan sa pakigsaad ug mapanalanginan sa espirituhanong kalig-on, personal nga pagpadayag, paglig-on sa hugot nga pagtuo, ug sa pagpangalagad sa mga anghel.”
Kon kamo adunay pisikal nga kadaot, ang inyong kahimtang mograbe ug mahimong makahulga sa kinabuhi kon kamo dili magtinguha og tukmang medikal nga pagtagad. Kana tinuod usab alang sa espirituhanon nga mga samad. Ang wala matambali nga espirituhanong mga samad lamang ang makahulga sa inyong mahangtorong kaluwasan. Ayaw pagtago gikan niadtong kinsa mohigugma ug mosuporta kaninyo; hinuon, dagan ngadto kanila. Ang maayong mga bishop, mga presidente sa branch, ug mga lider makatabang kaninyo sa paggamit sa makaayo nga gahom sa Pag-ula ni Jesukristo.
Alang niadtong kinsa tingali nagtago, kami mohangyo kaninyo sa pagbalik. Kamo nagkinahanglan sa unsay gitanyag sa ebanghelyo ug sa Pag-ula ni Jesukristo, ug kami nagkinahanglan sa unsay inyong matanyag. Ang Dios nasayod sa inyong mga sala; dili kamo makatago gikan Kaniya. Ipasig-uli ang inyong kaugalingon sa Iyang atubangan.
Isip Iyang mga Santos, ang matag usa kanato kinahanglang mopalambo og kultura nga pagkahisakop sa Simbahan nga mahigugmaon, modawat, ug modasig sa tanan kinsa nagtinguha sa pag-uswag subay sa Iyang dalan.
Pagbantay niining ikaduhang tentasyon! Sunda ang tambag sa mga propeta sa karaan ug sa karon ug hibaloi nga dili kamo makatago gikan sa usa ka mahigugmaong Amahan.
Hinuon, gamita sa inyong kaugalingon ang milagroso nga makaayo nga gahom sa Pag-ula ni Jesukristo. Kini mao gayod ang katuyoan sa atong kinabuhi—sa pag-angkon og nahuyang ug mortal nga lawas nga “ubos sa tanang matang sa mga kahuyang” ug subo lang, madala ngadto sa daghang unang mga tentasyon; sa pag-uswag bisan kon kita makahimo niini nga mga tentasyon; ug sa pagtinguha og diosnong tabang human sa pagbuhat niana, aron kita mahimong mas mahisama sa atong Manluluwas ug sa atong Amahan sa Langit. Kini mao ang Iyang paagi. Kini mao lamang ang bugtong paagi. Niini nga mga kamatuoran ako mopamatuod sa ngalan ni Jesukristo, amen.