Ima eke Abasi

Ke ini ndaeyo kiet ke ini ŋkekade isaŋ ke ebiet emi akadade ikpɔŋ, ufɔkemana nnyin ebiat mbubreyo kiet ke ndide ke aŋwa ke aŋwaŋa enyɔŋ. Emi akenehede anwaŋa akan ekedi ediye afia usuŋ, ɔyɔhɔde ye ntafiɔŋ emi owo mikemeke ndibat ye enye emi ayamade ke ini ke ini. Ke ini nnyin ikodude ke mkpaidem kabaŋa akamba edibot eke Abasi, nnyin ima-ikop uteŋe eyiride nnyin ye Enye. Mkpri nditɔ nnyin, emi ekekɔride ke Hong Kong, akanam ikwe ŋkpɔ ntem akpa. Mmɔ ema ebup mme nnyin iduŋ ke ukem enyɔŋ oro ke obio nnyin. Mma ndomo nditiŋ nnɔ mmɔ ke edi ukem enyɔŋ, edi ke ubiat ofin ye unwana ke ebiet emi nnyin iduŋde akpan nnyin ndikut mme ntanta-ɔfiɔŋ ɔkpɔsuk nte mmɔ edude do.

Ŋwed Abasi ekpep nnyin ete “mbuɔtidem edi mme ŋkpɔ inyenede idorenyin ibaŋa uwutŋkpɔ mme ŋkpɔ emi mikutke ke enyin.” Ke ini ibinde mme nditabi ye mme idomo ntɔŋ enyɔŋ ererimbot ŋkukut spirit nnyin, ke ini inyenede mbuɔtidem ke Abasi ye Eyen Esie Jesus Christ, nnyin ibɔ ata ɔsɔŋɔ eke edidu Mmɔ ye ekikere Mmɔ kabaŋa nnyin.

Ke Ŋwed Mormon, prophet Lehi ama okut “eto emi mfri esie ekeyede ke ndinam owo enem esit ndien ekedi “nnem ŋkan, akande kpukpru.” Ke ini enye akadiade mfri oro, ukpɔŋ esie ama ɔyɔhɔ ye akamba idara, ndien enye ama oyom ufɔkemana esie edia ŋko. Nnyin ikpep ite ke eto emi ada ɔnɔ “ima Abasi,” ndien nte Lehi, nnyin nko imikeme ndibɔ ntiense eke Abasi ke ini nnyin ikootde Enye isin ke uwem nnyin.

Jesus Christ akama ima eke Ete eke Heaven. Otode ke uwa Erisio isop Esie, Enye emen ɔnɔ Idem Esie mme idiɔkŋkpɔ nnyin ndien ema edituhɔre kabaŋa idiɔkŋkpɔ nnyin. Enye ke idem esie ama obiom ukut nnyin, akama mme mfuhɔ nnyin, ndien emen ɔnɔ idem Esie mme ubiak ye udɔŋɔ nnyin. Enye ama ɔdɔŋ Edisana Spirit ete ɔdɔŋ nnyin esit, ndien mme mfri eke spirit ɔdɔŋɔ idara, emem, ye mbuɔtidem, emi ɔyɔhɔde nnyin ye idorenyin ye ima.

Ntak emi ima Abasi osimde kpukpru owo, ediwak eyom ke akpanikɔ kabaŋa enye, ke ini mbon eken eduakde ndikop ima Abasi edi inimke ke mmɔ edot ndinyene. Ndusuk mbon efen ke enyekidem edomo ndibet enye. Ŋwed Abasi ye mme prophet Abasi ekpep nnyin ete ke nnyin imikeme ndikop ima Abasi ke ini, otode ke mfɔn eke Jesus Christ, nnyin ikaiso ndikabare esit, ifen inɔ ke akpanikɔ, idomo ndinim mme ibet Esie, ye ndinam ŋkpɔ nnɔ mbon efen. Nnyin ikop ima Abasi ke ini inamde ŋkpɔ emi oduride nnyin ekpere Enye, utɔ nte ndineme nneme ye Enye ke usen ke usen otode ke akam ye ndikpep ŋwed Abasi, inyuŋ itre ndinam mme ŋkpɔ emi adiaŋade nnyin ɔkpɔŋ Enye, oruk nte ŋkohode idem, efaŋa, ye nsɔŋ ibuot.

President Russell M. Nelson ama okoot nnyin ete “isioro, ye unwam Andinyaŋa, mme nkani mbio ke uwem nnyin” ndien iyak ntuaŋa inim.” Enye kɔnɔ nnyin udɔŋ “ndisɔŋɔ mme itiat idak-isɔŋ spirit nnyin ke “ndidori uwem nnyin ke Enye ye mme edinam ye mme ediomi ke mme temple Esie.” Enye ɔŋwɔŋɔ ete “nte nnyin inimde mme ediomi temple nnyin, nnyin itim inyene usuŋ ke odudu nsɔŋ-idem Abasi. … Nnyin inyene edisana ima Jesus Christ ye eke Ete ke Heaven ediwak ediwak!”

Ami mmenyene ufan kiet emi enyenede ye ediye ufɔkemana ye eti ubɔk utom. Emi ama okpuhɔre ke ini udɔŋɔ anamde enye ikemeke ndinam utom, emi ediwɔrɔ ndɔ eketienede. Ke mme isua ke edem ekedi ɔkpɔsɔŋ, edi ima esie kabaŋade nditɔ esie ye mme ediomi emi enye akanamde ye Abasi ekpeme enye. Usen kiet enye ɔfiɔk ke akani ŋwan esie ama afiak ɔdɔ ndɔ ndien ke ama oyom ndibiat edidian temple mmɔ. Enye ama enyene mfina onyuŋ odu ke ndutimere. Enye oyom emem ye ifiɔk oto ke ufɔk Ͻbɔŋ. Ke usen adiana edidi esie, ami ma mbɔ mme etop emi nto enye.

“Ami mma nnyene eti ifiɔk-ukpep ke temple okoneyo emi ekebede. Mekere ke edi akpan ke ndimum ekpri ubiak. … Ma mfiɔk ke ana nte ami mkpuhɔre, ndien mmebɔŋ akam kpukpru urua ke ndinam oro. Okoneyo emi ekebede ke temple mma nkop spirit ke ndisiori ubiak ke esit mi. … Oro ekedi oruk ubɔhɔ nto enye. … Ema emen mbiomo ekikere eke obukidem emi okofukde mi efep.”

Ke ini okusuk enyenede mfina, ufan mi odot enyin ete ke ifiɔk ke ufɔk Ͻbɔŋ ebiet emi odudu edikpɔk nyak ekeŋwamde enye ke ndikpere Abasi, enehede ekere eti abaŋa uwem, ndien ikereke ɔkpɔsɔŋ ibaŋa ini iso esie.

Ke ini nnyin ikopde ima Abasi, nnyin imikeme ndiyɔ mme ukut ye mfefere ye ndisuk ibuot ye ime ye ndidara ke uduak Esie. Nnyin iminyene idorenyin ke Abasi eye ti mme ediomi Esie ye nnyin, edise nnyin ke ukut nnyin, onyuŋ atat nnyin ayak ke ŋkpɔkɔbi. Nnyin nko iyeyom ndibuana idara emi ikopde ye mbon ufɔk emana nnyin ye mbon ima. Ukem nte ufɔkemana Lehi, owo kiet kiet enyene unen ndimek mme eyedia mme ididiaha mfri, edi unen nnyin edi ndima, mbuana, ye ndikot ke ukem usuŋ emi mbon emi imade ekemede ndikop ima Abasi.

Man iŋwam mbon efen ekop ima Abasi, ana nte nnyin inyene mme edu uwem Christ ke idem nnyin utɔ nte nsuhɔre idem, ima, mbɔm, ye ime, ye ndinwam mbon efen ese Andinyaŋa otode ke ndinim mme akwa mbet iba eke odu-uwem Abasi ye ndima mbon efen.

Eyen eren nnyin kiet aŋwana ke ndidu ye uko idem ke isua uyen esie. Ŋwan mi ye ami ibɔŋ akam ndifiɔk adaŋa nte idiŋwamde enye, ŋko nnyin iduak ndinam ŋkpɔ ekededi emi Abasi ediyomde nnyin inam. Usen kiet ami ndikop udɔŋ ndibup president eboho mme elders mi mme enye ɔfiɔk owo emi oyomde uŋwam emi ŋkemede ndikise ye eyen eren mi. Ke ediwak ekikere ebede, enye ɔdɔhɔ nnyin ndikise ŋwan kiet enyenede akamba mfina nsɔŋidem, ndien ye unyime otode branch president, ke ndida udia-ɔbɔŋ nsɔk enye ke ofuri udua. Ami mma ŋkop inem edi ŋko ndikere adaŋa nte eyen mi edinamde kabaŋa nsinifik eke ofuri udua emi.

Ke akpa edika nnyin, esit nnyin ama ekere kabaŋa edima ŋwan emi, nte enye okodude ke ubiak. Enye ama enehede okop inem kabaŋa sacrament, ndien nnyin ima ikop inem ke ndikise enye ye ebe esie. Ke mme esisit edise ebede, ke Sunday kiet ami ŋkoduhe ŋko ŋkikemeke ndisaŋa ye eyen mi edi nti enye ubiɔŋ utom nnyin. Ke ini nsimde ufɔk, ŋkikemeke ndibet ndikop nte ndikise eketiede. Eyen mi ɔbɔrɔ ete ke enye ikereke ke mbon class esie ekeme ndinam eti ŋkpɔ ntem. Ndien enye anam aŋwaŋa ke ndidɔhɔ nte ke enye ema ada eka esie ye enye ke ndinwam, nko ke sacrament ama ɔfɔn, edi ke edima eyen eka ŋwan emi ama ɔfuhɔ ke udua oro koro enye ama okot mme ufan esie edi ufɔk esie man ese mme edinam vidio, edi ŋkpɔ mbre ikifɔnke. Eyen mi ete enye oyom ke ŋkpɔ ofim, okut mfina, ndien anam enye ɔfɔn ɔnɔ enye ini kiet. Enye okop ufɔn, adara, ndien odotenyin k ndinam ŋkpɔ emi anamde usen esie ayama. Enye okop ima Abasi kabaŋa enye.

Edieke midihe eti ukeme nnyin uwem ekpekan, edieke ekerede ete ke akam mbufo owo ikopke, mme ukemeke ndikop ima Abasi, mbɔk efiɔk ete ke kpukpru ukeme mbufo edi akpan-ŋkpɔ ndien, kpa nte ntanta-ɔfiɔŋ odude ke enyɔŋ, ke Ete eke Heaven ye Jesus Christ efiɔk, ekop, enyuŋ ema mbufo.

Ke ndaha kiet ke ini mbet Esie ekedude ke ubom “etɔde eto ofim mmɔŋ,” Andinyaŋa asaŋa akpere mmɔ ke enyɔŋ mmɔŋ ndien ɔnɔ mmɔ ɔsɔŋɔ, ɔdɔhɔ, “Ekop idara; edi ami; ekukop ndik.” Ke ini Peter oyomde ndisaŋa ke enyɔŋ mmɔŋ ntiene Andinyaŋa, Jesus okoot enye ete, “Di.” Ndien ke ini Peter afepde enyin ndien ɔtɔŋɔ ndideŋ, Andinyaŋa inikiet anyan ubɔk Esie omum enye ndien oduri enye osio ke ini ɔdɔhɔde, “O mbufo mbon ekpri mbuɔtidem, ke emi nte afo ukukopke eyihe?”

Ke ini ofim afinade nnyin ke uwem nnyin, ndi imiduak ndidara nyuŋ ŋkop uko? Didie ke ikeme ndifiɔk ete ke Andinyaŋa ifreke nnyin ndien ke Enye odu-ekpere nnyin ke akpan ke mme usuŋ nnyin mifiɔk-ke? Ndi nnyin imeyime nditiene Enye ke mbuɔtidem akpan-akpan ke ini usuŋ ke iso nnyin etiede nte imemke? Ndien ke ewe usuŋ ke Enye edibede nnyin ke ini iduɔde? Didie ke nnyin ye mbuɔtidem ise Enye ke kpukpru ekikere, ke eyihe mme ndik miduhe?

Edieke mbufo edimade ndikop ima Abasi awak ke uwem mbufo, yak ami ŋkot mbufo ekere ebaŋa ŋkpɔ emi:

• Akpa, sɔp nditre man eti ete ke mbufo edi nditɔ Abasi ndien ekere mme ŋkpɔ emi enemde esit ebaŋa.

• Udiana, ebɔŋ akam kpukpru usen, ebup Ete eke Heaven yak aŋwam mbufo efiɔk owo emi ekperede mbufo emi eyomde ima Esie.

• Ͻyɔhɔ Ita, ebup ke eti esit se ekemede ndinam man eŋwam owo ndikop ima Abasi.

• Ndien ɔyɔhɔ Inaŋ, esɔp enam etiene ndausuŋ emi ebɔde.

Edieke nnyin ikade iso ndibɔŋ akam nyuŋ mbup ke ibuot mbon efen, Abasi eyewut nnyin mme owo eyomde uŋwam. Ndien edieke inamde ke usɔp, imikeme ndidi ŋkpɔ utom emi Enye ɔbɔrɔde akam mmɔ. Ke ndinam oro, ke ini, nnyin iyebɔ mme ibɔrɔ akam nnyin ndien nnyin iyekop ima Abasi ke uwem nnyin.

Ke ɔfiɔŋ ifaŋ emi ekebede ke ini ŋkekade Vietnam, ŋwan mi ye ami ikodu ke ubom ofim emi akadahade ke akamba oyobio. Ofim ama enehede ɔdiɔk, ndien akim ntɔŋ-enyɔŋ, akwa edim, ndien ekeme ndikut ekep-kep enyɔŋ ke window nnyin. Ke anyan ye akamba edidɔk ebede, ubom enyɔŋ nnyin ke akpatre ɔdɔk akan oyobio onyuŋ oduk ke ediye ndise. Ema eti nnyin ini kiet efen kabaŋa Ete Heaven ye Jesus Christ nnyin ndien ikop akwa ima emi Mmɔ enyenede enɔ nnyin.

Ndima ufan, nte owo emi okopde ima Abasi, ami ye idara ntie ntiense nte ke Andinyaŋa Jesus Christ edi ima Abasi. Ima Esie kabaŋa nnyin edi mfɔn-ma, saŋa-saŋa, ye ke nsinsi. Nte itienede Enye ye mbuɔtidem, yak nnyin iyɔhɔ ye ima Esie ndien yak nnyin idi ufɔk uŋwana emi edidade mbon efen usuŋ ŋkesim ima Esie. Ke enyiŋ Jesus Christ, amen.