“Mme Edisana Unwam ke Uwem Mkpa”

Oto ke Prophet Joseph Smith, Jehovah ama ayarade ediwak abaŋa uwem nnyin mbemiso uwem ererimbot. Do, nnyin ikidu nte nditɔ spirit Abasi. Ke ntak emi Abasi okoyomde ndiwam nditɔ Esie ekɔri, Enye ebiere ndibot ererimbot emi nnyin ikemede ndibɔ ikpɔk idem, ikpep ito mme edinam, inyene mme edisana edu, ndien edomo nnyin ese me nnyin imikeme ndinim mme mbet Abasi. Mbon emi edotde eyenyene “ubɔŋ emi ediande ke mme ibuot mmɔ ke nsinsi ye ke nsinsi” (Abraham 3:26).

Man esiak mme idaha edisana uduak emi, Abasi ama emek Ikpɔŋ-ikpɔŋ Eyen Esie emi Enye Obonde ete edi Andinyaŋa nnyin. Lucifer, emi ekikere esie akpabiatde ufaŋ owo ndimek, akabade edi Satan ndien ema “ebin enye esio.” Ebin esio enɔ isɔŋ enyuŋ esin enye ifet ndinyene uwem mkpa, ema enɔ Satan ufaŋ ete odomo “ndibiaŋa nyuŋ nnam mme owo edi nnan, ye ndida mmɔ nte mbon ŋkpɔkɔbi nte enye amade, kpa nte ediwak emi midikopke uyo [Abasi]” (Moses 4:4).

Se idide akpan ke akwa uduak Abasi ɔnɔ ŋkɔri nditɔ Esie ke uwem mkpa ekedi mmɔ ndinyene “ubiɔŋɔ ke kpukpru ŋkpɔ” (2 Nephi 2:11). Ukem nte obuk idem owo mikemeke ndikɔri me ndidu ke ini mikamake enye inam ŋkpɔ, ntre ke ŋkɔri ke uwem mkpa oyom ete owo anam nsinsi ŋkpɔ ke ubiɔŋɔ uwem mkpa. Enye emi edide akpan akan ke ŋkɔri spirit edi se eyomde ete emek ke ufɔt eti ye idiɔk. Mbon emi emekde eti eyekɔri eka nsinsi akaŋa mmɔ. Mbon emi emekde idiɔk—nte kpukpru edinamde ke mme nsionsio idomo eke uwem mkpa—eyeyom uwam edinyaŋa, emi enyene ima Abasi emekde ndinɔ.

Ke okponde akan, unwam Abasi ke uwem mkpa emi enyenede odudu akan ekedi Enye ndinɔ Andinyaŋa, Jesus Christ, emi edibɔde ufen man ekpe ekɔm urua onyuŋ ɔnɔ edifen ke mme idiɔk ŋkpɔ. Enyene mbɔm ye ediye Usio-isop anam aŋwaŋa ntak emi mbuɔtidem ke Ɔbɔŋ Jesus Christ edide akpa ukpep-ŋkpɔ eke gospel. Usio-isop Esie “ada ediset ke mkpa eke mkpa edi” (Alma 42:23), ndien enye “afak [mme] idiɔk-ŋkpɔ ererimbot” (Alma 34:8), sɔhi kpukpru mme idiɔk-ŋkpɔ nnyin emi ituade ŋkpɔfiɔk ndien ɔnɔ Andinyaŋa nnyin odudu ndinwam nnyin ke mme mmem-idem uwem mkpa nnyin.

Ke ebede ediye edisɔhi mme idiɔk-ŋkpɔ emi enamde ye ndifen nnɔ, uduak edima Ete ye Eyen ɔnɔ ediwak enɔ efen ndikpeme nnyin, emi esinede ndikpeme nnyin ndinam idiɔk-ŋkpɔ ke akpa ifet. Uwem mkpa nnyin ofuri ini ɔtɔŋɔ ye ete ye eka. Nte akpana nte edi, mbiba edu ye mme nsionsio enɔ ndikpeme ŋkɔri nnyin. Midighe ntre, mmɔ ndidu edi ubak ke ubiɔŋɔ emi anade nte nnyin ikan.

Uduak eke Ete nnyin ke Heaven ɔnɔ nnyin mme unwam efen ndida nnyin usuŋ ke mme isaŋ nnyin ke uwem mkpa. Ami nyetiŋ mbaŋa inaŋ ke otu mme ŋkpɔ emi. Mbɔk ekumum mi ubaŋa ibat mi inaŋ, koro mme unwam emi edɔŋɔ ye kiet eken. Ke ndidian do, mme ukpeme mbɔm efen edu ediana mbon emi.

Akpa, ami ntiŋ mbaŋa Unwana mme Spirit Christ. Ke akwa ukpep ŋkpɔ esie ke Ŋwed Mormon, Moroni etiene etiŋ ukpep-ŋkpɔ ete esie ete ke “enɔ kpukpru owo Spirit, man enye ɔfiɔk eti ye idiɔk” (Moroni7:16). Nnyin imikot ukem ukpep-ŋkpɔ emi ke mme ediyarade eyo mfin.

“Ndien Spirit ɔnɔ kpukpru owo emi edide ererimbot unwana; ndien Spirit anam kpukpru owo efiɔk oto ke ererimbot, emi akpaŋde utɔŋ ɔnɔ uyo Spirit” (Doctrine and Covenants 84:46).

“Koro enɔ Spirit mi edi ke ererimbot ndinam anwaŋa emi osukde idem ye emi anuahade, ye ndibiom emi midighe eke Abasi ikpe” (Doctrine and Covenants 136:33).

President Joseph Fielding Smith ama anam mme ŋwed Abasi emi aŋwaŋa: “Jehovah ikpɔŋke mme owo (ke ini mmɔ emanade eduk ke ererimbot emi) ete enana unwam, efiɔŋɔ ubɔk eyom unwana ye akpanikɔ, edi ofuri owo … emana ye unen ndibɔ ndausuŋ, ukpep-ŋkpɔ, item Spirit Christ, mme Unwana Akpanikɔ.”

Ɔyɔhɔ iba mme akwa unwam emi Jehovah ɔnɔde ndinwam nnyin ndimek se idide nnen nnen edi eboho mme ndausuŋ emi edɔŋɔde kiet ke mme ŋwed Abasi nte ubak ke uduak edinyaŋa (uduak inemesit). Mme ndausuŋ emi edi mme mbet, mme edinam, ye mme ediomi.

Mme mbet eteme usuŋ emi Ete nnyin ke Heaven enimde ɔnɔ nnyin ndikɔri nka nsinsi uwem. Mme owo emi ekutde mme mbet nte usuŋ emi Abasi enimde ndimia mbon emi Enye emekde ufen ifiɔkke ntak eke uduak inemesit eke edima Abasi. Ke usuŋ oro, nnyin imikeme ndinyene ebuana emi iyomde ye Andinyaŋa nnyin inyuŋ idot ndinyene ŋkɔri ke odudu Esie ndinwam nnyin ke usuŋ nnyin ndika ebiet emi Abasi aduakde ɔnɔ kpukpru nnyin. Ete nnyin ke Heaven oyom kpukpru nditɔ Esie efiak enyɔŋ eka obio ubɔŋ celestial, emi Abasi ye Andinyaŋa nnyin edude, ye ndinyene ukem uwem ye mbon emi edude ke obio ubɔŋ celestial.

Mme edinam ye mme ediomi edi ubak ke mbet emi owutde usuŋ nsinsi uwem. Mme edinam, ye mme edisana ediomi emi nnyin inamde ye Abasi ito mmɔ, edi mme usuŋ emi eyomde ye mme akpan ndausuŋ ke usuŋ oro. Ami mema ndikere mbaŋa ubiɔŋ-utom mme ediomi nte uwut-ŋkpɔ ke idak uduak Abasi, mme edidiɔŋ Esie emi ekponde ekan ke enɔ mbon emi eŋwɔŋɔde ndinim ibet Esie ke ntɔŋɔ ye mbon emi enimde mme eŋwɔŋɔ oro.

Mme edidiɔŋ Abasi efen ke ndinam nnen nnen edimek edi mme ediyarade eke Edisana Spirit. Edisana Spirit edi ɔyɔhɔ ita ke Ibuot Abasi. Utom Esie, nte etemede ke ŋwed Abasi, edi nditie ntiense mbaŋa Ete ye Eyen, ndikpep nnyin, ndinam nnyin iti kpukpru ŋkpɔ, ye ndida nnyin usuŋ nka ofuri akpanikɔ. Mme ŋwed Abasi edɔŋɔ ediwak mbuk eke mme ediyarade eke Edisana Spirit, utɔ nte ntiense spirit ke ibɔrɔ abaŋade mbume emi kabaŋa Ŋwed Mormon. Inaha nte ebuak ediyarade ye enɔ Edisana Spirit, emi enɔde ke ini eduɔkde mmɔŋ.

Ata akpan kiet ke otu mme unwam emi Abasi ɔnɔde nditɔ Esie emi ebuɔtde idem edi enɔ Edisana Spirit. Akpan ufɔn ke enɔ emi ekut nte ke enɔ ke ini ema ekekabade esit enyuŋ eduɔk mmɔŋ, “ndien [mme ŋwed Abasi anam aŋwaŋa] edifen ke mme idiɔk-ŋkpɔ edi oto ikaŋ ye ke Edisana Spirit” (2 Nephi 31:17). Mme owo emi enyenede edifen ke mme idiɔk emi—ndien edemede ediyet mmɔ ke ini ke ini ke ndikabade esit ke usen ke usen enyuŋ edude nte asaŋade ye ediomi emi mmɔ ekenamde eto edinam sacrament—edot eŋwɔŋɔ ete ke Edisana Spirit, Spirit Jehovah, “kpukpru ini … oyodu ye mmɔ” (Doctrine and Covenants 20:77).

Ke ntem, President Joseph F. Smith ama ekpep ete ke Edisana Spirit “eye atat mme esit mme owo kabaŋa mme ŋkpɔ Abasi, ndinam mmɔ efiɔk ke ini edikabade esit ke mmɔ enam esit Ete, ye ndidu ke mmɔ ikɔ ntiense kpukpru ini nte ada-nsaŋa ke uwem, edade nte akpan ye eti andikpeme nsin ke ofuri akpanikɔ ndien ɔyɔhɔ mmɔ ke usen ke usen ye idara ye inemesit, ye udɔŋ ndinam eti nnɔ kpukpru owo, ndibɔ ufen utu ke anam idiɔk, ndidi eti nyuŋ nyene mbɔm, anyan ime ye ima. Kpukpru mbon emi enyenede anana ekɔm-urua enɔ emi, nsɔŋurua ŋkpɔ emi, enyene nkaiso nsat-itɔŋ kabaŋa edinen ido. Ke unwam Edisana Spirit miduhe owo ndomo kiet ikemeke ndisaŋa ke nnen nnen ye mfafaha usuŋ.”

Ye ediwak enyene odudu unwam ndida nnyin usuŋ ke isaŋ uwem nnyin, edi ŋkpɔ okpu ndifiɔk ke ediwak edu ke unana mbeŋeidem ebaŋa ini emi enimde enɔ mmɔ ndisobo ye Andinyaŋa ye Andifak nnyin, Jesus Christ. Nke Esie abaŋade nditɔ iban duop emi mifiɔkke erenowo owut ete ke otu mbon emi ekotde ete edisobo ye Enye, ibio ibat oro edibeŋeidem.

Kpukpru nnyin imifiɔk mme uwut-ŋkpɔ mbon mibeŋeke idem: mme return missionary emi etrede ŋkɔri spirit mmɔ ke ntak mfiak-edem, mme nditɔ iden ye iban emi ebiatde ŋkɔri spirit mmɔ oto ke nditre ndibuana ke ukpep-ŋkpɔ ye mme edinam ufɔk Abasi, mme eden owo emi esiode udori ubɔk mmɔ ke itie oku Melchizedek enim, iden ye iban—usuk ini ubon mme ada iso mme nti ete ye eka—emi ewɔrɔde ekpɔŋ usuŋ ediomi etre ndinam nyuŋ nnim mme ediomi ke edisana temple.

Ediwak mme ŋwɔrɔ-ŋkpɔŋ oro etibe ke ini mbon ufɔk Abasi mitieneke akpan uduak spirit ndinim eke akam idem, ndikpep ŋwed Abasi kpukpru ini , ye ndikabade esit ke ini ke ini. Usuk esin ndidemede mme ediomi mmɔ ke urua ke urua ke ndidia sacrament. Usuk edɔhɔ ete ke Ufɔk Abasi inamke ŋkpɔ inɔ mmɔ, ekpuhɔ se mmɔ ekerede ke edi se mmɔ eyomde ke iso ye se Jehovah ɔnɔde ke ediwak ukpep-ŋkpɔ ye mme ufaŋ Esie ɔnɔ akpan utom emi nnyin inamde inɔ mbon efen.

Nsuhɔde idem ye idorenyin ke Jehovah edi usɔbɔ ɔnɔ mme utɔ ŋwɔrɔ-ŋkpɔŋ oro. Nte Ŋwed Mormon ekpepde, Jehovah “ɔdiɔŋ onyuŋ oforo mbon emi esinde idorenyin mmɔ ke enye” (Helaman 12:1). Ndidori enyin ke Jehovah edi akpan se eyomde enɔ kpukpru mbon emi edade ibet Abasi ye mme ukpep-ŋkpɔ mme prophet Esie edomo ye se idide idahaemi ye ifiɔk owo.

Ami metiŋ mbaŋa ediwak unwam emi edima Ete ke Heaven ɔnɔde ndinwam nditɔ Esie enyɔŋ etiene Enye. Utom nnyin ke edisana uduak emi edi ndidori enyin ke Abasi nyuŋ nyom nyuŋ nda mme edisana unwam emi nnam utom, akpan akpan Usio-isop Edima Eyen Esie, Andinyaŋa ye Andifak nnyin, Jesus Christ. Ami mbeŋe yak mbufo ebɔ edidiɔŋ, uforo, ye ukpeme, ke enyiŋ Jesus Christ, amen.