Ekpeme Udiana Idomo
Ekudibe ekpɔŋ mbon emi edimade enyuŋ eŋwam mbufo; edi efehe etiene mmɔ.
Ke mme isua ekebede, ke ini ŋkɔyɔhɔde 12, ema ekot mi ete ndiduk akpa mbre nsiere eyo eke eboho itie oku Aaron mi. Emi ekedi ikoot emi nkebetde ke anyan ini nte ete mi ekedide adausuŋ ke eboho ndien esisɔp aka camp ye mme nditɔ iren ke ward, ke ini ekesiyakde mi enim ke ufɔk.
Ke usen ekemde, ami mma ŋkop inemesit. Menyime nte ke ŋkoyom ke nyeŋidem ke ndidu ye ikpɔ nditɔ iren. Mma mbiere ndinam idem ŋwut. Ke ukeme oro, ikibihike mbemiso ekedomo mi ndise mme nyekeme ndibre kiet ye ndidi kiet ke eboho.
Utom emi ekenɔde mi ekedi ndida mme ukpɔhɔde moto ete mi man enam adausuŋ ŋkari. Ami ntihe ŋkpɔ emi nketiŋde man nkeme ndinam ete mi enyime, edi mma nsɔp mfehe ntiene mme udim nditɔ iren ye mme ukpɔhɔde ke ubɔk, nnem esit ke edikan mi.
Ntre utom efen edi. Akana nte ntat udɔk moto ndien mfiɔk eto ke idak edem ŋkpɔ-itie andiwat ye ifiom moto. Akana nte nyiri usuŋ man ifiom ekeme ndinehede nsioro-uyo ŋkesim mbubreyo ke usuŋ miduhe ke ndiduk moto man esio ŋkpɔ-utom emi.
Idaha emi, emi edi ebiet emi mbuk oro akakabare edi ubiak esuene ɔnɔ mi. Ini kiet nkesinde eto ke ebiet, mma nyiri usuŋ ndien mfehe nte nkemede ndisɔp ndibe ke ikɔt emi ekperede. Ndiana ke isɔŋ, mma nkop ata ubiak. Ke ekim ye ke usɔp mi, ami mma ntie ke eto ŋkukim.
Mme mfiori ubiak mi osop ke ɔkpɔsɔŋ uyom ifiom, ami nkinyeneke usuŋ efen nkan nditama mfiak nka moto, ndiyarare “mme idiɔk “ŋkpɔ mi,” ndien ke ndiyom akpa ye usɔbɔ esuene.
Ke ofuri okoneyo oro, nkekɔbi ke idibi mi ke atayat ke ini ete mi, akamade plier, osioŋo ŋkukim ke … ndien, yak ami ntiŋ nte ke nkitiehe ye emem ke ediwak usen ke iso.
Ami mmesikere mbaŋa ŋkpɔ oro ke ediwak ini. Ami mekeme ndisak idahaemi kabaŋa mbre ini uyen mi kpa nte mme ubono ŋkpɔ enehede aŋwaŋa mi.
Ediwak mme ndaha ke edu uwem owo etie nte anehede amem ke ata owo—udɔŋ ndidot ke ndiduk, udɔŋ ndinam ŋwut idem nnyin, ndik ke ndiwɔrɔ, ye edinyik udɔŋ ke ndidibe man itre ndikut se iditibede. Edi akpatre edu uwem emi ndiwukde enyin mfin—ndidibe ke ima inam ŋkpɔ emi mikpinamke.
Idahaemi, ami ndaha nkari ini uyen mi ndomo ye akamba idiɔk ŋkpɔ, edi nnyin imikeme ndiduri ndusuk udim emi ekemede ndiwut eti nte edomode nnyin ese ke isaŋ uwem nnyin.
Ke Iŋwaŋ Eden, Adam ye Eve ema enyene eti ndaha—ediwak udia, uyai inwaŋ miduhe utɔ—idihe ediye inwaŋ kpɔt edi inwaŋ minyeneke mbiet ye eto ŋkukim.
Nte ededi, nnyin nko imifiɔk ite ke uwem inwaŋ oro atre ndikɔri mmɔ eyomde. Iŋwaŋ ikidihe akpatre ebiet mmɔ edi udomo, akpa ke ediwak emi ekemede ndiwut, mbeŋeidem, nnyuŋ nyak mmɔ ekɔri eka akpatre ebietiduŋ mmɔ eke ndifiak nka iso Ete ye Eyen.
Mbufo eyeti ete ke ubiɔŋɔ ama odu ke iŋwaŋ. Ema eyak Lucifer odomo Adam ye Eve. Ke akpa enye ama odomo Adam ate adia mfri eto ifiɔk eti ye idiɔk. Etide abaŋa ewuhɔ ete ekudia ke esit, Adam afaŋa. Ndien edi ediye Eve, emi ekemekde ndidia mfri, ekpekde adam ate anam ntre.
Edikem, Adam ye Eve etiŋ ete ke ubiere emi ekem ke ndinam uduak Ete eke Heaven osu. Edi ke ndidia ke mfri, ke mmɔ ema edue ibet—ibet emi ekenɔde nnen nnen otode Ete. Ibɔrɔ ye edikɔk ifiɔk eti ye idiɔk ana edi ama ɔkpɔŋ mmɔ ye ubiak ke ini mmɔ ekekopde uyo Ete ofioride ndifiak ndi iŋwaŋ. Mmɔ ema ekut ke mmimɔ ikedi iferi, koro mmɔ ekedide kakpan ikisineke ɔfɔŋ, ke ema ekedu ke ndaha unana ifiɔk. Ke akpan anehede abiak akan mmɔ ndidu isineke ɔfɔŋ, ndien ema eyarare ndudue mmɔ. Mmɔ ikikemeke ndinyaŋa idem enyuŋ emem. Mmɔ ekedi iferi ke kpukpru ndaha ikɔ.
Akananam andiyom, Lucifer, ɔfiɔkde ke eyarade mmɔ ye ndaha mmemidem, afiak odomo mmɔ—idahaemi ndidibe ke iso Abasi.
Idomo emi—ami nyekot enye “udiana idomo”—edi idomo emi ekemede ndida mkpon-ŋkan siwɔrɔde ke edinam owo edieke isukde ibuot. Ke akpanikɔ, man itre kpukpru mme akpa idomo ke ndibiat ewuhɔ Abasi edi mmem mmem, edi nnyin ifiɔk ite ke kpukpru eyesuk ibuot enɔ ediwak akpa idomo mi ke isɔŋ. Nte nnyin ikɔride ke ndiɔŋɔ idem nnyin ye mbufiɔk, nnyin imidot enyin ite ke ukeme nnyin ndibe akpa idomo eye akaiso ɔfɔn nte nnyin inwanade nditie nte Andinyaŋa, Jesus Christ.
Ndusuk eyedomo ndidibe ke iso Abasi ke ntak emi mmɔ miyomke eyarade mmɔ, ndien mmɔ ekop but mme ndudue. Nte ededi, ediwak mme ŋwed Abasi ekpep nnyin ete ke ndidibe ke iso Abasi idihe mmem mmem. Ami nyebuana ata esisit.
Ɔbɔŋ ekpep Jeremiah oto mme mbume emi: “Ndi owo ndomokiet akeme ndidib idem esie ke ndedibe ebiet man Ami ndikut enye? Ɔbɔŋ ɔdɔhɔ. Ndi Ami nyɔhɔke enyɔŋ ye isɔŋ?
Nko ema ekpep Job:
“Koro enyin esie odude ke mme usuŋ owo, ndien enye okut kpukpru ebiet enye akade.
“Ekim iduhe, mme ndukpɔŋ mkpa, emi mme anam utom idiɔk ŋkpɔ ekemede ndidib idem mmɔ.”
Andiwed psalm David mkponkan ewet uto anam anwaŋa:
“O Ɔbɔŋ, afo ɔmɔduŋɔde mi, ɔmɔnyuŋ ɔfiɔk mi.
“Afo ɔmɔfiɔk nte nsuhɔrede ntie, ye nte ndahade nda; afo ɔmɔtim ɔfiɔk ekikere ke nsan-nsan. …
“Koro baba ikɔ kiet miduhe mi ke edeme; sese, Ɔbɔŋ, afo ɔmɔfiɔk mmɔ kpukpru. …
“Ebiet ewe ke ndika mbɔhɔ spirit fo? mme ebiet ewe ke ndifehe mkpɔŋ iso fo?
“Adieke ami ndɔkde nka heaven, afo mɔdo: adieke ami namde bed mi ke hell, sese, afo modo.”
Obufa Mbon Ufɔk Abasi
Kabaŋa mbon emi edukde Ufɔk Abasi Jesus Christ mme Ndisana Owo ke Ukperedem Usen obufa, udiana idomo ekeme ndidi mfina. Ɔkpɔsuk edi ke uduɔkmmɔŋ fo afo ama ɔŋwɔŋɔ ndida nnɔ idem fo enyiŋ Jesus Christ, emi edide ke ediwak esine ukpuhɔre edu uwem emi eyomde. Ndikpuhɔre edu uwem owo imemke. Esisɔp oyom fi okpuhɔre edu-uwem ye mme edinam ndien kɔm mme nka ke ndikɔri mbine edima Ete eke Heaven.
Andidiɔk ɔfiɔk ke afo emekeme ndimem idem ke mme uyire emi. Enye eyenam akani uwem fo, emi anamde fi ukokop uyuhɔ ke ediwak usuŋ, idahaemi kɔm ata ŋkpɔ midihe akpanikɔ. Andibiomo ndo, nte enye okotde ke ŋwed Eriyarare, eye odomo fi ye mme ekikere emi atiede ntem: “Afo usɔŋke idem ukem ke ndikpuhɔre uwem fo; afo ukemeke ndinam emi; afo usineke ye mbon emi; mmɔ idinyimeke fi ke nsinsi; afo emenehede emem idem.”
Edieke etiede nte mme ekikere emi etiede nte edi akpanikɔ ke usuŋediomi, nnyin ikpe fi ubɔk ekukop uyo enɔ andidot uyo. Nnyin imima mbufo; mbufo emekeme ndinam; nnyin iminyime mbufo; ndien ye Andinyaŋa, mbufo eyenyene ukeme ndinam kpukpru. Ke ini mbufo ediyomde ima nnyin ye iberedem ikan, ekuyak ebiaŋa mbufo esin ke ndikere nte ke nnyin iyesin mbufo edieke mbufo edifiakde edem eka akani uwem mbufo. Otode ke unanan udomo odudu Erisio-isop eke Jesus Christ, ekeme ndinam mbufo efɔn. Edi edieke mbufo edibede eto Enye enyuŋ esik idem mbufo otode ke obufa mbuɔtidem mbufo, mbufo esik idem mbufo ewɔrɔ ekpɔŋ ata ŋkpɔ emi ekemede nko edinɔde mbufo odudu ke ndikan.
Edima ufan mi, obufa owo ufɔk Abasi, akabuana adaŋa nte ɔsɔŋde ndinyene mbuɔtidem ke nsan nsan. Odu akamba odudu ke ndidi ye ndido kiet ke ebiet unwam—kpukpru emi eduɔk edi ke ekaiso ke ini ediɔŋde otode ke ima Jesus Christ.
President Russell M. Nelson ama ekpep ete “Ndikan ererimbot idighe ŋkpɔ emi etibede ke usen kiet mme iba. Etibe ke anyan ini nte nnyin ikade iso ikop ukpep-ŋkpɔ Christ. Nnyin inyene mbuɔtidem ke Jesus Christ ke ndikabare esit kpukpru usen nyuŋ nnim mme ediomi emi enɔde nnyin odudu. Nnyin idu ke usuŋ ediomi enyuŋ ediɔŋ nnyin ye odudu spirit, eriyarare nnɔ idem nnyin, ŋkɔri ke mbuɔtidem, ye utom mme angel.”
Adieke mbufo enyenede unan ikpɔkidem, ndaha mbufo eyekpuhɔre ndien ekeme ndidi ŋkpɔ-afinade uwem edieke mbufo imiyomke eti usɔbɔ idem. Oro edi ntre ye unan eke spirit ŋko. Unan eke spirit emi owo mikɔk-ke kpɔt, ekeme ndifina nsinsi erinyaŋa. Ekudibe ekpɔŋ mbon emi edimade enyuŋ eŋwam mbufo; edi efehe etiene mmɔ. Mme nti bishop, mme branch president, ye mme adausuŋ ekeme ndiŋwam mbufo ndikut odudu eke Erisio-isop Jesus Christ.
Kabaŋa mbon oro ekemede ndidibe, nnyin ikot mbufo ite efiak edem edi. Mbufo emeyom se ikɔ Abasi ye Erisio isop Jesus Christ ɔnɔde, ndien nnyin imiyom se mbufo enɔde. Abasi ɔfiɔk mme idiɔk ŋkpɔ mbufo; mbufo ikemeke ndifehe ndidibe Enye. Enam emem ke iso Esie.
Nte Ikɔt Esie, nnyin kiet kiet ana nte inɔ eduwem eke edidu ke Ufɔk Abasi emi emade, enyimede, ye enɔde udɔŋ eke kpukpru udɔŋ ke ndikɔri ke usuŋ Esie.
Ekpeme udiana idomo emi! Etiene item mme prophet mbiba ke eke eset ye eke idaha emi enyuŋ efiɔk ete ke mbufo ikemeke ndidibe edima Ete.
Edi, ebɔ utibede odudu edikɔk Erisio-isop Jesus Christ. Emi edi ata ntak eke nnyin ndidu—uwem ke ndibɔ mmem mmem ye ikpɔkidem emi “ememde ɔnɔ kpukpru oruk mmemidem” ŋko oro eyesuk ibuot ɔnɔ, ke mfuhɔ, ediwak mme akpa idomo; ke ndikɔri kpa ke ini nnyin iduɔde inɔ mme idomo emi; ndien ke ndiyom edisana unwam ke ima ikinam oro, man nnyin ikeme nditie nte Andinyaŋa nnyin ye Ete nnyin eke Heaven. Oro edi usuŋ Esie. Oro edi ŋkokure usuŋ. Ke mme ŋkpɔ emi ke ami nnɔ ikɔ-ntiense mbaŋa ke enyiŋ Jesus Christ, amen.