Idaresit Oto Ke Nditiene Ke Ediomi

Usen kiet ke 2023, Uyanga Altansukh okodu ke utom ke enyɔŋ-enyɔŋ obio Mongolian ke Darkhan ke ini mission president Mongolian okodukde itie utom esie. Ke mme ikɔ efen:

“Ami mma nkut enye ndien mma nkere ke enye ama enyene ikaŋ unwana ke ɔkpɔ-iso esie. Enye ama ɔfɔn ido onyuŋ ebre ye mbon emi ekedude ye enye, ndien ami mma nkop idaresit. Mbemiso enye ɔnyɔŋ ami mma mbup enye mme mbume ifaŋ. Ke usen ifaŋ ama ekebe, enye ama afiak edi itie utom mi ndien obup me ami nyedi ufɔk Abasi esie. Ami mma nkere ke ekeme ndinwam. Ami mma nkere mbaŋa iniso nditɔ mi, nte ererimbot ɔyɔhɔde ye mfina ye ekim. Ami nkoyom nditɔ mi etie nte ete emi ye unwana ke ɔkpɔ-iso mmɔ, esuan idaresit enɔ mbon efen emi edude ye mmɔ.

“Usen kiet mme missionary ema ekpep nnyin mbet tithing. Nditɔ mi ema etiŋ ye idaresit ete, ‘Ana nte nnyin ikpe tithing nnyin, Mma.’ Ami mma nkut mbuɔtidem nditɔ mi ke ini oro. Mbemiso ami ndiduk Ufɔk Abasi, ami mma nse general conference nyuŋ mkpaŋ-utɔŋ nnɔ President Russell M. Nelson. Enye ama asian abaŋa mme mbufa temple ke ofuri ererimbot onyuŋ ɔdɔhɔ ete ke eyebɔp obufa temple ke Ulaanbaatar, Mongolia. Ami mma nnem esit nyuŋ ntua, okposuk edide ke ŋkɔfiɔkke ntak. Ye idaresit emi, ami mma nkut nte ke mbuɔtidem ye ikɔ ntiense mi ke ɔkɔkɔri.”

Uyanga, nte mme million mbon efen, edi ubak ke akwa editaŋ Israel mbok ke mbeŋeidem nnɔ Edidi Ɔyɔhɔ Iba.eke Jesus Christ. Enye ɔtɔŋɔ isaŋ esie ke usuŋ ediomi onyuŋ akabade edi mbet Christ. Ɔwɔrɔ nso ndidi mbet Christ? Ami mema ikɔ Japan emi adade ɔnɔ mbet—deshi—de ɔwɔrɔ ekpri eyen eka eren, ndien shi ɔwɔrɔ eyen.

Jesus Christ ama ɔdɔhɔ ete, “Ami mma ndu ke editɔŋɔ ye Ete, ndien ami ndi Akpa eyen.” Ke ntak owo emi Enye edide ye se Enye anamde, nnyin ikpono Enye, nnyin ibaak Enye, nnyin inɔ Enye Ubɔŋ, ndien nnyin itiene Enye. Christ afak nnyin, ndien nnyin iminemesit ke nsinsi inɔ anana utit ye usio-isop uwa Esie.

Nnyin iminyene Ete ke Heaven emi amade nnyin nte nditɔ Esie. Enye enyene mfɔn-mma ima ɔnɔ nnyin. Jesus Christ ye utom Esie owut ima emi Abasi enyenede ɔnɔ nnyin. Nte John ekewetde, “Koro Abasi akamama ererimbot ntem, tutu Enye osio ikpɔŋ-ikpɔŋ Eyen emi Enye Obonde ɔnɔ, man owo ekededi eke ɔbuɔtde idem ye Enye okutak, edi enyene nsinsi uwem.”

Ke udɔŋ nnyin ndifiɔk se nnyin mifiɔkke, nnyin usukini idorienyin ke mme ifiɔk ererimbot nnyin, mme mme ŋkpɔ emi nnyin ifiɔkde. Ke nte uwut-ŋkpɔ, nnyin imikeme ndikpep ekpri mbaŋa Abasi Ete ito ete ye eka nnyin ye ebuana ufɔk emana ke uwem emi. Edi, ana nte nnyin ikpeme idem ke ndimen mme udomo emi nka anyan ke mme udomo nnyin ndifiɔ Ete nnyin ke Heaven. Mme edu Abasi Ete okpon akan edu ndomo kiet emi mifɔnke ima eke owo emi ɔduɔde. Abasi Ete edi Ete emi ɔfɔnde ama. Enye edi se ifɔnde-ima ke ima, eti ido, ifiɔk, ye mfɔn-mma ubɔŋ. Nnyin imikeme ndidori enyin ke Enye ofuri ofuri. Ima Christ owut ima Abasi Ete ndien ada ɔnɔ ima oro.

Jesus Christ edi uwut-ŋkpɔ ye usuŋ mbiba. Ke Christ, nnyin imikeme nditim mfiɔk mfɔn-mma edu Ete ye uduak Esie. Oto ke Christ, enɔ nnyin odudu ndikan mme usuŋ iren ye iban nte obot edide man nnyin ikabade itim itie nte Ete.

Kpa nte Ete ke Heaven, Jesus Christ edi mbɔm ye edinen emi ɔfɔnde ama. Mme edisana edu edinen ye mbɔm emi iduhe ke efaŋa. Mmɔ edada edian. Edinen ido ye mbɔm ewut mfɔn-mma ima emi Abasi enyenede ɔnɔ nditɔ Esie. Nnyin imikeme ndibuɔtidem ke Abasi Ete ye Jesus Christ ke ntak emi mmɔ edide edinen ye akpanikɔ ye kpukpru nnyin.

Abasi Ete ye Eyen Esie Jesus Christ esaŋa kiet ke ntak ye ima. Ke ntak emi Abasi ye Jesus Christ emade nnyin, enɔ nnyin ufaŋ ye ifet nte mme ata mbet ndinam mme ediomi ye mmɔ. Ke ndinam ntre, etat ebuana nnyin ye Christ: “Ndien idahaemi, ke ntak ediomi emi mbufo enamde eyekot mbufo nditɔ Christ, nditɔ iden esie, ye nditɔ iban esie; koro esese, mfin emi enye enyene mbufo ke spirit; koro mbufo edɔhɔde ete ke mme esit mbufo ekpuhɔ eto mbuɔtidem ke enyiŋ esie; ke ntak oro, mbufo emana eto enye enyuŋ ekabade edi nditɔ iden esie ye nditɔ iban esie.”

Nte mme mbet, ke ini nnyin inamde inyuŋ inimde mme edisana ediomi ediɔŋ nnyin ye odudu spirit. Edian nnyin ye Christ ye Abasi Ete ke saŋa-saŋa ebuana ndien ikan ikop ima ye idaresit Mmɔ ke usuŋ emi enimde enɔ mbon emi enamde enyuŋ enimde mme ediomi. Ukeme nnyin ndikop ɔyɔhɔ udomo ima Abasi, mme ndika iso ke ima Esie, ɔkɔŋɔ ke mme edinen udɔŋ ye mme edinam nnyin.

Ke John chapter 15, verse 9, nnyin ikot ite, “Nte Ete akamade mi, ntre ke Ami mma mbufo.” Ndien ŋko enɔ nnyin ikot, “eka iso ke ima mi.”

Ke udiana ufaŋ, enɔ“ nnyin usuŋ ndika iso ke ima Esie “Edieke mbufo enimde mme mbet mi, mbufo eyedu ke ima mi; kpa nte ami nnimde mme mbet Ete mi, ndien ndu ke ima esie.”

Nnyin ndien ikut ntak ndinim mme mbet ke ufaŋ 11: “Mma ntiŋ mme ŋkpɔ emi nnɔ mbufo, man idaresit Mi odu ke mbufo, idaraesit mbufo onyuŋ ɔyɔhɔ.”

Oto ke mbet ediomi akpanikɔ, nnyin imikeme nditim mfiɔk uduot Abasi ye idaresit emi Enye oyomde kpukpru nditɔ Esie enyene. Nnyin ŋko imikeme nditɔŋɔ ndifiɔk usuk ukpep-ŋkpɔ emi miŋwaŋake nnyin ke akpa. Ke nte uwut-ŋkpɔ, didie ke Abasi enyene ɔyɔhɔ idaresit ke ini usuk nditɔ Esie ebɔde ufen eti eti? Ibɔrɔ odu ke mfɔn-mma usuŋ Abasi ye ke mfɔn-mma uduak Esie. Enye okut nnyin tɔŋɔ ke editɔŋɔ esim se inyenede ke ediye iso. Enye ɔnɔ usuŋ, oto ke Eyen Esie Jesus Christ, ɔnɔ kpukpru nnyin, nditɔ Esie, ndikan mme ubiak, ukut, mme idiɔk ŋkpɔ, ndudue, ye ikpɔŋ ke uwem mkpa emi. Abasi ɔnɔ nnyin usuŋ ye ufaŋ.

Uwut-ŋkpɔ mbon emi enyenede idaresit ito ndidimbet ekeme ndinwam nnyin itim ifiɔk ŋkpɔ emi. Ekeme ndidi ke afo omokop mme ikɔ emi ete ke nnyin inemesit nte eyen nnyin emi minemke esit. Ami mokut nte ke inaha emi edi ntre. Eka mi emi edide isua 94 enyene ubon emi ewakde ekan 200. Ke ini kiet eke ededi, kiet ke otu 200 oro idinemke esit. Edieke ikɔ emi edide akpanikɔ, eka mi edidu ke idaha unana inemesit kpukpru ini, emi enye miduhe. Mbon emi efiɔkde enye efiɔk nte enye enemde esit.

Idahaemi nyema ndibuana ifiɔk efen. Ke January 2019, ema ekot ŋwan mi Debbie ye ami esin ke ubet utom President Nelson. Enye ama enim ŋkpɔ-itie ekere nnyin, ndien nnyin itie ekpri ayak edɔŋ ke edɔŋ. Ke ini enye ama ɔkɔnɔ nnyin ikot emi, President Nelson ɔŋwɔŋɔde ese Debbie onyuŋ etiŋ enyin ese enye. Enye ama ɔfɔn, enyene ima, edi suŋ-suŋ, onyuŋ ɔyɔhɔ ye idaresit, nte mfɔn-mma ete mme ete ete. Enye omum ubɔk Debbie onyuŋ ɔkɔm enye, ɔnɔ enye nsɔŋɔ ete ke eyefɔn ndien ete ke eyediɔŋ ufɔk nnyin. Eketie nnyin ke ini oro nte ke nnyin ikidi ata akpan mme owo inɔ enye ndien ke enye ama enyene ofuri ini ke ererimbot ɔnɔ nnyin. Nnyin ima ikpɔŋ ubet utom esie ke Friday oro ye ekikere emi ɔnɔde nsɔŋɔ, ima, ye idresit.

Ke Monday nnyin ima ikut mbuk oro. Kpa ukem usen oro emi President Nelson okodude ye nnyin, eyen anwan esie kiet ama akpa oto cancer. Idem ama akpa nnyin. Esit nnyin ama ɔyɔhɔ nte nnyin ikifuhɔde ye enye ye ufɔk esie. Esit nnyin ama ɔyɔhɔ ye ekɔm abaŋa ima nte Christ esie kabaŋa nnyin ke ini enye ɔkɔfuhɔde eyen anwan esie emi ɔkɔbɔde ufen.

Nte nnyin ikerede ibaŋa ifiɔk emi, nnyin ibup idem nnyin ite, “Didie ke enye ɔfɔn ntem, enyene ima, ndien adaresit kpa ke utɔ ɔkpɔsɔŋ ini ntre?” Ibɔrɔ edi koro enye ɔfiɔk. Enye ɔfiɔk ete ke Christ ama akan. Enye ɔfiɔk ke enye eyefiak odu ye eyen esie ndien ke oyodu ye enye ke nsinsi. Idaresit ye usuŋ nsinsi edi oto ndidiana ye Andinyaŋa ke ndinam nyuŋ nnim mme ediomi oto ke ndidi mbet nte Christ.

President Nelson ama ekpep ete: “Ukem nte Andinyaŋa ɔnɔde emem emi ‘akande kpukpru ifiɔk’ [Philippians 4:7], Enye ŋko ɔnɔ ɔkpɔsɔŋ, ntɔtuŋɔ, ye ebifik idaresit emi mitieneke ifiɔk owo mme ifiɔk uwem mkpa. Ke nte uwut-ŋkpɔ, idighe se ekopde idaresit ke ini emi eyen fo ɔbɔde ufen ye udɔŋɔ emi owo mikanke ikɔk mme ke ini ananade utom fo mme ke ini ŋwan mme ebe fo ɔkpɔŋde fi. Edi oro edi idara emi Andinyaŋa ɔnɔde.”

Nte nnyin inamde inyuŋ inimde mme ediomi, nnyin iyise aŋwa-aŋwa ndien inyene udɔŋ ndiwam mbon efen ekop udomo idara ye ima emi nnyin ikopde ke mme ebuana ediomi nnyin. Nnyin imikeme ndidi ubak ke ntak emi okponde akan ke isɔŋ mfin—nditaŋ Israel mbok. Nnyin imikeme ndiŋwam ndida nditɔ Abasi nsɔk Christ. Nte prophet Jacob ekekpepde, “Ndien ɔfɔfɔn ɔnɔ fi; koro ke ntak emi afo esinde ifik ke ndinam utom ye ami ke iŋwaŋ vine mi, ndien enim mme mbet mi, ndien afiak ada ɔsɔk mi mfri mi nte obot edide, … afo eyenyene idaresit ye ami ke ntak mfri iŋwaŋ mi.”

Nte nnyin idian idem nnyin ndinam nte mme mbet ediomi, ke ukeme nnyin eke ekpededi, ebuana nnyin ye Ete ye Eyen ɔkɔri, edian ke idaresit nnyin, ndien nsinsi usuŋ nnyin atara. Ndien ediɔŋ nnyin ye odudu ndien ikan ikop idara ke udomo emi enimde enɔ mme ata mbet ediomi Abasi. Ke edisana enying Jesus Christ, amen.