Ke Ata Enyin Nnyin

Ndito-eka iren ye iban, ami mmenem esit ndidu ye mbufo. Nnyin imama mbufo imenem esi inɔ mbufo; inyuŋ ikop eridiɔŋ otode akam mbufo.

Ke akpatre mbono ikinyenede, President Russell M. Nelson ama ɔdɔhɔ: Ndi mbufo emekut se itibede ke atta enyin nnyin? Ami mmebeŋe nte yak nnyin ikutaba uyai ini emi! Ke akpanikɔ, Abasi kanam utom Esie kusɔp.”

Kɔsɔp utom Esie. “Kɔsɔp” edi ikɔ emi eyomde. Enye owut ndisaŋa ɔsɔp, ndinam ɔsɔp, ye edu ndinam ɔsɔp. Ke nkɔri ufɔk-Abasi ye uduak Christ, ndisɔp edi ŋkpɔ-ntibe. Ndien kpukpru nnyin idi mbak esie.

Ke April 1834 ke Kirtland, Ohio, Joseph Smith ama obok ɔtɔ-kiet kpukpru mbon emi ekekamade itie-oku ke ekpri ubet-ufɔkŋwed ekedide ŋkp nte ikpat (4.3 m). Nnyin imekeme nditaŋ mme ubet-ufɔk-ŋwed oro ibon ke esit ufɔk Anwa Mbono emi, ye mme nyɔhɔ nsuhɔ ubet. Joseph Smith ama ɔdɔhɔ,“Edi ɔyɔhɔ ekpri eka-ubɔk Itie-Oku ke mbufo ekut mi okoneyo emi, edi Ufɔk-Abasi emi eyeyɔhɔ Edere ye Usuk America—enye eyeyɔhɔ ererimbot.”

Prophecy oro ɔwɔrɔ osu“ ke atta enyin nnyin.” Ufɔk-Abasi Jesus Christ eke Ndisana Owo Ukpere-edem Usen ke ɔkɔri ke ibat-owo ye ekpuk, mme mission ye mme missionary, ufɔk-ederi ye mme temple, itie-ukpepŋwed, ye mme ufɔkŋwed nta-ifiɔk ke ofuri ererimbot

Nnyin imenemesit ndidu ke ererimbot ke ini emi Ufɔk-Abasi ɔkɔride ke ibat ye odudu, edi atta akpan-akpan, ke esit ye uwem ikɔt esie. Ediɔŋɔ nnyin nte mme Anditiene Jesus Christ. Nnyin ibuana ikɔ ntiense nnyin ibaŋa Enye, Ufɔk-Abasi Esie, usuŋ Esie, ye usuŋ ediomi Esie. Nnyin idi ikɔt Esie, Enye onyuŋ edi Andinyaŋa nnyin.

Idem akpa mi abaŋa se President Nelson okotde “uyai eke ini emi” nyuŋ ŋwut ata esit-ekɔm nnɔ Ɔbɔŋ Abasi ke utom Esie. Mmɔnɔ mbufo uko nte yak esɔŋ eda nte mme anditene Enye, mbon emi ekutde nte prophcy osude, eke eyo oko ye eyo emi.

Edu mbon eneni emi efioride, “Edi mi enyuŋ Eka ko,” kpasuk nte mmɔ ekenamde ke ini Prophet Joseph Smith. Nte ededi, mmɔ edi, ndien edisuk idi mme ikpu-ikpu owo ke odot-ukpono utom emi. Eti ikɔ Prophet Joseph Smith: “Iduhe idiɔk ubɔk emi ekemede nditre utom emi ndika-iso; isin-enyin eyesak nte ikaŋ, … edi akpanikɔ Abasi eyeka iso ke uko, ke ubɔŋ, ye ke idem esie, tutu enye oduk ofuri idut, ekesim nsat ye ukwɔ, ɔkpɔri kpukpru obio, enyuŋ ekop ke kpukpru utɔŋ, tutu uduak Abasi ewɔrɔ esu, ndien Jehovah Ata Edikoŋ eyɔdɔhɔ ette utom ekure.”

Ke utom mi isua emi, ami ŋketie ke akpa udim ŋkpɔ-itie ke utom Ɔbɔŋ Ndisɔp utom Esie. Ufɔk-Abasi ke ebɔp temple ke ndaha emi akpade owo idem, emi ɔnɔde ediwak mbon ufɔk-Abasi ukeme ndituak-ibuot ke ufɔk Ɔbɔŋ oro. Udiana, utom ukwɔrɔ-ikɔ ke adian ediwak owo ɔnɔ otu-erɔŋ Eti Ekpeme-erɔŋ, Jesus Christ. Anam ita, ukpep-ŋwed ufɔk-Abasi ke ediwak usuŋ, odu ke obufa akwa ndaha ke ndikpep mbon emi “eyomde Jesus emi.”

Mfin emi, Ufɔk-Abasi enyene temple 367 ke nsio-nsio ndaha mbuwed, edibɔp, mme ediberede. Ndien, edi ke nsutɔ ntak? Ibɔrɔ edi se ewetde ke idem temple kiet-kiet: “Edisana ɔnɔ Ɔbɔŋ Abasi.” Temple atat usuŋ atta edikoŋ eridiɔŋ emi Ete nnyin ke Heaven enyenede ɔnɔ owo nnyin kiet-kiet. Nditɔ-eka iren ye iban, nnyin inam edisana nnyin ɔsɔp nte nnyin idotde ndiduk temple, nte nnyin ituakde-ibuot ke ufɔk Ɔbɔŋ Abasi, ye nte nnyin inamde ediomi ye Abasi inɔ idem nnyin, ye ke ibuot mme nkani owo nnyin ke ŋkaŋ mbiba ikpehe.

President Nelson ɔdɔhɔ ete: “Ukɔbɔ andidiɔk okpon eti-eti, ke ndaha, ye ke uduot. Akamba ufɔn odu nnyin ndidu ke temple kpukpru ini. Ami mmebeŋe mbufo ebɔŋ akam eyom nte ebiatde ini mbufo.” Ke ufɔk Esie nnyin iyekut iso Ɔbɔŋ Abasi ye atta emem

Isua oko ami mma nnyene ifet nditie-ibuot ke ediberede Temple Mendoza Argentina. Ke etop mi, mma ntiŋ mbaŋa prophecy Elder Melvin J. Ballard ke 1926, ɔkɔdɔhɔde ke utom Ɔbɔŋ Abasi eyekɔri suŋ-suŋ ke ekpri ini ke South America, “kpasuk nte eto Oak ɔkɔride suŋ-suŋ oto mfri. Iditibeke iwɔrɔ ke usen kiet,” edi tɔsin eyeduk Ufɔk-Abasi emi, ndien mme idut ke South America eyekabare edi ”odudu ke Ufɔk-Abasi.” Prophecy oro ɔwɔrɔ osu ke atta enyin mi.

Mendoza, ini kiet ekedide ekpri mfri, edikabare edi akwa eto Oak. Nkɔri oro ke afiak etibe ke kpukpru idut ye isuɔ akpa inyaŋ.

Nnyin ime okut Ɔbɔŋ Abasi awarade utom Esie ke mme mission. Ke 2024, mme missionary 80000 ekenam utom ke mission 450. Edip ye efirekiet ke otu oro edi mbufa mission. Isua emi ekebede utom ukwɔrɔ-ikɔ ama ada mbufa owo ebede 300,000 edisin ke Ufɔk-Abasi. Akande ibat oro, spirit edibok ɔtɔ-kiet ada ediwak ukpɔŋ ɔsɔk Jesus Christ ye gospel Esie.

Ami mmeti mme Apostle Brigham Young ye Heber C. Kimball, emi ke 1839, ekekade isaŋ nte mme ɔkwɔrɔ-ikɔ ke British Isles. Idem mmɔ ikesɔŋke; mmɔ ekekpɔŋ ekpuk mmɔ ke udɔŋɔ ye unana. Nte ededi, owo iba oro ema edɔK eduk ukpat-ŋkpɔ, ndien nte mmɔ esuk esede ikɔt mmɔ, Heber ama ɔdɔhɔ, “Yak idaha ida inyuŋ ikɔm mmɔ.” Mmɔ owo iba ema enwana edaha eda enyuŋ efiori, “Hurrah, Hurrah enɔ Israel.”

Mma nnyuŋ nkut ukem udɔŋ ndinam utom Christ oro ke Lima, Peru, ke ini ŋkosobode ye mme ɔkwɔrɔ-ikɔ eketode missionary training centre ye Mission ke Lima Nsutɔ ndise! Mma nkut edisɔp ke atta enyin mi. Idahaemi mission itiaba edu ke isɔŋ Lima kpɔt.

Ke utit esop nnyin, mme ɔkwɔrɔ-ikɔ oro ema enyene ŋkpɔ mkpa-idem ndinɔ mi. Mmɔ ema edahaeda enyuŋ edara, “Hurrah enɔ Israel.“ Ami ndifreke ini oro; ɔdɔŋ mi nte kpukpru mbufo ekpekedu do. Ke atta enyin mi ekedi mme ɔkwɔrɔ-ikɔ emi ekekpɔŋde “ŋkpɔ ererimbot” man ekpenam utom Ɔbɔŋ Abasi onyuŋ anwam ke edisɔp ndi Esie

Nnyin imokut nte Ɔbɔŋ Abasi edisɔpde ukeme ndika ufɔk-ŋwed ɔnɔ ikɔt nnyin ye mbon efen ke ofuri ererimbot. Mkpɔ kiet emi abahade nnyin nte ufɔk-Abasi edi nnyin ndisɔŋɔ ntiŋ mbaŋa ukpep-ŋwed. Ɔbɔŋ Abasi ama eteme ke ntɔŋɔ Edifiak-mmen-ndi yak “iyom ifiɔk, kpa ke ndikpep ye ke mbuɔtidem nko.” Oro ketibe mfin, ndien odot efioride “hurrah.”

Idahaemi nditɔ ufɔk-ŋwed ewakde ekan 80,0000 ke nkan-nkuk ererimbot esin enyiŋ ke seminary ye Institute, usin-enyiŋ emi awakde akan ke mbuk Ufɔk-Abasi. Mkparawa nnyin eboho ke nsio-nsio usuŋ, ɔtɔŋɔde ke ukpep-mkpɔ mbak nsiere usenubɔk, uwemeyo, ye mbubreyo ekesim online ye ukpep-mkpɔ esit ufɔk. Mmɔ edi mme okop odudu ye ndinen udim-ekɔŋ, emi enyenede nsɔŋɔ eto kiet eken nte mmɔ ekpepde ebaŋa Jesus Christ, etiene enyuŋ etiŋ ikɔ ntiense ebaŋa Enye nte Eyen Abasi

Ke ini ukwɔ emi ekebede, mma ntiŋ ikɔ ke devotional kiet nnɔ anwa emi nditɔ seminary ye institute ekeyɔhɔde, ye mme ete ye eka mmɔ ke University Utah. Edidu mmɔ do ama etiŋ ediwak ikɔ abaŋa udɔŋ mmɔ ndidiɔŋɔ nnyuŋ ntiene Jesus Christ. Etop mi nkɔnɔde nditɔ ufɔk-ŋwed oro ekedi anwa-anwa: Enɔ Ɔbɔŋ Abasi ukem-ukem ini. Ami mma nteme mmɔ nte yak mmɔ enam ukpep-mkpɔ ekem ndaha ye nnen-nnen, ŋkoŋ-ŋkoŋ ifiɔk, kpa ukpep-ŋkpɔ abaŋade “Eyen odu-uwem Abasi.”

Nyom ukem mkpɔ emi nto kpukpru owo mfin: ŋwed ŋkpɔ edinamde, yak ukem-ukem ini, idihe nyɔhɔ-nsuhɔ ini, nnɔ Ɔbɔŋ Abasi ke ndikpep scripture ke idem mbufo, ndikpep Come Follow Me nte Ekpuk,akam, ikot ke Ufɔk-Abasi, edisaŋa nse, ndidia sacrament, ndika temple, ye ndikere mbaŋa mme mkpɔ Abasi. Ɔbɔŋ nnyin ye Andinyaŋa etiŋ ette“Ekpebe mi; … ndien mbufo eyekut nduɔk odudu enɔ ukpɔŋ mbufo.” Da Enye ke ikɔ Esie. Onyuŋ ɔnɔ Enye ukem-ukem ini.

President Nelson etiŋ: “Mmebeŋe mbufo eyak Abasi akara ke uwem mbufo. Enɔ Enye eti ubak ini mbufo. Nte enamde emi, se se iditibede inɔ eti ndaha ukeme spirit mbufo.”

Nnyin imokut ubɔp ukeme oro ke mme seminary, institute, ye ufɔk-ŋwed nta-ifiɔk Ufɔk-Abasi. Ke ebiet enye emi, Ɔbɔŋ Abasi edi akpa. Ntre ke ana Enye edi ke uwem owo kiet-kiet.

Nkaŋ efen emi owutde ndaha emi ukpep-nkpɔ ɔkɔride ekesim ke Ufɔk-Abasi edi BYU-Pathway Worldwide. Ke ofuri ererimbot, usin-enyiŋ esim 74000, onyuŋ akaiso ndikɔri ke usɔp. Mbon ufɔk-Abasi ewakde ekan edi ikɔt Ufɔk-Abasi, ndien mbak kiet ke ita edu ke Africa. Pathway abaŋa ndinɔ usuŋ asangade aka ufɔk-ŋwed. Ndikure mme ukpepmkpɔ ɔwɔrɔ usuŋ ndinyene utom, ndien ndiwut mbufo usuŋ ndinam utom ŋwɔrɔ eti uwem ɔnɔ ekpuk ye ukeme ndikpono Abasi

Ini nkokutde mme adausuŋ ke mme stake ke Uganda, mma nkop ke kpukpru owo edude ke presidency mme stake ema esin enyiŋ ke BYU–Pathway. Nte nnyin ibeŋede idem ke obuk-idem ye spirit, ntre ke nnyin idikeme ndikan ŋkari Satan. Ti mme ikɔ Peter: “Satan,nte lion okunide, oyoyo, oyomeke enye editade.”

Ami mmɔdiɔŋɔ nte ke ufɔt eti mbuk gospel, edu mbon emi enwanade, emi enyenede mfina ke mbuɔtidem, eyihe, ye mbume emi minyeneke ibɔrɔ. Ndito eka iren ye iban, Jesus Christ edi ibɔrɔ. Etɔŋɔ ye Enye. Eyom ubok Esie ke uwem mbufo. Ekpaŋ utɔŋ enɔ Enye. “Ekuyak esit mbufo etimede,” Enye eketiŋ ke akpatre ini Esie ɔnɔ mbet Esie mbemiso edika Gethsemane, mbemiso ekemen cross asaŋa ke efak Jerusalem, mbemiso Golgotha, ebiet emi Enye ekekurede uwa usio-isop Esie, ŋkpɔ emi Enye ikpɔŋ, Ikpɔŋ-Ikpɔŋ Eyen Abasi, ekemede ndinam.

Ediɔŋɔ ete ke anwaŋa Enye. Enye ama emen odori ke idem Esie kpukpru mme idiɔkŋkpɔ nnyin, ndudue, ukut, ye mme atta idiɔk usen man nnyin ifiak idu uwem ye Ete nnyin keHeaven ke nsinsi. Enye eketiŋ ete, “Ese mi ke kpukpru ekikere; ekunyene eyighe, ekufehe ndik.” Mbuɔtidem ke Jesus Christ eyemenere mbufo onyuŋ ɔkɔk unan ukpɔŋ mbufo. Nyene mbuɔtidem ke Enye ndien mbufo eyesɔp edifiak nnyɔŋ nka “eka-ubɔk ima Esie.”

Mmeyire ntiŋ ini efen ikɔ odu uwem prophet nnyin: “Ndi mbufo emekut se itibede ke ata enyin nnyin? Ami mmebeŋe nte yak nnyin ikutaba uyai ini emi! Abasi kanam utom Esie kusɔp.” Yak nnyin nte mme mbet ini nnyin emi ifiori, “Hurrah inɔ Israel” nte nnyin ibeŋede idem inɔ edifiak ndi Ɔbɔŋ ye Andinyaŋa nnyin. Ke enyiŋ Jesus Christ, amen.