Usuŋ Heaven Ekpemede Nnyin
Nte nnyin iwukde enyin nnyin ke Jesus Christ, nnyin iyekut usuŋ ikesim ufɔk, iyɔ ikesim utit inyuŋ idara ikesim utit.
Jesus Christ ama ɔkpuhɔre uwem mi ke ini ŋkɔduɔkde mmɔŋ ini nkedide isua 26 ke edima Frutillar, Chile. Ke ini oro utom mi ama ada mi ebe mme inyaŋ ye isuɔ ke ediye Chilean Patagonia. Uduɔk-mmɔŋ mi ama ekebe, mma nkut uwem mi ke obufa ye ukpuhɔre usuŋ, mandiɔŋɔ ke “kpukpru ŋkpɔ owut ke Abasi mmɔdo odu.”
Ke ubono ŋkpɔ obot, salmon emana ke ebiet emi inyaŋ ɔtɔŋɔde ɔwɔrɔ. Ke mme itn ke uwem mmɔ, ana mmɔ ewɔk esuhɔre ekesim akwa-akpa, ebiet emi mmɔ edikutde inem udia ye mme ŋkpɔ eken ɔfɔnde ye nkɔri mmɔ.
Edi akpa-inyaŋ edi idiɔk ebiet emi mme ndiɔi unam edude ebet ye ebiet emi mme ɔkɔ-iyak ebinede ndimum mme iyak emi ye nsem-nsem uwam emi ebietde udia edi iyuhɔke mmɔ. Edieke mmɔ ebɔhɔde mme ŋkpɔ ndik emi, mmɔ eyedu ke mbeŋe-idem ndida ediye usuŋ ukpeme mmɔ eda efiak edɔk enyɔŋ akpa eka ukem ebiet emi mmɔ ekemanade, eka-iso ekut obufa ye mme mfina mmɔ ediɔŋɔde. Nta-ifiɔk eduŋɔde nte mmɔ esisaŋade ke mme isua enyuŋ ekut ke mmɔ eda ŋkpɔ ebietde manetic map, etiede nte GPS, ada ekpeme mmɔ ekesim akpatre ebiet mmɔ ekade atta nnen-nnen.
Usen kiet, kpupru nnyin imekeme ndifiak nnyɔŋ ebiet-iduŋ heaven emi nnyin ikotode idi. Ndien nte mme salmon, nnyin imenyene eke nnyin magnetic map, mme Uŋwana Christ, ada ekpeme nnyin ekesim do. Jesus ɔdɔhɔ ete, “Ami ndi usuŋ, akpanikɔ, ye uwem: owo baba kiet itieneke Ete, ibɔhɔke ebe ke ami.”
Nte nnyin iwukde enyin nnyin ke Jesus Christ, nnyin iyekut usuŋ ikesim ufɔk, iyɔ ikesim utit inyuŋ idara ikesim utit. President Nelson ekpep ete: “Inemesit emi nnyin inyenede enyene ekpri nkpɔ ndinam ye mme ŋkpɔ-ntibe ke uwem nnyin edi kpukpru ŋkpɔ ndinam ye nte uwem nnyin etiede.”
Edisana Uduot Nnyin ye Akpatre-Iduŋ
Ke etop abaŋade ufɔkemana, nnyin imokot ete “owo kiet-kiet [ke idem nnyin] idi edima eyeneren ye aŋwan spirit ete ye eka ke heaven, ndien, ke ntre, owo kiet-kiet enyene edisana uduot ye akaŋa. … Ke ererimbot ikitode idi, nditɔ spirit iren ye iban Abasi, ema ediɔŋɔ enyuŋ ekpono Abasi nte Nsinsi Ete enyuŋ enyime uduak Esie emi edinamde nditɔ Esie ekeme ndibɔ ikpɔk-idem efiak enyene uwem-isɔŋ eda ekɔri ebine mfɔn-mma ndien ke akpatre ediɔŋɔ edisana akatre-iduŋ mmɔ nte mme andinyene nsinsi uwem.”
Mbemiso eman Enye ke isɔŋ, Jesus Christ ama owut Moses idem onyuŋ etiŋ ikɔ ɔnɔ enye ke enyiŋ Ete. Enye ama ɔdɔhɔ Moses ke imenyene akwa utom ndinɔ enye anam. Ke esop oro, Ɔbɔŋ okot enye “eyen mi” ediwak ini.
Oro ama ekebe, Satan ama edi ndidomo enye, ette “Moses, eyen owo, tuak ibuot nno mi!”
Moses ama ɔnɔ ibɔrɔ ke enye nditi edisana uduot esie, ete, “Afo edi anie? Sese, ami ndi eyen Abasi.” Akpanikɔ ama anyaŋa Moses osio ke eŋwan ye andidiɔk.
Nditɔ eka iren ye iban, mkpɔkɔbi mmɔdo ke ererimbot. Mmɔ esiye, edi mmɔ esiyom ŋkpɔ idomo kiet kpɔt: eda eduri nnyin esio ekpɔŋ usuŋ mmɔŋ uwem emi adade ebine Ete ye uwem nsinsi.
Ami mmɔdiɔŋɔ ke ŋkpɔkɔbi ke ererimbot edi akpanikɔ. Ederi kiet, nte obufa owo ke ufɔk-Abasi, ami nkekpep ŋkpɔ ke ubet-ukpep-ŋkpɔ itie-oku kiet ke ini ufiop-ufiop nneme ɔkɔtɔŋɔde. Mma ŋwana man nkure ukpep-ŋkpɔ mi. Mma nyatesit nyuŋ nkere ke ami ke ekeyom. Ke ndop-uyo, mma nsaŋa nka enyin usuŋ ye ekikere ke ndisɔpke mfiak ndi ufɔk-Abasi ke esisit ini.
Kpa ke ndo-ndo oro, owo kiet akakamade itie-oku, ama ɔwɔrɔ ada mi ke iso, Enye ama okot mi ke ima ɔdɔhɔ yak nse Christ mkpɔŋ se iketibede ke ubet- ukpep-mkpɔŋ, Nte nketide sikitibede ye enye, enye ama ɔdɔhɔ mi ette ke imɔ ikokop uyo ɔdɔhɔde enye, “Ka bine enye; enye enyene ufɔn ɔnɔ me.”
Ndima ufan mi, nnyin kpukpru imenyene ufɔn inɔ Enye. President Nelson ama ekpep oro “ke ntak ediomi nnyin ye Abasi, Enye idikpaha mba ke ukeme Esie ndiŋwam nnyin, ndien nnyin idikureke anyan ime Esie ye nnyin.” Edisana uduot nnyin ye ebuana ediomi ye Abasi ɔnɔ nnyin unen ndibɔ edisana uŋwam heaven.
Ntak Iyomde Udia
Kpasuk nte nte salmon eyomde udia ke akpa-mmɔŋ eda ekɔri, nnyin nko ana inɔ idem nnyin udia eke spirit man itre ndikpaŋa ke ntak unana udia eke spirit. Akam, ŋwed Abasi, temple, ye nnyin ndika esop Ederi kpukpru ini, edi akpan-ŋkpɔ ke ndutim spirit nnyin.
Ke November 1956, Ricardo García ema eduɔk mmɔŋ ke chile, edide akpa owo ufɔk-Abasi ke obio mi. Usen kiet mbemiso enye akakpa, enye ama etiŋ ke iso mbon ekpuk esie ye ufan, “Ediwak isua emi ebede, missionaries ema ekot mi nsaŋa ye ekpuk mi ndinemesit. Ami ndi owo inemesit. Ntiŋde nnɔ kpukpru owo ke Chile ke ikɔ Abasi edi inemesit.”
Ema ekebɔk enye ye gospel Jesus Christ, Ricardo ama ayak ofuri uwem esie ɔnɔ ndikpono Abasi ye mbɔhɔ-iduŋ esie ke ima. Uwutŋkpɔ esie ɔdiɔŋ ediwak emana, esinede okim. Prophet Joseph Smith ekekpep ete: “owo emi ɔyɔhɔde ye ima Abasi, iyuhɔke ke ndidiɔŋ ufiɔk esie ikpɔŋ, edi ebe ekesim ofuri ererimbot, ye udɔŋ ndiɔŋ ofuri ubon owo.”
Iyefiak Inyɔŋ Ebiet-Iduŋ Heaven Nnyin
Ke ntuŋɔ esit nnyin kiet-kiet imenyene udɔŋ ndifiak nnyɔŋ nka ebiet-iduŋ heaven nnyin, emi Jesus Christ edide usuŋ ukpeme eke heaven nnyin. Enye edi usuŋ. Nwaidem Esie anam edi memm-mmem ɔnɔ nnyin ndinam ndinen ediomi ye Abasi. Nnyin ima inam ediomi, iyekut idem nnyin ndusuk ini nte inamde ŋkpɔ emi mifɔnke. Afai, edikpu, idomo, ye ukut eyedomo mbuɔtidem ye odudu spirit nnyin. Eyom unwam. Jesus Christ ɔdiɔŋɔ onyuŋ oyom ndibuana ke mbiomo nnyin.
Eti ete ke ediɔŋɔ Enye nte, “owo ukut, onyuŋ emehe ke mfuho.” Andinyaŋa ama ekpep ete, “Mbufo eyekut ukut ke ererimbot: edi esɔŋ esit; Ami ŋkakan ererimbot.” Nwa-idem Esie ayak efen ndudue nnyin ekesim idaha emi Enye mmitihi mmɔ aba.
Nnyin idikemeke ifre ndudue nnyin ofuri-ofuri nte mbak ukpep-ŋkpɔ nnyin edi nnyin iyeti nditre ndifiak nnam mmɔ. Midihe, nnyin iyeti Enye ke ini idiade udia-ɔbɔŋ ke ufɔk-Abasi ofuri Ederi. Edinam emi edi ata akpan ubak ukpono ye ŋkɔri ke spirit. Idara odu adaŋa-nte ifiɔkde ite ke emi idihe ke usen efen. “Ekenam usen sabbath enɔ owo,” ye ekikere ndinɔ nnyin nduɔk-odudu mkpɔŋ ererimbot ye ndifiak ndemere ikpɔk-idem nnyin ye spirit.
Nnyin iyeti Enye nko ke ini nnyin ima ika temple—ufɔk Ɔbɔŋ. Temple ɔnɔ nnyin ntɔtuŋɔ ifiɔk abaŋade Jesus Christ nte ufɔt ediomi emi adade nnyin aka nsinsi uwem, andikpon-ŋkan ke kpukpru enɔ Abasi.”
Ndika temple ɔnɔ mi inemesit ye akwa idorenyin abaŋade nsinsi ebiet-iduŋ nnyin. Ami mmenyene ifiɔk edidianakiet heaven mme owo ke nkaŋ ikpehe mbiba. Mokut utibe erikɔk ke uwem mkpri nditɔ mi, iba emi edude ye ud emɔŋɔi owo mikwe ke enyin emi oyomde ukpeme ke usen-ke usen ke nyɔhɔ nsuhɔ uwem emi.
Ufɔkemana nnyin edara nte nnyin inemede ibaŋa uduak inemesit. Iso nditɔ mi esiyama ke ini mmɔ ekopde, ekɔm enyene Jesus Christ, eke mmɔ “ukut eyedi kpasuk ke esisit ini.” Nnyin imima nditɔ nnyin eti-eti, inyuŋ idiɔŋɔ ite usen kiet, nte President Jeffrey R. Holland ekekpepde, mmɔ “eye da ke iso nnyin enyene-ubɔŋ enyuŋ eye, efɔn-ma ke ikpɔk-idem ye ukpɔŋ.” Ediomi nnyin esik nnyin ekpere Abasi ekesim ebiet emi anamde se isɔŋde emem, ada unwana ye emem esiri kpukpru ufaŋ ekim ye eyihe.
Ekɔm enyene Jesus Christ, idorenyin ye ata isɔŋ ntak edu ndika-iso ke ndima, ke ndibɔŋ akam mbaŋa, ye ke ndiŋwam mbon emi ituade mbɔm.
Ami mmefiɔk ke Enye odu uwem. Enye ɔdiɔŋɔ nnyin onyuŋ ama nnyin. Enye edi usuŋ, akpanikɔ, ye uwem ofuri ererimbot.
Ami mmokot kpukpru nnyin mfin yak iwuk uwem nnyin ke Jesus Christ ye ukpepŋkpɔ Esie. Ndinam ntre eyeŋwam nnyin itre ndiduk idomo, iyatesit, ye useme-idem. Nnyin iyeda nte mme temple—isana, isihekede, ye ukem-ukem. Nnyin idifeheke ndik, inyuŋ inyɔŋ ikesim ufɔk, iyɔ ikesim utit inyuŋ idara ikesim utit. Ke enyiŋ Jesus Christ, amen.