“Efiak etiene Mi … Man Ami Mkpɔkɔk Mbufo”

Inikiet nnyin ikiduŋ ke ufɔkiduŋ kiet emi mme enyene uteŋe eto ekekanare ekuk. Efen emi ekperede mbe-nduk ufɔk oro ekedi ediye eto emi esibehede mfaŋ. Ke okoneyo mfuhɔ kiet ɔkpɔsɔŋ oyobio ama ofime, ndien eto oro ama ɔduɔ. Enye akana ke isɔŋ ye mme oruŋ esie emi ewebede ndien ekedi ŋkpɔ mbɔm.

Ami mma mbeŋe idem ndida engine usiak-eto nsibe eto oro nnam ifia kini mbɔhiduŋ nnyin ɔwɔrɔde efehe edi editre mi. Enye akasua ɔnɔ mi ke edisin eto oro, ndien enye enehede ebeŋe nnyin ete ikuwot eto oro. Edikem enye anyan-ubɔk owut oruŋ kiet emi osuk esinede ke isɔŋ ndien ɔdɔhɔ ete edieke nnyin imenede eto oro ke enyɔŋ, isibe ŋkɔk esie, inyuŋ ibɔɔk enye, mme oruŋ eyenyene uwem inikiet efen.

Ami ŋkinimde nyuŋ nyik nte eto emi ɔkɔduɔde onyuŋ odu ke mfina ekemede edibɔhɔ nyuŋ mfiak ndu uwem. Ami ndikere nte edieke eto oro afiakde ɔtɔŋɔ edikɔri, enye idibɔhɔke oyobio efen. Edi ndidiɔŋɔ ke mbɔhiduŋ nnyin enim ke eto oro osuk enyenyene ini-iso, nnyin ima inam uduak oro.

Ndien nsidi ibɔrɔ? Ke esisit ini ebede, nnyin idikut mme idiɔŋɔ uwem ke nte eto oro ɔtɔŋɔde edinyene oruŋ. Idahaemi, ke isua Duopeba ebede, eto okop-idem ye uwem onyuŋ ɔyɔhɔ ye mkpɔsɔŋ oruŋ, ndien inikiet efen edisin uyai ɔnɔ ebiet oro.

Ke ini ami nsobode mbon Ufɔk Abasi ke ofuri ererimbot, ami mmesiti eto emi ye nte idorenyin odude kpa ke ofuri idorenyin ama okokure. Ubak-owo ke ini kiet ema enyene ikɔ-ntiense eke gospel emi ama ɔkɔsɔŋɔ-ada enyuŋ ekop-idem nte eto oro. Ekem, ke ata ntak eke idem mmɔ, mme ikɔ-ntiense oro akabare emem, adade ekesim mbuɔtidem edisop. Uba-owo ekɔŋɔ ke mfefere oruŋ emi eyiride ke isɔŋ ikɔ-Abasi.

Edi efen ye efen, ami mmenem esit ke mme mbuk ata ediwak owo emi ekemekde ndifiak nam ndaha-mbet mmɔ edi obufa enyuŋ efiak edi Ufɔk Abasi mmɔ. Utu ke edisisin mbuɔtidem ye edinim mmɔ nte anana-udori ifia oro, edi mmɔ ema ebɔrɔ nduduai spirit ye ndima ikoot edifiak ndi.

Ami ŋkeka mbono stake kiet ke Korea ke ebiet emi owo ufɔk Abasi emi afiakde edi ɔdɔhɔde ete: “Ami mmɔkɔm nditɔ-ka irenowo ke uduak mmɔ ndinyime unan mbuɔtidem ye mmemidem mi, ke ediyom mi, ye mbon ufɔk Abasi emi esifɔnde ido ye ami ke ofuri ini. Ami nsuk nnyenyene ediwak ufan ekperede mi emi misinke idem ke ufɔk Abasi. Edi mbubru, edi mmɔ esidɔhɔ kiet eken ete eka Ufɔk Abasi efiak ekebɔ mbuɔtidem mmɔ. Ami ŋkere ke ekeme edi-di ke kpukpru mmɔ enehede eyom mbuɔtidem.”

Eke kpukpru owo emi eyomde mbuɔtidem, nnyin imikoot mbufo ete efiak edi. Ami ŋwɔŋɔ ke mbuɔtidem mbufo ekeme edisɔŋɔ nte mbufo efiakde edituak-ibuot ye ikɔt Abasi.

Akani missionary otode Africa ekewet ŋwed ɔnɔ esɔk akamba adausuŋ eke Ufɔk Abasi, ekpe-ubɔk onyuŋ oyom erifen-nnɔ ke edikop iyaresit nto ukpep ŋkpɔ esie kabaŋa ido mbon-iduŋ kiet, emi akanamde enye ediwɔrɔ ke Ufɔk Abasi. Enye osuhɔre-idem etiŋ ete: “Ke mbɔm, akpanikɔ eke ami ŋkeyatde esit ke isua Efut emi ekebede edi-namde mi mkpe ata ndodobi ekɔm-urua. Ata ediwak ŋkpɔ atak mi—enehede awak se ami mkpekerede. Ami mmenehede ŋkop esuene ke idiɔk eke ami mkpenamde ke usuŋ oro, edi akande oro ami mmenem esit koro ami mmokut usuŋ mi mfiak ndi.”

Eke kpukpru owo emi efiɔkde se itakde fi, nnyin imikot fi ite fiak di man afo inikiet efen ekeme editabi mfri idara eke ikɔ-Abasi.

Eyeneka-aŋwan kiet ke United States ama ɔkpɔŋ Ufɔk Abasi ke ediwak isua. Mbuk edifiak ndi esie esine ɔsɔŋɔ ukpep ɔnɔ mme ete ye eka ye mbon ufɔkemana emi ekopde ubiak ke mbon ima mmɔ emi ekewɔrɔde. Enye ewet ete:

Ami mmekeme ndibat ediwak ntak eke ami ŋkekpɔŋde Ufɔk Abasi, ikɔAbasi, ndien ke ndaha efen mkpɔŋ ufɔkemana mi. Edi mmɔ inehede inyene ufɔn. Ami ŋkinamke akamba ubiere kiet ndikpɔŋ Ufɔk Abasi—ekeme edidi ami mma nnam ata ediwak mbumek. Edi ŋkpɔ kiet ami nsiwakde edidiɔŋɔ edi ke ete ye eka mi ema enam akamba ubiere kiet, ndien mmɔ eyire ke ubiere oro. Mmɔ edibiere ndima mi.

“Ami ŋkemeke edifiɔk ediwak mmɔŋeyet emi eketuade, ediwak okoneyo unan-idap emi okodude, mme ediwak iduɔesit mkpe-ubɔk akam emi ekebɔŋde ke ibuot mi. Mmɔ ikikotke mi isio ke idiɔkŋkpɔ mi; edi, mmɔ ekekot mi esio ke edi-nam idiɔkŋkpɔ mi. Mmɔ ikinamke mi ŋkere ke owo iyomke mi ke ufɔkiduŋ ye ke mboho ufɔkemana mmɔ; kiet kotu ekikere ekedi eke mi. Edi, mmɔ ekeka-iso ndidara mi. Ekeme edidi mmɔ ema ekut nte uŋwana mi enimede ke esisit ini. Edi mmɔ ema ediɔŋɔ ke owo eke ami ŋkedide kini edem ekedi mbukpɔŋ eke owo eke ami mikabakede ndi kaŋa.

“Ukem nte usuŋ mi edikpɔŋ Ufɔk Abasi ɔkɔsɔŋde, ntre ke usuŋ mi edifiak ndi ɔkɔsɔŋ. Edi ŋkpɔ kiet emi mikisɔŋke kabaŋa edifiak ndi ekedi ekikere edifiak nnyɔŋ ebiet ufɔkiduŋ eke ami ntode.”

Etop mi mfin emi edi akpan-akpan ɔnɔ ofuri mbon emi ema ekenyene Spirit akpa edi eyik mme usuŋ odu ndifiak nnyɔŋ mme itie odu ɔnɔ fi ke mfiak-mmen-ndi Ufɔk Abasi Jesus Christ. Edi ŋko ɔnɔ owo ekededi emi eyiride ke mben mme enye emi oyomde edikpɔŋ ufɔk Abasi.

Etop emi idige eŋwan, inyuŋ idige ubiom-ikpe. Edi ikoot, enɔde ke ima ye akpan udɔŋ ndidara afo edifiak nnyɔŋ ndi ufɔkiduŋ spirit fo.

Ami mmebeŋe yak afo enyene ntiense Edisana Spirit idahaemi nte afo okopde edima ikoot ye utibede eŋwɔŋɔ emi otode Andinyaŋa nnyin, Jesus Christ ete:

“Nte mbufo idifiak-ke edem idahaemi itiene mi, ndien etua-mkpɔfiɔk ke mme idiɔkŋkpɔ mbufo, enyuŋ ekabare esit, man ami mkpɔkɔk mbufo?”

Ofuri udua ediwak ke ebɔrɔ ikoot Andinyaŋa ke edifiak nka ndaha-mbet ye edinam Ufɔk Abasi, ke ndobo enyuŋ esuhɔre-idem eyom erikɔk emi Jesus ɔkɔŋwɔŋɔde ndinɔ. Ndien ekpɔŋde mme ekikere emi enyenede ke ubakini, ediwak ibat mkpri owo nnyin ke ememek edituak-nda nyuŋ nam mbuɔtidem mmɔ ɔkɔri ke Jesus Christ.

Ini emi ubak mme anditiene Jesus ke Capernaum ekutde ke ukpepŋkpɔ Esie ɔsɔŋ enyuŋ emek ndikpɔŋ, Enye ɔwɔŋɔre ese mme Apostle Esie ete, “Nte ɔdɔŋ mbufo ɔko ndidianare nnyɔŋ?”

Emi edi mbume anade nnyin kiet-kiet ibɔrɔ nte nnyin iyɔde mme ini idomo eke idem nnyin. Ibɔrɔ emi Peter ɔkɔnɔde Jesus awak onyuŋ esin ekikere ete: “Nnyin iditiene anie?Afo enyene ikɔ uwem nsinsi.”

Ntem nte afo ekerede-abaŋa ikoot Andinyaŋa ke ndifiak ntiene Enye, nso ke afo ekeme edikpep oto mbuk eke ebehe-mfaŋ eto oro?

1. Usuŋ edifiak nnyɔŋ isiwak-ke edimem mme edinem, edi ɔfɔn ndinam ntre. Ini emi ekedibede ebehe-mfaŋ eto edaha, ema esibe kpukpru ŋkɔk esie efep. Oro ikinemke. Nnyin ŋko imikeme edikere ke imibiara nte nnyin isinde ŋkani usuŋ enyuŋ ebɔ nnyin ŋkohore-idem eduɔk. Ke iwukde mbuɔtidem ke Jesus Christ ye ke gospel Esie—ekpat-eto ye oruŋ—eyenɔ nnyin idorenyin ye uko ke nditɔŋɔ mfiak nnyɔŋ ndi.

2. Ama ada ediwak isua ɔnɔ eto nnyin edifiak ŋkada ɔsɔŋɔ ye uyai esie. Idahaemi enye enehede ɔsɔŋ-idem onyuŋ eye eti-eti akan akpa ini. Yene ime kini mbuɔtidem ye ikɔ-ntiense fo ɔkɔride ŋko. Emi esine editre ediyat esit ke ndisime ikɔ nte “Afo okodudu mmɔŋ ke mme isua emi ekebede?”

3. Eto oro ikpikiduhe uwem ke ukpeme ye edibɔk mikpiduhe. Afo edibɔk mbuɔtidem fo ye ikɔ-ntiense fo nte afo adiade udia-ɔbɔŋ ofuri udua onyuŋ atuakde-ibuot ke ufɔk Jehovah.

4. Ukem nte ebehe-mfaŋ eto oyomde uŋwana-utin ɔnɔ mme ŋkɔk ye mfaŋ esie ndifak ŋkɔri, ntre ke ikɔ-ntiense mbufo edikɔri nte mbufo esɔpde-utɔŋ enɔ mme ekikere ye ntiense eke Spirit. Ekpep eto Amulek, emi okowutde eyo esie nte anana-nsɔŋɔnda owo ufɔk Abasi ke ɔdɔhɔde ete, “Ema ekot mi ke ediwak ini edi ami ŋkikopke.”

5. Mbɔhiduŋ mi ama ɔdiɔŋɔ se eto oro ekemede edikabare inikiet efen ndi. Ntre ŋko ke Abasi ɔdiɔŋɔ edisana ndaha fo ye se mbuɔtidem fo ye ikɔ-ntiense fo ekemede edikabare ndi. Enye idisioŋoke idem ikpɔŋ fi. Otode ke Erisio-isop Jesus Christ, ekeme edidiɔŋ kpukpru se ikibiara.

Ami ndi ntiense ke idara odu ke heaven ke mmɔ emi efiakde enyɔŋ edi. Eyom mbufo, ndien ema mbufo. Ami nnɔ ikɔ-ntiense ke Jesus Christ edi Andinyaŋa nnyin ndien ke Enye eyediɔŋ ofuri mbon emi efiakde etiene Enye ye akwa emem ye idara. Ubɔk mbɔm Esie ifureke edi ana iŋwaŋ onyuŋ anyanare ɔnɔ fi. Ini ibiarake inɔ fi ke edifiak nyɔŋ ndi. Ye ofuri ima ke esit nnyin, nnyin imidara afo edinyɔŋ ndi ufɔkiduŋ. Ke enyiŋ Jesus Christ, amen.