Kusɔŋ Esit Fo

Edifiak-mmen ikɔ Abasi Jesus Christ ndi ɔkɔtɔŋɔ kini Abasi ye Edima Eyen Esie ɔkɔbiɔŋɔre ɔnɔ ekpri Joseph Smith, ebɔrɔde akam nsuhɔreidem esie. Nte ubak nkpɔ ke Mfiak-mmen-ndi, Prophet Joseph Smith ama akabare ŋwed eset kiet oto ke enɔ ye odudu Abasi. Nwed emi esine “Edinam Abasi ye mbon ekeduŋde ke obio America ke eset enye onyuŋ esine nsinsi ikɔabasi ɔyɔhɔ-ɔyɔhɔ.”

Ke ini Ami nkedide ekpri enyen, nte Ami nkotde Ŋwed Mormon, Ami mmasikere ntak emi Laman ye Lemuel mikinimke akpanikɔ emi ekenɔde mmɔ, ɔkpɔsukedi angel Jehovah ɔkɔbiŋɔre ɔnyuŋ etiŋde ikɔ nnen-nnen ye mmɔ. Ntak emi Laman ye Lemuel mikikemeke nditim nsuhɔreidem nyuŋ nsukibuot nnɔ ukpepŋkpɔ ete mmɔ, Lehi, ye eke ekpri enyeneka mmɔ Nephi?

Ami mma nkut kiet ke otu ibɔrɔ mbume emi ke Akpa Ŋwed Nephi, emi ɔdɔhɔde ete ke Nephi ama “ɔfuhɔ ke ntak isɔŋesit mmɔ.” Nephi ama obup nditɔ ete esie emi ekeponde ekan enye ete, “Ntak emi mbufo esɔŋde esit ntem, enyuŋ edɔŋɔde nnan ke esit mbufo?”

Owo ndinyene isɔŋesit ɔwɔrɔ nso?

Ndikabare “ɔkpɔsɔŋ” emi esinede ke Ŋwed Mormon ke usem mbon Korea edi 완악 (Wan-Aak: 頑惡). Mme udim ikɔ emi akama ubɔkŋwed eke mbon China “Wan”(頑), emi ɔwɔrɔde “nsɔŋibuot,” ye “Aak” (惡),emi ɔwɔrɔde “idiɔk.” Kini nnyin isɔŋde esit nyin, nyin idɔŋɔ nnan, ndien eti ŋkpɔ ikemeke ndiduk esit nyin. Nyin ikabade idi mbɔn nsɔŋibuot inyuŋ itɔŋɔ ndiwuk enyin ke udɔŋ ererimbot, iberi esit nyin ikpɔŋ ŋkpɔ Abasi. Nyin imek ndiwuk enyin kpɔt ke ekikere idem nyin inyuŋ itre ndiyime ekikere ye ndausuŋ mbon efen. Nyin imek nditre ndiberede esit nyin nnɔ ŋkpɔ Abasi edi iberede esit nyin inɔ odudu nkpɔ ererimbot ye andidiɔk. Kini esit nnyin ɔsɔŋde, nyin isin odudu Edisana Spirit. Nnyin “isɔpke nditi Jehovah,” ndien ke ini ebede nyin ikabade “ifre” mme ikɔ Esie

Alma ama ekpep mbon Ammonihah ete ke ndusuk owo “eyesin Spirit Abasi ke ntak isɔŋesit mmɔ” Enye nko ama ekpep mmɔ ete ke “mbon emi esɔŋde esit mmɔ, ke mmɔ ke edinɔ esisit udeme ikɔabasi tutu mmɔ ikemeke ndifiɔk ŋkpɔ ndomokiet mbanga ndibe ŋkpɔ esie.” Ke akpatre ekemde, Spirit eyekpɔŋ, ndien Jehovah eyeda ikɔ esie ɔkpɔŋ mbon emi esɔŋde esit mmɔ, kpa nte Laman ye Lemuel. Koro Laman ye Lemuel ekekade iso ndisɔŋ esit mmɔ, esin ntuk otode Edisana Spirit, enyuŋ emek nditre ndiyime mme ikɔ ye ukpepnkpɔ ete mmɔ ye eke Nephi, mmɔ ke ofuri-ofuri ema esin nsinsi akpanikɔ otode Abasi.

Ke ukpuhɔhode eke Laman ye Lemuel, Nephi ama aka iso nidisuhɔde idemesie, nyom ndausuŋ nto Spirit Jehovah. Ke usiene, Jehovah ama anam esit Nephi emem. Nephi abuana ete ke enye “ama atuaeyet ɔnɔ Jehovah; ndien sese enye ama edi se mi, onyuŋ anam esit mi emem ndien Ami mma nnim kpukpru mme ikɔ emi ete mi eketiŋde.” Jehovah ama anwam Nephi ndiyime, mfiɔk, nyung nnim ke akpanikɔ kpukpru ndibe ŋkpɔ Abasi ye mme ikɔ Esie. Nephi ama ekeme ndiyene nsaŋa Edisana Spirit kpukpru ini.

Nso ke ikpenam man nyin ikusɔŋ esit nyin?

Akpa, nyin imikeme ndinam edu ukabade esit kpukpru usen.

Andiyaŋa nyin ama ekpep ete, “Owo ekededi eke akabare esit onyuŋ etiene Mi nte ekpri eyen, Ami nyeyime enye, .” Ami mmema prophet nnyin, President Russell M. Nelson,:

Edikabare esit edi akpan usuŋ ndika iso. Edisana mbuɔtidem anwam nyin ndika iso ke usuŋ ediomi.

“Mbɔk kufehe ndik mme ndisik ini nkabaresit. Satan enem esit abaŋa ukut mbufo. … Etɔŋɔ ke mfin emi ekop inem ndisio owo ererimbot mfep ke uwem mbufo. Andinyaŋa ama nnyin kpukpru ini akpan akpan ke ini nnyin ikabaresit.”

Nte nyin ikopde idaraesit eke edimem esit ye nditiene Jehovah, nyin ikabade itie nte “enyenɔnwɔŋ, onyime ndikop item,ndidi suŋ-suŋ, osuhɔre idem, enyene ime, ɔyɔhɔ ye ima, ebeŋe idem ndiyime kpukpru ŋkpɔ emi Jehovah okutde ke odot ndidori enye ke idem, kpa nte enyenɔwɔŋ osukde ibuot ɔnɔ ete esie.”

Udiana, nyin imikeme ndinam edu nsuhɔdeidem.

Ndikabade esit kpukpru usen eyeda nsuhɔdeidem esdi ke esit nyin. Nyin iyom ndisuhɔdeidem ke iso Jehovah, nte enyenɔwɔŋ emi osukde ibuot ɔnɔ ete esie. Nyin ndien iyeyene Edisana Spirit ye nyin kpukpru ini, ndien esit nyin eyemem.

Nwan mi, Sue, ye Ami imɔfiɔk utibe anwan ye ebe kiet ke isua inaŋ emi ebede. Ke akpa ini nyin isobode ye mmɔ, ebe ekedi obufa owo ke ufɔkabasi, ndien anwan okosuk osobo nye mme ɔkwɔrɔ-ikɔabasi mman ekpep ikɔabasi. Ediwak mme ɔkwɔrɔ-ikɔabasi ema esobo ye enye man enwam enye edi etiene Christ. Nyin ima inim ite ke enye enyene akwa ikɔntiense abaŋa ikɔabasi onyuŋ ɔfiɔk ete ke Ufɔkabasi edi akpanikɔ. Enye ama okop ntuk Spirit kini nyin ikisobode ye enye onyuŋ abuana mfɔn-mfɔn ke kpukpru mbono. Enye ama ma ndineme-nneme ye utibe mbon ward. Nte ededi, ekedi ɔkpɔsɔŋ ŋkpɔ ɔnɔ enye ndiyime ndiduk mmɔŋ una baptism. Usen kiet enye okokot Moroni 7:43-44, emi ɔdɔhɔde:

“Efen, sese Ami ndɔhɔ mbufo nte enye ikemeke ndiyene mbuɔtidem ye idotenyin, ibɔhɔke enye osuhɔre idem, onyuŋ ɔsuhɔre esit.

“Edieke edide ntre, mbuɔtidem ye idotenyin [fo] edi ikpuikpu, koro Abasi inyimike owo baba kiet ibɔhɔke mbio nsuhɔreidem ye mbio nsuhɔre esit.”

Ke okurede ndikot mme udim nwed emi, enye ama edifiɔk se anade nte imɔ inam. Enye ama ekere ete ke imɔ imɔfiɔk se nsuhɔre-esit ye nsuhɔreidem ɔwɔrɔde. Nte ededi, ifiɔk esie ikiponke ikem enye ndiyene mbuɔtidem ye idotenyin ndinim mbet Abasi. Enye enyene ndisana nsɔnŋ ibuot esie ye ifiɔk esie nyak. Enye ama ɔtɔŋɔ ndisuhɔre idemesie oto ke nkabaresit akpanikɔ. Enye ama ɔtɔŋɔ ndifiɔk se nsuhɔreidem edide ke enyin Abasi. Enye ama ɔbuɔtidem ke Ete eke Heaven onyuŋ ɔbɔŋ akam man enyene mmem-mmem esit. Oto ke mme akam oro, enye ama okop nte Spirit etiede ntiense ɔnɔ enye ete ke Ete eke Heaven esie onyom enye ɔduɔk mmɔŋ.

Mbiba nwan ye ebe ema ebuana ete ke nte mmɔ etimde esuhɔreidem, ntre nko ke mmɔ ekeme ndifiɔk ikɔ Abasi, ndien esit mmɔ ama emem nditiene mme ukpepnkpɔ Ɔbɔŋ nyin Jesus Christ.

Oyoho Ita, Nnyin Imikeme ndiyene mbuɔtiden nyuŋ mbere ke Andiyaŋa nyin.

Nephi ekedi akwa uwutnkpɔ abaŋa ndiyak esit esie emem ke ndibuɔtidem ke Jehovah. Enye ama ekpep ete “Ami mma mbuɔtidem ke afo, ndien nyebuɔtidem ke afo ke nsinsi. Ami ndisinke mbuɔtidem mi ke ubɔk obukidem.” Ukem-ukem, ke eriyarare emi ekenɔde Prophet Joseph Smith, Jehovah ama ɔdɔhɔ ete, “Buɔtidem ke Spirit oro adade owo usunŋ ndinam eti—ihn, ndinam se inende, ndisaŋa ke nsuhɔreidem.” Kini nyin ibuɔtde idem ke Jehovah, Enye eyenam esit nyin emem, ndien eyewam nyin ke kpukpru idomo, afanikɔŋ ye ukut nyin.

Edieke nyin ikabare esit ke akpanikɔ, isuhɔre idem nyin, inyuŋ ibuɔtidem ke Jehovah, esit nyin eyemem. Enye ndien eyenɔ Spirit Esie onyuŋ owut nyin mme ndibe ŋkpɔ heaven. Nyin iyenim kpukpru ikɔ emi Enye ekekpepde ke akpanikɔ, ndien ifiɔk nyin eye ɔtuŋɔ

Andiyaŋa nyin Jesus Christ, ekedi akwa uwutnkpɔ eke nsuhɔresit Ke 2 Nephi 31:7, nyin ikot, “Edi kemisehe nte Enye ekedide edisana enye owut nditɔ owo ete, ke obukidem enye ɔsuhɔre idem esie ke iso Ete, onyuŋ edi ntiense ɔnɔ Ete ete ke imɔ iyisuk ibuot inɔ Enye ke ndinim mbet esie.” Okposukedi Enye ekedide edisana ye andifɔn-mma Enye ama ɔsuhɔre Idemesie ke iso Ete onyuŋ osuk ibuot ɔnɔ Enye ke ndiduɔk mmɔnŋ.

Ke utit uwem isɔŋ Esie, Jesus Christ ama ayak uduak Esie ɔnɔ Ete Esie ke ndiwɔŋ ndot-ndot cup. Ufen emi amanam Enye, “ndinyek idem oto ke ubiak, ndien iyip ɔkɔwɔrɔ ke ofuri ndudu-idem, onyuŋ ɔbɔ ndutuhɔ ke ikpɔkidem ye ke spirit.” Andiyaŋa ama ebeŋe yak Enye “ukuwɔŋ ndot-ndot cup, inyung ifurɔ.” “Nte ededi, Enye ama ɔdɔhɔ ete, ubɔŋ enyene Ete, ndien [Enye] ama anam oyuŋ okure mbeŋe-idem [Esie] ɔnɔ nditɔ owo.”

Nditɔ eka iren ye iban, Ema enɔ nyin unen ndimek eti. Nyin imikeme ndimek ndisɔŋ esit nyin, mme ndimek ndinam esit nyin emem. Ke uwem nyin kusen kusen, nyin imikeme ndimek ndinam mme ŋkpɔ oro okootde Spirit Jehovah edi ediduŋ ke esit nyin. Ami mefiɔk nte ke idara ye emem odu ke mme mbumek emi.

Yak nyin itiene uwutnkpɔ Andiyaŋa nyin, Jesus Christ, emi eketienede uduak Ete. Nte nyin inamde ntre, Jehovah ama ɔnwɔŋɔ ɔnɔ nyin ete, “Ndien, sese, Ami nyetaŋ mmɔ mbok nte eka unen ataŋde nditɔ esie obok ke mba esie, edieke mmɔ mmidisɔŋke esit mmɔ.” Ke enyiŋ Jesus Christ, amen.