Ndinyene Uteŋe nnɔ Nsasana Ŋkpɔ

Ke ŋwed Exodus, nnyin isaŋa ye Moses ika idiarare Obot Horeb nte enye ɔwɔŋɔre ɔkpɔŋ kpukpru utom usen esie—ŋkpɔ emi kpukpru nnyin ikpiduakde ndinam—man okut ikaŋ asakde ke ikɔt emi mikitaha. Nte enye asaŋade ekpere, Abasi okot enye ke esit ikaŋ, ndien ɔdɔhɔ ete, Moses, Moses. Ndien enye ɔdɔhɔ, Se mi mi. Ndien [Abasi] ɔdɔhɔ ete, … sio ikpa-ukot fo ke ukot fo fep: koro ɔtɔ oro afo adade ke esit edi edisana isɔŋ.” Ke akwa uteŋe, nsuhɔre-idem, ye mkpaidem, Moses osioŋo ikpa-ukot esie ndien ebeŋeidem esie ndikop uyo Jehovah nyuŋ mfiɔk edisana iso Esie.

Ekikere edifiɔk nsasana obot emi ekedi ifiɔk-ukpep emi ɔyɔhɔde ye ndik-ifiɔk uteŋe, ekeyiri Moses ye edisana idiɔŋɔ esie ndien ke akpanikɔ, ekedi akpan ŋkpɔ eke edikpuhɔ enye nto suŋ-suŋ ekpemerɔŋ ŋkesim akwa prophet, adade enye ndisaŋa ke obufa usuŋ ke uwem. Ukem oro, nnyin owo kiet-kiet imikeme edikpuhɔ owo-mbet nnyin isin ke edikoŋ usuŋ eke ŋkpɔ-Abasi ke ndinam eti uteŋe edi ubak ido ŋkpɔ-Abasi nnyin.

Ikɔ oro uteŋe ekeme ediyom ŋkut ke ikɔ-edinam Latin revereri, emi ɔwɔrɔde ndi “da ke mkpaidem.” Ke ndaha ikɔ-Abasi, ibɔrɔ emi abuaha ye ekikere mme ido eke ata ukpono, ima ye esit-ekɔm. Oruk idiɔŋɔ nnɔ sisana otode mbon emi enyenede edinuaha esit ye ata nsinifik nnɔ Abasi ye Jesus Christ ɔsɔŋɔ ŋkɔri idara ke ukpɔŋ mmɔ.

Ndinyene uteŋe nnɔ nsasana ŋkpɔ edi mkpon-nkan idiɔŋɔ eke akpan ŋkpɔ Abasi; oro edi ibɔrɔ eke ebuana nnyin ye se-isanade onyuŋ owut ima nnyin nnɔ ye edikpere Ete Heaven nnyin ye Andinyaŋa nnyin, Jesus Christ. Enye ŋko edi kiet kotu mme ata edinem ifiɔk-ukpep eke ukpɔŋ. Oruk eti-ibuot oro emen ekikere, esit ye uwem nnyin ekpere Abasi. Ke akpanikɔ, uteŋe idihe ndaha ŋkpɔ spirit ikpɔŋ, enye edi akpan-ŋkpɔ eke esie—itiat emi ebɔpde ŋkpɔ-spirit edori, anamde owo enyene ebuana ye edisana-ŋkpɔ, nte nditɔ nnyin ekpepde kini mmɔ ekwɔde: “Ini eke ami nnyenede-uteŋe, ami mmɔdiɔŋɔ ke esit mi Ete Heaven ye Jesus edu ekpere.”

Nte mme mbet Jesus Christ, ekot nnyin ete inyene enɔ uteŋe ke uwem nnyin man iberede idem nnyin inɔ ata nneme ye Abasi ye Eyen Esie, Jesus Christ, etibede-ukem ndisɔŋɔ ido ŋkpɔ-Abasi nnyin. Nte nnyin ikpikinyene oruk ekikere oro awak ke esit nnyin, ke akpanikɔ akwa idara ye inem okpodu ke esit nnyin, ndien esisit ebiet okpodu ɔnɔ mbɔm ye mfuhɔ. Ana nnyin iti ke ediwut uteŋe nnɔ nsasana ŋkpɔ owut ekikere ɔnɔ se nnyin inam kpukpru usen onyuŋ ɔsɔŋɔ ekikere esit-ekɔm nnyin—anamde uteŋe, ukpono, ye ima ɔnɔ edikɔŋ ye edisana ŋkpɔ.

Ke ndiɔkiso, nnyin idu ke ererimbot emi ediwut uteŋe nnɔ nsasana ŋkpɔ miwakke nditibe aba. Ke akpanikɔ, ererimbot esidara se inanade uteŋe, nte edise ŋwed-ndise, edi-nam ke television, mme se intanet enyimede. Unana ukpono nnɔ se isanade ananam unana nsinifik ke edu-uwem ye unan-ukpeme ke edinam, emi ekemede edisɔp nda emana kiet nsin ke unana-esit-mbɔm onyuŋ emen emana efen esin ke nsobo.

Unana-uteŋe ŋko ekeme edida nnyin mkpɔŋ ebuana emi ediomi ye Abasi ɔnɔde onyuŋ enime ifiɔk edinam-ibat nnyin kiso Abasi. Mmɔdo, nnyin idikere ŋkpɔ kpɔt ibaŋa inemesit nnyin; iyuhɔde mme udɔŋ nnyin; ndien ke akpatre idisim ndedehe ebiet emi esinde nsasana ŋkpɔ, kpa Abasi, ndien edisana uduot nnyin nte nditɔ eke Ete Heaven. Unana-uteŋe nnɔ nsasana ŋkpɔ ɔsɔsɔŋɔ uduak andidiɔk ke edibiat usuŋ ifiɔk nnyin eke eriyarare, emi edide akpan-ŋkpɔ ɔnɔ ubɔhɔ ŋkpɔ-Abasi nnyin ke eyo nnyin.

Enehede ewet ibɔrɔ ye ufɔn edinyene uteŋe nnɔ se isanade ke ofuri ŋwed Abasi. Ndaha kiet ke Doctrine ye Covenants eyewut ke edinyene uteŋe nnɔ Ete Heaven ye Eyen Esie, Jesus Christ, edi akpan-ŋkpɔ ɔnɔ mbon emi edukde obio-ubɔŋ celestial.

Nte ufɔk Abasi nnyin idomo ndida Ete ye Eyen ke ata akpan nsasana ndaha ye ukpono ke ofuri ndaha, esinede nte nnyin idade idiɔŋɔ Mmɔ. Ndausuŋ Edisana Spirit edi akpan ndaha ke edibiere nte mme idiɔŋɔ emi enyenede ediwut ke nsasana uduot, edu, ye nti ido eke Ete ye Eyen. Nnyin iminehede itiŋ-enyin man ifep mme ŋkpɔ emi ekemede edisio nnyin mkpɔŋ ediwuk-enyin ke Ete Heaven nnyin ye Eyen Esie, Jesus Christ, ye ukpepŋkpɔ Mmɔ, esinede nte nnyin idade ŋka-iso ŋkpɔ-utom emi ŋkpɔ-ukwak ɔnɔde, oruk nte edikama artificial intelligence (AI) ndinam se-isinede ye mme idiɔŋɔ.

Enam ukem ukpep enɔ usuŋ etop ekededi emi odude ke mme akpan usuŋ nneme eke Ufɔk Abasi. Enehede enam enyuŋ enyime ofuri ukpepŋkpɔ, ŋwed, ŋwed ukpepŋkpɔ, ye etop ke idak ndausuŋ Spirit man ekut ete ke nnyin iminam nsasana ido, ufɔn, ye edu eke gospel Jesus Christ. Ke etop eke idahaemi enɔde mkpri iwaad eke Ufɔk Abasi, Elder David A. Bednar ekekpep ete, “Ndisaŋa ke usuŋ Abasi ye ŋkpɔ-ofim, mbon Ufɔk Abasi enyene edisuhɔre-idem nyuŋ nda-akam (1) ndiɔŋɔ ukpepŋkpɔ ikɔ-Abasi emi ekemede ndikpeme nte mmɔ edade ifiɔk ŋkpɔ-ofim enam ŋkpɔ ye (2) nehede nyom nsaŋa Edisana Spirit ye enɔ spirit eke erikabare.”

Ndima nditɔ-eka irenowo ye iban, nte mbufiɔk ŋkpɔ-ofim idahaemi akabarede edi, oro ikemeke edinehede edibiat utibede, mkpaidem, ye nyɔ emi ikutde ke ndaha uteŋe eketode odudu Edisana Spirit. Nte mme anditiene Christ, nnyin inyene edikpeme mbak idibiat ebuana nnyin ye Abasi ye Eyen Esie ke edikama ŋkpɔ ye mbiet emi AI-osiode edi ke idiɔk usuŋ. Nnyin inyene nditi ke edibuɔt-idem ke odudu ŋkpɔ-ofim idahaemi edi ukpɔk ye anana-ukpono ukpuhɔ ɔnɔ ifiɔk, itoro, ye ntiense emi ekemede edibɔ kpɔt nto odudu Edisana Spirit. Nte Nephi eketiŋde, “O Ɔbɔŋ, ami mmenyene mbuɔtidem ke afo, ndien nyebuɔtidem ke afo ke nsinsi.” Ami ndisinke mbuɔtdem mi ke odudu obukidem.”

Ke eriyarare efen, eketeme Prophet Joseph Smith ke mme temple emi ebɔpde enɔ Jehovah enyene edidi ebiet uteŋe nnɔ Enye. Ke ofuri utom esie, edima prophet nnyin, President Russell M. Nelson, ɔsɔŋɔ etiŋ uteŋe ntuak-ibuot nnyin ke nsasana temple. Ke ufɔk Jehovah, ekpep nnyin ebaŋa nte edukde ke edisana iso eke Ete ye Eyen. Kpukpru ini ami mmokut oro nte item kpa ye ifiɔk ete kiet kotu mme akpa ŋkpɔ nnyin inamde ke idukde temple inyuŋ ibeŋede idem nnyin ke edibuana ke nsasana edinam do edi ndisio ikpa-ukot nnyin nyuŋ mkpuhɔ nsine mfia ɔfɔŋ nnyin. Nte Moses, edieke nnyin inyene udɔŋ, nnyin imikeme edikut ke edisioŋo ikpa-ukot ererimbot nnyin edi ntɔŋɔ ke edibe nduk edisana isɔŋ ye edikpuhɔ nka edikɔŋ ye edisana usuŋ.

Nditɔ-eka irenowo ye iban, nnyin inyeneke edidɔk nka etiŋe obot, nte Moses akanamde, ndikut uteŋe nnɔ nsasana ŋkpɔ nyuŋ mkpuhɔ owo-mbet nnyin nsin ke akwa ndaha ŋkpɔ-Abasi ye nsinifik. Nte uwutŋkpɔ, nnyin imikeme edikut oro nte nnyin idomode edikpeme itie ufɔkiduŋ nnyin nsio ke odudu ererimbot. Ekeme edi-nam emi ke edinehede nyuŋ nsɔŋɔ mbɔŋ-akam kiso Ete Heaven ke enyiŋ Jesus Christ nyuŋ nyom edinehede ndiɔŋɔ Andinyaŋa nnyin oto ke nnyin editiŋ-enyin ŋkot ikɔ Abasi emi kutde ke ŋwed Abasi ye ke mme ukpepŋkpɔ eke mme prophet nnyin. Ndidian do, oruk edikpuhɔ ŋkpɔ-Abasi oro ekeme edidi ke nte nnyin idomode edikpono ediomi emi nnyin ikinamde ye Abasi ke edidu-uwem ke ŋkopitem nnɔ ibet. Utom emi ekeme edida ifure ye ata ndobo esin ke esit nnyin. Ndinam mme oruk edinam oro ekeme edinehede ŋwam edikpuhɔ ufɔkiduŋ nnyin nsin ke ebiet uteŋe eke ubɔhɔ ŋkpɔ-Abasi—itie-ubɔhɔ mbuɔtidem emi Spirit odude, ebietde ifiɔk-ukpep eke Moses ke obot.

Nnyin imikeme edifiɔk oruk edikpuhɔ ŋkpɔ-Abasi oro nte nnyin inehede ibuana ke edinam ntuakibout eke Ufɔk Abasi, esinede ediwɔŋɔde esit nnyin nnɔ Abasi oto ke ata edikwɔ nsasana ikwɔ. Ndiwɔŋɔde nte Moses mkpɔŋ ndutime ererimbot, akpan-akpan mme phone nnyin mme ŋkpɔ ekededi emi misaŋake ye nsasana ini emi, aŋwam nnyin ke ndiyak ofuri ekikere nnyin nsin ke edidia udia-ɔbɔŋ, ke ekikere ye esit nnyin esede Andinyaŋa ye uwa ufak Esie diana ye ediomi nnyin. Oruk edise udia-ɔbɔŋ oro eyesɔŋɔ editeŋe mfiak nam ndaha ebuana nnyin ye Andinyaŋa edi obufa ndien eyenam Sabbath edi inem onyuŋ okpuhɔ uwem nnyin.

Ke akpatre, nnyin iyekem edifiɔk ukpuhɔre ŋkpɔ-Abasi emi ke ido-mbet nnyin nte nnyin iwakde edituak-ibuot ke obot eke ufɔk Jehovah—ndisana temple nnyin—nyuŋ ndomo edidu uwem ye uko ediomi, akpan-akpan kini nnyin isobode mme idomo eke uwem isɔŋ.

Ami ye ŋwan mi ima inyene ubak ifiɔk-ukpep eke ndaha nsasana obot ke uteŋe nte nnyin idomode ndinam mme ukpep emi ke uwem nnyin, emi anamde eti ukpuhɔde ke owo-mbet nnyin. Ami nditi ke ekedi nte mkpɔŋ ke nsaŋade mbe ebiet-ubukowo mbemiso edibuk ɔyɔhɔ eyen nnyin iba, emi mikikemkde-ɔfiɔŋ ke amanade ndien ikoduhe-uwem, kini ŋwan mi osuk odude ke ufɔkibɔk. Ami nditi nte mbɔŋde-akam ye udɔŋ ye uteŋe nnɔ Abasi, nyom uŋwam ndiyɔ ye idomo oro. Ke ndo-ndo oro, ami ndibɔ aŋwaŋa-waŋa ye ɔsɔŋɔ odudu spirit ke esit mi: Ofuri ŋkpɔ eyefɔn ke uwem nnyin edieke ami ye ŋwan mi idiyɔde, imum idara oro otode ndi-nam gospel Jesus Christ ikama. Se ikibiet nte akakak nnyin, ɔyɔhɔde ye mfina kini oro akabare edi nsasana, ifiɔk-ukpep uteŋe, idiɔŋɔ emi akanwamde ndisɔŋɔ mbuɔtidem nnyin ndien edinɔ nnyin uko ke ediomi emi nnyin ikinamde ye Abasi ye ke mme eŋwɔŋɔ Esie ɔnɔ mi ye ufɔkemana mi.

Nditɔ-eka mi irenowo ye iban, ndinyene uteŋe nnɔ se isanade ɔbɔk ata esit-ekɔm, ɔnɔ ata inemesit, ada ekikere ekesim eriyarare, onyuŋ ada akwa esin ke uwem nnyin Enye enim ikpat nnyin ke edisana isɔŋ onyuŋ emenede esit nnyin ɔnɔ Abasi.

Ami nnɔ mbufo ikɔ-ntiense ke nte nnyin idomode edida oruk ido oro nsin ke ofuri usen uwem nnyin, nnyin iyenam nsuhɔre-idem nnyin ɔkɔri, inam edifiɔk uduak emi Abasi enyenede ɔnɔ nnyin okpon, inyuŋ isɔŋɔ uko nnyin ke mme eŋwɔŋɔ ediomi emi nnyin ikinamade ye Abasi. Ami ntiŋ ke nte nnyin inyenede enɔ edinyene uteŋe nnɔ nsasana ŋkpɔ—ekpedi ke temple, ke ufɔk Abasi, mme ke ufɔkiduŋ nnyin—nnyin iyeyɔhɔ ye akwa nyɔ ye mkpaidem nte nnyin ibuanade ke mfɔn-ma ima eke Ete Heaven ye Jesus Christ nnyin. Ami ke uteŋe ntie ntinse mbaŋa mme akpanikɔ emi ke edisana enyiŋ Andinyaŋa ye Andifak nnyin, Jesus Christ, amen.