Ata-Ima—Idiɔŋɔ eke Eti Owo-mbet

Owo mbet edi anditiene mme owo odude ke idak ukpepnkpɔ nto owo efen. Mme mbet edi mbon edude ke “idak ukpepnkpɔ” emi esinde ofuri uwem mmɔ man ekabare etie nte andikpep mmɔ. Ke ntre, ndidi mbet Jesus Christ okpon akan ndinim mme ukpepnkpɔ Esie ke akpanikɔ. Enye nko okpon akan ndiyime edisana uduot Esie ye ndiyime Enye nte Andiyaŋa ye Andifak nnyin, okposukedi oro edide akpan ŋkpɔ.

Presdident Dallin H. Oaks ama anam anwaŋa ete : “Nditiene Christ idighe mfefere mme se enamde nte emade. Enye edi se enamde kpukpru ini ye usuŋ uwem emi anade ada nnyin usuŋ kpukpru ini ye ke kpukpru ebiet.” Editiene edi nkoi-nnam isaŋ emi nnyin ikade man nnyin ikabade ukpuhɔre oto ke uwa usio-isop Obɔŋ ye odudu ukeme Esie. Ata utit isaŋ eke editiene edi ndikabade ntie nte Jesus Christ tutu—esim ndaha emi nnyin ibɔde “mbiet Esie ke ɔkpɔ-iso [nnyin].”

Ndidi mbet Ͻbɔŋ, ana nnyin iko-koi itiene ekikere ye edinam Esie kpukpru usen—nte uwutŋkpɔ, nkopitem, nsuhɔreidem ye ime Esie. Nte nnyin suŋ-suŋ isinde mme edu emi ke uwem nnyin, nnyin ikabade idi “mme andibuana ke edisana uduot [Esie].” Nditiene mme edu Andiyaŋa edi ata akpan nkpɔ ke ndituak ibuot nnɔ Enye. Nte President Nelson ekekpepde, “Ukpono emi nnyin iyenede inɔ Jesus otim owutidem ke nte nnyin itienede edu Jesus. ”

Ke otu ediwak edisana edu eke Jesus Christ anade nnyin itiene, kiet edi ata akpan onyuŋ esinede kpukpru mbon eken. Edu oro edi Edisana ima Esie, mme ata-ima. Mbiba Prɔphet Mɔrmɔn ye Apostle Paul eti nnyin ete ke esiode ata-ima efep, “[Nnyin] idighe baba nkpɔ kiet.” Mme nte ekeyarade enɔ prɔphet Joseph Smith, kesiode “ata-ima efep, [nnyin] ikemeke ndinam baba nkpɔ kiet.”

Andiyanŋa ke idem ama okut ima nte idiɔŋɔ emi edidade ifiɔk mme nti mbet Esie ke ini Enye eketiŋde ete:

“ Ami Mmɔnɔ mbufo obufa ibet nte, Mbufo ema kiet eken; nte mbufo nde ema kiet eken kpa nte nkamade mbufo.

“ke emi ke kpukpru owo edifiɔk ke mbufo edi mbet Miedieke mbufo emade kiet eken.”

Ata-ima edi ediye ukpepŋkpɔ emi ɔsɔŋde nditiŋ mbaŋa edi enye edi mmemmem ɔnɔ mbon emi enye otukde ndikut enye. Ŋwed Preach My Gospel ekpep ete “ata-ima, ukem nte mbuɔtidem, ada aka edinam” Ke akpan, ekeme nditiŋ mbaŋa ata-ima nte “ima ke edinam.” Editiŋ mbaŋa emi ɔnɔ akwa ifiɔk abanga se eketiŋde ibio-ibio ebaŋa uwem Andiyanaŋa—Enye “ama asaŋa anam eti ke ofuri ebiet.”

Nte mme anditiene Jesus Christ, ana nnyin iyom nditiene usuŋ emi Andikpep nnyin okowutde mbon efen edisana ima Esie. Okposukedi Andiyaŋa okowutde ata-ima Esie ke ediwak usuŋ, Ami nyema ndiwut akpan uduot eke ata-ima Esie ita emi esɔpde ekut ke uwem nti mbet Esie.

Akpa, Andiyaŋa ama owut ata-ima Esie ke ndiyene esit mbɔm. Kini utom Esie ke otu mbon Nephi nte ewetde ke Ŋwed Mɔrmɔn, Ͻbɔŋ ama okoot otuowo ete enyɔŋ ufɔk enyuŋ ekekere ebaŋa mme ŋkpɔ emi Enye ekekpepde mmɔ ndien ebeŋeidem ndifiak ndi ke edem usen. Ŋwed etiŋ ete:

“Mmɔ ekedu ke mmɔŋeyet, ndien ewuk enyin mmɔ ese enye nte mmɔ ekpebeŋede enye ete odu esisit ye mmɔ.

“Ndien Enye ɔdɔhɔ mmɔ ete: “Sese esit Mi ɔmɔyɔhɔ ye mbɔm ɔnɔ mbufo”

Esit mbɔm edi ubak eke ata-ima emi enyenede udɔŋ ndinam ufen ɔsuhɔre. Ke ɔyɔhɔde ye mbm, Obɔŋ ama ɔkɔk mbon udɔŋɔ ye mbon ukut ke otu mmɔ. Ke oro ebede, Enye ama ɔdiɔŋ nditɔwɔŋ mmɔ kini mme angel ekesuhɔde eto heaven enyuŋ ekanare mmɔ ekuk Enye akanam mme edima, utom ima emi, ye mme ediwak eken, koro enye “ekeyenede mbɔm.”

Ke ini nkenamde utom nte ekpri ɔwɔrɔ ikɔ-Abasi ke South America, ami mma ndia ufɔn nto mbɔm edima ufan mi kiet. Mbubreyo kiet kini ami nkewatde ye nsaŋa mi nka ufɔkiduŋ mission president nnyin, akparawa kiet awtde enaŋ-ukwak ama ɔwɔŋɔre inikiet oduk iso ubom-isɔŋ oro. Enye eketibe ke ata usop nte Ami mme nkikemeke nditre ndi tɔ enye. Ke ndiɔk iso ekpri owo emi ama akpa oto ke edituaha oro. Ami mma nkop mfuhɔ eti eti nto mkpa esie. Ke nyomonsia ye ke ntimede idem otode nkpɔ ndik emi osuk etibede, ema eda mi eka ufɔk nkpɔkobi enyuŋ ekɔbi mi. Akananam ami nkopke utɔ ndik ye edidu ikpɔŋ emi okponde akan emi. Ami nkedu ke unana idotenyin ye ndik nte ke Ami ndidu ke ufɔk nkpɔkɔbi ke ofuri uwem mi.

Nsaŋa mi kiet, Elder Brian Kochever, ama okop abaŋa ŋkpɔ-ntibe oro ndien esit esie ediyɔhɔ ye mbɔm. Enye ama edi ufɔk nkpɔkɔbi onyuŋ ekpe mbon ukpeme ubɔk ete eyak imɔ idu ye ami ke ekpri ubet mi man ami nkudu ikpɔŋ. Ke nkpaidem, mmɔ ema enyime. Tutu esim usen emi, Ami mmɔnɔ ekɔm mbaŋa ukem ima eke Christ okotode owo mbet emi, emi ekekpande ndik, ɔdɔŋ mi esit onyuŋ ɔsɔŋɔ mi esit kini akwa ukut ke uwem mi. Ata-ima mbɔm esie ekedi idiɔŋɔ ndiwut editiene esie. Kpa nte President Russell Nelson eke kpepde, “Mmem mmem usuŋ kiet ndifiɔk ata anditiene Jesus Christ edi nte owo oro enyenede mbɔm abaŋa mbon efen.”

Uwutnkpɔ efen abaŋade nte Andiyaŋa owutde ima Esie oto ke Enye ndise ye ndinam utom unwam nnɔ unana mbon efen emi owo mmitingke ibaŋa . Eke owo emi ekedide mbuŋɔ ke isua edip ye efuteta ye unana owo ndiwam enye, Ɔbɔŋ ama ɔkɔk enye onyuŋ ɔdɔhɔ enye ete odu edinen uwem. Eke nwan emi ekemumde ke efibe, Enye ama ɔnɔ idotenyin ye ndɔŋesit ke itie ubiom-ikpe. Eke owo akpa-ubeŋ emi ekesukde enye eto enyɔŋ ufɔk, Obɔŋ ama ɔnɔ nfen-nnɔ ke idiɔknkpɔ, idighe ndikɔk ikpɔkidem kpɔt.

Kini ekekotde mi ndinam utom nte bishop, mkpri nditɔ nnyin owo itiokiet ema esinam esop udia Obɔng edi akwa mfana ɔnɔ nwan mi, Cristin, emi ekesinamde enye akama mmɔ ikpɔŋ kini ami ntiede ke enyɔŋ-mbot. Nte ekeme ndikere, nditɔ nnyin ediwak ini ema esinam uyom eti eti. Ke ekutde ndaha esie, owo iba ke ward nnyin, John Debbie ye Debbie Benich, ema etɔŋɔ nditie ye enye kpukpru usen ederi man enwam. Mfonido emi ama akaiso ke ediwak ini, ndien mmɔ ema ekabare edi udiana ete-ete ye eka-eka enɔ ufɔkemana nnyin. Ukem nte Obɔŋ, mme mbet emi ema ekut unana emi owo mmitiŋke ibaŋa enyuŋ enam utom ke ima—nwɔrɔnda idiɔngɔ eke editiene mmɔ.

Akpatre, edisana ima Andiyaŋa oyom ndiwam kpukpru nditɔ Abasi enam edisana ukeme nnyin ɔwvrɔ osu man nnyin “ibuana ke eriyaŋa esie, ye ke odudu erifak esie.” Nte nnyin ikabade itim itie nte Andikpep nnyin, udɔŋ nnyin ndiwam nditɔ ete ye nditɔ eka nnyin ke usuŋ eiomi eyekɔri ke idemesie.

Nte uwutnkpɔ, nnyin imikeme mdimenere mbon efen ke enyɔŋ inyuŋ inam ufan ye mbon emi ekerede ke ema edue mme efre mmimɔ, inwam mbon emi edide obufa ke otu nnyin ekop inem ndidi ke ufɔt nnyin, mme ndikoot mme ufan edituak ibuot ye nnyin ke mbono udia Obɔŋ—ndusuk ke ini Easter emi edide. Anana-ibat usuŋ edu ndisŋɔ mbon efen esit nyuŋ nwam mmɔ ke nkɔri mmɔ edieke nnyin ikoide koi ye ke akam iyom unwam eke heaven ndiyene enyin ndikut ye esit ndikere nte Jesus Christ okutde mmɔ ye se Enye ekerede abaŋa mmɔ.

Ndiŋwam mbon efen ke usuŋ ediomi ekeme nditie nte utom unwam emi midighe se esinamde kpukpru ini. Nte uwutnkpɔ, kini ubiɔŋ utom mi emi nsuk nnamde idahaemi ke Philippines, Ami mma nkop mbaŋa ufɔkemana Agamata. Mmɔ ekeduɔk mmɔng ke 2023, ndien ke udɔŋ mmɔ ema edori usen ndika nkedian ufɔkemana mmɔ ke Urdaneta Philippines Temple emi ada ekpere. Nte ededi, mbemiso edikem usen emi ufɔkemana oro ekedoride, akwa oyobio ama oduk obio mmɔ. Enyen ete Agamata, ɔtɔinwaŋ edesi, ikikemeke nditɔ inwaŋ ke ini oyobio oro. Kini oyobio etrede ke akpatre, ana enye ɔsɔ-sɔp ɔtɔ edesi kini mmɔŋ osuk odude ke isɔŋ—ata eti ini utɔ. Ke mfuhɔ, ana edoride isaŋ uka temple enim ke ini efen.

Mbet iba, Elder ye Sister Cauilan, ye mkpri ɔkwɔrɔ ikɔ-Abasi eke unwam ita, ema ekop ebaŋa afanikɔŋ eke ufɔkemana Agamata enyuŋ eyom ndiwam okposukedi mmɔ mmikiyeneke ifiɔk ibaŋa utɔ inwaŋ. Ke enamde utom ke idak ufiop eyo, mmɔ ema enwam ke nditɔ nkpasip, emi akayakde mme Agamata ndikure utom enyung eduk edidian ke temple nte ekedoride. Elder Cauilian ama etiŋ ete Ɔkpɔiso eke mbon “[ufɔkemana Agamata’] ama anyama nte nnyin ikutde mmɔ esinede afia ɔfɔng ke ufɔk Jehovah. Idara emi nnyin inyenede kini emi nnyin inwamde mbon efen edi idara owo mikemeke ndida ndomo ye efen!”

Mbon ufɔkemana Agamata idahaemi ebɔ ediye edidiɔŋ edidian nte nsinsi ufɔkemana koro esisit nsaŋa mme mbet ema ekeyɔhɔ ye ata-ima—idiɔŋɔ editiene mmɔ—ema ebiere ndiwam nditɔ ete ye nditɔ eka mmɔ eka iso ke usuŋ ediomi mmɔ.

Nditɔ eka iren ye iban, nditiene Jesus Christ edi nkukure usung ndibɔ inemesit emi edibigide. Enye edi usung emi ɔyɔhɔde ye nkoi-nnmam utom ima nnɔ mbon efen kini usuŋ editiene ɔyɔhɔde ye ukut ye afanikɔŋ, ndien kini nnyin idiwanade inyuŋ iduɔ ubak ini, nnyin imikeme ndibɔ ndɔŋesit ite ke Abasi ke ese nnyin onyuŋ oyom ndiwam nnyin kpukpru ini emi nnyin iwanade ukeme. Isaiah eti nnyin ete “Abasi eyemum [nnyin] ubɔk, ɔdɔhɔ ete … , Kufehe ndik; Ami nyeŋwam fi.”

Ye ɔsɔŋɔ emi otode Ete eke Heaven nnyin ke esit mi, Ami mbɔŋ akam ke ofuri esit mi nte yak nnyin itiene ikoot President Nelson mdinam editiene edi ata akpan mkpɔ ke uwem nnyin. Yak nnyin “ibɔŋ akam inɔ Ete ye ofuri odudu esit” man “nnyin ikpeyɔhɔ ye ima emi, emi enye ɔnɔde kpukpru mme anditiene Enyen Esie, Jesus Christ ke akpanikɔ; … man ke ini enye edi idide nnyin ikpetie nte enye,” koro nnyin ikamade idiɔŋɔ eke eti owo-mbet, emi edide “ata-ima … edisana ima Christ.”

Ami nnɔ ikɔ-ntiense ke Jesus Christ edi odu-uwem, enyene-ubɔŋ Andinyaŋa, Andifak, Uwutŋkpɔ, ye Ufan nnyin. Ke enyiŋ Jesus Christ, amen.