ndima uwem

Enye aka-iso ete: Ami mmebɔ ediwak ima ye uŋwam nto ward ufɔkemana mi. Ima oro enehede okpon eti-eti. Bishop [mi] ye president eke Young Women ema enam ebe ndaha ndiwut ima ye uŋwam mmɔ. … Ami mmokut ubɔk Abasi … ekpemede mi ye ufɔkemana mi. … Oruk ward nte okim edi ufɔkemana emi owo kiet-kiet eyomde, akpan-akpan eyen-aŋwan ekedude ke ndaha mi.”

Enye ye ufɔkemana esie ye ward esie, edima edara nsekeyen eren esie ke ɔfiɔŋ February ekebede mi.

President Russell M. Nelson ete, “Ndutum ido eke eti ye odu-uwem Ufɔk Abasi Jehovah ke kpukpru ini edi-di … ukeme ediŋwam nditɔ Abasi … kiet-kiet [esinde uŋwam ye esit ima] enɔ owo kiet, ukem nte Enye akanamde.

Ini emi asaŋa-ikpɔŋ ŋwan ɔfiɔkde ke enye eyeman eyen emi enye mikiyomke ndiman, mfina udɔŋɔ, ndutime eke spirit, esuene, mfina ŋkpɔ-okuk, mfina ŋkpɔ ufɔkŋwed, unana-idorenyin ndɔ, ye mfuhɔ unana idorenyin, ke ndaha ubiak ye ndutime, eyenam anana-ekikere ŋwan oyom usuŋ ndi-nam ŋkpɔ emi edidade akwa ubiak ye mkpɔfiɔk edi.

Eke owo andikop emi okokutde akwa ubiak ye mkpɔfiɔk oto ndinam mme ndibuana ke usioŋo-idibi, mbɔk ti ete: Okposuk nte nnyin mikemeke edikpuhɔ se ikebede, Abasi ekeme edidiɔŋ se ikebede. Erifen-nnɔ ekeme edi-di oto ke utibe-ŋkpɔ eke mfɔn usio-isop Esie, nte afo ɔwɔŋɔre etiene Enye ke ndimem ye erikabare esit.

Esiwak ndidian ikɔ iba nnɔ ewuhɔ ediman eyen: uwem ye mbumek. Uwem edi ata nsɔŋurua ŋkpɔ ke mfɔn-ma uduak eke Ete heaven nnyin, ndien ke ewuhɔ Esie nnyin imima inyuŋ ikpeme uwem; ndien nnyin imek eyen emi ema eyomo inikiet edika-iso ndu-uwem. Nnyin ŋko imima enɔ edimek, eke unen edimek—anwamde ndisɔŋɔ nti mbumek emi Abasi enyimede eke edidade nsinsi inemesit idi.

Ini emi ŋwan ye erenowo edude ke oruk idiɔk ini ntre, anade nte enam akpan mbumek oro, ikɔ nnyin, ubɔk nnyin, esit nnyin—eke spirit, ekikere, ye ke ŋkpɔ-okuk—ekeme ndinam mmɔ ekop ima Andinyaŋa ndien, nte President Henry B. Eyring eketiŋde ete, adade edinwaŋa ufɔn ɔnɔ mme enyin spirit mmɔ otode “se mmɔ ekerede mmɔ edikut” ekesim “se mmɔ mikemeke ndikut kaŋa.”

President Dallin H. Oaks ete: “ido nnyin kabaŋa usioŋo-idibi ikɔŋɔke ke ifiɔk emi ekeyarare ebaŋa kini uwem isɔŋ ɔtɔŋɔde. … Ɔkɔŋɔ ke ifiɔk nnyin ete … ke ana kpukpru nditɔ Abasi ke spirit edi isɔŋ ke ntak ubɔŋ, ndien ke idiɔŋɔ owo kiet-kiet ɔkɔtɔŋɔ ke anyan ini mbemiso ediyomo ndien eyeka iso ke ofuri mme nsinsi emi edidide.”

Item Abasi kabaŋa eyen eke mimanake kaŋa, ekenɔde eto uyo eke Akpa Presidency ye Eboho mme Apostle Duopba, akanama ikpuhɔke onyuŋ ofiori mme ikɔ eke mme prophet ke ofuri emana, ɔnɔde nsasana edinam-aŋwaŋa esɔk se Abasi okoyomde oto nnyin.

“Ufɔk Abasi Jesus Christ Mme Ndisana Owo ke Ukperedem Usen enim ewuhɔ edikpeme uwem owo ke akpanikɔ. Mmɔdo Ufɔk Abasi inyimeke edisioŋo-idibi ke ntak ubɔhɔ eke idem owo mme eke mbubru, enyuŋ eteme mbon mmɔ ete ekunyime enɔ, edina-nam, edite-teme, edikpe-okuk nnɔ, mme edinim-itie nnɔ oruk usioŋo-idibi oro.

“Abasi enyime ɔnɔ mme esisit usioŋo-idibi … kini:

• Idibi eyomode eto ŋkan-ubɔk idaŋ mme otode eke imaan , mme

• Eti dɔkta ebierede ke uwem mme nsɔŋidem eke eka odu ke idiɔk ndaha, mme

• Eti dɔkta eberede ke eyen-idibi enyene mme unɔmɔ emi midiyak-ke nsekeyen odu uwem ebe ini amanade.”

Akpa Presidency eka-iso etiŋ ke: “Usioŋo-idibi edi ata idiɔkŋkpɔ. [Kpa ke mme esisit ndaha emi] enyene edikere mbaŋa or kpɔt ke mbonowo emi enyenede ubiɔŋ ema ekebɔ ibɔrɔ ke akam” enyuŋ eneme ye mbon efen.

Ke isua Edip-ye-duop emi ekebede, prophet Abasi ama ɔnɔ etop esɔk ererimbot. Etop oro esine mme ikɔ emi:

“Nnyin … ifiori ke Abasi ama eteme ete ke enyene edikama nsasana odudu edibot-owo kpɔt ke ufɔt erenowo ye ŋwan, emi enamde ndɔ nte ebe ye ŋwan.

“Nnyin ifiori ke usuŋ emi ekebotde uwem isɔŋ edi nte Abasi enyimede. Nnyin imisɔŋɔ ewuhɔ kabaŋa uwem ye ufɔn esie ke nsinsi uduak Abasi.”

Edibɔk ye edikpeme uwem eke mimanake kaŋa idige ke ndaha mbre-ukara. Edi mbet eti edu-uwem emi Abasi ɔsɔŋɔke oto ke prophet Esie.

Ikɔ kiet otode President J. Reuben Clark Jr., emi akanamde-utom ke First Presidency, enehede emen mme iwaad eyo nnyin owut ete: “Mme iwaad eke Ufɔk Abasi eyom ŋkpɔ Spirit; mmɔ eyom edikpep gospel, ndien mmɔ eyom oro nnen-nnen, ke mibuak-ke. Mmɔ eyom edidiɔŋɔ kabaŋa … se nnyin inimde ke akpanikɔ; mmɔ eyom edinyene mme ikɔ-ntiense eke akpanikɔ[oro]. Mmɔ edi … mme andiduŋɔre, mme andiyom akpanikɔ.” Yak nnyin isiwak editiŋ ke mbuɔtidem ye mbɔm inɔ iwaad nnyin ke ufɔkiduŋ nnyin ye kiet eken ke mme esop eke Relief Society ye elders quorum, kabaŋa mbet Abasi eke mfara-ke-idem, ewuhɔ eke uwem, ye edikpeme eyen eke mimanake-kaŋa ye eka mmɔ.

Edima eyeneka-aŋwan kiet ekewet ɔnɔ mi abaŋa ifiɔk-ukpep kiet emi enye ekenyenede ke ediwak isua emi ekebede ete: “Nte owo isua Efureba… , ami ndikut ke ami moyomo edi nnyeneke uŋwam nto ufan erenowo mi. Ami mma ŋkop buut ye ndobo-ikpɔŋ [edi ami] akananam ŋkikereke [edisioŋo-idibi]. … Ami [mma nnyene] edima ufɔkemana ye bishop mi, eke ami ŋkesisobode ke ofuri ini mbɔ ndausuŋ. … Ami ndiwɔŋɔre ntiene Abasi. Ami nsikot ŋwed Abasi … nyuŋ mbɔŋ-akam [ndien] ndibɔ ɔsɔŋɔ nto Andinyaŋa mi ye ke usuŋ ŋkabare-esit. … Ami ndibɔ ibɔrɔ kiet [nto akam mi] eke ami mme ŋkemeke ndikaŋ. … Ibɔrɔ oro ekedi oyomo-nsia, edi ami mma ndiɔŋɔ ke ami nyenɔ eyen-aŋwan mi nte ebɔ-ekama. … Ami ndibɔŋ-akam nyom uko [nyuŋ] ŋkop ediŋwaŋa ima Andinyaŋa otode ke erikabare-esit, ami ndiɔŋɔ ke Abasi … esibɔrɔ akam onyuŋ ɔsɔŋɔ nnyin idem.”

Edima ebe ye ŋwan kiet ekebɔ nsek eyen-aŋwan oro ekema enyuŋ ekpep enye ikɔ-Abasi. Idahaemi enye ɔdɔ-ndɔ ye ediye ufɔkemana eke esie.

Ndusuk ini, akamba nsɔŋɔ-ŋkpɔ ye ubiak unana-idorenyin ekeme editiene nte ekpemede uwem.

Mmi-mmi-emi ekpri ebe ye ŋwan kiet emi Kathy ye ami imade ediwet enɔ mi kabaŋa ediye nsekeyen emi mmɔ eketiede ebet.

Ete ediwet ete: [Ini emi ŋwan mi oko] yomode ke udua Duop nnyin idikut ke utibede nsekeyen enyene udɔŋɔ ŋkpɔ-uboneke trisomy 21 emi ewakde edidiɔŋɔ nte Udɔŋɔ ndukpi. Nnyin imibɔ item … emi okotode mbia-ibɔk mbakara ete inyime man ebiat-idibi oro efep. Esisit mme udua eken nnyin idifiɔk ke … eyen nnyin emi mimake-kaŋa … eyeyom ediwak usiak-esit ke akpa isua uwem esie. Ke ofuri ŋkpɔ emi nte nnyin ibɔŋde-akam iyom uŋwam Abasi, … nnyin idikop nte Spirit ɔnɔde nnyin ndɔŋesit. Nnyin idibɔ eriyarare ye ifiɔk ke eyen-aŋwan nnyin edi ɔwɔrɔiso eyen eke Ete Heaven ndien ke enyene akwa udɔŋ ndidu ke ufɔkemana nnyin nyuŋ ndi ke isɔŋ.”

Eka nsekeyen oro ekewet ete: [Nnyin] ima inehede idige, idutin, ndien ke akpanikɔ ifuhɔ oto ke etop oro. … Ini eke ediyomo mi ekedide udua Duopenaŋ, nnyin ididiɔŋɔ ke nsekeyen nnyin ama enyene mme unɔmɔ-ubon ke esit, kiet emi ekemede edinehede ndiɔk. Nnyin idikut ediwak mme dɔkta ye nta-ifiɔk tɔŋɔde kini eyen esinede-ke-idibi ke udua Duop kesim udua Efureba. … Ke edisobo nnyin kiet-kiet, esibup mme nnyin imoyom idibi oro edida mme iyom ete ebiat efep. … Andinyaŋa edimum esit mi onyuŋ ɔnɔ mi ekikere emem ye inemesit kabaŋa eyen-nsek aŋwan nnyin. … [Ete Heaven] ama owut mi ke ediwak ini ke Enye enyene edifn uduak ɔnɔ mi [ndien] ami mmenim Enye ke akpanikɔ.”

Mmɔ ekenem esit edara nsekeyen aŋwan oro ke ata udua kiet emi ekebede mfin emi. Enye edi eke mmɔ ndien mmɔ edi eke esie ke nsinsi.

Ɔsɔŋɔ mbuɔtidem ye eti uko edi mme idiɔŋɔ eke mbet Jesus Christ.

Ke ediwak isua, ami mmenyene eti-ifet ndisobo ye irenowo ye iban emi esuhɔre-idem eyom ndifiak nka usuŋ ediomi ye itie-oku mmɔ ye edidiɔŋ temple mmɔ ediwak mme isua ke ema ekenana itie nte owo ufɔk Abasi.

Ke ndaha kiet, akana nte ami nduŋɔre erenowo kiet nnɔ Akpa Presidency ke edifiak nnɔ itie-oku ye edidiɔŋ temple esie.

Ke ama akanam ndɔ esie ke edisana temple, ke ama ekenyene nditɔ ita, erenowo emi ama edue ŋwan ye nsasana ediomi esie. Asaŋa-ikpɔŋ ŋwan akabare oyomo-idibi ndien ediyom edisioŋo.

Ebe eti ŋwan emi ekpe-ubɔk ye ŋwan emi ete aman eyen oro onyuŋ ɔŋwɔŋɔ ke enye eyebɔk eyen oro, inikiet emi enye amanade, diana ye nditɔ esie.

Asaŋa-ikpɔŋ ŋwan emi edikere enyime editre edibiat idibi oro.

Idahaemi oro edisim isua Duop. Ɔsuhɔre-idem eyeneka-ŋwan etiede kiso mi edima eyeneren oro nte eke esie ndien ɔdɔhɔ mi abaŋa ukeme eke ebe esie ke ndinam sifɔn nyuŋ ma nyuŋ mkpeme enye ye ufɔkemana esie. Ete oro editua-eyet nte enye etiŋde ikɔ.

Didie ke ediye eyen-aŋwan Abasi edikeme edida eyen-ɔwɔŋ nte eke esie emi ekemede editi enye kpukpru usen kabaŋa idiɔk-ido eke ebe esie. Didie? Koro enye edikut ɔsɔŋɔ ke Jesus Christ ndien enye enim nsasana ŋkpɔ-uwem, edisana uwem. Enye edidiɔŋɔ ke eyen eke mimanake-kaŋa edi eyen Abasi, inyeneke-ndudue onyuŋ edi nsasana.

Ndima nditɔ-eka irenowo ye iban, unana edinyene ima nnɔ nsek nditɔ eke mimanake-kaŋa ke ofuri ererimbot edinɔ ata ɔkpɔsɔŋ ekikere. Abasi amama uwem. Oro edi utomEsie ye ubɔŋ Esie ndida uwem unana-mkpa ye nsinsi uwem nsɔk nditɔ Esie. Nte mme mbet Jesus Christ, nnyin imima uwem. “Mbufo ema ema kiet eken, kpukpru owo eyeda oro efiɔk ete mbufo edi mbet Mi.” Yak nnyin itim iwak edibuana ima nnyin ye mbon emi enehede eyom uŋwam nnyin. Ami mmowut ima mi nnɔ mbufo ye ima emi Ete Heaven nnyin enyenede ɔnɔ Esie ekedide isɔŋ. Ke enyiŋ Jesus Christ, amen.