“Oto Ke Emi Kpukpru Owo Eyefiɔk Ete Ke Mbufo Edi Mme Mbet Mi”
Ima nnyin inyene inɔ Abasi ye nditɔ Esie edi enyene odudu ikɔ ntiense ɔnɔ ererimbot ete ke emi ke akpanikɔ edi Ufɔk Abasi Andinyaŋa.
Ke ediwak isua emi ekebede Harriet ye ami ikinam isaŋ ibe ke usuk usuk Germany. Ekedi mbemiso Easter ndien nnyin ima ikot eti ufan, emi mikidighe owo Ufɔk Abasi nnyin, ete edidiana ye nnyin ke Sunday. Nnyin ima ima edima ufan emi, ke ntre ekedi ntre ye nnen nnen ndibuana ye enye se nnyin ikerede ibaŋa Andinyaŋa ye Ufɔk Abasi Esie ye ndikot enye ete edi onyuŋ edise! Enye ama enyime ikot emi onyuŋ adiana ye nnyin ke mme mboho ke branch kiet emi ekekperede.
Edieke edide ke afo amada ufan edi Ufɔk Abasi ke akpa ini, afo emekeme ndikut nte eketiede ye ami ke usenubɔk Sunday oro. Ami nkoyom kpukpru ŋkpɔ ɔfɔn ama. Ufan nnyin ekedi ata ɔfiɔk ŋwed, owo spirit. Ami ke akpanikɔ mma nkere ke mme mbono branch emi eyefɔn ke ekikere esie onyuŋ owut Ufɔk Abasi ke eti usuŋ.
Branch oro ekedu ke mme ubet ke ufɔk owo ke ɔyɔhɔ enyɔŋ iba ke ufɔk uyam ŋkpɔ. Man esim do, akana nte nnyin idɔk ke edem esa ufɔk oro, ibe mme ɔkpɔsɔŋ utebe otode mme ŋkpɔ urua emi ekenimde do.
Nte eketɔŋde sacrament, ami mma nkere mbaŋa ufan mi nte okopde emi ke akpa ini, ndien nkekanke nyaŋa edi mma nkut mme ŋkpɔ emi akanamde mi ndighe ekpri. Ikwɔ ke nte uwut-ŋkpɔ, ikitiehe ukem ukem nte Tabernacle Choir. Mfina, uyom nditɔ ɔŋwɔŋ ke ekekop ke ini sacrament. Mme etiŋ ikɔ ema edomo ukeme mmɔ, edi mmɔ ikidighe mme akwa ikɔ. Ami ntie ke nyek-idem ke ofuri ini mbono oro, nkere ke ini Sunday School eye ɔfɔn akan oro.
Ikidighe.
Ofuri usenubɔk oro ami nkekere se ufan nnyin edikerede ibaŋ Ufɔk Abasi emi nnyin ikidade enye ika.
Ke ekekurede, nte nnyin ikiwatde inyɔŋ ufɔk, ami ŋwɔŋɔde nse ufan nnyin. Ami nkoyom ndinam enye ɔfiɔk ete ke emi ekedi ekpri branch kiet ndien ke ikidaha inɔ ofuri Ufɔk Abasi. Edi mbemiso nkekan ntiŋ ikɔ kiet, enye osioro uyo.
“Oro ama eye,” enye ɔdɔhɔ.
Nkenyeneke uyo.
Enye ama aka iso, “Ami mema nte mme owo edade kiet eken ke Ufɔk Abasi mbufo. Etie nte kpukpru mmɔ eto nsio-nsio ebiet, edi ke akpanikɔ mmɔ ema kiet eken. Emi edi se ami nkerede ke Christ okoyom Ufɔk Abasi Esie edi.”
Ndien, ami mma nsɔp nkabade esit mbaŋa ido ubiere ikpe mi. Ami nkoyom ndiwut mme mbono emi efɔnde ema man enem ufa mi esit. Edi se mbon branch emi ekenamde ekedi mfɔnmma-esit spirit ima, eti-ido, ime, ye mbɔm.
“Man Mbuɔtidem Ɔkpɔkɔri Ke Ererimbot”
Nditɔ eka iden ye iban, mme ndima ufan, ami mema Ufɔk Abasi Jesus Christ eke Ndisana Owo ke Ukperedem Usen. Enye edi Ufɔk Abasi akpanikɔ ye eke uwem eke Andinyaŋa, ndien enye ekpep ɔyɔhɔ gospel Jesus Christ emi ekefiakde emen edi. Odudu ye unen itie-oku Esie odu mi. Jesus Christ ada Ufɔk Abasi emi usuŋ ke idem esie, oto ke mme isuŋ utom emi enye okotde onyuŋ ɔnɔde odudu ye odu-uwem prophet, kpa President Russell M. Nelson. Enye ɔnɔ Ndisana Owo ke Ukperedem Usen saŋa-saŋa ubiɔŋ utom nditaŋ nditɔ Abasi mbok nyuŋ mbeŋe ererimbot idem nnɔ Edidi Ɔyɔhɔ Iba eke Andinyaŋa. Ami mmetie ntiense nte ke ofuri emi edi akpanikɔ.
Edi edi akpan nditi ete ke ini emi ediwak owo efiɔkde Ufɔk Abasi Jesus Christ ke akpa ini, mmɔ ikereke ibaŋa unen itie-oku mme mme edinam mme edibok Israel. Se mmɔ esɔpde ekut, ekan kpukpru ŋkpɔ efen, edi nte mmɔ ekopde ke ini mmɔ edude ye nnyin ye nte nnyin idade kiet eken.
“Ema Kiet Eken,” Jesus ɔkɔdɔ. “Oto Ke Emi Kpukpru Owo Eyefiɔk Ete Ke Mbufo Edi Mme Mbet Mi” Ediwak ini, akpa ikɔ ntiense owo eke Jesus Christ edi ke ini enye okopde ima ke otu mme mbet Jesus Christ.
Andiyaŋa ama ɔdɔhɔ ete ke Enye akafiak ada Ufɔk Abasi Esie edi man mbuɔtidem ɔkpɔkɔri Ke ererimbot.” Ke ntak oro, ke ini mme owo edide mme mbono Ufɔk Abasi nnyin, Andinyaŋa oyom ete mmɔ enyɔŋ ye ɔkpɔsɔŋ mbuɔtidem ke Enye! Ima emi mme ufan nnyin ekopde ke otu nnyin eyemenede mmɔ ekpere Jesus Christ. Oro edi uduak nnyin kpukpru ini emi nnyin ibohode.
Owo ndomo kiet emi oyomde akamba mbuɔtidem ke Christ mme ndikpere Ete ke Heaven ana nte odu ke ufɔk ke Ufↄk Abasi Jesus Christ Mme Ndisana Owo Ke Ukperedem Usen. Ndikot mmɔ edi mme mbono nnyin ekeme ndidi ntre ye nnen nnen nte ndikot mmɔ edi ufɔk nnyin.
Se Ikpidide ye se Idide
Idahaemi, ami mokut nte ke ntiŋ mbaŋa se ikpidide. Ndien ke uwem mkpa emi, nnyin isisɔpke inyene se ikpidide. Ndien “tutu usen mfɔnmma,” ufaŋ oyodu ke ufɔt se ikpidide ye se idide. Ke ntre, nso ke nnyin ikpanam ke ini Ufɔk Abasi mitiehe nte usen emi ɔfɔnde ama? Ke ini, ke ntak eke ekpededi, ward nnyin inyeneke kaŋa mfɔnmma mbuɔtidem mme ima? Mme ke ini etiede nte nnyin idotke?
Ŋkpɔ kiet emi nnyin minaha inam edi nditre ndiyom se ikpidide!
Akpa ikpa ŋwed Ŋwed Mormon esine akpan ikpan emi: “Edieke mme ndudue edude,” enye ɔdɔhɔ, “mmɔ edi mme ndudue owo; ke tre, kubiom mme ŋkpɔ Abasi ikpe.”
Ndi ŋwed—mme ufɔk Abasi—ekeme ndinyene “mme ndo” ye “mme ndudue” ndien esuk edi utom Abasi?
Ibɔrɔ mi edi akamba iŋ!
Ke ntre, ke ini nnyin ikamade idem nnyin ke akamba udomo Jehovah, yak nnyin ŋko inyene ime ye kiet eken. Nnyin kiet kiet idi utom emi akade iso, ndien nnyin idori enyin ke Andinyaŋa ibaŋa ŋkɔri emi nnyin inamde. Oro edi akpanikɔ ɔnɔ nnyin nte owo kiet kiet, ndien edi akpanikɔ ɔnɔ obio ubɔŋ Abasi ke isɔŋ.
Jehovah ikotke nnyin ete idiana ke Obio ubɔŋ Esie ikpɔŋ edi ŋko ete isin ifik ke ndibɔp enye. Jehovah okut mbon emi edide “esit kiet ye ekikere kiet.” Ndidi esit kiet ana nte nnyin inyene mme edisana esit, ndien oro oyom akamba ukpuhɔde ke esit.
Edi oro iwɔrɔke ite ke ana nte mkpuhɔde esit mi edisaŋa ye okuo. Ŋko iwɔrɔke ite ke ana nte ɔkpuhɔde esit fo edisaŋa ye ekim. Oro ɔwoɔrɔ nnyin kpukpru ikabade esit nnyin edisaŋa ye eke Andinyaŋa.
Edieke nnyin miduhe do kaŋa, ti ete ye uŋwam Jehovah, ŋkpɔ ndomo kiet isɔŋke ikaha.
Dot nyuŋ du
Ndien edieke afo ekerede ke afo utimke udot, mbɔk fiɔk ete ke afo idighe ikpɔŋ. Ndi kpukpru nnyin akananam idughe ke mme itie ke uwem emi nnyin ikerede ke idi isien owo ke ubet? Ami mokut emi ediwak ini. Ke ini nkedide isua 11, ema eyire mbon ufɔk mi esio ke ufɔk nnyin ete ika obufa ebiet. Kpukpru ŋkpɔ ama enyene ukpuhɔde ye se ami ŋkɔfiɔkde. Ndien uyo utiŋ-ikɔ mi ama anam nditɔ eken efiɔk ke ami mma mkpuhɔde mkpɔŋ se mmɔ ekefiɔkde. Ke ini emi ami ŋkoyomde ufan ye ndidu, ami ndi ikpɔŋ nyuŋ nnana.
Mi ke ererimbot, ediwak mme ukpuhɔde emi nnyin ikutde—mme ukpuhɔde emi usuk adade abahade kiet eken—asaŋa ye mme ŋkpɔ ererimbot: nte etiede, ebiet etode, usem, ɔfɔŋ, mme ido, ye ntre eken. Edi “Abasi isehe mme ŋkpɔ ke usuŋ emi mme owo esede. Mme owo ese se enyin okutde, edi Jehovah ese esit.”
Ke ŋkaŋ Esie, odu ikpehe kiet emi edide mbemiso mbon efen: eyen Abasi. Ndien kpukpru nnyin isine ediye ediye ke enye emi.
Edi nte edide ndiyom ndidu ndiana mme owo emi etiede, etiŋde ikɔ, enamde ŋkpɔ, enyuŋ ekerede ŋkpɔ nte nnyin. Ebiet odu ɔnɔ oro.
Edi ke Ufɔk Abasi Andinyaŋa, nnyin ibok kpukpru nditɔ Abasi emi eyomde ete ebok ye emi eyomde akpanikɔ. Idighe nte nnyin itiede, ke enyin mbre ukara, edu, mme ebiet itode ada nnyin adian kiet. Idighe se nnyin ibuanade kiet adian nnyin. Edi se nnyin iyomde, ima inyenede inɔ Abasi ye mbɔhɔiduŋ, nsin-ifik nnyin ye Jesus Christ ye gospel Esie emi ekefiakde emen edi. Nnyin idi “kiet ke Christ.”
Edidiana kiet emi nnyin iyomde idighe ndinam kpukpru owo eda ke ebiet kiet, edi ndinam kpukpru owo ese usuŋ kiet—ese Jesus Christ. Nnyin idi kiet, idighe ke ntak ebiet emi nnyin ikikade edi ebiet emi nnyin idomode ndika, idighe ke ntak owo emi nnyin idide edi owo emi nnyin iyomde ndidi.
Oro edi se Ufɔk Abasi akpanikɔ Christ abaŋade.
Idem Kiet
Edieke amade Abasi, edieke oyomde nditim mfiɔk Enye ke nditiene Eyen Esie, ndien afo esene mi. Edieke afo ke akpanikɔ odomode ndinim mme mbet Andiyaŋa—okposuk edi ke afo ufɔnke uma kaŋa—ndien afo emetim odot ɔnɔ Ufↄk Abasi Jesus Christ Mme Ndisana Owo Ke Ukperedem Usen.
Ndien nso itibe edieke afo ɔkpuhɔde ye mme owo edude ye afo? Oro inamke fi edi emi midotke—anam fi edi ubak emi eyomde ke idem Christ. Eyom kpukpru owo ke idem Christ. Mme utɔŋ ekop se mme enyin mikemeke. Ikpat enam mme ŋkpɔ emi mme ubɔk minyeneke ukeme.
Oro iwɔrɔke ite ke utom fo edi ndikpuhɔde kpukpru owo ete etie nte afo. Edi ɔwɔrɔ ete ke afo emenyene akpan ŋkpɔ ndidian—ndien ke afo emenyene akpan ŋkpɔ ndikpep!
Uyo Kiet
Ke ofuri ikpehe akwa mboho, ediɔŋ nnyin ye ikwɔ emi otode mme enyene enɔ mbon ikwɔ. Nte afo akpaŋde utɔŋ, afo eyekut ete ke mme ɔkwɔ-ikwɔ ikwɔhɔ ke uyo kiet. Usuk ini ŋkaŋ kiet ekwɔ ye nsek uyo, usuk ini ŋkaŋ eken. Edi kpukpru mmɔ edian uyo ekwɔ edinem ikwɔ, ndien mmɔ kpukpru edi kiet. Owo ikwɔ kiet kiet enyene ukem akpan ubiɔŋ utom: nditoro Abasi nyuŋ mmenede esit nnyin nnɔEnye. Kiet kiet ana nte enyene esit ye ekikere esie ke ukem edisana ntak. Ndien ke ini oro etibede, mmɔ ke akpanikɔ ekabade edi uyo kiet.
Edieke afo mudighe kaŋa owo Ufɔk Abasi Jesus Christ Mme Ndisana Owo ke Ukperedem Usen,nnyin imikot fi ete edidiana ye nnyin nte nnyin idarade ke ikwɔ Andinyaŋa “song of redeeming love.” Nnyin imiyom fi. Nnyin imima fi. Ufɔk Abasi eyefɔn akan akpa ye mme ukeme fo ndinam utom nnɔ Jehovah ye nditɔ Esie.
Edieke edide ke afo omowut, oto ke uduɔk-mmɔŋ, oto ke ndinam mme ediomi ye Abasi, udɔŋ fo “ndididuk eboho Abasi, man ndikot fi owo esie,” sɔsɔŋɔ ke ndidi kiet ke akamba ye edisana utom emi ye ke ndinwam ndinam Ufɔk Abasi Jesus Christ edi se Andinyaŋa oyomde ete enye edi.
Nte nkekpepde nto ufan mi ke Germany, ima nnyin inyene inɔ Abasi ye nditɔ Esie edi enyene odudu ikɔ ntiense ɔnɔ ererimbot ete ke emi ke akpanikɔ edi Ufɔk Abasi Andinyaŋa.
Yak Abasi ɔdiɔŋ nnyin ndiyom ke ime ye ntiŋ-enyin ndidu ke se ikpidide emi Andinyaŋa, Andifak, ye Etubom nnyin enimde ɔnɔ nnyin— man kpukpru owo efiɔk ete ke nnyin idi mme mbet Esie. Ke edisana enying Jesus Christ, amen.