Ndien Nnyin Itiŋ ibaŋa Christ

Ke utit anyan utom ke obio-mbakara, ŋwan mi Lesa ye ami imaiduk ke esit airport ke mbeŋeidem ndife ini kiet efen—ke okoneyo—nyɔŋ ufɔk. Nte nnyin idade ye ediwak mbon efen emi esaŋade ke ikpat ke ikpat ke mme anyan udim, nnyin imaikop ekikere mbon efen ikisaŋade kiet abaŋa isaŋ oro, ndibe ke ebiet use mme ŋwed isaŋ, ye ndibe mme ebiet mbon ukpeme.

Ke utit nnyin ima isim okpokoro owo utom emi mikikereke ibaŋa mme akamba ufen ye ekikere emi okodude ke ubet oro. Enye ama ɔsɔp idem, ke misehe mi enyin, ɔbɔ mme ŋwed isaŋ mi, ese ndise mi, ɔkubɔde ikpa ŋwed kiet kiet, ndien ke akpatre ɔnɔ ŋwed isaŋ mi unyime ye ɔkpɔsɔŋ ubɔk.

Enye ndien anyan ubɔk ɔbɔ mme ŋwed Lesa. Ke miwutke ekikere esie, osuk ibuot onyuŋ aka iso ke utom esie, enye ke nte ubono ŋkpɔ edide ese mme ŋwed efen ye enyin ifiɔk, etiŋ enyin ese mme ŋwed oro ke iso esie. Ama akpa nnyin idem ke ini enye eketrede, emenede ibuot esie, onyuŋ ɔfɔfiɔk ese Lesa ke iso ekɔm. Ye mmem mmem imam, enye ɔnɔ ŋwed isaŋ Lesa unyime onyuŋ ayak mme ŋwed oro ɔnɔ enye. Ŋwan mi ama asak ye enye ŋko, ɔbɔ mme ŋwed oro, onyuŋ ɔkɔm enye.

“Nso itibe idahaoro?” Ami mma mbup.

Lesa ndien ama owut mi se owo oro okokutde—ekpri ŋwed ye ndise Andinyaŋa. Enye ama ɔbɔhɔ ɔwɔrɔ ke ekpat esie oduk ufɔt ŋwed isaŋ esie. Se anam utom oro okokutde edi emi. Se sikikpuhɔde ofuri uwem esie ekedi emi.

Mfɔn ye Akpanikɔ, eke Simon Dewey, otode unyime altusfineart.com, © 2025, ekama ye unyime ebeŋe.

Ekpri ndise Andinyaŋa emi akadian esit owo iba emi kikidighe kiet. Enye ama ɔkpuhɔde se mikidighe eke idem ɔnɔ idem, owut uyai, utibe ŋkpɔ, ye akpanikɔ abaŋade Unwana Jesus Christ. Ke nyɔhɔ nsuhɔ usen oro ye tɔŋɔ ke ini oro, ami mekere mbaŋa edinem, mmem mmem ini oro ye mkpaidem ndien menem esit mbaŋa ediye ifiɔk eke Unwana Christ ke idem nditɔ Abasi.

Nnyin idi mme anditiene Jesus Christ, ndien nnyin iyom ndibɔ nyuŋ mbuana unwana Esie mbiba. Se isinede ke enyiŋ Ufɔk Abasi edi ukpep-ŋkpɔ nnyin abaŋade “Jesus Christ ke idem esie edide etubom itiat inuk.” Oto ke mme prophet eset ye mme odu uwem prophet, Ete nnyin ke Heaven ɔnɔ nnyin uyo ete “Ikpaŋ-utɔŋ inɔEnye!” inyuŋ “idi itiene Christ.” “Nnyin itiŋ ibaŋa Christ, nnyin inem esit ke Christ, nnyin ikwɔrɔ Christ, [ndien] nnyin itiŋ nte prophet ibaŋa Christ.”

Nnyin ikpep ite ke Jesus Christ edi Eyen Abasi, ndien ke ini utom Esie ke isɔŋ, Jesus ama ekpep gospel Esie onyuŋ asiak Ufɔk Abasi Esie.

Nnyin itie ntiense ite ke utit uwem Esie, Jesus ama osio isop ɔnɔ mme idiɔk-ŋkpɔ nnyin ke ini Enye ɔkɔbɔde ufen ke Inwaŋ Gethsemane, ema ekɔŋ ke cross, ndien ama eset.

Nnyin idaresit ite ke ntak mkpa usio-isop Andinyaŋa, ekeme ndifen nnɔ nnyin enyuŋ eyet ke mme idiɔk-ŋkpɔ nnyin nte nnyin ikabakede esit. Emi ada emem ye idorenyin ɔsɔk nnyin ke ini anamde edi mmem mmem ɔnɔ nnyin ndifiak nka iso Abasi ndien ibɔ uyɔhɔ idaresit.

Nnyin itiŋ nte prophet ite ke ntak Ediset Jesus, mkpa idighe utit edi edi akpan ikpat ndika iso. “Kpukpru nnyin iyiset ke ini ima ikpa. Emi ɔwɔrɔ ete ke spirit owo kiet kiet ye ikpɔk-idem eyefiak ediana kiet ndien edu uwem ke nsinsi.”

Mme odu uwem prophet ke eyo nnyin—emi ebɔde ediyarede eto Abasi ndikpep nyuŋ nda nnyin usuŋ—ke ekot nnyin kpukpru ini ete idi itiene Christ. Mmɔ ke enwam nnyin ndidori mme esit , mme utɔŋ ye mme enyin nnyin ofuri ofuri ke Enye. Nnyin imikeme ndisiak ediwak uwut-ŋkpɔ ke ukpuhɔde ye edidian emi Akpa Presidency esiande emi enamde nnyin idorienyin ke Jesus Christ. Ndusuk ke otu mmɔ edi:

• Ubiere ndinɔ enyiŋ emi “Ufɔk Abasi Mormon” nduɔk-odudu ye ndikot enye nnen nnen enyiŋ nte, Ufɔk Abasi Jesus Christ Mme Ndisana Owo ke Ukperedem Usen.

• Ndinim obufa, ŋkpɔ ndise emi ɔkɔŋɔde ke Christ ke mme ebiet ukpono.

• Mme ibuot ikɔ eke mme ŋka-iferi ye mkparawa ye ikwɔ emi esede Jesus Christ, utɔ nte “I Am a Disciple of Jesus Christ” ye “Look unto Christ.”

• Nditim ntiŋ mbaŋa Usio-isop ye Ediset ke Mkpa Jesus Christ nte mme ŋkpɔ emi eyede ekan ke mbuk.

• Ndidara Easter nte usɔrɔ idighe nduɔk-odudu ikpɔŋ, ye akpan ekikere ke Jesus Christ.

• Ndimen ndi ndise emi edade efiɔk Ufɔk Abasi Jesus Christ ye se enye adade ɔnɔ.

Yak nnyin itim ise ufɔn usuk mme ŋkpɔ emi. Akpa, se idade inɔ Ufɔk Abasi.

Ke 2020, President Nelson ama emen owut obufa ndise emi adade ɔnɔ Ufɔk Abasi. Se idade inɔ emi owut ke akpanikɔ ete ke Christ edi akpan ke Ufɔk Abasi Esie ndien ke ana edi akpan ke mme uwem nnyin. Idahaemi nnyin imikut se idade inɔ emi ke mme website ye mme ŋwed Ufɔk Abasi, ke mme temple recommend, nte se iwutde ke Gospel Library app, ye ke mme idiɔŋɔ mbon ekɔŋ eke mbon Ufɔk Abasi emi edukde ekɔŋ. Mme idiɔŋɔ emi esine enyiŋ Ufɔk Abasi emi ewetde ke itiat, ŋkpɔ nditi ete ke Jesus Christ edi etubom itiat inuk, emi ewutde mi ke Cambodia ye emi odude ke mme usem 145.

Ke ufɔt se idade inɔ emi edi se idade inɔ edima itiat Albert Bertel Thorvaldsen Christus emi ebotde, emi edifiɔkde ye Ufɔk Abasi ndien odu ke ebiet mme isen owo ye ke mme isɔŋ temple ke ofuri ererimbot. Ufɔn esie ke se idade inɔ Ufɔk Abasi owut ete ke Christ ana nte odu ke ufɔt kpukpru se nnyin inamde. Ntre ŋko, mme ubɔk Andinyaŋa emi ayande owut eŋwɔŋɔ Esie ndibɔ kpukpru mbon emi edidide etiene Enye. Se idade inɔ edi se ekutde emi adade ɔnɔ ima Andinyaŋa Jesus Christ ye nditi kpukpru ini mbaŋa odu uwem Christ

Ke nkoyomde ndifiɔk, ami mobup ediwak mbon ufɔk emana mbaŋa ufɔn kiet ke idade inɔ Ufɔk Abasi emi. Ke mkpaidem, ediwak ifiɔkke ibaŋa ntɔtuŋɔ ŋkpɔ emi enye adade ɔnɔ. Jesus Christ ada ke idak itiat oro. Emi ada ɔnɔ Andinyaŋa emi esetde nte Enye ɔwɔrɔde ke udi. Nnyin ke akpanikɔ idara ediset, odu uwem Christ, kpa ke se idade inɔ Ufɔk Abasi.

Idahaemi yak nnyin ikere ibaŋa ufɔn Easter. Ke etop Akpa Presidency abaŋade Easter, edɔhɔ nnyin ete yak “idara Andiset ye odu uwem Andinyaŋa ke ndiduŋɔde mme ukpep-ŋkpɔ Esie ye ke ndinwam ndisiak edu Easter ke ofuri obio nnyin, akpan akpan ke mme ufɔk nnyin.” Ke ibibio, edɔhɔ nnyin ete yak inam edinam Easter emi okoŋde onyuŋ asanade akan.

Ami mema nkaiso ediyarade abaŋade Easter ndien esit enem mi abaŋa ediwak ukeme mbufo ndinam Easter edi edisana edinam. Ke ediande ke ndinyene sacrament meeting eke hour kiet ke Easter Sunday, mme nti uwut-ŋkpɔ efen esine mme edinam ke ward ye stake ye mme edinam ke Palm Sunday ye ke Holy Week. Mme ŋkpɔ editi emi esine mme edinam nditɔ-ɔŋwɔŋ, mkparawa iren ye iban ye ikpɔ-owo ndien ke ediwak ini esine mme ɔkwɔ-ikwɔ etode ebiet efen. Mbon efen enam edinam Odu uwem Christ enɔ mbon Ufɔk Abasi ye mme ufan ndien ebuana ke edinam esinede nsionsio Ufɔk Abasi ke mme edinam Easter.

Mme utɔ edinam oro ewut mme nsionsio owo ke Jerusalem emi mme uyo mmɔ edianade kiet nditoro Andinyaŋa ke ini idara ndiduk. Ŋko se idide akpan edi mme etop abaŋade mbufo nte enamde ikot Akpa Presidency ndikpono Abasi ke ufɔk nte mbon ufɔk emana ndidara usen nduɔk-odudu emi emi okponde akan.

Ami menim nte ke ndikpono Abasi ke ufɔk ke ini Easter emi emenede eti eti. Isua iba emi ebede, ami mma ntiŋ ikɔ mbaŋa udomo mbon ufɔk nnyin ndinam ɔfɔn nte ikponode Easter. Nte nkutde, emi edi utom emi osuk akade iso. Nnyin imisikop inem ibaŋa saŋa-saŋa udia eke Easter Sunday kpukpru ini, mme enɔ Easter ye ndibre mbre uyom nsenunen ke Eatster, ndien ke inanam. Edi, ndikokoi ndian ŋkaŋ eke spirit emi esede Jesus Christ ye Usio-isop Esie ke usɔrɔ nnyin ada ubak edi ke nditi mme edinam nnyin emi esanade ekan kpukpru mme edinam.

Isua emi edidi ɔyɔhɔ isua ita emi idomode ndinam Easter enyene Christ ke ufɔt. Nte edinam emana eke Ukabade isua, Mbre Usen Easter ke ufɔk nnyin esine mme ɔfɔŋ mbre, ndikot mme ŋwed Abasi nto Obufa Testament ye Ŋwed Mormon, ikwɔ, mme ndise Easter, mme ekpin ukɔt—ye ekpri ntime, edieke ntiŋde ofuri akpanikɔ. Nditɔ ye nditɔ-nditɔ ekotde enyuŋ efiakde etiŋ mme itoro Palm Sunday “Hosanna … Ɔfɔfɔ ɔnɔ enyemi edide ke enyiŋ Jehovah; Hosanna ke enyɔŋ” ye “Emi edi Jesus … Galilee” etie nte edi akpan nte “Emem ke isɔŋ, mfɔn enyene mme owo” edide ke ini Ukabadeisua.

Nnyin inyene nsionsio mbana ke ufɔk. Se ikidide ke ini kiet ŋkpɔ mbre nditɔ-ɔŋwɔŋ ye mbre Easter idahaemi enyene Christus ye mme ndise ukpɔk udi, Andinyaŋa emi esetde nte owutde idem ke Iŋwaŋ ke aŋwa udi, ye Andinyaŋa nte owutde mme Nephite idem. Nnyin ŋko ke idomo ndinam ini Easter edi ini usɔrɔ ukudi ikpikpu usen. Nnyin ke idomo nditim mfiɔk, nkere mbaŋa, nyuŋ ndara Palm Sunday ye Good Friday ye mme ndisana edinam emi akadade itie ke ofuri ini Holy Week.

Easter ayak nnyin ikpono usio-isop Jesus Christ ye idara Ediset ke nkpa Esie mbiba. Esit nnyin ɔfɔhɔ nte nnyin ikerede ibaŋa ufen Andinyaŋa ke Calvary, edi esit nnyin adara abaŋa nte nnyin isede ukpɔk udi ye ewuhɔ eke heaven, “Enye eset!”

Mme ikɔ ndɔŋesit eke Akpa Presidency idahaemi “ndise Easter ye Ediset ke Mkpa eke Jesus Christ—mme etop emi enɔde ubon owo emi eyede akan” ewut akpan ufɔn eke ini emi. Ke edide ete ke ekikere ke otu mme nsionsio ada usuŋ mme ebiet ukpono ndikut Ediset ke mkpa nte nke ye nte ŋkpɔ emi adade ɔnɔ ke ɔkɔri, nnyin imisɔŋɔ ukpep-ŋkpɔ nnyin ite ke “Ediset ke mkpa ɔwɔrɔ ete ke ofuri owo emi akananam edude uwem eyeset, ndien Ediset ke mkpa emi edi akpanikɔ.” “Koro nte kpukpru owo ekpade eto ke Adam, kpa ntre ke edinam kpukpru owo edu uwem eto ke Christ.” Jesus Christ ama obuŋ eduat mkpa ɔnɔ kpukpru odu uwem ukpɔŋ.

Nnyin ke akpanikɔ idu ke mkpaidem ibaŋa mfɔn emi Jesus ɔnɔde nnyin. Nnyin imidara mme ikɔ Esie ite ke “baba owo kiet inyeneke ima eke okponde akan enye emi, owo ndikpiyak uwem esie nduɔk kabaŋa mme ufan esie.”

C.S. Lewis ama ɔdɔhɔ ete “ndikwɔrɔ Anditiene Christ ɔkɔwɔrɔ [ɔnɔ mme Apostle] akpan-akpan ndikwɔrɔ Ediset ke mkpa. … Ediset ke mkpa edi akpan ibuot ikɔ ke se ofuri mbon se itienede Christ ekwɔrɔde nte ewetde ke mme Utom. Ediset ke mkpa ye mme se itienede enye, ekedi ‘gospel’ mme eti mbuk emi mme anditiene Christ ekedade edi ”

Ami mɔdɔhɔ nte ke “Ediset ke mkpa odu, …udi inyeneke erikan, Christ ama emen odudu mkpa efep.”

Ke akpatre, ami metie ntiense nte ke kpukpru mbon emi enyimede mme ikoot eto odu uwem prophet nnyin ye mme ɔnɔ item esie ete etim efɔfiɔk edara mme edisana edinam emi Easter adade ɔnɔ eyekut ete ke nsaŋa mmɔ ye Jesus Christ eyetim ɔkɔri.

Ke mme usen ifaŋ emi ebede, ami mma mkpep mbaŋa eka-eka emi ekefiakde etiŋ mbuk Easter ye eyeyen isua inan esie ke ndida mkpri ŋkpɔ emi ebietde udi, itiat emi okofukde udi, Jesus, Mary, mme mbet, ye angel. Ekpri eyen emi ese onyuŋ akpaŋutɔŋ eti eti nte eka-eka esie abuanade ikpo, ndikubi ye ndikubɔde udi, ye ebiet ke iŋwaŋ eke Ediset ke mkpa. Ndien enye ada ini afiak etiŋ mbuk oro ke usuŋ emi akpade owo idem nte enye emende mme ŋkpɔ oro odomo ye idem esie. Ke etienede edinem ini emi, ema ebup enye me enye ɔfiɔk ntak emi nnyin inyenede Easter. Eyen emi emenede iso ke enyɔŋ ndien ye ekikere ekpri eyen ɔbɔrɔ ete, “Ke ntak emi Enye odude uwem.”

Ami median ikɔ ntiense mi ye esie, ye eke mbufo, ye eke mme angel ye mme prophet, nte ke Enye eset ndien ke Enye odu uwem, emi ami ntiede ntiense ke enyiŋ Jesus Christ, amen.