“Esaŋa Ekpere Mi”

Ndima nditɔ-eka mi iren ye iban, ami mmenem esit ndidu ye mbufo ke mboho eke ufɔk Abasi Jesus Christ eke Ndisana Owow ke ukperedem Usen. Emi edi Ufɔk Abasi Esie. Nnyin idu ke mme ufɔk ye mme ebiet iduŋ ke ofuri ererimbot ke enyiŋ Esie.

Nnyin ida enyiŋ Esie idori ke idem nnyin ke ini nnyin idukde obio ubɔŋ Esie ito ediomi. Enye edi andiset ye enyene ubɔŋ Eyen Abasi. Nnyin idi mme owo emi iyɔhɔde ye idiɔk ŋkpɔ ye mkpa. Edi, ke ima Esie ɔnɔ nnyin kiet kiet, Enye okot nnyin ete idi ikpere Enye.

Emi edi ikot Esie ɔnɔde nnyin: “Sanga kpere mi ndien Ami nyesanga nkpere fi, tim yom mi ndien mbufo eyekut mi; bup, ndien mbufo eyebo; kong, ndien eyeberede usung eno mbufo.”

Mme ini edu emi nnyin ikperede Andiyaŋa Jesus Christ. Ndien edi, usuk ini ke ini mme idomo uwem nnyin, nnyin imikeme ndikop nte idiaŋade ikpɔŋ Enye inyuŋ iyom uko ite ke Enye ɔfiɔk se idude nnyin ke esit ndien ama nyin nte owo kiet kiet.

Ikot Andinyaŋa esine usuŋ ndikop uko oro. Sik kpere Enye ke nditi Enye kpukpru ini. Tim yom Enye to ndikpep ŋwed Abasi. Beŋe to akam esit nnɔ Ete ke Heaven man asaŋa ekpere Edima Eyen Esie.

Mmem-mmem usuŋ odu ndikere mbaŋa enye. Edi se afo akpanamde edieke ekpediaŋadere fi ke ekpri ini ekpɔŋ edima ufan. Afo okpoyom usuŋ nditiŋ ikɔ ye mmɔ, afo akpama etop ndomo kiet emi ɔbɔde oto mmɔ, ndien afo akpanam kpukpru se ekemede ndinwam mmɔ.

Nte emi etibede awak, ntre ke ebighi, ntre ke ima etim ɔsɔŋ, ndien afo oyokop nte mbufo esikde ekpere kiet eken. Edieke anyan ini ebede owo itiŋke ikɔ ye ufaŋ ndinwam kiet eken, ediana kiet oro eyemem.

Jesus Christ ama nnyin kiet-kiet. Enye ɔnɔ ufaŋ oro ndisaŋa mkpere Enye. Nte ye edima ufan, afo eyenam enye kpa ke ukem usuŋ oro, ke ndineme nneme ke akam nnɔ Ete ke Heaven ke enyiŋ Jesus Christ, akpaŋ utɔŋ ɔnɔ edima ndausuŋ Edisana Spirit, ndien anam ŋkpɔ ɔnɔ mbon efen ke ima. Ibighike afo oyokop edidiɔŋ eke edisaŋa mkpere Enye.

Ke ini uyen mi, ami mma nyene idaresit ke ndisaŋa mkpere Andinyaŋa ye eke Enye ndisaŋa mkpere mi, oto ke mme mkpri edinam nkopitem nnɔ ibet. Ke ini nkedide ekpri-eyen ekesinɔ sacrament ke mbono mbubreyo. Ke nsuk nteti saŋa-saŋa okoneyo kiet, ke awakde akan isua 75 emi ebede, ke ini ekedide ekim ye mbitmbit ke aŋwa. Ami meti nte nkopde uŋwana ye ufiop ke chapel nte nkɔfiɔkde nte ke menim mbet ndiboho ye mbon Ufɔk Abasi ndidia sacrament, ndinam ediomi ye Ete nnyin ke Heaven nditi Eyen Esie kpukpru ini ye ndinim ibet Esie.

Ke utit esop oro nnyin ima ikwɔ “Di daŋ ye Ami; ’Tutu Mbubreyo,” ye mme ikɔ emi ke esit ikwɔ oro, “O Andinyaŋa, du ke okoneyo emi ye ami.”

Mme ikɔ emi eda akamba ntuk Spirit esɔk mi, kpa nte ekpri eyen. Ami mma nkop ima Andinyaŋa ye nte ekperede mi ke mbubreyo oro oto ke ndɔŋ-esit eke Edisana Spirit.

Ke ediwak isua ema ekebe, ami mma nyom ndidemede mme ukem ifiɔk ima Andinyaŋa oro ye edikpere emi ami ŋkokopde mbaŋa Enye ke ini sacrament oro ke uyen mi. Ke ntre ami mma nnim mbet efen: ami mma nduŋɔde mme ŋwed Abasi.

Ke ŋwed Luke, ami mokot mbaŋa ɔyɔhɔ usen ita ke mkpa ye ikpo Esie ama ekekure, ke ini mme nti isuŋ-utom ekedide, oto ke ima enyenede enɔ Andiyaŋa, ndiyet Enye aran ke idem. Ke ini mmɔ ekesimde, mmɔ ema ekut ke ema ewere itiat efep ke udi ndien ekut ete ke idem Esie ikiduhe do.

Mme angel iba eda ekpere enyuŋ ebup ntak emi idem enyeŋde mmɔ:

”Nsinam mbufo eyomde Enye emi odude uwem ke otu mme akpa-mkpa?

”Enye iduhe mi, Enye emeset: eti nte Enye eketiŋde ɔnɔ mbufo ke ini Enye okodude kaŋa ke Galilee,

”Ete, eyeda Eyen Owo esin mme idiok owo ke ubok, eyenyung ewot Enye ke Cross, ndien ke oyoho usen ita enye eyetɔŋɔ ntak eset.”

Ke mbubreyo oro, mme mbet iba esaŋa eto Jerusalem ke usuŋ eka Emmaus, ndien Jehovah emi ekesetde owut mmɔ idem onyuŋ asaŋa ye mmɔ.

Ŋwed Luke ayak nnyin isaŋa ye mmɔ mbubreyo oro:

”Ndien edikem, nte, ke ini mmɔ enemede nneme kiet enyuŋ ekɔkde ibuot, Jesus ke idem Esie asanga ekpere, onyung asanga ye mmɔ.

”Edi ebɔp mmɔ enyin ete mmɔ ekudiɔŋɔ enye.

”Ndien Enye ɔdɔhɔ mmɔ ete, Nso utɔ nneme ke eneme ye kiet eken, nte mbufo esaŋade, ndien efuhɔ?

”Edi owo mmɔ kiet, emi enyiŋ esie ekedide Cleopas, ke ɔbɔrɔde ɔdɔhɔ enye ete, Nte afo ikpɔŋ edi esen owo ke Jeusalem, ndien ufiɔkke se itibede do ke mme usen ifaŋ emi?”

Mmɔ edɔhɔ Enye ebaŋa mfuhɔ mmɔ ete ke Jesus ama akpa ke ini mmɔ ekedoride enyin ete ke Enye edidi Andifak Isreal.

Ekeme ndidi ke mbɔm ama odu ke uyo Christ emi ekesetde nte Enye eketiŋe ikɔ ɔnɔ mme mfuhɔ ye ukut mbet iba emi.

Nte ami nkade iso ndikot, mme ikɔ emi enamde esit mi enem edi, kpa nte ŋkɔfiɔkde ke ini ŋkedide ekpri eyen:

”Edi mmo esanga ekpere obio-inwang, emi ekade do: ndien Enye anam nte nkpo eke Enye oyomde ndibe nka iso.

”Edi mmɔ ekpan Enye, ete, Daŋ ye nnyin: koro ke ekpere mbubreyo, ndien eyo ɔmɔŋ okut. Ndien Enye oduk akadaŋ ye mmɔ.”

Andinyaŋa ama enyime okoneyo oro ikot ndiduk ufɔk mme mbet Esie. Enye ama etie ke itie udia ye mmɔ. Enye emen uyo, ɔdiɔŋ enye, obuŋ enye, onyuŋ ɔnɔ mmɔ. Enyin mmɔ etara, ndien mmɔ efiɔk Enye. Ndien Enye osop mmɔ ke enyin.

Luke ewet ɔnɔ nnyin mme ekikere mme mbet oro: “Ndien mmɔ edɔhɔ kiet eken ete, Ndi esit nnyin ikofiopke nnyin, ke ini enye ekenemede nneme ye nnyin ke usuŋ, ye ke ini enye okokotde mme ŋwed Abasi ɔnɔ nnyin?”

Mme mbet iba oro esɔp efiak enyɔŋ Jerusalem ndikidɔhɔ mme Apostle duopekiet se ikitibede. Nte mmɔ eketiŋde ebaŋa ifiɔk mmɔ, Andinyaŋa afiak owut idem.

Enye ada ke otu mmɔ onyuŋ “ɔdɔhɔ mmɔ ete, Emem odu ye mbufo.” Enye afiak etiŋ mme prophecy utom Esie ndisio isop ke mme idiɔk ŋkpɔ eke kpukpru mme nditɔ Ete Esie ye ndibuŋ mme eduat mkpa.

”Ndien Enye ɔdɔhɔ mmɔ ete, Ntem ke ekewet, ete Christ enyene ndikpa, ye ndiset ke mkpa ke ɔyɔhɔ usen ita:

”Ndien ke ana nte ekwɔrɔ erikabare esit ye edifen nnɔ ke mme idiɔk ŋkpɔ ke enyiŋ esie ke otu ofuri idut, ɔtɔŋɔde ke Jerusalem.

”Neien mbufo edi mme ntiense ke mme ŋkpɔ emi.”

Kpa nte mme edima mbet Esie, kpukpru eyen eke Ete ke Heaven emi emekde ndiduk ke inua otop uduɔk-mmɔŋ odu ke idak ediomi ndidi ntiense Andinyaŋa ye ndikpeme mbon unana ke ofuri eyo uwem mkpa nnyin. Ema enam eŋwɔŋɔ emi aŋwaŋa nnyin oto prophet eke Ŋwed Mormon Alma ke mme ediwak isua emi ebede ke mme Mmɔŋ Mormon:

“Nte mbufo enyenede udɔŋ ndididuk ke ubon Abasi, man ekot mbufo ikɔt esie, enyuŋ enyenede udɔŋ ndiyɔ mme mbiomo kiet eken, man mmɔ efere;

”Iŋ, enyuŋ enyimede nditua ye mbon emi etuade; iŋ, nyuŋ ndɔŋ mbon emi eyomde idɔŋesit esit, enyuŋ edade nte mme ntiense enɔ Abasi ke kpukpru ini ye ke kpukpru ŋkpɔ, ye ke kpukpru ebiet … tutu osim mkpa, man Abasi afak mbufo osio, ndien … man mbufo enyene nsinsi uwem.”

Nte mbufo enamde akpanikɔ enɔ mme eŋwɔŋɔ emi, mbufo eyekut ete ke Jehovah enim eŋwɔŋɔ esie ndidi kiet ye mbufo ke utom mbufo, ndinam mme mbimo mbufo efere. Mbufo eyedifiɔk Enye, ndien ke ini ekemde mbufo eyeditie nte Enye enyuŋ “efɔn ema ke enye.” Ke ndiŋwam mbon efen, mbufo eyekut ete ke mbufo ke esik ekpere Enye.

Ediwak mbufo emenyene mbio emi emade emi ewɔrɔde ekpɔŋ usuŋ emi adade aka nsinsi uwem. Akpa fi idem se ekpekemede ndinam man ada mmɔ afiak edi. Mbufo emekeme ndiberedem ke Jehovah man ada mbufo ekpere mmɔ nte mbufo anamde utom enɔ Enye ke mbuɔtidem.

Mbufo emeti eŋwɔŋɔ emi Jehovah ɔkɔŋwɔŋɔde ɔnɔ Joseph Simth and Sidney Rigdon kini mmɔ ekekpɔŋde mbio ufɔk iduŋ mmɔ eka utom Esie: “Mme ufan mi Sidney ye Joseph, idem ɔsɔŋ mbio ufɔk mbufo; mmɔ edu ke eka ubɔk mi, ndien Ami nyenam se mmade ye mmɔ; koro Ami mmenyene ofuri odudu.”

Nte mbufo ebɔpde mme unana mbon unana, odudu Jehovah oyodu ye mbufo. Ubɔk Esie eyeyanade ye eke mbufo ndibɔk nyuŋ ndiɔŋ nditɔ eke Ete nnyin ke Heaven.

Kpukpru isuŋ-utom ediomi eke Jesus Christ eyebɔ ndausuŋ Esie nte mmɔ ediɔŋde enyuŋ enamde utom enɔ mbon efen. Ndien mmɔ eyekop ima Esie enyuŋ enyene idara ke nidsaŋa mkpere Enye.

Ami ndi ntiense kabaŋa Ediset ke mkpa Jehovah ke akpanikɔ nte ke ami nkodu do kpa ke mbubreyo oro ye mme mbet iba oro ke ufɔk ke usuŋ Emmaus. Ami mɔfiɔk nte ke Enye odu uwem.

Emi edi Ufɔk Abasi akpanikɔ Esie—Ufɔk Abasi Jesus Christ. Nnyin, ke Usen Ikpe, iyida ke iso Andinyaŋa, iso ye iso. Edidi ini akwa idara inɔ mbon emi, ke uwem emi, emi esaŋade ekpere Enye ke utom Esie ndien etim ebet ndikop mme ikɔ emi: “Amanam, afo eti ye ɔbuɔtidem eyen utom.”

Ami metie ntiense nte ntiense eke Andinyaŋa ye Andifak nnyin emi esetde, ke enyiŋ Jesus Christ, amen.