Ŋkabare-esit Fo Ifinake Jesus Christ; Oro Ɔnɔ Enye Idaraesit

Ke ediwak isua emi ebede nte ŋkade isaŋ ke Florida, ami ŋketie ke aŋwa ŋkot ŋwed kiet. Ibuot ikɔ esie etiŋ ete ke nyin imikeme ndika heaven, okposukedi nyin mmifɔnke-ima idahaemi. Eyenaŋwan kiet asaŋa ebe onyŋ obup ete, “Ndi afo emekere ke oro ekeme nditibe?”

Ami mma menede iso, ndutin, ndien ekem ami ndifiɔk ke enye etiŋ abaŋa ŋwed eke ami ŋkotde. Ami mma ntiŋ ikɔ nsahi nte, “Ɔfɔn, ami ŋkotke enye nka anyan, edi nyenam fi ɔfiɔk nte enye editrede.”

Oh, didie ke ami ŋkere nte mkpefiakde ŋka isaŋ eke ini edem! Ami mkpedɔhɔ enye nte, “Iŋ, oro ekeme nditibe ntre! Koro heaven inaha inɔ mbon efɔnde-ema; enye ana ɔnɔ mbon emi ema ekefen enɔ, emi emekde Christ enyuŋ efiak emek Enye.”

Mfin ami nyom nditiŋ ikɔ nnɔ nyin emi ndusuk ini ikerede ite ke “Etie nte ŋkabare-esit ye edifen-nnɔ edi se kpukpru mbon efen enamde ekut unen kesioho mi efep.” Mbon emi ekereke ke ndidibe ete, “Sia ami nsuk ŋkade-iso ndinam ukem ndudue, ekeme ndidi nte ami ntiede edi emi.” Mbon, etiede ukem nte ami, enyene usen emi usuŋ ediomi etiede ebedeŋ-ebedeŋ, oro editie nte ediomi anyan usuŋ isaŋ!

Eti ɔkwɔrɔ-ikɔ-Abasi kiet ke Australia, Elder QaQa otode Fiji, ama abuana ukem ekikere emi ke ikɔ-ntiense unyɔŋ esie ete: “Ami mmɔfiɔk ke Abasi ama mi, edi ndusuk ini ami ndikere, Ndi Abasi ɔfiɔk ete ke ami mmema Enye? Koro ami mme-mfɔnke-ma, nyuŋ nsuk nnanam ndudue.”

Ke ndimem, nduŋɔre mbume kiet oro, Elder QaQa ama etiŋ ibio-ibio se isifinade mi ke ediwak ini. Ekeme ndidi esifina fi, ndikere ete, “Ami ke ndodomo ukeme eti eti, edi ndi Abasi ɔdiɔŋɔ mme ami mmenehede ndomo ukeme? Kini ami ŋkade-iso ndinam ndudue, ndi Abasi ɔfiɔk ke ami nsuk mmama Enye?”

Edi ŋkpɔ mfuhɔ ɔnɔ mi ndinyime emi, edi ami mmasidomo ebuana mi ye Andinyaŋa ke nte ndude mfɔn-ma uwem. Ami ŋkekere ke uwem ŋkopitem ɔwɔrɔ ke ami ndiyomke ŋkabare-esit aba. Ndien kini ami nnamde ndudue, emi ekesitibide kpukpru usen, ami nyesik mkpɔŋ Abasi, nyuŋ ŋkere nte, “Enye enehede ɔbɔ esuene kabaŋa mi.”

Oro idihe akpanikɔ.

Ami mma mkpep nte edieke afo ebetde tutu afo otim asana mme ɔfɔn-ama mbemiso afo ebine Andinyaŋa, ndien afo emenana ofuri ndaha!

Nso edieke nnyin ikerede ibaŋa ibet ye ŋkopitem ke isio-isio usuŋ?

Ami ntiŋ ikɔ-ntiense nte okposukedi Abasi ekerede abaŋa mme ndudue nnyin, Enye enehede ekere abaŋa se itibede kini nnyin ima ikinam ndudue. Ndi nnyin iyefiak iyɔŋ ibine Enye? Ndi nyin iyedu ke ebuana ediomi emi?

Ekeme ndidi afo omokop ikɔ Jehovah ete, “Edieke [afo] amade mi, nim mbet mi” ndien ekere ke emeduɔ koro afo mukemeke ndinim ofuri ibet. Yak ami nti fi ete ke ndikabade-esit edi ibet ŋko! Ke akpanikɔ, ekeme ndidi oro edi mbet emi etiŋde awak akan ibet efen ke ŋwed Abasi.

Ke ikɔ emi Alma eketiŋde ɔnɔ idemesie, “O nte Ami mkpedide angel, mkpoyuŋ ŋkemede ndinam kpukpru uduak esit [mi] … nyuŋ ŋkwɔrɔ erikabare-esit,” enye ikiŋwanake edisuene nyin ke ndiwut nyin mme ndudue nyin. Enye okoyom ndifiori ŋkabare-esit man afo ye ami ikpekeme ndibɔhɔ ufen ke ererimbot.. Kiet ke otu ntak emi Alma ekesuade idiɔknkpɔ ekedi koro enye esidade ufen edi

Ndusuk ini ami nditi, nte Ŋwed ŋwetde ndian ke ɔkpɔiso mi, nte ke mbet edi usuŋ emi adade ɔkpɔŋ ubiak. Ndien ŋkabare-esit edi ntre. Prophet nyin ɔdɔhɔ ete, “Andinyaŋa ama nyin kpukpru ini edi akpan-akpan ke ini nnyin ikabarede esit.”

Ke ntre kini Jehovah ɔdɔhɔde ete “Mbufo ekabare-esit, mbufo ekabare-esit,” nso edieke afo ekpekerede nte Enye ɔdɔhɔde ete, “Ami mmema fi. Ami mmema fi.” Kut Enye ekpede fi ubɔk ete ɔkpɔŋ mme ido emi ɔnɔde fi ubiak, okotde fi ete ɔwɔro ke ekim ediduk uŋwana Esie.

Ke ward eke eyenaŋwan mi Carly, obufa oku kiet ɔtɔŋɔ-edɔŋ ndidiɔŋ udia-ɔbɔŋ, ndien utu ke enye ɔkpɔdɔhɔde ete, “Man mmɔ enam oro ke nditi iyip Eyen fo,” enye ke ndudue ɔdɔhɔ ete, “Man mmɔ enam oro ke nditi ima Eyen fo.” Mmɔŋeyet ama ɔyɔhɔ enyin Carly nte mme ikɔ akpanikɔ oro okodukde enye idem.

Andinyaŋa nyin ama onyime ndibɔ ubiak Erisio-isop Esie koro Enye amade fi. Ke akpanikɔ, afo edi “idaresit emi ekenimde enye ke iso” kini Enye ɔkɔbɔde ufen.

Ikoot ndikabare esit edi usuŋ ediwut ima Abasi.

Ndinyime ikoot oro edi usuŋ ediwut ima nyin.

Kere baŋa ndise Christ emi afo otimde ama. Idahaemi kere nte Enye asakde imam ye idaresit kpukpru ini emi afo adade enɔ Esie anam ŋkpɔ, koro Enye edi “mfɔn-ma uŋwana idorenyin.”

Iŋ, ŋkabare-esit fo ifinake Jesus Christ; oro ɔnɔ Enye idaresit!

Yak nyin ikpep oro!

Koro ŋkabare-esit edi mfɔn-ŋkan etop nyin!

Nyin iduhe ke usuŋ ediomi ke unana edinam ndudue. Nyin idu ke usuŋ ediomi ke ndikabare esit kpukpru usen.

Ndien kini nyin ikabarede esit, Abasi efen ke mmisinke nyin ke esuene, idaha nyin idomo ye owo efen ekededi, mme ndiduat nyin koro emi edide ukem ŋkpɔ emi nyin ikikabarede esit ibaŋa udua oro ebede.

Enye okop inemesit kpukpru ini emi Enye okutde nyin ke edɔŋ nnyin. Enye enemesit ndifen-nnɔ nyin koro nyin idi ŋkpɔ inemesit inɔ Enye!

Ndi afo usukopke ke oro edi akpanikɔ?

Ndien nso idi ntak oro ɔsɔŋde ɔnɔ nnyin ndinim ke akpanikɔ?!

Satan, akwa andidori-ikɔ ye andibiaŋa, ada esuene emen nyin ɔkpɔŋ Abasi. Buut edi akwa ekim otimde odobi emi ekerede ete edieke afo osiode enye efep ke idem fo, ke eyenyene ata udobi.

Buut edi uyo emi amiade fi, onyuŋ ɔdɔhɔ ete, “Nso ke afo ekekere?” Akananam ndi afo amanam ŋkpɔ se idide eti?”

Buut idɔhɔke nyin ete ke nyin iminam ndudue; enye ɔdɔhɔ nyin ete ke nnyin idi ndudue nyin. Afo omoyuŋ ekeme ndikop “Dibe.” Andidiɔk anam kpukpru ukeme esie ndinim udobi oro ke esit, ɔdɔhɔde nyin ete ke ekom urua oro okpon eti eti, ete ke ekpedi mmem-mmem edieke emi odude ke ekim, osiode kpukpru idorenyin.

Satan edi inɔ idorenyin.

Ndien afo enyene ndikop emi, ke ntre ami nyetiŋ mme ikɔ emi ke nsɔŋ-uyo: Afo udihe uyo emi odude ke ibuot fo mme ndudue emi afo akanamde. Ekeme ndidi afo enyene nditiŋ oro ke nsɔŋ-uyo ŋko. Dɔhɔ Satan ete, “Idige mfin emi.” Sio enye ke usuŋ fo fep.

Kop nduri oro, mfuhɔ eti esit emi ɔwɔŋɔre fi ebine Andinyaŋa fo, yuŋ se nte mfɔn Esie odukde uwem fo ye uwem mbon emi afo amade. Ami mmewɔŋɔ nte kini nnyin idade mbuŋɔ esit ibine Enye ke uko, Enye odu do ke ndo-ndo oro.

Edieke afo okutde owo emi mmɔŋ emende, ndi afo ukpuyanke ubɔk fo ndinyaŋa mmɔ? Ndi afo emekeme ndikere nte Andinyaŋa fo esinde edinyanade ubɔk fo? Ami ŋkere nte Enye ɔfrɔde oduk mmɔŋ, onyuŋ osuhɔre akan kpukpru ŋkpɔ man emenere nyin ke enyɔŋ man nyin ikeme ndiŋwek obufa ibifik! Iduhe owo ndomokiet emi ekemede ndiduɔ mkpɔŋ uŋwana Christ.

Andinyaŋa ke nsinsi ayama akan ekim esuene. Enye ke nsinsi iditɔk-ke ekɔm-urua fo. Ke ntre Tim se.

• Kere ete ke ubɔk emi ada ɔnɔ ekom urua.

• Ubɔk emi ada ɔnɔ ŋkopitem. Ekeme ndidi afo ama edemere idap usenubɔk emi, ɔbɔŋ-akam ke ofuri esit, onyuŋ ɔduŋore ŋwed Abasi man okop uyo Abasi. Afo emenam nti ubiere ke onyuŋ ɔfɔn ido ye mbon efen emi edude ekpere fi ukem nte Christ ekpenamde. Amakpaŋ-utɔŋ ɔnɔ akwa mbono! Ŋkopitem fo odu mi!

• Mme ekeme ndidi ŋkpɔ isaŋake mfɔn-mfɔn. Afo omodomo ukeme mmi-mm-emi ndinam mkpri, ndimem ŋkpɔ emi ndidiana ye heaven. Afo emenam ndusuk ubiere emi afo munemke esit ubaŋa.

• Ekɔm-urua fo odu mmɔŋ? Ndi akananam ubɔk emi esik?

Ekɔm-urua fo iyirike ke ŋkopitem. Ekɔm-urua fo ada ɔtɔkiet; enye ikpuhɔkede. Edi Abasi ɔkɔnɔ fi, ndien iduhe ŋkpɔ ndomokiet emi afo mme owo ekededi edinamde ndikpuhɔde oro. Ŋkopitem ada edidiɔŋ edi; oro edi akpanikɔ. Edi ekɔm-urua idihe kiet ke otu mmɔ. Ekɔm-urua osuk “okpokpon kpukpru ini ke iso Abasi,” isehe ebiet emi ubiere fo adade fi aka.

Kini ami nnamde ndudue, ami nyom ndidu ke ebuana ediomi ye Christ, ndien nyedɔhɔ fi ntak.

Nte ami ŋkɔride ami mma mbɔ ukpep mbaŋa enim nyuŋ mfiɔk nte kini mme ekpe-ikpe enɔde ibɔrɔ, mmɔ eyese nte ekenamde. Ndi usuŋ ediduk ama otim ɔfɔn, ye nnuenukot ayande ndien mmɔŋ atiam esisit? Ndien mmɔ enam utibede ɔŋkpɔ efen. Mmɔ esin adaŋa nte enye ɔsɔŋde.

Kpukpru owo enim enim ye adaŋa nte ɔsɔŋde ye mmɔ. Ndien Andinyaŋa fo edi ŋkokure owo emi otimde ɔfiɔk nte enim fo ɔsɔŋde. Ami nyom ebuana ye owo kiet emi akamade mi, emi ɔfiɔkde esit mi ye akwa ukeme emi ami ŋwanade ndinam1

Enye ɔfiɔk ete ke mbufuk ekim ke osuhɔre ofuk nyin kpukpru mme aka-isaŋ, ndien ke isaŋ nyin ebe ke ndedehe mmɔŋ—ke ntre okposukedi kini nyin imumde esaŋ ukwak ikama, enye eyetiam nyin.

Ndidi mbine Christ edi ndidɔhɔ ete, “Ndi afo eyeŋwam mi, ye idorenyin, ɔsɔŋɔ otode eriyarare ete ke ubɔk Esie anyanade ɔnɔ fi ke ofuri ini. Ami mmenin obufa usuŋ ndikut ŋkabare-esit emi ɔwɔrɔ ete okposuk edi nyin mmiyeneke mfɔn-ma ŋkopitem idahaemi, edi, nyin idomo ndinam ima ŋkopitem idahaemi, imek ndidu, ndien ifiak imek, koro nyin imade Enye.

Ti mbon Edidem Benjamin emi mmikiyeneke udɔŋ aba ndinam idiɔkŋkpɔ edi udɔŋ ndika iso nnam eti? Ndi afo ekere ke mmɔ ema etaŋ atayat mmɔ, enyɔŋ ufɔk, ndien owo inyuŋ inamke ndudue aba ke nsinsi? Iŋ-iŋ ikidige ntre1 Ukpuhɔre edi ke mmɔ ikiyomke aba ndinam idiɔkŋkpɔ. Mmɔ ema enyene ima ŋkopitem. Esit mmɔ ama ɔwɔŋɔre afiak ɔwɔŋɔre ebine Abasi kini mmɔ esuk eŋwanade ukeme!

Inikiet, ke mben inyaŋ, mi mma ŋkut nte inuen kiet efede oduk ofum, ke amia mba esie ke ata odudu, edi osuk ododu ke ebiet kiet. Ndien ami mma ŋkut inuen efen, ke ata enyɔŋ. Enye ama efe ɔdɔk enyɔŋ onyuŋ ɔfiɔrɔ mfɔn-mfɔn, ofum ikifinake enye. Oro edi ukpuhɔre ke nyin ndiŋwana ke idem nyin ye nyin ndiwɔŋɔre mbine Andinyaŋa, iyak Enye emenede nyin ke enyɔŋ, ye “edikɔk ke mba Esie.”

Nte mme adaibuot ke mission ke Australia, ke akpatre edikise nyin ye mme ɔkɔwrɔ-ikɔ -Abasi kiet kiet, nyin ima-itiŋ ikɔ ibaŋa 3 Nephi 17, emi otu owo emi ekedade ekpere Andinyaŋa ekemede edikop nte Enye ɔbɔŋde-akam ɔnɔ mmɔ. Nyin idibup ete, “Edieke afo okpokopde nte Andinyaŋa ɔbɔŋde akam ɔnɔ fi, nso ke afo ekere ke Enye ekpetiŋ?”

Ndikop mme ibɔrɔ mmɔ ekedi kiet ke otu ata uyɔhɔ ifiɔk-ukpep Spirit eke uwem mi. Kpukpru mme ɔkwɔrɔ-ikɔ-Abasi oro kiet kiet eyedop, ndien mmɔŋeyet eyeyɔhɔ enyin mmɔ nte nyin itide mmɔ ite, “Andinyaŋa fo ɔfiɔk adaŋa ukut emi afo enyenede. Enye ama okop oro!”

Emi edi se mme ɔkwɔrɔ-ikɔ-Abasi oro suŋ-suŋ ye nsuhɔre-esit ekebuanade ete: Eyeneka anwan ete “Jesus ekpedɔhɔ Ete, ‘Enye ke anam ata ukeme esie. Ami mmɔfiɔk nte enye esinde ifik ndinam.’” Ebio-owo kiet ɔdɔhɔ ete, “Ye kpukpru se itibede ke uwem esie, ami mmenem esit ye enye.”

Yak nyin idomo ndinam emi. Okoneyo emi, mbemiso afo ɔbɔŋ akam, kere nte Jesus Christ adade ekpere fi. Enye edi Etie-ubiɔŋ fo ye Ete. Bup idem fo ete, “Nso-ŋkpɔ ke Andinyaŋa mi ekpetiŋ ɔnɔ Ete abaŋa mi?”

Ndien du ke ndopuyo.

Kpaŋ utɔŋ nɔ uyo emi etiŋde nti ŋkpɔ abaŋa fi—uyo Andinyaŋa, akpan ufan fo, ye Ete Heaven fo, emi enehede odu do. Ti, ke ima Mmɔ ye ekɔm-urua fo edi akamba kpukpru ini, ibeheke se itibede!

Ami nda mi nditie ntiense nte ke Jesus Christ ɔnɔ uŋwana esɔk mbon edude ke ekim. Ke ntre, ke mme usen oro afo okopde uyo emi ɔdɔhɔde fi ete edibe, ete yak afo edibe ke ŋkim-ŋkim ubet ke idem fo ikpɔŋ, ami ŋkot fi ndinyene uko onyuŋ enim Jesus Christ ke akpanikɔ! Saŋa ka yuŋ domo Ikaŋ oro—mfɔn-ma Uŋwana Idorenyin Nnyin.

Ke odude ke uŋwana Esie, afo eyekut kpukpru owo emi edude ekpere fi emi ekopde ndobo-ikpɔŋ ŋko, edi idahaemi, koro uŋwana ayamade, afo ye mmɔ eyetiŋ ke mkpaidem ete, “Ntak emi nyin ikikopde ndik ke ekim ntre? Ndien ntak nyin ikidude do ibighi ntem?”

“ Yak Ɔbɔŋ Uŋwana ekpekam awaŋ fi ubɔk Esie onyuŋ ɔdɔŋ fi esit onyuŋ akaiso ama fi.” Yak nyin ika iso ndima Enye imek Enye inyuŋ itɔŋɔ ntak imek Enye. Ke enyiŋ Jesus Christ, amen.