Damgo ni Desideria

Gigiyahan sa Ginoo didto sa Mexico

Si Desideria Yáñez mipuyo sa Nopala, Mexico. Usa ka gabii, si Desideria nagdamgo bahin sa usa ka gamay nga libro nga gihimo sa Siyudad sa Mexico. Kini gitawag og Voz de amonestación, o Tingog sa Pasidaan. Sa pagmata ni Desideria, nasayod siya nga kinahanglan niyang pangitaon kana nga libro.

Mga Santos, 2:602

Si Desideria nga nagsugilon sa iyang anak nga lalaki mahitungod sa damgo.

Apan ang Siyudad sa Mexico layo kaayo, ug si Desideria tigulang na kaayo nga mobiyahe og ingon ka taas nga biyahe. Mibati siya nga ang Ginoo gusto nga ang libro iyang makaplagan. Mao nga gisultihan niya ang iyang anak nga lalaki, si José, mahitungod sa damgo. Siya mituo usab nga ang libro importante. Siya miingon sa iyang inahan nga iya kining pangitaon alang kaniya.

Mga Santos, 2:595

Si José nga miabot sa Siyudad sa Mexico.

Dihang si José miabot sa Siyudad sa Mexico, ang kadalanan bisi, saba, ug daghan kaayong mga tawo. Unsaon niya sa pagkaplag sa libro sa ingon ana ka nagkaguliyang nga dapit?

Mga Santos, 2:595

Si José nga nakighimamat ni James Stewart.

Human sa pipila ka adlaw, nahimamat ni José ang usa ka misyonaryo nga ginganlan og James Stewart. Si James miingon nga nagtrabaho siya sa pag-imprinta og libro nga gitawag og Voz de amonestación.

Mga Santos, 2:595

Si James nga naghisgot mahitungod sa Basahon ni Mormon.

Si José mahinamon kaayo! Gisultihan niya si James mahitungod sa damgo sa iyang inahan. Si James mipasabot nga ang mga misyonaryo mogamit sa Voz de amonestación sa pagtudlo sa mga tawo mahitungod ni Jesukristo ug sa bag-ong basahon sa kasulatan, ang Basahon ni Mormon.

Mga Santos, 2:595

Si James nga naghatag og mga libro ngadto ni José aron sa pagtabang kaniya nga makat-on mahitungod sa ebanghelyo.

Ang Voz de amonestación wala pa mahuman, ug ang Basahon ni Mormon wala pa mahubad ngadto sa Español. Apan si James mihatag kang José og laing mga libro ug mga papel aron sa pagtabang kaniya ug sa iyang inahan nga makat-on mahitungod ni Jesukristo, sa Basahon ni Mormon, ug sa gipahiuli nga Simbahan.

Doktrina ug mga Pakigsaad 90:11; Mga Santos, 2:595

Si José ug ang iyang inahan nga magkauban nga nagkat-on mahitungod sa ebanghelyo.

Nagdali nga mipauli si José sa iyang inahan. Dungan sila nga nagtuon sa ebanghelyo, ug nahibalo sila nga kini tinuod. Si Desideria mihangyo og mga misyonaryo nga moadto ug mobunyag kaniya.

Mga Santos, 2:595

Si Desideria, José, ug ang anak nga babaye ni José nga si Carmen nga gibunyagan.

Si Desideria maoy usa sa unang mga babaye nga nabunyagan sa Mexico. Si José ug ang iyang anak nga babaye nabunyagan usab.

Mga Santos, 2:595

Si Desideria nga nakadawat og kopya sa Basahon ni Mormon.

Sa dihang ang Voz de amonestación nahuman na, si José nakakuha og 10 ka kopya alang sa iyang inahan aron mopakigbahin sa uban sa Nopala. Mga tuig ang milabay, sa dihang ang Basahon ni Mormon sa kataposan naimprinta sa Español, si Desideria mao ang unang tawo sa Mexico nga nakadawat og kopya. Nasayod siya nga ang Ginoo migiya kaniya ngadto sa Iyang gipahiuli nga Simbahan.

Doktrina ug mga Pakigsaad 88:815; Mga Santos, 2:596