Si Joseph ug Sidney Giatake

Ang masuk-anon nga mga tawo misulay sa paghunong sa buhat sa propeta sa Dios

Ang masuk-anon nga mga lalaki nag-istorya duol sa siga sa kalayo.

Pipila sa mga tawo ganahan sa unsay gitudlo ni Joseph Smith mahitungod sa Langitnong Amahan, ni Jesukristo, ug sa langit. Apan ang ubang tawo wala makagusto sa iyang gitudlo. Pipila kanila nasuko ug gustong mopugong ni Joseph sa pagtudlo.

Doktrina ug mga Pakigsaad 76; Mga Santos, 1:170–71

Si Emma ug Joseph Smith nag-atiman sa ilang nasakit nga masuso.

Usa ka gabii, si Joseph nagpulaw nga mitabang ni Emma sa pag-atiman sa usa sa ilang sinagop nga kaluha nga masuso. Ang masuso grabe nga nasakit.

Mga Santos, 1:171

Si Emma nga nag-atiman sa mga bata samtang natulog si Joseph.

Gikuha ni Emma ang masuso ug gisultihan si Joseph nga mopahulay. Magsangyaw pa siya inigka buntag. Sa kataposan, si Joseph ug Emma nakatulog.

Mga Santos, 1:171

Ang mga lalaki nga miguyod ni Joseph pagawas sa balay.

Kalit lang, miabli ang pultahan, ug usa ka grupo sa masuk-anong mga lalaki midagan padulong sa lawak. Misyagit si Emma samtang gigunitan sa mga lalaki si Joseph sa mga bukton, mga tiil, ug sa buhok. Giguyod nila siya pagawas sa balay.

Mga Santos, 1:171–72

Ang mga lalaki naggunit ni Joseph samtang si Sidney Rigdon nagbuy-od sa yuta.

Misulay si Joseph sa paglingkawas sa kalalakin-an, apan hugot nila siyang gigunitan. Nakita ni Joseph nga ang mga lalaki miguyod usab sa iyang higala nga si Sidney Rigdon gikan sa iyang panimalay.

Mga Santos, 1:172

Mga lalaki nga nagbu-bo ni Joseph ug alkitran ug mga balahibo.

Ang mga lalaki migisi sa mga sapot ni Joseph ug mibu-bo og init, pilit nga alkitran sa iyang tibuok panit ug buhok. Dayon gitabonan siya og mga balahibo ug midagan palayo.

Mga Santos, 1:173

Si Emma ug iyang mga higala nag-atiman ni Joseph ug Sidney.

Human mibiya ang mga lalaki, si Joseph nagdali pagbalik sa balay. Nahadlok si Emma dihang nakita niya si Joseph. Ang mga higala nga nagpuyo sa duol nakadungog sa nahitabo ug dali nga miadto aron motabang. Gikagis ni Emma ang alkitran gikan sa panit ni Joseph. Sa tibuok gabii, si Emma ug iyang mga higala mitabang sa pag-atiman ni Joseph ug Sidney.

Doktrina ug mga Pakigsaad 25:5; Mga Santos, 1:174

Si Joseph nagsangyaw sa usa ka grupo sa mga Santos.

Pagkasunod adlaw, si Joseph gisakitan gihapon kaayo. Apan kinahanglan niyang mag-ilis ug motudlo sa usa ka grupo sa mga tawo mahitungod ni Jesukristo. Pipila sa mga lalaki nga miatake niya naminaw niya nga nagtudlo. Sa ulahi nianang adlawa, si Joseph mibunyag og tulo ka tawo. Padayon siyang mihimo sa buluhaton sa Ginoo, bisan kon ang mga tawo mosulay sa pagpahunong kaniya.

Doktrina ug mga Pakigsaad 24:8; Mga Santos, 1:174