Pagpundok didto sa Ohio

Sa Ohio, nagkadaghan ang mga tawo nga mipasakop sa Simbahan. Ang Ginoo misulti ni Joseph Smith nga ang mga Santos nga nagpuyo sa ubang mga dapit kinahanglang magpundok sa Ohio. Kini usa ka taas nga biyahe. Apan ang Ginoo misaad nga human sa ilang pagpundok, Iyang tudloan ang mga Santos sa Iyang balaod ug panalanginan sila uban ang gahom aron mohimo sa Iyang buluhaton.

Doktrina ug mga Pakigsaad 37; 38:32; Mga Santos, 1:124–25

Ang inahan ni Joseph, si Lucy, ug usa ka grupo sa mga 80 ka miyembro sa Simbahan mibiya sa ilang mga panimalay sa New York ug mibalhin ngadto sa Ohio. Misakay sila og barko nga modala nila sa parte sa agian. Human sila makabiyahe og pipila ka adlaw, ang barko kinahanglang mohunong. Ang baga nga ice sa tubig nakababag sa ilang agianan.

Mga Santos, 1:139–40

Ang mga Santos kinahanglang maghulat nga mabuak ang ice. Gikapoy na sila, gigutom, basa, ug gitugnaw.

Mga Santos, 1:140

Lisod maghulat. Ang ubang mga Santos misugod sa paglalis sa usag usa.

Mga Santos, 1:140

Si Lucy dili ganahan nga makadungog sa panaglalis sa mga Santos. Nasayod siya nga kinahanglan niyang isulti ang usa ka butang. “Hain man ang inyong pagtuo?” nangutana siya. Si Lucy misulti sa mga Santos nga kon sila mag-ampo sa Dios, Iyang buakon ang ice aron sila makapadayon sa ilang panaw.

Mga Santos, 1:140

Sa kalit, nakadungog sila og lugapak sama sa dalugdog samtang nabuak ang ice. Usa ka agianan mibukas diha sa ice, igo lang nga gilapdon aron makaagi ang ilang barko.

Mga Santos, 1:140

Ang mga Santos nasurprisa ug mapasalamaton. Nagpundok sila aron mag-ampo ug magpasalamat sa Langitnong Amahan. Ang ilang barko luwas nga mibyahe paingon sa Ohio.

Mga Santos, 1:140

Dihang naabot na sa Ohio ang mga Santos, giabi-abi sila sa mga miyembro sa Simbahan didto ug gitabangan sila nga makakita og mga dapit nga kapuy-an. Ang Ginoo mituman sa Iyang saad sa pagtudlo kanila sa Iyang balaod ug paghatag kanila sa gahom sa pagbuhat sa Iyang buluhaton.

Doktrina ug mga Pakigsaad 42; Mga Santos, 1:142