Ang Apostoles Miserbisyo og Misyon sa Great Britain

“Ang Apostoles Miserbisyo og Misyon sa Great Britain,” Mga Istorya sa Doktrina ug mga Pakigsaad (2024)

“Ang Apostoles Miserbisyo og Misyon sa Great Britain,” Mga Istorya sa Doktrina ug mga Pakigsaad

Hulyo 1838–Hulyo 1841

2:59

Ang Apostoles Miserbisyo og Misyon sa Great Britain

Pagsalig sa mga saad sa Ginoo

Si Joseph Smith nga nagdawat og pagpadayag sa pagtawag sa Apostoles sa Simbahan og misyon ngadto sa Great Britain.

Sa usa ka pagpadayag ngadto ni Joseph Smith, gitawag sa Ginoo ang Apostoles sa usa ka misyon tabok sa kadagatan ngadto sa Great Britain. Bisan tuod lisod kadto para ni Joseph nga mapalayo og maayo ang Apostoles, misalig siya sa Ginoo. Lisod usab para sa Apostoles nga mobiya sa ilang mga pamilya. Apan misaad ang Ginoo nga mopanalangin nila.

Doktrina ug mga Pakigsaad 118

Si Heber C. Kimball ug ang iyang asawa, si Vilate, adunay bag-o pa nga pamilya. May anak sila nga usa pa lang ka bulan ang edad. Daghang mga sakop sa ilang pamilya masakiton kaayo.

Mga Santos, 1:463

Si Brigham Young nangandam sa pagbiya alang sa iyang misyon.

Masakiton usab si Brigham Young, ug kabos ang iyang pamilya. Apan ang asawa ni Brigham, si Mary Ann, misulti kaniya, “Lakaw, ug tumana ang imong misyon, ug ang Ginoo mopanalangin kanimo.”

Mga Santos, 1:463–64

Si Brigham Young nagpuyo uban ni Heber C. Kimball.

Si Brigham misugod sa paglakaw, apan sa pag-abot niya sa balay ni Heber, luya kaayo siya nga dili na makalakaw. Nagpuyo siya uban sa pamilya ni Heber sa pipila ka adlaw.

Mga Santos, 1:463

Si Mary Ann Young nag-atiman ni Brigham ug Heber.

Si Mary Ann Young nag-atiman ni Brigham ug ni Heber hangtod nga siya ug si Heber miarang-arang ang pamati aron makabiya. Luya kaayo silang duha, apan ganahan sila nga mosangyaw sa ebanghelyo.

Mga Santos, 1:463

Si Brigham ug Heber mibiya alang sa ilang misyon.

Si Heber ug Brigham nanamilit sa ilang mga asawa ug misaka sa likod sa karomata. Naguol sila nga mobiya sa ilang mga pamilya nga masakiton kaayo ug kabos. Samtang nagkalayo ang karomata, si Heber misulti kang Brigham, “Lisod kaayo kini.” Gusto niyang tabangan ang ilang mga pamilya nga magmaisogon. Gihangyo ni Heber ang drayber sa karomata nga mohunong.

Mga Santos, 1:463–64

Si Brigham ug Heber mihunong aron manamilit.

Gikan sa sulod sa balay, nakadungog si Vilate og langas. Miadto siya sa pultahan, diin nagbarog si Mary Ann. Nakita nila si Heber ug Brigham nga nagbarog sa likod sa karomata, nagwara-wara sa ilang mga kalo ug nagsinggit og, “Hurrah [Mabuhi]! Hurrah [Mabuhi]! Hurrah [Mabuhi] alang sa Israel!” Ang mga babaye mitubag, “Maayong paglakaw! Panalanginan kamo sa Dios!”

Mga Santos, 1:464

Si Brigham ug Heber nagsangyaw sa Great Britain.

Human sa taas nga biyahe tabok sa kadagatan, si Heber ug Brigham miabot sa Great Britain. Kuyog ang ubang Apostoles, nagtudlo sila sa daghang tawo mahitungod ni Jesukristo ug sa Iyang ebanghelyo. Daghang tawo ang nabunyagan ug mipasakop sa Simbahan sa Manluluwas.

Mga Santos, 1:467–71

Mga Santos nagbiyahe aron mopuyo sa Nauvoo.

Daghang tawo nga nabunyagan didto sa Great Britain ang mibalhin ngadto sa Nauvoo aron motabang sa pagtukod sa siyudad ug sa templo. Ang Ginoo mituman sa Iyang saad nga atimanon ang mga pamilya ni Heber ug Brigham samtang sila nagserbisyo Kaniya isip mga misyonaryo.

Mga Santos, 1:495–98