Ang Kirtland Temple Gipahinungod

Human sa hapit tulo ka tuig nga pagtrabho og maayo, sa kataposan ang Kirtland Temple nahuman. Si Propeta Joseph midapit sa mga Santos sa usa ka espesyal nga miting sa pagpahinungod sa templo. Siya mosulti og espesyal nga pag-ampo ug mohatag sa templo ngadto sa Ginoo. Kini mahimong ang balaang balay sa Ginoo.

Mga Santos, 1:268

Sayo sa buntag sa miting, gatusan ka mga Santos ang nagpunsisok ngadto sa templo. Dihang ang tanang lingkoranan napuno, ang mga tawo nagtindog sa may agianan ug sa gawas, nagtan-aw diha sa mga bintana. Matag usa mahinamon nga makita ang templo nga ipahinungod.

Mga Santos, 1:268–69

Gibasa ni Joseph ang pag-ampo sa pagpahinungod sa templo. Iyang gisultihan ang Ginoo nga ang mga Santos misunod Kaniya. Naghangyo siya sa Ginoo nga dawaton ang templo isip Iyang balay.

Doktrina ug mga Pakigsaad 109:1–5

Nag-ampo si Joseph nga ang tanan nga anaa sa templo mobati sa gahom sa Ginoo ug masayod nga kini Iyang balay.

Doktrina ug mga Pakigsaad 109:13

Si Joseph usab nag-ampo nga kon ang mga Santos makasala, mahimo dayon silang maghinulsol. Naghangyo siya sa Ginoo nga hatagan sila og gahom sa pagpakigbahin sa Iyang ebanghelyo sa tibuok kalibotan. Human sa pag-ampo, ang choir mikanta og bag-o nga awit nga gitawag og “Ang Espiritu sa Dios.” Ang katawhan napuno sa hingpit nga kalipay. Nanindog sila ug nagdayeg sa Ginoo.

Doktrina ug mga Pakigsaad 109:21–32; Mga Himno, nu. 2; Mga Santos, 1:268–269

Daghang mga tawo nakakita og mga anghel diha sa templo nianang adlawa. Nakakita sila og sanag nga kahayag gikan sa langit ngadto sa templo. Ang pipila sa mga tawo miingon nga sama kini sa usa ka panganod; ang uban miingon nga mora og kalayo. Silang tanan mibati nga ang templo usa ka balaan nga dapit. Sa pagkatinuod kini mao na karon ang balay sa Ginoo.

Mga Santos, 1:269