Ang Pamilya Jackson

Usa ka biyahe inubanan sa pagtuo ug usa ka pagluwas

Ang pamilyang Jackson nga nagsakay og barko sa Liverpool, England.

Human ang unang grupo sa mga Santos milalin sa Walog sa Salt Lake, ang liboan sa ubang mga Santos nangadto usab. Nagbiyahe sila og taas kaayo, ug ang Ginoo mitabang kanila. Usa ka pamilya nga mibiyahe mao ang pamilyang Jackson. Gibiyaan nila ang ilang panimalay sa England ug mahinamon nga moadto aron sa pagtabang sa mga Santos sa pagtukod sa Zion.

Doktrina ug mga Pakigsaad 136:1–11; Mga Santos; 2:276–77

Ang mga Jackson nga nagbiyahe pinaagi sa bapor.

Ang mga Jackson mitabok sa kadagatan pinaagi sa usa ka bapor. Dayon misakay sila og tren sa pipila ka bahin paingon sa Walog sa Salt Lake. Kinahanglang lakawon nila ang nahibiling bahin sa agianan.

Mga Santos, 2:276–277

Ang mga Jackson mipahimutang sa mga karga sa ilang kariton.

Naghimo sila og gamay nga kariton aron dad-on ang ilang pagkaon, sinina, ug uban pang mga butang nga gusto nilang dad-on. Daghang mga Santos ang luwas nga nakaabot sa walog niini nga paagi.

Mga Santos, 2:277–80

Ang mga Jackson mibiyahe paingon sa kasadpan gamit ang ilang kariton.

Si Elizabeth ug Aaron Jackson mibira sa ilang bug-at nga kariton. Ang ilang mga anak, si Marta, Mary, ug Aaron Jr., naglakaw. Lisod kadto nga buhaton. Sila naglaom nga makaadto sa walog sa dili pa ang tingtugnaw. Apan pag-abot sa tinglarag, layo pa kaayo ang ilang lakton. Nagsugod na og katugnaw, ug hapit na sila mahutdan og pagkaon.

Mga Santos, 2:277–78, 285, 288–89

Si Brigham Young mihangyo sa mga Santos sa Salt Lake sa pagtabang sa mga Santos nga mobiyahe paingon sa kasadpan.

Sa Siyudad sa Salt Lake, nahibal-an ni Brigham Young ang mahitungod sa mga Santos nga mangadto sa walog. Nabalaka siya mahitungod kanila. Pagkasunod adlaw sa simbahan, gisultihan niya ang tanan nga kini nga mga Santos anaa sa lisod nga kahimtang. Siya mihangyo kanila sa pagpuno sa mga karomata sa mga butang nga gikinahanglan sa mga Santos. “Adtoa ug dad-a kanang mga tawhana,” siya miingon.

Mga Santos, 2:285–87

Ang mga Santos sa Salt Lake nagtigom og mga butang aron itabang sa mga Santos nga nagbiyahe paingon sa kasadpan.

Ang mga babaye nga diha sa miting mikuha sa ilang mainit nga mga medyas ug gibutang kini sa mga karomata. Ang uban mihatag sa ilang pagkaon, mga habol, mga sapatos, ug mga sinina. Paglabay sa duha ka adlaw, sobra sa 50 ka mga lalaki ug 20 ka mga karomata ang mibiya sa walog aron motabang.

Mga Santos, 2:287

Si Aaron Jackson ug ubang mga Santos mitabok sa Amihanang Platte River.

Samtang ang pamilyang Jackson nagpadayon sa paglakaw, ang niyebe [snow] nagsugod sa pagpangatagak. Si Aaron nasakit og grabe kaayo. Lisod kaayo kaniya ang paglakaw. Ang mga Santos kinahanglang motabok sa nibagtok nga tubig sa suba, ug kini nakapaluya og samot ni Aaron. Nianang gabhiona, namatay si Aaron. Makasubo, ang iyang pamilya kinahanglan nga magpadayon nga wala siya.

Mga Santos, 2:289–91

Ang mga Jackson ug ubang mga Santos nagbira sa ilang mga kariton diha sa dalan nga niyebe.

Sa pagkasunod buntag, mas daghan ang mga niyebe diha sa yuta. Ang mga Jackson ug ang ubang mga Santos miduso ug mibitad sa ilang mga kariton agi sa niyebe. Matag adlaw sila nag-ampo nga ang Dios motabang nila.

Doktrina ug mga Pakigsaad 136:29; Mga Santos; 2:291–293

Si Elizabeth Jackson nagdamgo mahitungod sa iyang bana.

Usa ka gabii, nabalaka si Elizabeth sa iyang mga anak. Sila gigutom ug gitugnaw. Makaabot kaha sila sa Walog sa Salt Lake? Nakatulog siya ug nagdamgo nga nakita niya si Aaron. Siya misulti, “Pagmadasigon, Elizabeth,” Siya misulti kaniya nga ang tabang nagkaduol na.

Mga Santos, 2:294–95

Mga tawo nga nangabot aron sa pagtabang sa mga Santos.

Sakto si Aaron. Sa wala madugay, ang mga tawo gikan sa Salt Lake nangabot dala ang ilang mga karomata. Ilang gihatagan ang mga Santos og pagkaon ug mga sapot. Ang mga Santos nangalipay, nangatawa ug migakos sa mga lalaki. Nanganta sila og himno ug nagpasalamat sa Langitnong Amahan sa pagtubag sa ilang mga pag-ampo.

Doktrina ug mga Pakigsaad 25:5; Mga Santos; 2:294–95

Ang mga langyaw nga mga Santos sa kataposan nangabot sa Walog sa Salt Lake.

Dihang sa kataposan nangabot na sila sa walog, Dominggo kadto. Si Brigham Young misulti sa mga miyembro sa Simbahan sa Siyudad sa Salt Lake nga imbis nga moadto sa simbahan, sila kinahanglan nga moadto sa paghangop sa mga Santos nga nangabot. Ilang gitimbaya ang gitugnaw ug gikapoy nga mga Santos ug gidapit sila nga magpabilin sa ilang mga panimalay.

Mga Santos, 2:298–99