Pagbiya sa Nauvoo ug ang Panaw Padulong sa Kasadpan

Si Joseph Smith namatay. Karon si Brigham Young ug ang ubang Apostoles nangulo sa Simbahan. Nasayod si Brigham nga ang mga Santos dili na luwas sa Nauvoo. Kinahanglan sila nga mobiya. Apan una, gusto sa Ginoo nga taposon nila ang pagtukod sa templo. Gusto Niya nga sila mohimo og mga pakigsaad uban Kaniya ug maselyo isip mga pamilya.

Mga Santos, 1:649–650, 658–59

Human sa pipila ka bulan, ang templo andam na alang sa mga tawo sa paghimo og mga pakigsaad didto. Liboan ka mga Santos ang nangadto sa templo. Si Brigham nagpabilin sa templo hangtod sa lawom nga kagabhion aron sa pagtabang kanila sa paghimo og mga pakigsaad ngadto sa Ginoo. Sa kataposan, gisultihan ni Brigham ang tanan nga kinahanglan nilang mobiya sa Nauvoo.

Mga Santos, 1:662

Sa dihang nakamata si Brigham pagkasunod buntag, daghang mga Santos ang naghulat sa templo. Gisultihan sila ni Brigham nga dili luwas ang pagpabilin sa Nauvoo. Kinahanglan silang mangitag bag-ong panimalay sa Kasadpan. Siya misaad nga makahimo sila og bag-ong templo inig-abot nila didto.

Mga Santos, 1:662–64; 2:13–14

Apan ang mga Santos wala mobiya. Gusto nila nga mohimo og mga pakigsaad ngadto sa Ginoo sa dili pa sila magsugod sa ilang panaw ngadto sa bag-ong panimalay.

Mga Santos, 1:662–­63

Nakita ni Brigham ang ilang mga panagway ug nausab ang iyang hunahuna. Iyang gigahin ang nahibilin nga adlaw ug ang sunod nga adlaw sa pagtabang sa mga Santos sa paghimo og mga pakigsaad sulod sa templo.

Mga Santos, 1:662–­63

Karon nga ang mga Santos nakahimo na og mga pakigsaad uban sa Ginoo, panahon na sa pagbiya sa Nauvoo. Nasayod si Brigham nga ang Ginoo adunay giandam nga dapit alang kanila. Nakita niya kini sa usa ka panan-awon. Gisugdan nila ang ilang panaw. Bugnaw ang panahon, ug lapokon ang yuta. Ang mga tawo nagkasakit. Hapit na sila mahutdi og pagkaon.

Mga Santos, 2:20–25, 25–26

Taas pa ang latason sa mga Santos. Naghunahuna si Brigham kon unsaon nila paghimo ang ingon ka taas ug lisod nga panaw. Nangamuyo siya sa Dios alang sa tabang.

Mga Santos, 2:57

Ang Ginoo mihatag ni Brigham og pagpadayag. Iyang gitudloan si Brigham unsaon sa paggiya ang mga Santos. Matod niya kinahanglan silang magtinabangay sa pag-atiman sa mga kabos.

Doktrina ug mga Pakigsaad 136:1–8

Ang Ginoo miingon nga ang mga Santos kinahanglang mohinumdom sa mga pakigsaad nga ilang gihimo uban Kaniya. Kon ila kining buhaton, Siya mopanalangin kanila ug motabang kanila sa ilang panaw.

Doktrina ug mga Pakigsaad 136:4, 11, 42; Mga Santos, 2:58

Ang panaw lisod gihapon kaayo. Pipila ka tawo ang nangamatay. Apan tungod sa ilang mga pakigsaad sa templo, ang mga Santos nasayod nga ilang makita pag-usab ang mga sakop sa ilang pamilya.

Paglabay sa pipila ka bulan, ang unang mga Santos miabot sa Walog sa Salt Lake niadtong 1847. Sa dihang nakita ni Brigham Young ang walog, miingon siya, “Kini ang tukma nga dapit.” Mao kadto ang dapit nga iyang nakita sa usa ka panan-awon. Dinhi ang mga Santos mahimong luwas. Dinhi sila makasimba sa Ginoo ug makabuhat sa Iyang buhat nga malinawon.

Mga Santos, 2:22, 80–82

Sa paglabay sa katuigan, nagkadaghan ang mga Santos nga miabot. Nagtukod sila og daghan pang mga templo, diin ang mga tawo makahimo og mga pakigsaad uban sa Ginoo. Mipadala sila og mga misyonaryo sa tibuok kalibotan aron sa pagtudlo sa ebanghelyo ni Jesukristo. Ang Simbahan sa Manluluwas nagpadayon sa pagtubo, nagpanalangin sa mga anak sa Langitnong Amahan bisan asa.