“Mahangtoron nga Kaminyoon ug mga Pamilya,” Mga Istorya sa Doktrina ug mga Pakigsaad (2024)
“Mahangtoron nga Kaminyoon ug mga Pamilya,” Mga Istorya sa Doktrina ug mga Pakigsaad
1843–1846
Mahangtoron nga Kaminyoon ug mga Pamilya
Giselyo pinaagi sa gahom ni Jesukristo
Dihang naminyo si Joseph ug si Emma, nagtuo sila nga ang ilang kaminyoon matapos kon mamatay sila. Ingon niini ang tanang kaminyoon kaniadto. Apan ang Ginoo misulti dayon kang Joseph nga ang mga kaminyoon ug mga pamilya mohangtod sa kahangtoran.
Mga Santos, 1:486
Ang Ginoo nagtudlo ni Joseph bahin sa mahangtorong kaminyoon. Pinaagi sa gahom sa pagkapari, ang usa ka lalaki ug ang usa ka babaye makahimo og pakigsaad sa Ginoo. Kon ilang tumanon ang ilang pakigsaad, nagsaad ang Ginoo nga ang ilang kaminyoon mohangtod sa kahangtoran. Gitawag kini nga giselyo. Sa wala madugay, si Emma ug Joseph giselyo alang sa kahangtoran.
Doktrina ug mga Pakigsaad 132:7, 19–24; Mga Santos, 1:486, 494–95, 547–48, 564, 575–77
Nakakat-on usab si Joseph nga kon ang lalaki ug babaye maselyo, ang ilang mga anak maselyo ngadto kanila. Tungod sa gahom ni Jesukristo, ang ilang pamilya mahimong mohangtod sa kahangtoran. Dihang gisultihan ni Joseph ang mga Santos bahin niini nga panalangin, nalipay kaayo sila! Ganahan na kaayo sila nga magkauban nga maselyo.
Doktrina ug mga Pakigsaad 131:2; 132:6–7; Mga Santos, 1:564–65, 661
Ang Ginoo nagtudlo sa kadugayan nga ang mga pagselyo kinahanglan nga himoon sa sulod sa templo. Ang mga Santos mitrabaho og maayo aron mahuman ang templo sa Nauvoo aron magkauban sila nga maselyo. Sa dihang andam na ang templo, daghang mga pamilya ang naselyo. Naselyo gani sila ngadto sa mga sakop sa pamilya nga namatay na. Mapasalamaton sila niini nga panalangin!
Mga Santos, 1:660–61