Si Mary ug Caroline Rollins

Si Mary Rollins 12 anyos dihang unang mibisita ang mga misyonaryo sa Kirtland, Ohio. Siya nakadungog nila nga naghisgot mahitungod sa Basahon ni Mormon. Niadtong higayona, usa lamang ka kopya sa basahon ang anaa sa Kirtland, ug usa ka lider sa Simbahan nga ginganlan og Isaac Morley ang aduna niini.

Si Mary miadto sa panimalay ni Brother Morley ug mihangyo nga makita ang basahon. Si Brother Morley misugot nga gunitan niya kini. Mihangyo si Mary kon pwede ba niya kining dad-on sa balay.

Si Brother Morley dili gusto nga ihatag kang Mary ang iyang kopya sa basahon. Wala pa niya kaayo mabasa kini. Nagpakiluoy si Mary kang Brother Morley nga pahulamon siya niini.

Misugot si Brother Morley. Miingon siya ni Mary nga pwede niyang dad-on ang basahon sa balay kon iya kining ibalik sayo sa sunod adlaw. Gitratar kini ni Mary sama sa usa ka bahandi. Siya nagpulaw hapit sa tibuok gabii sa pagbasa.

Dihang gihatag og balik ni Mary ang basahon, nasorprisa si Brother Morley kon unsa kadaghan ang iyang nabasa. “Anak,” miingon siya, “dad-a kini nga basahon sa balay ug tiwasa. Dili ko kapaabot.”

Si Mary ang unang tawo sa Kirtland ang nakabasa sa Basahon ni Mormon hangtod sa kataposan. Sa wala madugay pagkahuman niya, nahimamat niya si Propeta Joseph Smith. Sa dihang iyang nahibaloan kon unsa kaganahan ni Mary ang Basahon ni Mormon, miingon siya nga iyaha na ang kopya ni Brother Morley. Hatagan lang niya si Brother Morley og lain.

Human niana nga tuig, si Mary ug ang iyang pamilya mibalhin ngadto sa Independence, Missouri. Mahinamon siya nga nagtan-aw samtang ang mga lider sa Simbahan misugod sa paghugpong og bag-ong basahon nga gitawag og usa ka bag-ong basahon nga gitawag og Basahon sa mga Sugo. Kini nga basahon adunay daghang pagpadayag nga gihatag ni Jesukristo ngadto kang Joseph Smith.

Doktrina ug mga Pakigsaad 67; 70:1–4; Mga Santos, 1:204

Apan ang ubang mga tawo sa Independence dili ganahan sa Simbahan. Gusto nila nga mohawa ang mga Santos. Usa ka adlaw, ang masuk-anon nga mga tawo miguba sa bilding diin ang Basahon sa mga Sugo giimprinta. Gipanglabay nila ang printahanan sa gawas sa bintana ug gipangkatag ang mga pahina sa Basahon sa mga Sugo ngadto sa dalan.

Mga Santos, 1:202

Si Mary ug ang iyang igsoong babaye, si Caroline, nagtan-aw gikan sa luyo sa koral. Gisultihan ni Mary si Caroline nga gusto niyang kuhaon ang mga pahina sa dili pa kini mangadaot. Si Caroline nahadlok sa masuk-anon nga mga tawo. “Patyon ta nila,” siya miingon. Apan si Mary ug Caroline nasayod nga kadtong mga pahina adunay pulong sa Dios diha niini.

Mga Santos, 1:203

Ang managsuon naghulat hangtod nga wala na sila pangitaa sa mga tawo. Dayon midagan sila padulong sa dalan ug gipamunit ang daghang pahina nga kotob sa ilang makuptan. Samtang nagdali sila palayo, ang pipila ka lalaki nakakita nila ug gisiyagitan sila aron mohunong. Gigunitan og maayo ni Mary ug Caroline ang mga pahina ug nanagan kutob sa ilang mahimo ngadto sa duol nga kamaisan.

Mga Santos, 1:204

Duha ka lalaki migukod sa managsoon ngadto sa kamaisan. Ang mga mais tag-as kaayo, si Mary ug Caroline dili makakita kon asa sila paingon. Mihapa sila sa yuta ug gitagoan ang mga pahina ilawom sa ilang lawas. Hilom kaayo silang naminaw samtang ang duha ka lalaki naglakaw agi sa kamaisan nga nangita nila.

Mga Santos, 1:204

Sa wala madugay niundang ra ang mga lalaki. Si Mary ug Caroline luwas na. Ilang naluwas ang mga pahina sa mga pagpadayag sa Ginoo alang sa Basahon sa mga Sugo. Karon kadtong mga pagpadayag anaa sa Doktrina ug mga Pakigsaad.

Mga Santos, 1:204