“Susa Young Gates ug si Joseph F. Smith,” Mga Istorya sa Doktrina ug mga Pakigsaad (2024)
“Susa Young Gates ug si Joseph F. Smith,” Mga Istorya sa Doktrina ug mga Pakigsaad
1902–1918
Susa Young Gates ug Joseph F. Smith
Usa ka pagpadayag mahitungod sa kalibotan sa mga espiritu
Si Susa Young Gates anak nga babaye ni Brigham Young. Natawo siy sa Utah ug nagdako didto. Ganahan siya nga mosulat, ug ganahan siya nga moserbisyo diha sa Simbahan sa Ginoo.
Sa dihang hingkod na si Susa, duna siyay grabe nga sakit. Mao nga nangayo siya og panalangin sa pagkapari. Diha sa panalangin, ang Ginoo misulti kang Susa nga Siya gusto nga siya mobuhat sa buhat sa templo.
Mga Santos, 3:245–246
Human sa panalangin, niarang-arang ang pagbati ni Susa. Gigugol niya ang iyang panahon sa pagkat-on mahitungod sa kasaysayan sa iyang pamilya. Sa dihang iyang nakit-an ang mga sakop sa pamilya nga namatay nga wala mabunyagi, miadto siya sa templo aron magpabunyag alang kanila. Ganahan siyang mosulti sa mga tawo mahitungod sa buhat sa kasaysayan sa pamilya. Subo lang, daghang tawo ang dili interesado.
Usa ka adlaw, si Susa mibisita sa iyang higala nga si Joseph F. Smith, ang Presidente sa Simbahan. Si Presidente Smith nasakit sulod sa daghang mga semana. Nasayod si Susa nga naguol usab siya pag-ayo kay namatay ang iyang anak nga lalaki. Naguol siya sa ubang mga butang nga nahitabo usab sa kalibotan, sama sa mga gubat ug mga sakit.
Mga Santos, 3:248–252, 249–261
Apan sa dihang si Susa milingkod uban ni Presidente Smith, siya naghinam-hinam nga makig-istorya kaniya. Gisultihan niya si Susa nga gihatagan siya sa Dios ug espesyal nga panan-awon. Tanan kadto mahitungod sa kalibotan sa espiritu, diin ang mga tawo moadto human sila mamatay. Ang iyang panan-awon gisulat sa papel. Si Presidente Smith mihatag niini kang Susa ug mihangyo kaniya sa pagbasa niini.
Mga Santos, 3:261–262
Gibasa ni Susa ang nakasulat sa papel. Kini nag-ingon nga si Jesukristo mibisita sa kalibotan sa espiritu. Iyang gipadala si Adan, Eva, ug ubang matinud-anong mga lalaki ug babaye sa pagtudlo sa mga espiritu kinsa wala makadawat sa ebanghelyo samtang buhi pa sila. Sila nagtabang niini nga mga espiritu sa pag-andam aron ang mga tawo mabunyagan alang kanila sa templo.
Doktrina ug mga Pakigsaad 138:11–19, 29–48; Saints, 3:261–62
Si Susa nahingangha samtang nagbasa siya sa panan-awon ni Presidente Smith. Si Presidente Smith mipahiyom ngadto kaniya. “Susa,” miingon siya, “naghimo ikaw og mahinungdanon nga buhat.” Gisultihan niya siya nga gihigugma niya siya tungod sa iyang pagtuo sa Ginoo.
Mga Santos, 3:262
Si Susa misulat mahitungod sa pagpadayag diha sa iyang journal. “Ah, pagkadako nga kahupayan niana kanako!” miingon siya. Dili na siya makahulat sa pagsulti sa iyang mga higala ug ubang mga miyembro sa Simbahan mahitungod niini. Nasayod siya nga ang panan-awon ni Presidente Smith makatabang sa mga Santos nga maghinam-hinam sa pagbuhat sa buhat sa templo alang sa mga tawo sa kalibotan sa espiritu.
Mga Santos, 3:263