Elder James E. Evanson

Lumaki si Elder James E. Evanson sa isang sugar beet farm sa maliit na nayon ng Barnwell, sa silangan ng Lethbridge, Alberta, Canada.

Inapo ng matatapat na pioneer, lumaki si Elder Evanson sa isang tahanan kung saan “itinuro at ipinamuhay ang ebanghelyo.”

Sa edad na 10, nabasa na niya ang lahat ng 16 na tomo ng mga isinalarawang kuwento ng Aklat ni Mormon at kasaysayan ng Simbahan na pag-aari ng pamilya at nagpasyang tularan ang halimbawa ni Joseph Smith. Palihim na pumunta sa kakahuyan sa tapat ng kanyang tahanan, siya ay lumuhod, nanalangin, at tumanggap ng patunay mula sa Espiritu Santo na si Jesucristo ay kanyang Tagapagligtas, si Joseph Smith ay isang tunay na propeta, at ang Aklat ni Mormon ay totoo.

Ang paniniwalang iyan ang nagganyak sa kanya sa tapat na paglilingkod sa Simbahan buong buhay niya, kabilang na rito ang pagiging Area Seventy, stake president, at pangulo ng Utah Orem Mission. Nang tawagin siya sa tungkulin, naglilingkod noon si Elder Evanson bilang Valiant activity leader sa kanyang ward sa Lethbridge.

Isinilang si James Eugene Evanson sa Taber, Alberta, noong Agosto 16, 1968, isa sa walong anak nina Dale Eugene at Phyllis Tanner Evanson.

Matapos magmisyon nang full-time sa Tempe, Arizona, ikinasal si Elder Evanson kay Jody Karil Zobell noong Disyembre 20, 1989, sa Salt Lake Temple. Sila ay may limang anak at 11 apo.

Si Elder Evanson ay nagtamo ng bachelor’s degree at doctor of dental surgery degree mula sa University of Alberta at nagtrabaho bilang dentista sa pribadong pagsasanay sa loob ng 26 na taon.