“Ko e Siasi ʻo Sīsū Kalaisi Kuo Fakafoki Maí,” Liahona, Sānuali 2025.
Ko Hono Fakaʻaongaʻi ʻa e Ngaahi Makasini ʻo e Siasí
Ko e Siasi ʻo Sīsū Kalaisi Kuo Fakafoki Maí
Ko hono ako ko ia ʻi he taʻú ni ʻo e Haʻu, ʻo Muimui ʻIate Aú ʻo e Tokāteline mo e Ngaahi Fuakavá, ʻe fakamamafaʻi ai ʻa e founga naʻe fakafoki mai ai ʻe he ʻEikí Hono Siasí mo e ongoongoleleí ʻi he kau palōfita ʻo e ngaahi ʻaho kimui ní. ʻOku fakamamafaʻi ʻe ha ngaahi fakamatala lahi ʻi he makasini ʻo e māhina ní ʻa e ngaahi tāpuaki ʻo e Fakafoki Mai ʻo e Ongoongoleleí.
Ko e Ako mei he Makasini Ko ʻEní
Kau ʻi he Tānaki Fakatahá
ʻI he peesi 2, ʻoku fakamatala ai ʻe Palesiteni Lāsolo M. Nalesoni ha ngaahi founga te tau lava ai ʻo tānaki fakataha ki he Fakamoʻuí, tānaki fakataha mo e Kāingalotú, pea mo tānaki fakataha ʻi he ngāue ʻa e ʻOtuá. Fakakaukau ke fokotuʻu ha taumuʻa ki he māhiná ni ke tokoni ki ha taha ʻo e ngaahi faʻahinga ʻe tolu ʻo e tānakí.
Ngāue ʻi he Siasi kuo Fakafoki Maí
ʻOku fakamatala ʻa ʻEletā Petuliki Kealoni ʻo e Kōlomu ʻo e Kau ʻAposetolo ʻe Toko Hongofulu Mā Uá ki he ngaahi faingamālie ʻoku tau maʻu ʻi he Siasi ʻo Sīsū Kalaisi kuo fakafoki maí ke “tokoni ki he niʻihi kehé ʻi he ʻofá” (vakai, peesi 8). ʻOku ʻi ai nai ha kakai ʻi homou uōtí pe koló ʻoku faingataʻaʻia? Te ke lava ʻo hūfia ʻa e kakai ko ʻení mo kolea ha tataki fakalaumālie ki he founga ke tokoniʻi ai kinautolú.
Ako mei he Fanongonongo ʻo e Fakafoki Mai ʻo e Ongoongoleleí
ʻI he 2020, naʻe tuku atu ai ʻe he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ʻa e “Ko e Fakafoki Mai ʻa e Kakato ʻo e Ongoongolelei ʻo Sīsū Kalaisí: Ko Ha Fanongonongo ki Māmani ʻo e Taʻu Uangeaú” (vakai, peesi 40). ʻI hoʻo toe vakaiʻi ʻa e fanongonongo ki he Fakafoki Mai ʻo e Ongoongoleleí, te ke ala fakakaukauʻi ʻa e ngaahi fehuʻi ko ʻení: Ko e hā ha ngaahi meʻa mahuʻinga naʻe hoko ʻoku lave ki ai, pea naʻe tataki fēfē ʻe he ʻEikí ʻa e ngaahi meʻa ko iá?