“Ko e ʻUluaki Mata Meʻa-Hā-Maí,” Ko e Kaumeʻá, Sānuali 2025, 26–28.
Ngaahi Talanoa mei he Folofolá
Ko e ʻUluaki Mata Meʻa-Hā-Maí
Te ke lava ʻo lau ʻa e talanoa ko ʻení ʻi he Siosefa Sāmita—Hisitōlia 1:1–20.
ʻI he kei siʻi ʻa Siosefa Sāmitá, naʻe lahi ha ngaahi siasi naʻa nau akoʻi ha ngaahi meʻa kehekehe fekauʻaki mo Sīsū Kalaisi. Naʻe ʻikai ke ʻilo ʻe Siosefa pe ko e siasi fē ke kau ki aí.
Naʻá ne lau ʻi ha ʻaho ʻe taha ʻa e Sēmisi 1:5 ʻi he Tohi Tapú. Naʻe pehē ai kapau ʻoku tau fiemaʻu ʻa e potó, te tau lava ʻo kole ki he ʻOtuá. Naʻe fakakaukau ʻa Siosefa ke ne fai ia.
ʻI ha ʻaho fakaʻofoʻofa ʻo e faʻahitaʻu failaú, naʻe ʻalu ai ʻa Siosefa ki he vao ʻakaú ke lotu ki he Tamai Hēvaní.
Naʻe tūʻulutui ʻa Siosefa pea kamata ke ne lotu. Ka naʻá ne ongoʻi ʻoku takatakaiʻi ia ʻe ha fakapoʻuli. Naʻe manavasiʻi ʻa Siosefa. Naʻá ne kole tokoni ki he ʻOtuá.
Fakafokifā pē, kuo mamata ʻa Siosefa ki ha maama ngingila ʻoku ʻalu hifo mei he langí. Naʻá ne mamata ki he Tamai Hēvaní mo Sīsū Kalaisi ʻokú Na tuʻu ʻi he ʻataá. Naʻe folofola ʻaki ʻe he Tamai Hēvaní ʻa e hingoa ʻo Siosefá. Naʻá Ne tuhu leva kia Sīsū Kalaisi mo pehē, “Ko Hoku ʻAlo ʻOfaʻangá ʻEni. Fanongo kiate Ia!”
Naʻe folofola ʻa Sīsū kia Siosefa ʻoku ʻikai totonu ke ne kau ki ha taha ʻo e ngaahi siasí.
ʻE tokoni ʻa Siosefa ke fakafoki mai ʻa e kakato ʻo e ongoongoleleí ki he māmaní.
Naʻe ʻikai ke toe puputuʻu ʻa Siosefa. Naʻá ne fonu ʻi he fiefia! Naʻá ne ʻiloʻi ʻoku ʻofa ʻa e ʻOtuá ʻiate ia. Naʻe ʻi ai ha kakai ʻe niʻihi naʻe ʻikai ke nau tui kuó ne mamata ki he Tamai Hēvaní mo Sīsū Kalaisi, ka naʻá ne ʻiloʻi naʻá ne mamata moʻoni.