ʻOku Kamata Hono Fakafoki Mai ʻo e Ongoongoleleí

Palemaila, Niu ʻIoke (1820): Naʻe nofo ʻa Siosefa Sāmita mo hono fāmilí ʻi heni. Naʻe ō kotoa ʻa e kau mēmipa ʻo e fāmili ʻo Siosefá ki ha ngaahi siasi kehekehe, pea naʻe ʻikai ʻilo ʻe Siosefa pe ko e fē ʻa e siasi ke kau ki aí. Naʻá ne lau ʻi he Tohi Tapú, “Ka ai hamou taha ʻoku masiva ʻi he potó, ke kole ʻe ia ki he ʻOtuá” (Sēmisi 1:5).

Ko e Vao ʻAkau Tapú (faʻahitaʻu failau ʻo e 1820): Naʻe lotu ʻa Siosefa Sāmita ʻo fehuʻi ki he ʻOtuá pe ko e siasi fē ke kau ki aí. Naʻe ʻaʻahi mai ʻa e Tamai Hēvaní mo Sīsū Kalaisi kiate ia. Naʻá Na folofola ange ʻoku ʻikai totonu ke ne kau ki ha taha ʻo e ngaahi siasí. Naʻá Na ui ʻa Siosefa ke tokoni ki hono fakafoki mai ʻo e ongoongolelei kakato ʻo Sīsū Kalaisí ʻi he māmaní.

Loki ʻo Siosefá (1823): Naʻe ʻaʻahi ʻa e ʻāngelo ko Molonaí kia Siosefa Sāmita. Naʻá ne fakamatala kia Siosefa fekauʻaki mo e ʻū lauʻi peleti koula naʻe maʻu ʻi ai ʻa e ongoongolelei kakato ʻo Sīsū Kalaisí. ʻI he lea ʻa Molonaí, naʻe mamata ʻa Siosefa ki ha meʻa-hā-mai ʻo e feituʻu naʻe tanu ai ʻa e ʻū lauʻi peletí.

Ko e Moʻunga ko Komolá (1827): Naʻe foaki ʻe he ʻāngelo ko Molonaí kia Siosefa Sāmita ʻa e ʻū lauʻi peleti koulá ʻi he Moʻunga ko Komolá. Naʻe maʻu foki ʻe Siosefa ha ngaahi meʻangāue makehe naʻe tanu fakataha mo e ʻū lauʻi peletí. Naʻe teuteuʻi kinautolu ʻe he ʻOtuá ke tokoni kiate ia ʻi hono liliu ʻo e ʻū lauʻi peletí. Naʻe hoko ʻa e ʻū lauʻi peleti naʻe liliú ko e Tohi ʻa Molomoná koeʻuhí ke lava ʻe he fānau kotoa ʻa e ʻOtuá ʻo lau ʻEne ngaahi folofolá.